1 Corintios 3

1Ayaa nu tyaja'amue'ixaate'e, nye'ihuaamua'a, tɨ cai huatarɨ'ɨriistaraca'a nyej neyan tyajamuaata'ixaate'en tɨj aɨme ɨ tɨ hua'a jemi huatyajturaa ɨ xaijnyu'ucara'ara'an ɨ Dioj, silu tɨj aɨme ɨ mej yan japuan seijre'e ɨ chaanaca, mɨ saj sauchan huataujtuiiri'i ɨ Cɨriistu'u jemi. 2Nyatɨ'ɨj tyajamuaamí, canu cue'ira jamuaamí silu aɨj nu'u amua'anti'ite ɨ leechi a'ini caxu xɨ yá'ujapɨ'ɨra'a ɨ cue'ira. Sajta ijii, sauche'e xu seyan e'en. Caxuu xɨ tyaja'ujapɨ'ɨra'a. 3Sauche'e xu seyan e'en matɨj aɨme ɨ mej yan japuan huachaatɨme ɨ chaanaca. A'ini ayaa pu seijre'e muejmi tzajta'a cumu saj ruchueere'e, sajta saj rujaaxaijvi'i. ¿Ni cai ayan huataujmua'a saj sauj hua'ajemi ajtyama'acan aɨme ɨ mej yan japuan seijre'e ɨ chaanaca? Ee xaa nya'u, muan xu seyan ti'ijrɨ'ɨre a'ij mej ti'ijrɨ'ɨre ɨ seica ɨ tyetyaca. 4Ayaa xu rɨcɨ. Seij tɨ muejmi jemi ajtyama'acan ayan ti'ixa tɨcɨn: “Nyaa nu Pablo jetze ajtyama'acan.” Ajta ɨ saɨj ayan tɨcɨn: “Nyajta inyaa, Apolos nu jetze ajtyama'acan.” ¿Ni sacai seyan che'eta sana'a rɨcɨ matɨj aɨme ɨ tyetyaca ɨ maj cai jetzen seijre'e ɨ xaijnyu'ucara'ara'an ɨ Dioj? Ee xaa nya'u, ayaa xu rɨcɨ. 5Niche'e a'atzu tyajamue'ihua'u. ¿A'ini ti'itɨj cɨn ti'ivaɨre'e aɨjna ɨ Apolos, na'ari ti'itajni cɨn na'antinmua'aree inyaa, inyaj i'i Pablo? Ayaa nu tyaja'amue'ixaate'e. Tyan tu'u ravaɨre'e ɨ tavastara'a jemi. Ayaa xu een cɨn tya'antzaahua ɨ tavastara'a jemi saɨjna cɨme'e tyej teyan ravaɨre'e, a'ij tɨj aɨn titaijca seij ajta seij. 6Ayaa nu ti'ivaɨre'e tɨj a'atɨ tɨ ayan tyu'uhuii, ajta aɨn ɨ Apolos, aɨ pu ayan ti'ivaɨre'e tɨj a'atɨ tɨ tyu'ipuaa. Ajta aɨn ɨ Dioj, aɨ pu raaváujsi'iri'i tɨ ij huacɨɨre. 7Aɨj pu cɨn, aɨjna tɨ tyu'uhuii capu ti'itɨj cɨn ruxe'eve'e. Ajta aɨn tɨ tyu'ipuaa, capu ti'itɨj cɨn ruxe'eve'e, silu aɨ pu xaa ɨ Dioj tɨ raaváujsi'iri'i tɨ i huacɨɨre, aɨ pu xaa aɨn pueen ɨ tɨ ruxe'eve'e. 8- 9Naijmi'i mu ti'ivaɨre'e aɨjna tɨ ti'ihuiite'e, ajta aɨjna tɨ ti'ipua a'aye'i. Ruxa'a mu'u ti'ivaɨre'e, ajta Dioj pu ayan hua'uta'asin a'ij tɨ tiraavijte'e aɨjna cɨme'e ɨ tɨ racɨ'ɨcɨpua ɨ tɨ cɨn tyu'umuarej, a'ini tyan tu jamuan ti'imuare'e ɨ Dioj. Sajta muan, ayaa xu ti'itɨj cɨn ti'ivaɨre'e tɨj a'u maj tyaja'atasaahua, ajta tɨj chi'i tɨ Dioj ra'ajtaahua. 10Me nyajta inyaa, a'ini Dioj pu jeihua huapɨ'ɨ naa tinaata'a nyej ni neyan tyu'umuare'en, ayaa nu huarɨj tɨj a'atɨ tɨ chi'i ajtaahua. Nyaa nu re'itátaahuaxɨ nyaɨjna tɨ japuan ájtaavijhua ɨ jaxu'u tɨj a'atɨ tɨ tyamua'a naa raayɨ'ɨtɨ. Ajta ɨ saɨj aɨ pu japuan tya'ajtaahua. Ajta ayan ruxe'eve'e tɨ rɨ'ɨ naa tira'ajtaahua tɨ ij cai a'ij pua'a eenya'a ajcɨ'ɨpiihua. 11A'ini, cɨme'en aɨjna tɨ e'itátaavijhua, saɨj pu'u pueen, ajta ai pu aɨn pueen ɨ Jesús tɨ ajta Cɨriistu'u pueen. Capu maa a'atɨ tɨ ayan ti'ivaɨre'e tɨj aɨjna tɨ e'itátaavijhua. 12- 13Ajta, ayaa pu seira'a a'ame tɨj ti'itɨj tɨ cɨn japuan ájtaavijhuaca'a tɨ pua'a aɨjna cɨme'e ɨ ooro nusu plaata cɨme'e na'ari tetej cɨme'e tɨ huapɨ'ɨ ti'ijnajchi. Ajta ayan che'eta na'a seira'a a'ame tɨ pua'a ayan ájtaavijhuaca'a aɨjna cɨme'e ɨ cɨye na'ari ɨxaj cɨme'e ca'ɨn huaacɨxa'a cɨme'e. Ee xaa nya'u, ayaa pu seira'a a'ame ɨ ti'itɨ ɨ maj cɨn tyu'umuarej ɨ tyaɨte, seij ajta seij, matɨj mana'a pua'amua mej iiyan seijre'e ɨ chaanaca japua. Ajna xɨcajra'a jetze, ayaa pu Dioj raaxa'apɨ'ɨntare'en a'ij tɨ een a'ini ayaa pu tyaja'ure'enyejsin tɨj taij tɨ cɨn hua'utaseijrate'esin. Ajta aɨjna ɨ taij, aɨ pu raatyamua'atzi tɨ pua'a xa'apɨ'ɨn metyu'umuarej seij ajta seij nusu macai. 14Tɨ pua'a ayan tye'eviicue'i ɨ taij tzajta'a aɨjna tɨ cɨn a'atɨ tyu'umuarej, ayaa pu tiraacɨ'ɨti aɨjna ɨ a'atɨ a'ij tɨ tiraavijte'e. 15Na'ari cai, tɨ pua'a huatyajtaani ɨ tɨ cɨn tyu'umuarej ɨ a'atɨ, nain pu á'ujɨsin. Ajta aɨn ɨ a'atɨ, Dioj pu xaa ru'iratuaasin aru ayaa pu eenya'a a'ame tɨj a'atɨ tɨ xa'ichu'i aun ráavaɨ ɨ taij tzajta'a. 16Ayaa nu tyaja'amue'ixaate'e nyaɨjna cɨme'e saj saɨn pueen ɨ chi'ira'an ɨ Dioj. Ajta muejmi tzajta'a pu huatyajturaa ɨ xaijnyu'ucara'ara'an ɨ Dioj. 17Tɨ pua'a a'atɨ ayan raatyáuuna aɨjna ɨ chi'ira'an ɨ Dioj, Dioj pu ra'antipua'arite'esin aɨjna ɨ a'atɨ a'ini pu'uri Dioj huataura'ate aɨjna ɨ chi'i, saj muan saɨn pueen ɨ chi'ira'an ɨ Dioj. 18- 19Caxu rucuanamua rujɨɨmua'a. Tɨ pua'a ayan tira'amitejtya'a seij ɨ a'atɨ tɨ ayan rɨ'ɨ tiru'umua'aree aɨjna cɨme'e ɨ hua'amua'atziira'a aɨme ɨ mej ijii huatyaɨte, che'e aɨn cai che'e ayan a'ujtzaahuatya'a aɨjna cɨme'e ɨ hua'amua'atziira'a. Che'e aɨn ayan ra'ancura'an ɨ mua'atziira'a tɨ tavastara'a jetze e'ema'acan, a'ini aɨjna ɨ hua'amua'atziira'a aɨme ɨ mej ijii huatyaɨte, capu ti'itɨ a'ij huataujmua'a ɨ Dioj jemi. Ayaa pu xaa tya'asɨɨmue'i tɨcɨn: “Dioj pu hua'avivi'ira'an aɨme ɨ maj meyan á'ujtzaahuate'e maɨjna cɨme'e mej ti'ihue'itaca ɨ rumua'atziira'a cɨme'e.” 20Ajta ayan te'eyu'usi'i tɨcɨn: “Tavastara'a pu ramua'aree tɨ cai ti'itɨj vaɨre'e ɨ hua'amua'atziira'a aɨme ɨ maj nu'u eihua huapɨ'ɨ tya'umua'aree.” 21- 22Aɨj xu cɨn, caxu che'e seyan a'ujtzaahuatya'a saɨjna cɨme'e saj nu'u seij jetze ajtyama'acan ɨ tyaata'a. Naimi'i pu ayan tyaja'amuacɨ'ɨti, tɨ pua'a neyan tyaja'amuavaɨra'a inyaa, i nyaj i'i Pablo na'ari aɨn Apolos ayan tyaja'amuavaɨra'a nusu aɨjna ɨ Pedro. Tɨ pua'a ayan aɨjna cɨn rɨ'ɨ tyajamuaata'an ɨ Dioj aɨjna cɨme'e tɨj na'a tɨ iiyan seijre'e chaanaca japua nusu sej seyan ruuri huatyaturan na'ari sej seyan huacui'ini, ti'itɨ tɨ a'ij tɨ ayan ijii ti'iseijre'e ca'ɨn ti'itɨ tɨ ayan tyaja'ure'enyejsin, naimi'i pu ayan tyaja'amuavaɨre'e. 23Sajta muan, ayaa xu saɨjna jetze ajtyama'acan ɨ Cɨriistu'u, ajta aɨn Cɨriistu'u, aɨ pu ajta Dioj jetze ajtyama'acan.

will be added

X\