1 Corintios 6

1Tɨ pua'a seyan tyu'ujaaxaijvi'ira, ¿a'ini ti'irɨ'ɨri tɨ a'atɨ ayan huataura'an tɨ aun á'ume'en hua'a jemi ɨ jueesi ɨ maj cai tyejmi jetze ajtyama'acan i tyej tya'atzaahuate'e mej mi maɨn meyan raaxa'apɨ'ɨntare'en? ¿A'ini een cɨme'e sacai rujɨɨmua'a raaxa'apɨ'ɨntare'en aɨme jemi ɨ mej jemin seijre'e ɨ Dioj? 2Xu'uri ramua'aree tyej teyan hua'uxɨjte'en naijmi'ica ɨ mej yan japuan seijre'e ɨ chaanaca. Tɨ pua'a ayan te'eme saj hua'uxɨjte'en saɨme ɨ mej yan japuan seijre'e ɨ chaanaca, ¿ni tzaa sacai raayɨ'ɨtɨ sej seyan raaxa'apɨ'ɨntare'en saɨjna tɨ cai ti'itɨ jetzen ruxe'eve'e? 3Casi'i, tyan tu tyajta hua'axɨjte'e aɨme ɨ mej tajapua ti'ivaɨre'e. Aɨj pu cɨn, capu a'atzu muare'eri tyej teyan raaxa'apɨ'ɨntare'en aɨjna tɨ tyejmi jetze ayan ti'ijninyei ijii tyej huatyaɨte. 4Ajta tɨ pua'a ayan ruxe'eva'a sej seyan raaxa'apɨ'ɨntare'en saɨjna tɨ muejmi jetze ti'ijninyei ijii, ¿a'ini een cɨme'e seyan saɨjna cɨn tihue'ijcate'e mej mi jueesi cɨn antyujmua'aréera aɨme ɨ maj cai rɨ'ɨ tihua'axe'eve'e ɨ tyaɨte? 5Ayaa nu een cɨn tyaja'amue'ixaate'e nyej ni amuaatatyevi'iraste'en. ¿Ni tzaa cai rɨ'ɨri tɨ muejmi jemi seij seijra'a tɨ ayan raayɨ'ɨtɨ tɨ tyamua'a naa ra'uxɨ́jte'en aɨjna cɨme'e ɨ maj rujaaxaijvi'i ɨ ta'ihuaamua'a ɨ maj majta tya'atzaahuate'e? 6Ma sajta muan, ayaa xu ti'ijrɨ'ɨre. Seij pu ayan runyuuste'e ɨ ru'ihuaara'a, ajta ayan rɨcɨ hua'a jemi ɨ maj cai tya'atzaahuate'e. 7Xu'uri saɨjna cɨn huamue'itɨche saɨjna cɨme'e tɨ a'atɨ ayan runyuuste'e aɨjna jemi ɨ ru'ihuaara'a. Ayaa pu tyajamuaatyava'ɨri sej seyan huataura'an tɨ a'atɨ ayan a'ij pua'a amuaaruuren nusu tɨ ayan ti'itɨ amuaanahue'i. 8Ma sajta muan, ayaa xu rujɨɨmua'a saɨn pueen ɨ sej a'ij pua'a hua'aruuraa sa'aye'i, sajta seyan tihua'anahue'i. Ayaa xu hua'aruure ɨ a'amue'ihuaamua'a. 9Muan xu ramua'aree tyamua'a naa tɨ cai ayan tihua'acɨ'ɨti aɨme ɨ mej a'ij pua'a ti'ityujcha'ɨ maj maun a'utyarute a'u tɨ Dioj tyeje'ijta. Caxu taura'acare'en tɨ a'atɨ a'amuacuanamua. Camu aun a'utyaruti aɨme ɨ mej a'ij pua'a rɨjca na'ari aɨme ɨ maj rana'amiche aɨjna tɨ cai Dioj pueen nusu aɨme ɨ mej ti'ixana'acɨre'e ɨ ruxa'a tevi jamuan ca'ɨn aɨme ɨ mej ruxa'a tyetyaca jamuan ti'ixana'acɨre'e. 10Capu ajta tihua'acɨ'ɨti aɨme ɨ mej ti'inahua'ara nusu ɨ mej eihua huapɨ'ɨ ti'inyacua'atze maj tí'ijchaɨca ca'ɨn ɨ mej ruta'arujve'e na'ari ɨ mej a'ij pua'a tyu'ujepe'e o mej aviitzi cɨn ti'inahua'a. Camu xaa nya'u seira'a mua'aju'un ɨ Dioj jemi. 11Sajta muan, e'icaj xu hua'a jetze ajtyama'acantaca'a. Ma ajta Dioj, aɨ pu ari tyajámuaacá'ari'iri'i ɨ saj cɨn autyajturaa ɨ jemin. Aɨ pu ajta huataura'ate muejmi. Ajta aɨjna cɨme'e ɨ xaijnyu'ucara'ara'an ɨ Dioj, muan xu urare'enya'acan cɨn huatyajturaa ɨ Dioj jemi nyuucajtze'en aɨjna ɨ tavastara'a, ɨ Jesús tɨ ajta Cɨriistu'u pueen. 12Nain pu i'ixa'apɨ'ɨn. Ajta ayaa pu tinata'aca nyej neyan huarɨni. Ma ajta, capu nain ayan ti'ivaɨre'e. Naijmi'i pu i'i xa'apɨ'ɨn, ajta ayaa pu xaa nata'aca nyej neyan huarɨni. Me nyajta inyaa, canu huatana'asin tɨ ti'itɨ na'antimue'itɨn nyej ni nyaɨjna cɨn ca'anyejri cɨn tiraatyavaɨre'en. 13Ajta aɨjna tɨ ti'icue'iri'i, aɨ pu ayan ti'ivaɨre'e ɨ jucáj jetze. Ajta aɨjna ɨ jucáj, aɨ pu ajta ayan ti'ivaɨre'e tɨ cue'ira tya'arayeijxɨ'ɨn. Ma ajta Dioj, aɨ pu ra'antipua'arite'esin ɨ jucáj, ajta ɨ cue'ira. Ajta ɨ tyej ratyáhue'ira'a, capu ayaa na'a ti'ivaɨre'e tyej ti tyaɨjna cɨn ti'ixana'acɨra'a silu tej ti tyaɨjna cɨn raatyavaɨre'en ɨ tavastara'a. Ajta ɨ tavastara'a, aɨ pu ajta raatyavaɨre'esin aɨjna ɨ tyej ratyáhue'ira'a. 14Ajta aɨn Dioj, aɨ pu rumuare'eri'ira'a cɨn ra'ajjáj ɨ tavastara'a hua'a tzajta'a ɨ mɨ'ɨchite. Aɨ pu ajta ta'ajjájpua ityejmi. 15Xu'uri ramua'aree tɨ Cɨriistu'u jetze ajtyama'acan aɨjna ɨ saj ratyáhue'ira'a. ¿A'ini huataujmua'a aɨjna? ¿Ni qui nyaj ra'antyanajchite'e jamuan ɨ jɨita'a tɨ ti'ityeji'ivi ɨ rutevi cɨme'e nyaɨjna tɨ Cɨriistu'u jetze ajtyama'acan? Capu xaa nya'u. 16¿Ni qui seyan ramua'aree tɨ aɨn tɨ ayan antyaujnaxca jamuan ɨ jɨita'a tɨ ti'ityeji'ivi ɨ rutevi cɨme'e, ayaa pu huaujruu mej mi seij mana'a tevijra'an pueenye'en? 17Ma ajta aɨn tɨ ayan huataujtu'ire'en ɨ tavastara'a jemi, ayaa pu ruruuren tɨ aɨjna jamuan seij na'a pueen ɨ xaijnyu'ucara'ara'an tzajta'a. 18Sata'aj nain cɨn raatapua'ajta sej seyan ti'ixana'acɨre'e. Ajta seica cɨme'e ɨ maj cɨn atyaturaave ɨ Dioj jemi, naimi'i pu ayan cai rutevi cɨn a'ij tyu'uruure. Ma ajta, tɨ pua'a a'atɨ ayan ti'ixana'acɨra'a, aɨ pu a'ij pua'a raruure ɨ rutevi. 19- 20Casi'i, ayaa pu ti'ivaɨre'e ɨ a'amuatevi tɨj teyuu tɨ tzajta'an huirajca ɨ xaijnyu'ucara'ara'an ɨ Dioj. Aɨ pu a'amua tzajta'a seijre'e. Ajta, muan xu ra'ancure'evi'itɨ ɨ Dioj. Muan xu cai saɨjna cɨn antyujmua'aree ɨ rutevi a'ini aɨ pu tyu'utanajchitaca'a muejmi jetze ma'acan. Aɨj pu cɨn ayan ruxe'eve'e sej seyan rana'amiche'en ɨ rutevi cɨme'e.

will be added

X\