1 Corintios 7

1Cɨme'en aɨjna ɨ sej seri me tinyaja'utaiti'iri'i, ayaa pu tyamua'a ti'ixa'apɨ'ɨn tɨ cai a'atɨ nyaɨcha. 2Ma ajta, ayaa mu eihua maɨjna cɨn ti'ixana'acɨre'e. Miche'e meyan huarɨni, a'achu maj pua'amua. Miche'e huatyenyaɨche ɨ tyetyaca, seij ajta seij. Majta aɨme ɨ juuca, miche'e majta huatyeviche'en, seij ajta seij. 3Ajta aɨn ɨ tyaata'a, che'e ayan ra'ara'astijre'en a'ij tɨ tiraavijte'e aɨjna jemi ɨ ru'ɨj. Ajta aɨn jɨita'a, che'e ayan che'eta na'a ra'ara'astijre'en a'ij tɨ tiraavijte'e ɨ rucɨn jemi. 4Ayaa pu'u na'a, a'ini aɨn jɨra'ara'an, capu ayan aɨjna cɨn antyujmua'aree ɨ rutevi cɨme'e silu aɨ pu xaa ayan antyujmua'aree ɨ cɨna'ara'an. Ajta aɨn cɨna'ara'an, capu ajta ayan aɨjna cɨn antyujmua'aree ɨ rutevi cɨme'e, silu aɨn ɨra'ara'an, aɨ pu xaa aɨjna cɨn antyujmua'aree. 5Caxu cha'a sana'a ajtacɨ́'ɨca'an silu saɨjna cɨme'e sej seri seyan raaxa'apɨ'ɨntare sej a'atzu a'atyeevi'in saj huatyejnyuuni ɨ Dioj jemi. Sata'aj e'eyan ajtyaxɨɨre tɨ'ij cai aɨn Satanás ayan ca'anijra'a jamuaata'an sej seij jamuan tyu'uxana'acɨre'en aɨjna cɨme'e saj cai a'ujcu'uvajca'a. 6Canu neyan tyaja'amue'itii silu ayaa nu nyaɨjna cɨn ca'anijra'a jamuaata'aca sej seyan rɨcɨ. 7Nyajta inyaa, ayaa nu ti'ijxe'eve'e mej mi meyan e'enye'en nyatɨj inyaa, matɨj mana'a pua'amua ɨ tyetyaca. Ma ajta aɨn Dioj, aɨ pu ari ayan tiraata'a seij ajta seij a'ij tɨ aɨn tihua'uxa'apɨ'ɨntari'iri'i. 8Me nyajta inyaa, ayaa nu tihue'ixaate'e nyaɨme ɨ maj cai xɨ huanyéjnya'ɨchaca'a, majta aɨme ɨ maj majta cai xɨ víche'ejmee, majta aɨme ɨ mej huaujsaɨjtaraca'a. Cɨme'en aɨme, matɨj mana'a pua'amua, ayaa pu i'i xa'apɨ'ɨn mej mi meyan é'enya'a huatyaturan nyatɨj inyaa. 9Aru, tɨ pua'a cai rɨ'ɨri maj á'ujcu'uvaa, miche'e huanyéjnyaɨche, majta huáviche'en. Eitze'e pu hua'atyava'ɨri mej meyan huarɨni maj cai rajpueijtzi mua'ara'ani ɨ rutzajta'a. 10Me nyajta inyaa, canu neyan tihue'ijcate'e aɨme ɨ mej nyéjnyaɨche, majta ɨ mej víche'ejmee silu aɨ pu tavastara'a ayan tihue'ijte'e. Che'e cai aɨn jɨra'ara'an ajtaye'ican aɨjna jemi ɨ rucɨn. 11Ajta, tɨ pua'a ayan ajtara'ani, che'e ayan éenya'a huatyaturan tɨ rusaɨjtan. Na'ari cai, che'e ajtahua'a ra'antyanaxca aɨjna ɨ rucɨn. Ajta aɨn ɨ cɨna'ara'an, che'e ayan che'eta na'a huarɨni. Che'e cai ajtaye'ican aɨjna jemi ɨ ru'ɨj. 12Ajta, aɨme cɨme'e ɨ seica, capu ayan tihue'ixaate'e ɨ tavastara'a silu inyaa, nyaa nu neyan tihue'ixaate'e. Che'e ayan huarɨni aɨjna ɨ ta'ihuaara'a tɨ aɨjna tyevi'itɨn ɨ jɨita'a tɨ cai tya'atzaahuate'e. Tɨ pua'a aɨn jɨita'a a'ujca'anyaa tɨ jamuan huatyaturan, ayaa pu tyu'ujxe'eve'e tɨ aɨn ta'ihuaara'a cai ma ruuraini. 13Ayan che'eta na'a een cɨme'en ɨ jɨita'a tɨ ra'antyanaxcaca'a seij tyaata'a tɨ ajta cai tya'atzaahuate'e. Tɨ pua'a aɨn ajta ayan a'ujca'anyaa tɨ jamuan huatyaturan, ayaa pu che'eta na'a ruxe'eve'e tɨ cai ma ruuraini ɨ rucɨn. 14Ayaa pu aɨjna cɨn ruxe'eve'e, a'ini Dioj pu ajta huataura'ate aɨjna ɨ cɨna'ara'an tɨ cai tya'atzaahuate'e aɨjna cɨme'e nyuucajtze'en ɨ jɨra'ara'an. Ajta aɨn ɨ jɨra'ara'an tɨ ajta cai tya'atzaahuate'e, Dioj pu ajta ayan huataura'ate aɨjna jɨra'ara'an nyuucajtze'en ɨ ta'ihuaara'a. Na'ari cai, aɨ mu xana'avisi'i mua'aju'un ɨ yaujmua'ame'en. Ma ajta ɨ Dioj, aɨ pu ari huataura'ate aɨme. 15Ma ajta aɨn tɨ cai tya'atzaahuate'e, tɨ pua'a ayan ajtara'ani, che'e ayan eenye'en. Capu che'e ayan ruxe'eve'e maj naimi'i huatye'en. Ajta aɨn ɨ ta'ihuaara'a nusu aɨn ɨ tajuu, ayaa pu tihua'acɨ'ɨti mej mi ruxaahua raaxa'apɨ'ɨntare'en, a'ini Dioj pu ayan taatajée tej ti tyamua'a naa ta'ihuaamua'a ta'ara'ani. 16Che'e ayan eenye'en a'ini mɨ pej jɨra'ara'an pueen, capaj ramua'aree tɨ pua'a peyan ru'irajtuaani ɨ a'acɨn nusu pacai. Pajta muaa, mɨ pej cɨna'ara'an pueen, capaj pajta ramua'aree tɨ pua'a peyan ru'irajtuaani ɨ a'ɨj nusu pacai. 17Ayaa pu xaa nya'u ti'ayajna. Ayaa nu tihue'ijcate'e aɨme ɨ mej e'etyujsa'ɨri nainjapua teyujta'a, a'achu maj pua'amua, mej mi meyan tityaaju'un a'ij tɨ tavastara'a ayan tihua'uxa'apɨ'ɨntari'iri'i seij ajta seij, a'ij tɨ ajta Dioj tihua'utajée. 18Tɨ pua'a ari antisijchi'ihuaca'a ɨ naviira'an ɨ a'atɨ tɨ'ɨj Dioj raatajée, che'e aɨn a'atɨ cai ayan ti'ityesa'a tɨ ra'ava'anan ɨ tɨ antisijchi'ihuaca'a. Ajta, tɨ pua'a cai xɨ antisijchi'ihuaca'a ɨ naviira'an ɨ a'atɨ tɨ'ɨj Dioj raatajée, ayaa pu ruxe'eve'e tɨ aɨn a'atɨ cai ra'antisiiche ɨ runavij. 19Ayaa pu'u xaa nya'u, a'ini capu a'ij huataujmua'a ɨ Dioj jemi tɨ pua'a a'atɨ ra'antisijche ɨ runavij nusu cai ayan ra'antisijchaca'a. 20Aɨj pu cɨn, a'atɨ tɨ na'a, che'e aɨn ayan eenya'a huatyaturan a'ij tɨ eenya'a tɨ'ɨj Dioj ayan raatajée. 21Tɨ pua'a pauj ca'anyejri cɨn ti'imuara'acaa tɨ'ɨj Dioj muaatajée, capej paɨjna cɨn a'ij tyá'amuajca. Aru tɨ pua'a ayan ti'irɨ'ɨristan pej pi ra'antimue'itɨn, pej pi pajta axaahua á'ucha'acanye'en, pata'aj peyan huarɨni. 22Ayaa pu'u na'a ti'en, a'ini aɨjna tɨ ca'anyejri cɨn ti'imuara'acaa tɨ'ɨj tavastara'a raatajée, pu'uri ayan ruxé'evi'ira'a cɨn ti'ivaɨre'e ɨ tavastara'a jemi. Ajta aɨn tɨ ruxaahua ti'imuara'acaa tɨ'ɨj tavastara'a raatajée, aɨ pu ari ca'anyejri cɨn ti'ivaɨre'e ɨ jemin. 23Cɨriistu'u pu tyu'utanajchitaca'a ɨ saj cɨn tye'echaɨca'a ɨ Dioj jemi. Aɨj pu cɨn, caxu che'e taura'acare'en sej ca'anyejri cɨn ti'imuara'a hua'a jemi ɨ tyetyaca. 24Ayaa nu tyaja'amue'ixaate'e, nye'ihuaamua'a, sata'aj seyan che'eta sana'a e'enye'en huatyaturan ɨ Dioj jemi seij sajta seij satɨj e'enya'a tɨ'ɨj aɨn amuaatajée. 25Cɨme'en aɨme ɨ maj cai víche'ejmee, capu ti'itɨj cɨn tinyeijca ɨ tavastara'a silu ayaa nu tyaja'amue'ixaate'e a'ij tɨ ayan tina'amitejte'e inyeetzi i nyaj cai atya'ɨtza'ara aɨjna cɨme'e tɨ aɨn ná'ancu'uvajxɨ ɨ tavastara'a. 26A'ini pu'uri tɨn tyaja'ure'enyejsin ɨ tyaj cɨn rajpueiitzi ta'aju'un, ayaa pu tina'amitejte'e tɨ ayan tiraavijte'e sej seyan e'enye'en huatyaturan satɨj e'en ijii. 27Tɨ pua'a peri seij tyevi'itɨnye'en, capej peyan rahuauca a'ij pej ye'i huarɨni paj ma ruuraini. Na'ari tɨ pua'a pauj asaɨj á'ucha'acanye'en, capej peyan rahuauca paj huatyenyaɨche. 28Ma ajta, tɨ pua'a saɨj huatyenyaɨche, capu aɨn ti'itɨj cɨn autyajturaa ɨ Dioj jemi. Ajta tɨ pua'a seij jɨita'a ayan huatyeviche'en, capu ajta ti'itɨj cɨn autyajturaa. Camu xaa nya'u a'ij pua'a rɨcɨ silu ayaa pu hua'utamuare'eriste'esin maɨjna cɨme'e mej meri naiimi'i á'ujhua'an. Me nyajta inyaa, ayaa nu een cɨn neyan tyaja'amue'ixaate'e a'ini canu raxe'eve'e tɨ ayan tyaja'amuaruure. 29Casi'i, nye'ihuaamua'a, ayaa pu huataujmua'a aɨjna ɨ nyuucari nyaj ja'amue'ixaate'e. Pu'uri tɨn tyaja'ure'enyejsin aɨjna xɨcajra'a tɨ ayan titaaxa'apɨ'ɨntari'iri'i. Tɨj na'a ijii tɨ yu auca'itɨ a'ame, miche'e meyan ti'ityujchaɨ aɨme ɨ mej nyéjnyaɨche. Miche'e meyan rɨjca matɨj aɨme ɨ maj cai xɨ huanyéjnya'ɨchaca'a. 30Majta aɨme ɨ maj ruxaamɨste'e, miche'e meyan e'enye'en yaa cumu maj cai ruyein. Majta aɨme ɨ maj rutyamua'ave'e, miche'e majta meyan e'enye'en yaa cumu maj cai che'e na'anaj. Ajta aɨme ɨ mej ti'inanaave, che'e ayan tihua'amityejtya'a maj cai ti'itɨ ticha'ɨ. 31Ajta aɨme ɨ maj meyan maɨjna cɨn ruvaɨre'e tɨ iiyan ti'iseijre'e chaanaca japua, miche'e cai nain cɨn ruvaɨra'a, a'ini pu'uri tɨn tye'entipua'ari nain tɨj na'a tɨ yan ti'iseijre'e iiyan chaanaca japua. 32Nyajta inyaa, ayaa nu ti'ijxe'eve'e muejmi cɨme'en saj cai ti'itɨj cɨn a'ij tyá'ujmuajca a'ini aɨjna tɨ cai nyaɨche, ayaa pu aɨjna jetze ruxe'eve'e aɨjna cɨme'en ɨ tɨ tiraacɨ'ɨti ɨ tavastara'a jemi. Aɨj pu cɨn ayan rɨ'ɨ ti'ityujcha'ɨ tɨ'ij ayan rɨ'ɨ tiraata'an aɨjna ɨ tavastara'a. 33Ma ajta aɨn tɨ nyaɨche, ayaa pu aɨjna jetze ruxe'eve'e aɨjna cɨme'en tɨ yan ti'iseijre'e iiyan chaanaca japua tɨ ij ayan aɨjna cɨn rɨ'ɨ tiraata'acare'en aɨjna ɨ ru'ɨj. Aɨj pu cɨn cai che'e rɨ'ɨri tɨ nain cɨn tiraatyavaɨre'en ɨ tavastara'a. 34Ayaa pu che'eta na'a een cɨme'en, ɨ jɨita'a tɨ rusaɨj a'ucha'acan, tɨ ajta cai viche'e. Ayaa pu aɨjna jetze ruxe'eve'e aɨjna cɨme'en tɨ tiraacɨ'ɨti ɨ tavastara'a jemi. Ayaa pu ajta aɨjna jetze ruxe'eve'e tɨ urare'enya'acan cɨn huatyaturan ɨ Dioj jemi, nain cɨme'e ɨ rutevi jetze, ajta ɨ ruxaijnyu'uca cɨme'e. Ma ajta aɨn ɨ jɨita'a tɨ ari viche'e, ayaa pu aɨjna jetze ruxe'eve'e aɨjna tɨ yan ti'iseijre'e iiyan chaanaca japua tɨ ij ayan rɨ'ɨ tiraata'acare'en ɨ rucɨn. 35Canu nyaɨjna cɨn neyan tyaja'amue'ixaate'e nyej ni ti'itɨj cɨn amuaata'ijmɨ silu nyej ni ti'itɨj cɨn amuaatyavaɨre'en sej si seyan rɨ'ɨ ti'ityujchaɨ a'ij tɨ tiraavijte'e, sej si nain cɨn rana'amiche'en ɨ tavastara'a. 36Ajta aɨjna ɨ a'atɨ tɨ ayan tiyauj tɨ cai xɨ viche'e, tɨ pua'a ayan ra'amityejtya'a tɨ cai xa'apɨ'ɨn rɨcɨ tɨ raata'ijmɨ, ajta tɨ pua'a ari mu á'ume'en ɨ tɨ cɨn tyamueistaca aɨjna ɨ jɨita'a, che'e aɨn ya'upuaara'an ayan huarɨni a'ij tɨ tira'amitejtya'acaa. Capu ti'itɨj cɨn ti'ixana'acɨre'en ɨ Dioj jemi, che'e aɨn jɨita'a huatyeviche'en. 37Ma ajta aɨjna ɨ a'atɨ, tɨ pua'a ayan tyamua'a naa tiraaxa'apɨ'ɨntare ɨ rutzajta'a tirachaɨ́ɨ a'aye'i ɨ ruyauj a'ij tɨ een, ajta tɨ pua'a cai a'atɨ ayan ca'anyejri rata'aca tɨ huatyeviche'en aɨjna ɨ yaujra'an, aɨjna ɨ a'atɨ, aɨ pu xaa xa'apɨ'ɨn rɨcɨ. 38Aɨj pu cɨn, xa'apɨ'ɨn rɨcɨ aɨjna ɨ a'atɨ tɨ ayan rata'acare'en ɨ ruyauj tɨ huatyeviche'en. Ajta aɨn ɨ a'atɨ tɨ ayan rachaɨ́ a'aye'i ɨ ruyauj a'ij tɨ een, tɨ ij cai huatyeviche'en, aɨ pu eitze'e xa'apɨ'ɨn rɨcɨ. 39Ajta, aɨjna ɨ jɨita'a tɨ ari viche'e, aɨ pu ca'anyejri cɨn naiimi'i seijre'e jamuan ɨ rucɨn tɨj na'a tɨ auj ruuri aɨjna ɨ cɨna'ara'an. Ajta, tɨ pua'a huamɨ'ɨni aɨjna ɨ cɨna'ara'an, pu'uri rɨ'ɨri tɨ ajtahua'a ruxé'evi'ira'a cɨn huatyeviche'en aɨjna jamuan a'atɨ tɨ ra'araanajchi. Saɨj pu'u ruxe'eve'e, tɨ ayan huatyeviche'en a'ij tɨ tiraavijte'e ɨ tavastara'a jemi. 40Ma ajta aɨjna ɨ jɨita'a, eitze'e pu ɨ Dioj rɨ'ɨ tirata'aca tɨ pua'a ayan eenye'eque'e huatyaturan a'ij tɨ een. Ayaa pu tina'amitejte'e inyeetzi. Ajta ayej nya'ase tɨ ajta ayan che'eta na'a tira'amitejte'e ɨ xaijnyu'ucara'ara'an ɨ Dioj.

will be added

X\