1 Corintios 16

1Cɨme'en ɨ tumin sej rasaɨre'e sej si cɨn hua'utavaɨre'en aɨme ɨ mej Dioj jemi seijre'e, ayaa nu che'eta nyana'a tyaja'amueijcate'e a'ij nyej neri tihuéijca aɨme ɨ mej e'etyujsa'ɨri nain japua u Galacia. 2Ayaa xu huarɨni seij sajta seij, ajna xɨcajra'a tɨ jetzen tya'utye'itén ɨ iteeri. Che'e seij ayan ra'ajta'an ɨ ruche a'achu tɨ caj ti'ixe'evi'ira'a, tɨ pua'a Dioj raata'a eihua nusu cɨj na'a. Che'e aɨn rajsaɨre'en tɨj na'a sei iteeri tɨ ij cai che'e ayan ruxe'eva'a saj rajsa'ɨrihua'an ajna nyatɨ'ɨj nyaun a'atanyén. 3Nyatɨ'ɨj nyaun a'ara'asti, aj nu ni neyan hua'ure'epijte'esin ɨ yu'uxari aɨme ɨ saj hua'antihuau mej mi maɨjna cɨn majta ra'anya'a aujna u Jerusalén ɨ sej seri rajsaɨj saj hua'utapueijve'esin. 4Tɨ pua'a ajta ayan tina'amitejtya'a tɨ ayan titaatyava'ɨri nyaj nyajta nyaun á'ume'en, aɨ mu majta a'uju'u mua'aju'un nyeetzi jamuan. 5Nyatɨ'ɨj nyaun anacai a'atanyén u Macedonia, aj nu ni amuumuaarin. Me nyajta inyaa, nyauj mi'i nyaun u a'atanyén u Macedonia. 6Tij nyacai a'atzu muejmi jemi a'ateeri, na'ari neyan a'atyeevi'in tɨj na'a tɨ huaseevi'i a'ame sej si seyan naatyavaɨre'en saɨjna cɨme'e a'u tɨ na'a nyaj á'umej. 7Canu neyan raxe'eve'e nyaj ijii nyana'a amuaaseij nyej ni a'atzu nyana'a amuaamuaare, silu ayaa nu raxe'eve'e nyej ni a'atyeevi'in nyaj nyaun a'ucatii muejmi jemi, tɨ pua'a ayan tinata'acare'en ɨ tavastara'a. 8- 9Me nyajta inyaa, au nu a'utyaváa na'ame nyaujna u Efeso asta na'a cai tyaja'ure'enyen ajna matɨ'ɨj ti'iyeste maɨjna cɨme'e ta'araahua'apua tɨ ara'ase i iteeri. Ee xaa, ayaa nu huarɨni a'ini naa pu tinaavaɨ aɨjna cɨme'e ɨ nyej ti'imuare'e nyej ni eihua huapɨ'ɨ raatyavaɨre'en ɨ tavastara'a. Capu amɨn a'ij mej eihua nyejchaɨre'e. 10Ajta, tɨ'ɨj aun a'atanyén aɨjna ɨ Timuteeyu, sata'aj rɨ'ɨ tirájchaɨɨca tyamua'a naa, a'ini aɨ pu ayan che'eta na'a ti'ivaɨre'e ɨ tavastara'a jemi nyatɨj inyaa. 11Che'e cai a'atɨ raxaahuata. Tɨ'ɨj ajtahua'a u a'arajra'ani, sata'aj raata'an tɨj na'a tɨ ayan ruxe'eve'e tɨ ij ajtahua'a ya ra'asti nyeetzi jemi. Ayaa nu rachu'eve'e tɨ aɨn ya huacati hua'a jamuan ɨ seica ɨ ta'ihuaamua'a. 12Ajta aɨjna ɨ ta'ihuaara'a, aɨjna ɨ Apolos, eecan nu ca'anijra'a raata'acara'a na'aye'i tɨ muejmi jemi a'atanyén hua'a jamuan ɨ seica ɨ ta'ihuaamua'a. Ma ajta aɨn, capu a'uye'imɨɨ a'araa. Aj pu nu'u aun a'atanyejsin muejmi jemi tɨ'ɨj huatácɨ'ɨpáaca. 13Rɨ'ɨ xu'u muan. Sata'aj rɨ'ɨ ti'ityeseira'a saɨjna cɨme'e saj ra'astijre'e ɨ tavastara'a. Sata'aj sajta huatyaujca'anyen ɨ rutzajta'a. Sata'aj sajta araujca'anyen saɨjna jetze ɨ xaijnyu'ucara'ara'an ɨ Dioj sej si tya'utaviicue'i. 14Satɨj sana'a sej seyan rɨcɨ, sata'aj seyan rɨjca saɨjna cɨme'e saj huaujxe'eve'en. 15- 16Xu'uri ramua'aree ai mu aɨn pueen ɨ maj anacai huataujtu'iri'i ɨ tavastara'a jemi ayujna Acaya aɨme ɨ tyaɨtestyamua'ame'en aɨjna ɨ Estéfanas. Aɨ mu majta meri maɨjna cɨn autyajhuii maj hua'utyavaɨre'en aɨme ɨ mej Dioj jetze ajtyama'acan. Ayaa nu ca'anijra'a amuaata'aca, nye'ihuaamua'a, sej si hua'atzaahuatya'a aɨme, sajta naijmi'ica ɨ tyaɨte ɨ mej meyan che'eta mana'a ti'imuare'e tyatɨj ityan, ɨ maj majta tzaahuati'ira'a cɨn ti'ivaɨre'e tavastara'a jetze ma'acan. 17Nyaa nu xaa huatantyamua'ave matɨ'ɨj ya ra'a, aɨjna ɨ Estéfanas jamuan aɨjna ɨ Fortunato, ajta aɨjna ɨ Acaico. Aɨ mu xaa rɨ'ɨ tinaata'a maɨjna cɨme'e maj ya náamuaaraca'a muejmi jetze ma'acan tɨ ij cai ti'itɨ na'aturaatya'a. 18Aɨ mu rɨ'ɨ tinaata'a yu nyatzajta'a. Majta mu rɨ'ɨ amuaata'asin muejmi ɨ a'amua tzajta'a. Ayaa pu tyu'ujxe'eve'e saj rɨ'ɨ tihua'uta'an naijmi'ica ɨ tyetyaca mej meyan e'en matɨj aɨme ɨ maj hueica. 19Ya mu á'amuataujte'e aɨme ɨ mej e'etyujsa'ɨri hua'ateyujta'a tɨ ayun seijre'e tɨj na'a tɨ ayun huatacá'a iiya Asia. Ajta aɨjna ɨ Aquila, ajta aɨjna ɨ Priscila, aɨ mu tyamua'a naa á'amuataujte'e nyuucajtze'en ɨ tavastara'a. Ayaa mu che'eta mana'a ya á'amuataujte'e naijmi'i ɨ mej e'etyujsa'ɨri a'u mej e'eche aɨjna ɨ Aquila, ajta aɨjna ɨ Priscila. 20Naimi'i ɨ ta'ihuaamua'a ɨ mej ya huati, aɨ mu majta á'amuataujte'e. Sata'aj huaujtaujte'en tyamua'a naa, su'ityaujvisi'itɨmua'acare'e nyuucajtze'en ɨ tavastara'a. 21Nyajta inyaa, i nyaj Pablo pueen, nyamuajca'a nu cɨn tyaja'amuayu'use'e nyej ni nyajta amuaatataujte'en. 22Tɨ pua'a a'atɨ cai raxe'eva'a ɨ tavastara'a, che'e ayan pueijtzi raacɨ'ɨti. Che'e ya uvé'enyen ɨ tavastara'a. 23Che'e aɨn tavastara'a, aɨjna ɨ Jesús, che'e aɨn rɨ'ɨ tyajamuata'acare'en. 24Eihua nu nyajta a'amuaxe'eve'e nyaɨjna cɨme'e saj sajta saɨjna jetze ajtyama'acan ɨ tavastara'a, aɨjna ɨ Jesús. Yaa pu'u, che'e ayan tyaja'ure'enyen.

will be added

X\