1 Corintios 14

1Sata'aj seyan rahuauca saj haujxe'eve'en seij sajta seij. Ayaa pu i éenya'a, sauche'e su seyan sajta rahuauca tɨ Dioj rɨ'ɨ tyajamuaata'acare'en aɨjna cɨme'e ɨ muáre'eri'ira'ara'an tɨ aɨjna jemi seijre'e ɨ xaijnyu'ucara'ara'an ɨ Dioj, sej si seyan tyu'utaxaj Dioj jetze ma'acan. 2Ma ajta, aɨn ɨ tɨ raayɨ'ɨtɨ tɨ seij nyuucari cɨn tyu'utaxaj, capu ayan tihue'ixaate'e ɨ tyaɨte a'ini camu yau'eitaa mua'ara'ani a'ij tɨ ti'ixa. Aɨ pu'u jamuan ti'ixa ɨ Dioj aɨjna cɨme'e tɨ ru'avaa jemin ɨ xaijnyu'ucara'ara'an ɨ Dioj. 3Ma ajta aɨn tɨ Dioj jetze ma'acan ti'ixaxa'a, aɨ pu xaa aɨme ti'ixaate'e ɨ tetyaca tɨ ij rɨ'ɨ hua'uruuren, tɨ ij ajta ca'anijra'a hua'uta'an, tɨ ij ajta rɨ'ɨ tihua'utajeeve. 4Ajta aɨn tɨ seij nyuucari cɨn ti'ixaxa'a, aɨ pu rusaɨj rɨ'ɨ ruruure. Ma ajta aɨn tɨ Dioj jetze ma'acan ti'ixaxa'a, aɨ pu rɨ'ɨ hua'aruuren naijmi'ica ɨ mej aun e'etyujsa'ɨri teyujta'a. 5Ayaa nu xaa ti'ijxe'eve'e saj naimi'i seyan seica nyuucari cɨn tyu'utaxaj. Me nyajta inyaa, eitze'e nu neyan ti'ijxe'eve'e aɨjna saj Dioj jetze ma'acan ti'ixaxa'ata'an. Casi'i muaan, tɨ pua'a cai ma'a a'ahua'a a'atɨ tɨ ayan tihue'ixaate'en aɨme jemi ɨ tyaɨte a'ij tɨ huataujmua'a aɨjna tɨ raataxajtaca'a aɨjna tɨ seij nyuucari cɨn ti'ixaxa'a, tɨ pua'a cai a'atɨ tɨ ayan raayɨ'ɨtɨ, capu a'ij ti'irɨ'ɨri tɨ rɨ'ɨ hua'uruuren aɨme ɨ mej e'etyujsa'ɨri teyujta'a. Aɨj pu cɨn eitze'e pu ruxe'eva'a a'ame aɨjna tɨ Dioj jetze ma'acan ti'ixaxa'a cai aɨjna ɨ a'atɨ tɨ seij nyuucari cɨn ti'ixaxa'a. 6Casi'i, nye'ihuaamua'a, tɨ pua'a nyaun a'umé'en muejmi jemi nyej tyajamuaata'ixaate'en seij cɨme'e ɨ nyuucari ɨ saj cai yau'eite, canu ti'itɨ cɨn a'ij tyajamuaatyavaɨre'esin. Ayaa pu te'eme tɨ pua'a nyacai tyajamuaata'ixaate'en nyaɨjna tɨ ru'avaataca'a ɨ Dioj jemi, nusu tɨ pua'a nyacai Dioj jetze ma'acan na'ari tɨ pua'a nyacai ti'itɨj cɨn tyajamuaata'ixaate'en tɨ ca'anijra'a jamuaata'an ca'ɨn tɨ pua'a nyacai tyajamuaata'itii. 7Ayaa pu che'eta na'a ruxe'eve'e tɨ a'atɨ ayan a'ahuauritaacan cɨn tyu'utacuiina aɨjna jetze ɨ tuuturu'u tɨ cai uráxaijnyu'uca na'ari aɨjna jetze ɨ mej jetzen ruxɨte cɨn ti'icuinaca. Tɨ pua'a cai a'ahuaritaacan cɨn tyu'utacuiina ɨ tuuturu'u jetze, ¿a'ini auj ti'irɨ'ɨri tɨ a'atɨ ayan raamua'aree ti'itɨ tɨ chuiicarira'a pueen? 8Ajta, tɨ pua'a cai a'ahuauritaacan cɨn huatánamuajre'en ɨ corneeta jetze, capu a'atɨ rucaten tɨ ij u a'uve'enya'use'en. 9Ayaa pu che'eta na'a een muejmi jemi, tɨ pua'a seyan tihua'uta'ixaate'en ɨ tyaɨte nyuucari cɨme'e ɨ maj cai yau'eite. ¿A'ini ti'irɨ'ɨri tɨ a'atɨ ayan raamua'aree a'ij tɨ huataujmua'a ɨ sej raataxajtaca'a? Capu a'ij ti'irɨ'ɨri. Capu ti'itɨj vaɨra'a a'ame ɨ saj raataxajtaca'a. 10Tyamua'a pu ti'imui'i ɨ nyuucari tɨ iiyan namuajre'e chaanaca japua. Ajta naimi'i mu meyan a'ahuaritaacan cɨn ti'ixaxa'a. 11Ma ajta, tɨ pua'a nyacai ramua'aree a'ij tɨ huataujmua'a ɨ nyuucari, ayaa nu seiira'a na'ame ɨ jemin ɨ tɨ raxa tɨj a'atɨ tɨ seij chuejra'a japua e'ema'acan. Ajta aɨjna tɨ ti'ixa, aɨ pu ajta inyeetzi jemi ayej eenya'a seiira'a a'ame tɨj a'atɨ tɨ seij chuejra'a japua e'ema'acan. 12Aɨj pu cɨn, mɨ saj huapɨ'ɨ raxe'eve'e tɨ aɨn xaijnyu'ucara'ara'an ɨ Dioj ti'itɨj amuaata'an, ayaa pu che'eta na'a een muejmi cɨme'e, sata'aj ahuaujca'anyen saj hua'utyamue'itɨn ɨ seica saɨjna cɨme'e saj rɨ'ɨ hua'uruuren aɨme ɨ mej u e'etyujsa'ɨri teyujta'a. 13Ma ajta aɨn tɨ seij nyuucari cɨn ti'ixaxa'a, ayaa pu ruxe'eve'e tɨ aɨn a'atɨ ayan raatahuavii tɨ aɨn Dioj ayan raata'an ɨ muáre'eri'ira'ara'an tɨ cɨn yau'eitaa a'ara'ani a'ij tɨ ti'ixaj. 14Ayaa pu xaa nya'u ti'en, a'ini tɨ pua'a neyan nyaɨjna cɨn raatyajhuauni seij cɨme'e ɨ nyuucari, nyaxaijnyu'uca pu xaa ajta huatyenyuusin. Ma ajta, nyamua'atziira'a pu cai ti'itɨ cɨn ti'imue'itɨn. 15Ari inyaa, a'ini nyarɨni. Nyaxaijnyu'uca nu cɨn xaa huatyenyuusin. Nyajta neyan che'eta nyana'a nyamua'atziira'a cɨn neyan rɨni. Nyajta nu tyu'utachuiica nyaxaijnyu'uca cɨme'e, nyajta ɨ nyamua'atziira'a cɨme'e. 16Tɨ pua'a peyan rɨ'ɨ tiraata'an ɨ Dioj a'axaijnyu'uca cɨme'e, ¿a'ini ti'irɨ'ɨri tɨ a'atɨ tɨ cai muejmi jetze ajtyama'acan ayan huatyejnyuuni yee che'e ayen tya'ara'ani tɨ'ɨj ayan muaanamua pej peyan rɨ'ɨ tiraata'aca ɨ Dioj? Capu rɨ'ɨri a'ini aɨjna ɨ a'atɨ, capu yau'eitaa a'ame a'ij pej tyu'utaxajta. 17Rɨ'ɨriista pu a'ame pej peyan tyamua'a naa rɨ'ɨ tiraata'an ɨ Dioj. Ma pajta muaa, capaj a'ij rɨ'ɨ raaruu ɨ axa'aj tevi. 18Ayaa nu een cɨn eihua rɨ'ɨ tirata'aca ɨ Dioj nyaɨjna cɨme'e nyej eitze'e neyan ti'ixaxa'a seica cɨme'e ɨ nyuucari sacai naimi'i muan. 19Nyajta, nyatɨ'ɨj hua'a jemi a'utyavaaca aɨme ɨ mej e'etyujsa'ɨri teyujta'a, nyej ni neyan tihua'uta'itii, eitze'e pu na'araanajchi inyeetzi nyaj a'ahuaritaacan cɨn tihua'uta'ixaate'en anxɨ nyuucari cɨme'e nyacai nyej neyan tyu'utaxaj tamuaamuata'a vi'ira'a nyuuca seij cɨme'e ɨ nyuucari ɨ maj cai yau'eite. 20Nye'ihuaamua'a, caxu che'e seyan ti'imuajca matɨj ɨ tɨ'ɨrii, silu sata'aj seyan eenye'en seiira'a matɨj ɨ tɨ'ɨrii saɨjna cɨme'e saj cai a'ij pua'a rɨcɨ. Sata'aj sajta seyan che'eta sana'a tyu'umua'ati matɨj aɨme ɨ mej meri vaujsi. 21Ayaa pu te'eyu'usi'i aɨjna jetze ɨ nyuucari ɨ maj cɨn ti'ijta tɨcɨn: “Ayaa nu tihua'uta'ixaate'esin aɨjna ɨ tyaɨtejra'a nyaɨjna cɨme'e ɨ mej seica nyuucari cɨn ti'ixaxa'a. Aɨme ɨ mej seij chuejra'a japua e'ema'acan, aɨ mu tihua'uta'ixaate'esin. Ma majta aɨme ɨ nyetyaɨtestyamua'a, camu na'ara'astijre'esin inyeetzi.” 22Aɨj pu cɨn, aɨjna ɨ nyuucari ɨ maj cai yau'eite, capu ayan ti'ivaɨre'e tɨ i tihua'uta'itii aɨme ɨ mej tya'atzaahuate'e silu ayaa pu'u na'a ti'ivaɨre'e tɨ i tihua'uta'itii hua'a jemi ɨ maj cai tya'atzaahuate'e. 23Ee xaa nya'u, ayaa pu ti'ayajna. Casi'i, a'ini ti'itɨ metyu'utaxajta ɨ seica ɨ maj cai tya'atzaahuate'e, na'ari ɨ seica ɨ maj cai rɨ'ɨ me tityaumuámua'aree tɨ pua'a aun ma'utyarute a'u sej e'etyujsa'ɨri. Sajta muan, tɨ pua'a xu seyan naimi'i ti'ixaata xa'aju'un seica cɨme'e ɨ nyuucari ɨ maj cai yau'eite, a'ini tihua'amityejte'e aɨme. ¿Ni qui seyan nu'u tya'ataujtɨmue'iri'i? Ee xaa nya'u. 24Ajta, tɨ pua'a seij aun a'utyarute muejmi jemi tɨ cai tya'atzaahuate'e nusu tɨ cai muejmi jetze ajtyama'acan, sajta muan, tɨ pua'a xu naimi'i ti'ixaata xa'aju'un ɨ Dioj jetze ma'acan, ayaa pu tiraatamitejte'esin saj naimi'i ra'axɨjte'en aɨjna cɨme'e tɨ aɨn ayan autyajturaa ɨ Dioj jemi. 25Aj pu'i ayan huataseijre'esin tɨj na'a tɨ ru'avaataca'a u tzajta'an. Ajta aɨn tyaata'a, a a'arávaɨjtzi a chuaata'a. Aɨ pu raatyanajchi ɨ Dioj, ajta ayan tyu'utaxajta yee tɨ Dioj muejmi jemi seijre'e. 26¿A'ini sana'a sij rɨni nye'ihuaamua'a? Sata'aj seyan huarɨni satɨj sana'a saj e'etyujsaɨre'esin. Sata'aj naiimi'i rɨ'ɨ huaujruuren ti'itɨ cɨme'e, tɨ pua'a seij ti'ichuiicamɨ'ɨ, nusu seij ti'itɨ cɨn tihue'itiiramɨ'ɨ na'ari ti'ixajtamɨ'ɨ ɨ tɨ jetzen raatyajtuaa ɨ Dioj caɨn seij nyuucari cɨn ti'ixajtamɨ'ɨ, na'ari saɨj ayan raxe'eve'e tɨ tihue'ixaate'en a'ij tɨ huataujmua'a ɨ nyuucari tɨ raataxajtaca'a ɨ saɨj. Sata'aj seyan huarɨni sej rɨ'ɨ hua'uruuren naijmi'ica. 27Tɨ pua'a seica meyan raxe'eva'a maj seica nyuucari cɨn tyu'utaxaj, miche'e meyan eenye'en maj hua'apua ma'a na'ari maj hueica ma'a. Miche'e meyan tyu'utaxaj seij majta seij. Ajta, che'e seij ayan tihue'ixaate'en a'ij tɨ huataujmua'a. 28Ajta, tɨ pua'a cai ma'a a'atɨ tɨ ayan raayɨ'ɨtɨ tɨ ayan tihue'ixaate'en a'ij tɨ huataujmua'a, che'e aɨn cai ti'ixajta hua'a jemi ɨ mej e'etyujsa'ɨri. Che'e aɨn rusaɨj ti'ixajta ɨ rujemi, ajta ɨ Dioj jemi. 29Majta aɨme ɨ mej Dioj jetze ma'acan ti'ixaxa'a, miche'e meyan eenye'en ti'ixajta, maj hua'apua mana'a, na'ari maj hueica mana'a. Majta ɨ seica, miche'e meyan tiraaxa'apɨ'ɨntare'en a'ij tɨ ti'ixa ɨ saɨj. 30Ajta, tɨ pua'a iye'itzi cɨn ti'itɨ raatyatuaani seij jemi, che'e aɨn tɨ ti'ixa ayan raatapua'ajta. 31Ayaa pu ti'irɨ'ɨri saj naimi'i Dioj jetze ma'acan tyu'utaxaj sej si tihua'uta'itii naijmi'ica, sej si sajta ca'anijra'a hua'uta'an. 32- 33Majta aɨme ɨ maj Dioj jetze ma'acan ti'ixaxa'a, ayaa pu ruxe'eve'e maj majta raayɨ'ɨtɨhua'an maj tiraijte'en ɨ ruxaijnyu'uca hua'a jemi ɨ mej e'etyujsa'ɨri. Ayaa pu ruxe'eve'e a'ini capu Dioj cha'ana'a hua'aruuren mej mi cai xa'apɨ'ɨn ruruure silu aɨ pu hua'utyapua'arite'esin. Sata'aj seyan che'eta sana'a huarɨni a'ij mej meri ti'ijrɨ'ɨre naijmi'i ɨ seica ɨ mej e'etyujsa'ɨri ɨ Dioj jemi. 34Caxu hua'ata'acare'en aɨme ɨ juuca, mej mi ti'ixajta matɨ'ɨj e'etyujsaɨre'en u teyujta'a. Capu a'ij ti'irɨ'ɨri mej ti'ixajta silu mej ra'ara'astijre'en a'ij tɨ te'eyu'usi'i ɨ yu'uxari jetze ɨ maj cɨn ti'ijta. 35Tɨ pua'a meyan raxe'eva'a maj ti'itɨ huamua'areera, miche'e meyan tihua'utaihua'u ɨ rucɨna'astyamua'a ɨ ruche. Ayaa pu xaa nya'u, a'ini ayaa pu tyu'utyevi'iraste'e tɨ pua'a jɨita'a ti'ixajta hua'a jemi ɨ mej e'etyujsa'ɨri u teyujta'a. 36¿Ai ta'uj na'a? ¿Ni muejmi jetze a'uve'eme ɨ nyuucari tɨ cɨme'en raxa ɨ Dioj, na'ari ayan na'a muejmi jemi huatyatuiihuaca'a? Capu xaa nya'u. 37Tɨ pua'a a'atɨ ayan tira'amitejtya'a ɨ rujetze tɨ aɨ rusaɨj aɨn pueen seij tɨ ti'ixaxa'a ɨ Dioj jetze ma'acan, na'ari aɨn jetze araujca'anye ɨ xaijnyu'ucara'ara'an ɨ Dioj, che'e aɨn ayan ráamua'ati nyej neyan nyaɨjna cɨn tyaja'amuayu'use'e a'ij tɨ aɨn tinyeijca ɨ tavastara'a. 38Tɨ pua'a aɨn a'atɨ cai ayan ráamua'ati, caxu sajta muan seyan ra'astijre. 39Aɨj pu cɨn, nye'ihuaamua'a, naa pu ti'ixa'apɨ'ɨn saj ca'anin cɨn rahuauca saj Dioj jetze ma'acan ti'ixajta. Sajta, sata'aj cai hue'ijmɨjra ɨ maj seica nyuucari cɨn ti'ixajta. 40Ayaa pu'u na'a, satɨj sana'a sej seyan rɨcɨ, sata'aj seyan xa'apɨ'ɨn eenya'acan cɨn rɨjca a'ij tɨ tiraavijte'e.

will be added

X\