1 Corintios 2

1Nyajta inyaa, nye'ihuaamua'a, nyatɨ'ɨj anacai a muja'uva'amuaaraca'a nyej ni tyajamuaata'ixaate'en ɨ nyuucari tɨ cɨn Dioj tya'ataujratziiri'i, canu cui'i neyan nyaɨjna cɨn tyajamue'ixaa nyaɨjna cɨme'e ɨ nyuucari tɨ huapɨ'ɨ cɨn naa namuajre'e, canu nyajta nyaɨjna cɨme'e ɨ hua'amua'atziira'a ɨ tyetyaca silu 2- 3ayaa nu tiraaxa'apɨ'ɨntare nyaj aɨ na'a yau'eitaa na'ara'ani muejmi jemi nyaɨjna ɨ Jesús tɨ ajta Cɨriistu'u pueen, ɨ maj rá'utatai ɨ curuu jetze. Nyajta, nyatɨ'ɨj nyaun a'utyavaaca'a muejmi jemi, ayaa nu amua'aseijratya'acaa tɨ nu'u cai nu'uca'anisti'i. Cu xuee nyaj ti'itzɨɨnya'acaa. Ee xaa, eihua nu nyevivajca'a. 4Ajta aɨn ɨ nyuucari, ɨ nyaj cɨn tyajamue'ixaa, capu ayan eenya'a tɨj aɨjna tɨ huapɨ'ɨ naa namuajre'e, tɨ ajta hua'amua'atziira'a jetze airáninyeica ɨ maj cɨn hua'amue'itɨcɨ ɨ tyaɨte. Capu xaa nya'u, silu ayaa nu nyaɨjna cɨn tyajamuaata'ixaa sej si raamua'aree nyaj nyaɨjna jetze aranca'anye ɨ xaijnyu'ucara'ara'an ɨ Dioj, ajta aɨ pu jemin ma'acan ɨ muare'eri'ira'a ɨ nyaj cɨn neyan rɨcɨ. 5Ayaa nu nyaɨjna cɨn huarɨj, sej si cai saɨjna jetze araujca'anyen ɨ hua'amua'atziira'a ɨ tyetyaca silu sej si saɨjna jetze araujca'anyen ɨ muáre'eri'ira'ara'an ɨ Dioj saɨjna cɨme'e ɨ saj tya'atzaahuate'e. 6Me tyajta ityan, tyan tu xaa tyaɨjna cɨn tyajamue'ixaa seij cɨme'e ɨ mua'atziira'a aɨme tzajta'a ɨ mej meri tyu'unáijmire. Ajta aɨn ɨ mua'atziira'a, capu hua'a jetze huanyej aɨme ɨ mej yan japuan seijre'e ɨ chaanaca. Capu ajta hua'a tzajta'a ma'acan aɨme ɨ mej ti'ijta iiyan chaanaca japua, ɨ maj majta a'uva'ɨtzɨ. 7Ee xaa nya'u, tyan tu teyan raxa ɨ Dioj mua'atziira'a cɨme'e tɨ cai rɨ'ɨri tɨ a'atɨ ayan rusaɨj a'ij tirajtyauni ɨ mua'atziira'a tɨ ru'avaataca'a tɨ cɨme'en jajcua ɨmɨ tɨ'ɨj cai xɨ huataseijre ɨ chaanaca. Dioj pu ayan tiraaxa'apɨ'ɨntare tɨ ayan titáacɨ'ɨti ityejmi aɨjna tɨ huapɨ'ɨ naa seira'a a'ara'ani. 8Ma majta aɨme, ɨ mej yan ti'ijta iiyan chaanaca japua, capu a'atzu a'ij tihua'amityejtya'acaa aɨjna tɨ ru'avaataca'a, a'ini tɨ pua'a meyan ramua'areeracajche'e, camu meyan tirá'atatánche'e ɨ tavastara'a, ɨ tɨ ajta huapɨ'ɨ naa ti'iseira'a a'ara'ani tɨj na'a rusen cɨme'e. 9Ma ajta, ayaa pu tye'eyu'usi'i tɨcɨn: Aɨjna tɨ yee Dioj rɨ'ɨ raaruu aɨme cɨme'e ɨ mej raxe'eve'e, capu a'atɨ ayan raaseij, capu ajta a'ij tihua'amityejtya'acaa a'ij tɨ tye'eme'enche'e. 10Ma ajta aɨn, Dioj pu taataseijrate aɨjna cɨme'e tɨ tejmi jemi raatyajtuaa aɨjna ɨ ruxaijnyu'uca tɨ ij aɨn ayan titaata'itii. Ajta aɨn xaijnyu'ucara'ara'an, nain pu cɨn ayan tira'amitejte'e, ajta nain pu ru'umua'aree a'ij tɨ tira'amitejte'e ɨ Dioj. 11Ayaa pu'u, a'ini hua'a cɨme'en ɨ tyetyaca, aɨn xaijnyu'ucara'ara'an ɨ tyaata'a, aɨ pu'u ru'umua'aree a'ij tɨ tira'amitejte'e aɨjna ɨ a'atɨ. Ayaa pu che'eta na'a een ɨ Dioj jemi. Capu a'atɨ ru'umua'aree a'ij tɨ tira'amitejte'e ɨ Dioj silu aɨ pu'u ɨ xaijnyu'ucara'ara'an ɨ Dioj. 12Me tyajta ityan, catu tyaɨjna ancura'a ɨ hua'amua'atziira'a aɨme ɨ maj yan japuan huachaatɨme ɨ chaanaca silu aɨ pu tyejmi jemi huatyajturaa aɨjna ɨ xaijnyu'ucara'ara'an ɨ Dioj tyej ti yau'eitaa ta'ara'ani a'ij tɨ Dioj ari ruxé'evi'ira'a cɨn rɨ'ɨ titaatá'a. 13Ai pu aɨn pueen ɨ tyaj amue'ixaa. Capu aɨn na'a pueen ɨ hua'amua'atziira'a ɨ maj cɨn ta'itiiri'i ɨ tyetyaca silu ai pu aɨn pueen ɨ nyuucari tɨ ayan cɨn ta'itiiri'i ɨ xaijnyu'ucara'ara'an ɨ Dioj. Ayaa tu rɨcɨ tyej hue'ixaa a'ij tɨ huataujmua'a ɨ mua'atziira'a tɨ Dioj jemi e'ema'acan tyaɨjna cɨme'e ɨ nyuucari tɨ aɨn xaijnyu'ucara'ara'an ɨ Dioj ca'anijra'a taata'a tyej teyan tyu'utaxaj. 14Ajta aɨjna tɨ cai jemin huatyajturaa ɨ xaijnyu'ucara'ara'an ɨ Dioj, aɨ pu cai ra'ancura'asin aɨjna tɨ jemin e'ema'acan ɨ xaijnyu'ucara'ara'an ɨ Dioj, a'ini capu ti'itɨ a'ij huataujmua'a aɨjna jemi ɨ a'atɨ. Capu rɨ'ɨri tɨ aɨn yau'eitaa a'ara'ani a'ini ayaa pu ruxe'eve'e tɨ a'atɨ ayan jetzen araujca'anyen ɨ xaijnyu'ucara'ara'an ɨ Dioj, tɨ ij ayan tira'amitejtya'a a'ij tɨ huataujmua'a. 15Ajta aɨn tɨ jetzen araujca'anye ɨ xaijnyu'ucara'ara'an ɨ Dioj, nain pu ayan tira'amitejtya'a a'ame tɨ pua'a ayan ti'ivaɨre'e nusu cai. Ma ajta, capu rɨ'ɨri tɨ saɨj ayan ra'axɨjte'en aɨjna ɨ a'atɨ, tɨ pua'a ti'ivaɨre'e nusu cai. 16Ayan tɨcɨn: “¿A'ataani yee ru'umua'aree a'ij tɨ tira'amitejte'e ɨ tavastara'a tɨ ij aɨn a'atɨ ayan tira'itii?” Me tyajta ityan, ayaa pu ayan tita'amitejte'e a'ij tɨ ajta tira'amitejte'e ɨ Cɨriistu'u.

will be added

X\