1 Corintios 4

1Ayaa pu ruxe'eve'e tɨ ayan tyajamua'amityejtya'a ityejmi cɨme'en tyej teyan ravaɨre'e ɨ Cɨriistu'u, ajta tɨ ayan titaijca aɨjna cɨme'e ɨ tɨ rua'avaa ɨ Dioj jemi. 2Ajta, aɨjna tɨ ravaɨre'e, ayaa pu tyu'ujxe'eve'e tɨ aɨn ɨ a'atɨ ayan aráurasten nain cɨme'e aɨjna ɨ tɨ cɨn tiraijca. 3- 4Me nyajta inyaa, capu nyejetze ruxe'eve'e tɨ pua'a muan seyan na'uxɨjte'en, na'ari meyan na'uxɨjte'en aɨme ɨ mej ijii huatyaɨte maɨjna cɨme'e a'ij tɨ tihua'amityejte'e. Ee xaa nya'u, canu nyasaɨj á'anxɨjte'en, a'ini canu nyaa nyasaɨj ramua'aree tij ti'itɨj cɨn nya'utyajturaa ɨ Dioj jemi. Capu amɨn a'ij, capu ayan huataujmua'a nyej neri xa'apɨ'ɨn een ɨ Dioj jemi. Tavastara'a pu aɨn pueen ɨ tɨ na'axɨjte'en. 5Aɨj xu cɨn seyan huarɨni. Caxu ti'itɨ cɨn hua'axɨjtya'a asta na'a cai ajna tyaja'ure'enyen ajna xɨcajra'a tɨ jetzen Dioj ari raaxa'apɨ'ɨntare. Sata'aj sauj raachu'eva'a saɨjna ɨ tavastara'a tɨ'ɨj ajtahua'a ya uvé'enyen. Aj pu xaa aɨn raataseijrata tɨj na'a tɨ ru'avaataca'a a'u tɨ a'utɨca'a. Aɨ pu ajta raataseijrata ɨ tɨ ayan tihua'amityejtya'acaa ɨ hua'a tzajta'a ɨ tyaɨte. Aj pu'i ayan tihua'acɨ'ɨti tɨ Dioj ayan rɨ'ɨ tihua'uta'asin naijmi'ica a'ij tɨ tiraavijte'e seij ajta seij. 6Me nyajta inyaa, nain cɨn ɨ nyej neri tyajamue'ixaa, ayaa nu tyajamuaata'itiiri'i nyeetzi cɨme'en nyajta nyaɨjna cɨme'en ɨ Apolos nyej ni nyaɨjna cɨn jamuaatyavaɨre'en. Caxu yá'uhua'anan saɨjna ɨ nyuucari tɨ ayan tɨcɨn: “Sata'aj seyan aráurasten saɨjna cɨme'e a'ij tɨ te'eyu'usi'i.” Caxu seyan ahuaujtzaahuate'en saɨjna cɨme'e saj nu'u seij jetze ajtyama'acan. Caxu sajta raatyaxaahuata ɨ saɨj. 7¿Ni tzaa a'atɨ ayan aɨjna cɨn timuéijca aɨjna cɨme'e tɨ eitze'e ruxe'eve'e cai ɨ tɨ cɨn antyujmua'aree ɨ axa'aj tevi? Capu xaa nya'u. ¿Ni qui peyan ti'itɨ tí'ijcha'ɨ ɨ paj cai ra'ancura'a seij jemi? Capu xaa nya'u. Ajta, tɨ pua'a ayan ti'ayajna pej peyan ra'ancura'a, ¿a'ini een cɨme'e peyan a'atzaahuate'e? Capu ayan tiraavijte'e a'ini Dioj pu ayan muaatapueijve. 8Muan xu nu'u seri huatajuxai tyamua'a naa. Sajta nu'u seri huataujchijtyaanitaca'a. Muan xu nu'u cai taata'inyaa, sajta seyan ti'ijta rujɨɨmua'a sana'a. Oojala cu tɨ ayan tyaja'ure'enyen sej seyan tyu'utaijta. Eihua huapɨ'ɨ nu neyan ti'ijxe'eve'e. 9Ayaa nu een cɨn neyan tyaja'amue'ixaate'e a'ini ayaa pu tina'amitejte'e tɨ Dioj ayan taataseijrataca'a muejmi jemi tyaj ityan aɨn pueen ɨ tyaj cai ti'itɨj cɨn antitamua'aree, tyajta tyan tu aɨn pueen ɨ maj majta cɨme'en meri raaxa'apɨ'ɨntare tyaj nu'u huacui'ini a'u maj tityaja'acui'ica. Dioj pu ayan taataseijrataca'a naijmi'ica jemi ɨ mej tajapua seijre'e, ajta hua'a jemi ɨ mej yan japuan huachaatɨme ɨ chaanaca, a'u tɨ na'a nainjapua. 10Ayaa xu ti'ixaxa'a muan tyaj nu'u tatɨmue'i tyaɨjna cɨme'e tyej teyan ravaɨre'e ɨ Cɨriistu'u. Ma sajta muan, saj nu'u huapɨ'ɨ naa tiru'umua'aree ɨ Cɨriistu'u jemi. Capu nu'u tu'uca'anisti'i ityejmi. Ma sajta muan, ayaa xu nu'u nain cɨn tye'eviicue'i. Eecan mu nu'u rɨ'ɨ tyajamuata'aca muejmi. Majta mátaxana'ave'e mu nu'u ityejmi. 11Tɨj na'a tɨ yu e'ire'enye, ajta ijii ayaa tu tyana'a ji'itajcu, tyajta ji'icu. Tyamua'a tu titacacɨɨxure'e. Eecan mu a'ij pua'a taruure. Catu tyajta me'e e'eche. 12Ca'anin tu cɨn ti'imɨjhuaca tamuajca'a cɨme'e. Tɨ pua'a a'ij pua'a meti'itaxajta, tyan tu teyan rɨ'ɨ tihua'ata'aca. Ajta tɨ pua'a a'ij pua'a mataruura, tyan tu teyan ra'aviicue'i. 13Ajta, matɨ'ɨj tyaɨte hue'itzi tataavijra'a ityejmi, rɨ'ɨ tu naa tihua'ajee. Tɨj na'a tɨ yu e'ire'enye ajta ijii, ayaa pu tihua'amityejte'e ityejmi cɨme'en tyaj nu'u eihua huapɨ'ɨ hua'axana'aviste'e, tyaj nu'u teyan hua'aseijrate'e hua'a jemi tɨj ɨ xaɨri ɨ maj ma rúuraaraj ɨ mej yan japuan seijre'e ɨ chaanaca. 14Canu nyaɨjna cɨn neyan tyaja'amue'ixaate'e nyej ni neyan amuaatatyevi'iraste'en, silu nyej ni rɨ'ɨ jamuaata'itii muan, mɨ saj seyan na'aseijrate'e cumu niyaujmua'a ɨ nyej eihua huapɨ'ɨ a'amuaxe'eve'e. 15Tij cai mui'itɨ mu tyajamue'itiiri'i ɨ Cɨriistu'u jetze ma'acan. Capu a'ij amiteere'e a'achu maj pua'amua ara'ase. Ma ajta, seij pu'u ɨ tɨ a'amuaya'upuajtaca'a, nyajta inyaa, nyaa nu nyaɨn pueen i nyaj a'amuaya'upuajtaca'a ɨ Cɨriistu'u jemi nyaɨjna cɨme'e nyej tyajamue'ixaa ɨ nyuucari tɨ cɨn Dioj amue'irajtuaani. 16Aɨj nu cɨn neyan tyaja'amuajee sej seyan tityaaju'un nyatɨj inyaa. 17Aɨj nu cɨn neyan amuaatáiti'iri'i nyaɨjna ɨ Timuteeyu ɨ nyaj nyajta ya'upuaara'an pueenya'a ɨ tavastara'a jemi, ɨ nyaj nyajta eihua huapɨ'ɨ raxe'eve'e. Aɨ pu amuaatanamuajriste'esin a'ij nyej ti'itincha'ɨ jemin ɨ Cɨriistu'u tɨ ajta i'i Jesús. Ayaa nu che'eta nyana'a tihué'itii aɨme ɨ seica, a'u tɨ na'a maj e'etyujsa'ɨri. 18Seica muan, xu'uri á'ujtzaahuate'e. Cu xuee tɨ cuj ayan tyajamua'amitejte'e nyaj cai che'e nyaun mu a'atanyén. 19Me nyajta inyaa, nyaa nu xaa ca'anacan nyaun a'atanyejsin muejmi jemi tɨ pua'a ayan tinaatá'acare'en ɨ tavastara'a. Aj nu xaa ramua'areeran tɨ pua'a seyan ti'ityujcha'ɨ muáre'eri'ira'ara'an cɨme'e ɨ Dioj na'ari nyuucari sana'a cɨn seyan ti'ityujcha'ɨ. 20Ayaa pu'u xaa nya'u, a'ini aɨjna ɨ Dioj, capu nyuucari na'a cɨn tie'ijta silu rumuare'eri'ira'a cɨme'e. 21¿A'ini seti'ijxe'eve'e muan? ¿Ni qui neyan nyaɨjna cɨn u a'ume'en nyej ni pueijtzi amuaata'an na'ari nyej neyan nyaɨjna cɨn amuaja'uva'amuaare nyaɨjna cɨme'e nyaja'amuaxe'eve'e, nyej ni nyajta cua'anin cɨn tyajamue'ixaate'en?

will be added

X\