1 Corintios 15

1Nyajta nu neyan tyaja'amue'ixaate'e, nye'ihuaamua'a, sej si ra'utamua'aree a'ij nyaj eenye'en cɨn tyajamue'ixaa nyaɨjna ɨ nyuucari tɨ cɨn Dioj jamue'iratuaasin, ɨ saj sajta ra'ancura'a, ɨ saj sajta sauj seyan jemin seijre'e. 2Ai pu aɨn pueen ɨ nyuucari tɨ cɨn Dioj amue'iratuaasin tɨ pua'a sauj seyan ra'astijra'a a'ij nyej neri tyajamuaata'ixaa. Na'ari cai, capu ti'itɨj a'ij tyaja'amuavaɨre'e tɨ pua'a saɨque sana'a tira'antzaahua. 3Ayaa na'a, a'ini ayaa nu che'eta nyana'a a'amua jemi raatyajtua nyaɨjna ɨ nyaj nyajta ra'ancura'a ɨ tɨ eitze'e ruxe'eve'e tyaj raamua'aree tɨ aɨn Cɨriistu'u huamɨ'ɨ tajetze ma'acan tɨ ij titaatauuni'i ɨ tyaj cɨn autyajturaa ɨ Dioj jemi. Ayaa pu te'eyu'usi'i ɨ yu'uxari jetze. 4Matɨ'ɨj nu'u ra'ava'ana, ajta, tɨ'ɨj ayan tyauuma'aca hueica xɨcaj tzajta'a, Dioj pu ayan ra'ajjáj hua'a tzajta'a ɨ mɨ'ɨchite a'ij tɨ te'eyu'usi'i ɨ yu'uxari jetze. 5Aj pu'i aɨjna jemi huataseijre ɨ Pedro, ajta e'eyan hua'a jemi ɨ maj tamuaamuata'a japuan saɨj ara'ase. 6Ajta e'eyan aɨme jemi huataseijre ɨ mej meyan a'ara'ase a'achu cumu anxɨ cieentu japuan cɨj caj matɨ'ɨj naijmi'i u e'etyujsaɨɨra'aca'a. Mauche'e mu mui'itɨ ruuri, majta seica, meri huacuii. 7Tɨ'ɨqui ajta aɨjna jemi huataseijre ɨ Jacobo, ajta e'eyan naijmi'ica jemi ɨ tɨ hua'antihuau. 8- 9Ajta, nyeetzi jemi pu'uqui te'entipua'ari tɨ ayan huataseijre. Tij ayaa nu huanu'eihuaca'a matɨ'ɨj cai xɨ nyechu'eva'aca'a, a'ini nyaa nu nyaɨn pueen ɨ tɨ eitze'e cɨle'enye'en cɨn ti'ityejvee hua'a jemi tɨ Dioj hua'antihuau. Ee xaa nya'u, capu ayan tiraavijte'e nyej neyan raataxaj yee nyaa nu hua'a jetze ajtyama'acan aɨme ɨ tɨ Dioj hua'antihuau, a'ini nyaa nu huapɨ'ɨ a'ij pua'a hua'uruu aɨme ɨ mej e'etyujsa'ɨrihua'a mej mi raatyanajche ɨ Dioj. 10Ma ajta Dioj, aɨ pu rɨ'ɨ tinaata'a. Aɨj nu cɨn nyaa nu nyaɨn pueen seij tɨ Dioj na'antihuau. Ajta eecan pu huapɨ'ɨ tyu'utyavaɨ tɨ aɨn ayan rɨ'ɨ tinaata'a a'ini eitze'e nu ca'anin cɨn tyu'umuarej macai ɨ seica. Ma ajta, Dioj pu aɨn pueenya'a tɨ ca'anijra'a naata'a. Canu nyasaɨj nyana'a tyu'umuarej. 11Capu amɨn a'ij. Capu jetzen ruxe'eve'e tɨ pua'a aɨme me tyu'umuarej nusu inyaa. Naimi'i tu teyan che'eta tyana'a tihue'ixaate'e. Sajta muan, ayaa xu che'eta sana'a tya'antzaahua. 12Ajta, tɨ pua'a teri teyan tyajamue'ixaa tɨ Dioj ra'ajjáj ɨ Cɨriistu'u hua'a tzajta'a ɨ mɨ'ɨchite, ¿a'ini een cɨme'e meyan ti'ixaata mua'aye'i seica, ɨ mej a'amua jetze ajtyama'acan aɨjna cɨme'e maj nu'u cai che'e huatarujsin aɨme ɨ mej meri huacuii? 13Ayaa nu tyaja'amue'ixaate'e. Tɨ pua'a ayan macai che'e huatarun aɨme ɨ mej meri huacuii, capu ajta Dioj ra'ajjáj ɨ Cɨriistu'u hua'a tzajta'a ɨ mɨ'ɨchite. 14Ajta, tɨ pua'a Dioj cai ra'ajjáj ɨ Cɨriistu'u, capu ti'itɨ vaɨre'e ɨ tyej teri tyajamue'ixaa, ajta capu ti'itɨj vaɨre'e sej seyan tya'atzaahuate'e. 15Ajta, ayaa pu te'eme tyaj hue'ita'ame pueen tyaɨjna cɨme'e ɨ tyaj cɨn tyu'utaxajtaca'a tyaɨjna cɨme'en ɨ Dioj, a'ini tu'uri teyan raataxajtaca'a yee: “Aɨ pu ra'ajjáj ɨ Cɨriistu'u hua'a tzajta'a ɨ mɨ'ɨchite.” Ma ajta cai capu, tɨ pua'a macai che'e huatarun ɨ mej meri huacuii. Ee xaa nya'u, tɨ pua'a ayen een matɨj seica ti'ixaxa'a, capu Dioj ayan ra'ajjáj. 16Ayaa pu'u, tɨ pua'a Dioj cai hua'ajjájpuaxɨ'ɨ aɨme ɨ mej meri huacuii, ayaa pu huataujmua'a tɨ cai Dioj ajta ra'ajjáj ɨ Cɨriistu'u. 17Tɨ pua'a cai ra'ajjáj aɨjna ɨ Cɨriistu'u, capu ti'itɨj vaɨre'e sej seyan tya'atzaahuate'e. Ajta, tɨ pua'a cai ra'ajjáj, capu ayan a'amua japua huanyúu ɨ saj cɨn autyajturaa ɨ Dioj jemi. 18Ajta aɨme ɨ mej meyan tya'atzaahuatya'a ɨ Cɨriistu'u jemi muaacuii, mu'uri á'uvej. 19Tɨ pua'a ayaa na'a auj titaatyava'ɨri tyej tyauj i'iruuri tyej teyan ra'atzaahuatya'a ɨ Cɨriistu'u, eitze'e pu a'ij pua'a ti'itaruure tɨ cai a'ij tihua'aruure naijmi'ica aɨme ɨ seica ɨ mej yan japuan seijre'e ɨ chaanaca. 20Ma ajta xaa, ayaa pu ti'ayajna tɨ Cɨriistu'u a'itáraa hua'a tzajta'a ɨ mɨ'ɨchite. Ai pu aɨn pueen ɨ ta'anaayeijxɨ ɨ tyaj cɨn raamua'aree maj majta huatarujsin aɨme ɨ mej meri huacuii. 21Ayaa pu'u na'a, a'ini ayaa pu tihua'acɨ'ɨti ɨ tyaɨte mej meyan huacui'ini maɨjna cɨme'e tɨ seij na'a ɨ tyaata'a ayan autyajturaa ɨ Dioj jemi, ayaa pu che'eta na'a tihua'acɨ'ɨti maj huatarun maɨjna cɨme'e tɨ ajta seij na'a ɨ tyaata'a huatarú hua'a tzajta'a ɨ mɨ'ɨchite. 22A'ini naimi'i mu meyan cui'ica maɨjna cɨme'e tɨ aɨn Adán autyajturaa ɨ Dioj jemi, ayaa mu che'eta mana'a huatarujsin maɨjna cɨme'e mej maɨjna jetze ajtyama'acan aɨjna ɨ Cɨriistu'u. 23Ma ajta, ayaa pu tihua'acɨ'ɨti a'ij tɨ tihua'uxa'apɨ'ɨntari'iri'i ɨ xɨcajra'an jetze tɨ ayan tiraavijte'e. Anacai pu huatarú aɨjna ɨ Cɨriistu'u. Ajta e'eyan, tɨ'ɨj ya uvé'enyen, aɨme mu huatarun aɨme ɨ maj Cɨriistu'u jetze ajtyama'acan. 24Aj pu'i nain te'entipua'arite'esin. Anacai pu Cɨriistu'u aɨme antipua'arite'esin matɨj mana'a tityátatyá'upu'u, ajta aɨme ɨ mej ti'itɨj cɨn antyujmua'aree. Aj pu'i xaa tyu'utatuire'esin ɨ Dioj jemi tɨj na'a aɨn tɨ cɨn antyujmua'areeraca'a. 25Ayaa pu'u, a'ini ayaa pu ruxe'eve'e tɨ aɨn Cɨriistu'u ayan tyu'utaijta asta na'a cai hua'utyamue'itɨn matɨj mana'a pua'amua maj rajchaɨre'e. 26Ajta ɨ tɨ cɨn te'entipua'arite'esin tɨ raatyamue'itɨn ɨ tɨ rajchaɨre'e, ai pu aɨn pueen ɨ tɨ cɨn u'umɨ'ɨni. 27Ajta, tɨ'ɨj ayan ti'ixa tɨ nu'u aɨn nain tyu'utyaamue'itɨ, capu xaa nya'u ayan huataujmua'a tɨ aɨn ajta raatyamue'itɨ aɨjna ɨ Dioj tɨ ayan raata'a tɨ nain cɨn antyujmua'aréera. 28Tɨ'ɨj tyu'utyamue'itɨn nain tɨj na'a tɨ iiyan ti'iseijre'e, ajta ute'e tɨ teje'eseijre'e, aɨjna tɨ i'i yaujra'an pueen ɨ Dioj, aɨ pu rusaɨj huataujtuire'esin aɨjna jemi ɨ Dioj tɨ nain cɨn antyujmua'areeraca'a, matɨj mana'a pua'amua ɨ maj iiyan seijre'e chaanaca japua, ajta u tajapua. 29Tɨ pua'a pɨ na'a ayan saɨque eenye'en, ¿a'ij tɨ huataujmua'atiiche'e mej meyan ti'ijrɨ'ɨre ɨ tyaɨte maj huamuaɨ'ɨvijhua aɨme jetze ma'acan ɨ mej meri huacuii? Tɨ pua'a macai che'e meyan huatarun ɨ mej meri huacuii, ¿a'ini een cɨme'e meyan hua'a nyuucajtze'en rumuaɨ'ɨvijhua? 30Tyajta ityan, ¿a'ini een cɨme'e teyan á'ataca'anye tɨ'ɨj pɨ na'a tyej teyan huacui'ini pueijtzi cɨme'e? 31Ayaa nu tyaja'amue'ixaate'e tzaahuati'ira'a cɨme'e nyaɨjna cɨme'e nyaj ahuantzaahuate'en muejmi cɨme'e ɨ Cɨriistu'u jemi, aɨjna ɨ Jesús tɨ ajta tavastara'a pueen. Tɨ'ɨj pɨ na'a nain xɨcaj tzajta'a, ayaa pu tina'amitejte'e inyeetzi nyej neri mɨ'ɨmɨca. 32Tɨ pua'a macai huatarun ɨ mej meri huacuii, ¿a'ini ti'itɨj tinatyava'ɨri nyaj neyan tyaata'a pueen, tɨ pua'a neyan huatenya'use'en hua'a jamuan ɨ ti'ityaɨn aujna a'ahua'a u Efeso? Ayaa mu xaa ti'ixaxa'a tɨcɨn: “Tiche'e yee tyu'ucua'ani, tyajta ti'itɨ antiye'en, a'ini ruijmua'a tu cui'ini.” 33Caxu rata'acare'en tɨ a'atɨ a'amuacuanamua ti'itɨj cɨme'e. Casi'i, aɨme ɨ mej a'ij pua'a titetyujcha'ɨ, ayaa mu nu'u a'ij pua'a ca'anijra'a hua'ata'aca ɨ maj rɨ'ɨ titetyujcha'ɨ mej mi majta meyan che'eta mana'a a'ij pua'a huarɨni. 34Sata'aj sajtahua'a rɨ'ɨ me tityaumuámua'aren, sata'aj sajta raatapua'ajta ɨ saj cɨn atya'ɨtza'ara ɨ Dioj jemi. Camu tzaahuati'ira'a cɨn ramua'ate ɨ Dioj seica ɨ mej a'amua jetze ajtyama'acan. Ayaa nu een cɨn tyaja'amue'ixaate'e nyej ni amuaatatyevi'iraste'en. 35Ma ajta, tɨ pua'a a'atɨ ayan tyu'utaihua'usin tɨcɨn: “¿A'ini ye'i ti'irɨ'ɨri mej huatarun ɨ mɨ'ɨchite? ¿Ti'itajni tevijra'an cɨn meyan seira'a mua'aju'un?” 36Me nyajta inyaa, ayaa nu tiraata'ixaate'esin yee, mɨ paj cai máumua'aree. Aɨjna ɨ jatzi paj raahuaste, capu ajnyejsin tɨ pua'a cai anacai a'utátzi'ite. 37Patɨ'ɨj ti'ihuaste'e, capej paɨjna huaste'e ɨ cɨye tɨ ajnyejsin silu aɨj paj huaste'en ɨ jatzi tɨ pua'a ti'itɨ triigu nusu ti'itɨ seica. 38Ajta aɨn ɨ Dioj, aɨ pu ayan rata'aca ɨ cɨya'ara'an a'ij tɨ ari tiraaxa'apɨ'ɨntari'iri'i, seij ajta seij ɨ jatzi. 39Ajta, capu ruxa'a na'a e'en ɨ hue'ira'a. Seij pu saɨque e'enya'a tyahue'ira'a ɨ tyaata'a. Ajta saɨque mu e'enye'en tyahue'ira'a ɨ ya'amuaate. Majta aɨme ɨ pina'ase, aɨ mu majta saɨque e'enye'en tyahue'ira'a. Aɨ mu majta ɨ hue'ité, saɨque mu majta e'enye'en tyahue'ira'a. 40Ajta tɨ ute'e ti'iseijre'e, ajta tɨ iiyan ti'iseijre'e chaanaca japua, capu ruxa'a na'a ti'en. Ajta, seij pu aɨn pueen ɨ tɨ naa tihua'aseijrate'e aɨjna tɨ ute'e ti'iseijre'e. Ajta seij pu ajta aɨn pueen ɨ tɨ naa tihua'aseijrate'e aɨjna tɨ ti'iseijre'e iiyan chaanaca japua. 41Aɨjna ɨ xɨcaj, aɨ pu seij aɨn pueen tɨ naa tihua'aseijrate'e. Ajta ɨ maxcɨra'i, capu ruxa'aj na'a ayan tihua'aseijrate'e. Majta aɨme ɨ xu'ura'ave, camu majta ruxa'a mana'a meyan e'en. 42Ayaa pu che'eta na'a e'enye'en ti'iseijre'e aɨjna cɨme'e ɨ mej huatarun aɨme ɨ mej meri huacuii. Aɨjna ɨ tevijra'an tɨ huanu'eihuaca'a, aɨ pu á'apua'aren. Ajta aɨn tɨ Dioj rajjajsin, capu che'e a'anaj á'apua'aren aɨjna. 43Aɨjna tevijra'an, ayaa pu huanu'eihuaca'a maj cai rɨ'ɨ tirata'acare'en. Ajta, tɨ'ɨj Dioj rajjan, aɨ pu tyamua'a naa rɨ'ɨ tiraata'asin. Tɨ'ɨj huanu'eihua aɨjna ɨ tevijra'an, capu a'atzu ruca'anye. Ajta, tɨ'ɨj Dioj rajjan, aɨ pu rumuare'eri'ira'a cɨn rajjajsin. 44Ayaa pu eenye'en nú'eihuan tɨ ij tya'utaviicue'i iiyan chaanaca japua. Ajta, ayaa pu eenye'en rajjajsin tɨ ij ayan jetzen araujca'anyen ɨ xaijnyu'ucara'ara'an ɨ Dioj. Tɨ pua'a ayan seijre'e ɨ tevijra'an tɨ ayan tya'utaviicue'i iiyan chaanaca japua, ajta pu ayan che'eta na'a seijra'a ɨ tevijra'an tɨ jetzen araujca'anyen ɨ xaijnyu'ucara'ara'an ɨ Dioj. 45Jee xaa nya'u, ayaa pu te'eyu'usi'i tɨcɨn: “Aɨjna ɨ tevi, aɨjna ɨ Adán tɨ anacai huataseijre, aɨ pu ayan eenye'en ruuri huatyajturaa.” Ajta aɨjna ɨ tevi, aɨjna tɨ ajta Adán pɨrɨcɨ ɨ tu'uve'etyajtɨ, ayaa pu eenye'en huatyajturaa xaijnyu'ucari tɨ ayej auj tihua'ata'aca mej meyan ruuri mua'ara'ani. 46Capu anacai huataseijre aɨjna tɨ jetzen araujca'anyen ɨ xaijnyu'ucara'ara'an ɨ Dioj, silu aɨjna tɨ rusaɨj ta'utaviicue'i iiyan chaanaca japua. Tɨ'ɨj aɨn ayan huataseijre'en, aj pu xaa huataseijre'esin aɨjna tɨ aɨn xaijnyu'ucara'ara'an jetze araujca'anyen. 47Ajta, aɨn ɨ tyaata'a, ɨ tɨ anacai huataseijre, aɨ pu chuej cɨn huatyataavijhuaca'a. Aɨj pu cɨn, iiyan maj chuej japua ma'acan. Ajta ɨ tyaata'a, ɨ tɨ hua'apua tɨ huanyej, aɨ pu ute'e e'ema'acan. 48Majta aɨme ɨ mej yan japuan huachaatɨme iiyan chaanaca japua, ayaa mu e'en tɨj ajta een ɨ tevi tɨ chuej japua ma'acan. Majta aɨme ɨ mej jetzen ajtyama'acan aɨjna tɨ ute'e e'ema'acan, ayaa mu majta e'en tɨj een aɨjna ɨ a'atɨ. 49A'ij tyej teri teyan e'en taavijra'an cɨme'e aɨjna ɨ tevi tɨ chuej japua ma'acan, ayaa tu che'eta tyana'a eenya'a ta'aju'un taavijra'an cɨme'e aɨjna ɨ tevi tɨ ute'e e'ema'acan. 50Ayaa nu tyaja'amue'ixaate'e, nye'ihuaamua'a. Capu rɨ'ɨri tɨ aun a'utyarute a'u tɨ Dioj tie'ijta a'atɨ tɨ na'a tɨ auj ayen seijre'e taavijra'an cɨme'e aɨjna ɨ tevi tɨ chuej japua ma'acan. Ajta, aɨjna ɨ a'atɨ tɨ á'apua'aren, capu rɨ'ɨri tɨ ayan tiraacɨ'ɨti aɨjna tɨ cai a'anaj á'apua'aren. 51Xaanamuajri'i muan, a'ini ayaa nu tyajamuaata'ixaate'esin ti'itɨj cɨme'e tɨ ru'avaataca'a ɨ Dioj jemi. Catu naimi'i cui'ini, silu Dioj pu naijmi'ica saɨque taruuren ityejmi. 52- 53Ayaa pu te'eme ajna xɨcajra'a tɨ jetzen huatánamuajre'en ɨ trompeeta tɨ cɨme'en nain te'entipua'arite'esin. Tɨ'ɨj aɨn tɨ tajapua ti'ivaɨre'e ucaajijhua ɨ trompeeta jetze, aj pu'i ayan seiira'a a'ame tɨ'ɨj maj huatyamaxcava'axɨ'ɨn iye'itzi cɨme'e. Aj pu'i Dioj huá'ajjajpuaxɨ'ɨsin aɨme ɨ mej meri huacuii mej mi cai che'e a'anaj aupua'are. Tyajta ityan, saɨque tu huatyátaruurejsin, a'ini ayaa pu ruxe'eve'e tɨ aɨn tɨ á'apua'aren ayan saɨque huaujruuren tɨ ij cai che'e aupua'are. Ajta ayan ruxe'eve'e tɨ aɨn tɨ mɨ'ɨni, ajta ayan saɨque huaujruuren tɨ ij cai che'e huamɨ'ɨni. 54Tɨ'ɨj saɨque huaujruuren aɨjna tɨ á'apua'aren tɨ ij cai che'e aupua'are, ajta tɨ'ɨj ari saɨque huaujruu aɨjna tɨ mɨ'ɨniiche'en tɨ ij cai che'e huamɨ'ɨni, aj pu xaa ayan tyaja'ure'enyejsin a'ij tɨ anacai te'eyu'usi'ihuaca'a, aɨjna ɨ nyuucari tɨ cɨme'en raxa yee: “Nain pu hui cɨn ratyaamue'itɨ aɨjna ɨ tɨ hua'acui'ica. 55Mɨ paj hua'acui'ica, ¿a'uni a'ij een ɨ paj cɨn hua'utyaamue'itɨ? Capu me'e e'eseijre'e xaa nya'u.” Ajta ayan tɨcɨn: “Mɨ paj cɨn tihua'upueij, ¿a'uni a'ij een? Capu xaa nya'u ma'a ja'ahua'a.” 56Ajta aɨjna tɨ cɨn tihua'apueijte'e aɨjna tɨ ajta hua'acui'ica, ai pu aɨjna jetze araujca'anyen ɨ maj cɨn atya'ɨtza'ara ɨ Dioj jemi. Ajta aɨjna ɨ nyuucari ɨ maj cɨn ti'ijta, ai pu aɨn pueen tɨ ca'anijra'a hua'ata'aca mej mi meyan auta'ɨtza'ara'an ɨ Dioj jemi. 57Ma ajta, tiche'e teyan rɨ'ɨ tirata'acare'en tyaɨjna ɨ Dioj tɨ ayan titata'aca tyej teyan tyu'utyamue'itɨn tyaɨjna cɨme'e tyej jetzen ajtyama'acan ɨ tavastara'a, aɨjna ɨ Jesús tɨ ajta Cɨriistu'u pueen. 58Aɨj xu cɨn seyan huarɨni, nye'ihuaamua'a, mɨ nyaj a'amuaxe'eve'e huapɨ'ɨ. Sata'aj rɨ'ɨ ti'ityeseira'a a'anaj tɨ na'a, sata'aj sajta tya'utaviicue'i tɨ ij cai a'atɨ amua'ari'i ɨ á'amuamua'atziira'a. Sata'aj sajta a'ujca'anyaacan cɨn tyu'umuare'en ɨ tavastara'a jemi a'anaj tɨ na'a, a'ini xu'uri ramua'aree tɨ eecan huapɨ'ɨ tyajamuatyava'ɨri. Caxu huaapua'a sana'a ti'imuare'e tavastara'a jetze ma'acan.

will be added

X\