1 Corintios 5

1Ayaa nu tyu'unamuajri'i tɨ ayan ti'ayajna tɨ saɨj tɨ muejmi jemi ajtyama'acan ti'ixana'acɨre'e aɨjna cɨme'e tɨ jamuan hui'ica aɨjna tɨ ratyevi'itɨn ɨ ya'upuaara'an. Eecan pu a'ij pua'a seijre'e aɨjna. Majta aɨme ɨ mej seij chuejra'a japua e'ema'acan, camu meyan rɨcɨ. 2Ma sajta muan, aɨj xu cɨn á'ujtzaahuate'e. ¿Ni cai ayan tiraavijte'e saj saɨjna cɨn huataujxaamɨste'en? Ee xaa nya'u. Sata'aj raatamuarite'en saɨjna ɨ a'atɨ tɨ ij cai che'e seira'a muejmi jemi. 3Ayaa nu tyaja'amue'ixaate'e tzaahuati'ira'a cɨme'e. Ya nu ɨmɨ huaca inyaa. Me nyajta, au nu á'uca muejmi jemi nyamua'atziira'a cɨme'e. Nu'uri neyan ra'uxɨ́jte nyaɨjna ɨ a'atɨ tɨ ayan rɨcɨ nyatɨj neyan raruurénche'e tɨ pua'a nyaun a'ucatiiche'e. 4- 5Ayaa xu huarɨni satɨ'ɨj e'etyujsaɨre'en nyuucajtze'en ɨ tavastara'a, aɨjna ɨ Jesús, ajta nyatɨ'ɨj nyaun muejmi jemi e'eseijra'a nyamua'atziira'a cɨme'e. Sata'aj seyan saɨjna jetze araujca'anyen ɨ muáre'eri'ira'ara'an ɨ tavastara'a ɨ Jesús sej si raatatuire'en saɨjna ɨ a'atɨ ɨ Satanás jemi tɨ ij aɨn tiyaaru'u ra'upua'arite'en ɨ tevijra'an, tɨ ij ajta Dioj ru'irajtuaani ɨ xaijnyu'ucara'ara'an ɨ a'atɨ ajna xɨcajra'a tɨ jetzen tyu'utaijta ɨ tavastara'a. 6Capu xa'apɨ'ɨn saj seyan saɨjna cɨn a'ujtzaahuatya'a a'ini ayaa pu tyu'utaujnaxca muejmi jemi tɨj ajta tyu'utaujnaxca ɨ maj ranajchite'esin ɨ cueijtzi. Cɨj mu'u caj tirajnajchite'esin. Ajta e'eyan nain japua huanyajxɨ'ɨsin. 7Aɨj xu cɨn, sata'aj ma ruuraini saɨjna tɨ mi'ima'acan sej si seyan huaujjajcuare'en tɨj aɨjna ɨ cueijtzi tɨ cai ti'itɨ ranaxcaca'a. Ayaa xu huarɨni a'ini pu'uri huataujmuaɨ'ɨvajtaca'a aɨjna ɨ Cɨriistu'u tɨ tejmi jetze ma'acan huamɨ'ɨ tɨ ij cai pueijtzi taacɨ'ɨti. 8Aɨj pu cɨn, tiche'e teyan tyu'uyesten a'ij tɨ tiraavijte'e ɨ Dioj jemi, tyata'aj cai che'e teyan a'ij pua'a ti'ititacha'ɨ, tyajta cai che'e ti'itɨj cɨn autyaturan ɨ Dioj jemi silu tiche'e teyan rɨ'ɨ ti'ititacha'ɨ tzaahuati'ira'a cɨme'e, tiche'e tyajta teyan tyana'a tyu'utaxaj nyuucari cɨme'e tɨ ayan ti'ayajna. 9Nu'uri neyan tyajamuaataiti'iri'i ɨ yu'uxari jetze saj cai hua'a jamuan tyujsa'ɨrihua'an aɨme ɨ mej ti'ixana'acɨre'e. 10Aɨjna ɨ nyuucari tɨ cɨme'en: “Ɨ mej ti'ixana'acɨre'e”, capu ayan huataujmua'a a'atɨ tɨ na'a tɨ a'ij pua'a rɨjca ɨ Dioj jemi, tɨ pua'a a'ij pua'a ti'ityujcha'ɨ nusu tɨ huapɨ'ɨ ti'inyacua'atze tɨ eihua tí'ijcha'ɨ na'ari ti'inahua'a ca'ɨn seij na'amiche'e tɨ cai Dioj pueen. Tɨ pua'a ayan huataujmua'ati, ayaa pu ruxe'eva'a a'ame saj seyan ajtacɨɨnye naijmi'ica jemi ɨ maj yan japuan seijre'e ɨ chaanaca. 11Ma ajta, ayaa pu huataujmua'a ɨ nyaj cɨn tyajamuaataiti'iri'i saj cai che'e jamuan á'ujhua'anye'en seij tɨ ayan tamuari tɨj ta'ihuaara'a tɨ pua'a aɨn a'atɨ ayan ti'ixana'acɨre'e nusu huapɨ'ɨ ti'inyacua'atze tɨ eihua tí'ijcha'ɨ na'ari rana'amiche tɨ cai Dioj pueen ca'ɨn a'ij pua'a tyu'ujepe'e. Caxu sajta jamuan á'ujhua'anye'en tɨ pua'a ayan rutahuéiive'e na'ari ti'inahua'ara. Caxu sajta ti'icua'aca jamuan saɨj tɨ ayan rɨcɨ. 12- 13Canu nyaɨjna cɨn antinmua'aree nyej neyan hua'uxɨjte'en aɨme ɨ maj cai tyejmi jetze ajtyama'acan silu aɨ pu Dioj hua'axɨjte'en. Ma sajta muan, muan xu xaa saɨjna cɨn antyujmua'aree sej seyan hua'uxɨjte'en aɨme ɨ mej ja'amua jetze ajtyama'acan. Sata'aj raatamuarite'en saɨjna ɨ a'atɨ tɨ a'ij pua'a ti'ityujcha'ɨ.

will be added

X\