1 Corintios 13

1Tɨ pua'a nyacai raxe'eva'a ɨ nyaxa'aj tevi nyej neyan ti'ira'ixaatya'a, capu ti'itɨj vaɨre'e. Ayaa nu eenya'a na'ame ɨ jemin tɨj ɨ tyapuusti'i tɨ ayan een tɨj taampu ɨ tɨ cɨn a'atɨ cha'a na'a ti'iruajte'e na'ari tɨj tuxa'a ɨ tɨ rujetze rajvitze. Capu amɨn a'ij tɨ pua'a neyan seica nyuucari cɨn tira'ixaate'en nusu nyaɨjna cɨme'e ɨ hua'anyuuca ɨ mej ti'ivaɨre'e u tajapua. 2Tɨ pua'a nyacai raxe'eva'a ɨ nyaxa'aj tevi, capu ajta ti'itɨj vaɨre'e nyaj raayɨ'ɨtɨ nyej tyu'utaxaj Dioj jetze ma'acan tɨ pua'a neyau'eitaa nain tɨj na'a tɨ ru'avaa ɨ Dioj jemi, nusu nyaj nain u'umua'aree na'ari neyan tya'atzaahuatya'a nyej ni neyan tiraataijte'en ɨ jɨri tɨ aun ticheni a'u tɨ a'utáca, tɨ pua'a neyan raayɨ'ɨtɨ, canu ti'itɨj cɨn ti'ivaɨre'e tɨ pua'a nyacai nyajta raxe'eva'a ɨ nyaxa'aj tevi. 3Ayaa pu che'eta na'a een tɨ pua'a neyan tíhua'urá'ate'en nain tɨj na'a nyej tí'ijcha'ɨ na'ari tɨ pua'a, nyajta neyan huatanya'an ɨ nyacɨme'en mej mi naatyataira, canu nyajta ti'itɨj mue'itɨn tɨ pua'a nyacai raxe'eva'a ɨ nyaxa'aj tevi. 4Tɨ pua'a a'atɨ ayan raxe'eva'a ɨ ruxa'aj tevi, ayaa pu eenya'a a'ame. Aɨ pu a'ateevi'i tɨ tya'utaviicue'i a'ame, ajta rɨ'ɨ tirá'ancu'uvajxɨ'ɨsin ɨ saɨj. Capu ajta chueere, ajta capu á'ujtzaahuate'e. 5Ajta aɨn tɨ raxe'eve'e ɨ ruxa'aj tevi, capu runyáta tɨ huatanyu'ucan, ajta capu rajchaɨre'e ɨ saɨj. Capu ajta te'entyu'uuni'iraca, ajta cai rahuauca ɨ tɨ jetzen ruxe'eve'e. Capu ajta ra'utamua'areera tɨ pua'a a'atɨ ayan a'ij pua'a raaruuren. 6Ayaa pu ajta een ɨ a'atɨ tɨ ayan raxe'eve'e ɨ ruxa'aj tevi. Capu aɨjna cɨn huataujtyamua'ave'esin aɨjna cɨme'e tɨ a'ij pua'a een silu aɨj pu cɨn huataujtyamua'ave'esin aɨjna cɨme'e tɨ tzaahuati'ira'a cɨn ayan huarɨj. 7Tɨ pua'a a'atɨ ayan raxe'eva'a ɨ ruxa'aj tevi, aɨ pu nain cɨn tiraatauuni'ira. Nain pu ajta cɨn tya'atzaahuate'e tɨ aɨn Dioj rɨ'ɨ tiraata'asin. Aɨ pu ajta nain cɨn ti'ijchu'eve'e tɨ Dioj nain cɨn araurastejsin. Nain pu ajta cɨn te'eviicue'i ɨ tɨ cɨn tirajpueiitzi. 8Capu a'anaj huatyapua'ari tyej ti teyan ti'itaxe'eve'e. Ma ajta, aɨ pu xaa huatyapua'ari tyej teyan ti'ixaxa'a ɨ Dioj jetze ma'acan. Ajta, tyej teyan seica nyuucari cɨn ti'ixaxa'a, aɨ pu ajta huatyapua'ari. Ajta, aɨjna tɨ tyejmi jemi huatyajturaa tyej ti tyamua'a naa tiru'umua'areera, aɨ pu ajta huatyapua'ari. 9Ayaa pu'u xaa, catu nain cɨn ru'umua'aree. Catu tyajta nain cɨn ti'ixaxa'a ɨ Dioj jetze ma'acan. 10Ma ajta, tɨ'ɨj ayan huataseijre'en ɨ tɨ ari huaujnaijmire, aj pu xaa huatyapua'ari ɨ tɨ a'aturaaca'a. 11Nyatɨ'ɨj nyauj pa'arɨ'ɨstaca'a, ayaa nu che'eta nyana'a ti'ixaxa'ata'a tɨj pa'arɨ'ɨ, nyajta neyan ti'imua'atzɨjca'a tɨj pa'arɨ'ɨ. Ajta ijii, ɨ nyej neri vasta'a, ayaa nu neri ma ruurai nyej neyan me tyáumua'arajca'a tɨj pa'arɨ'ɨ. 12Ajta ijii, ayaa tu che'eta tyana'a rasise'ij ɨ Dioj tyatɨj taqueenime'e ti'isise'i ajtya'ahua jetze, ɨ tyaj cai tyamua'a raseij. Ma ajta, ajna xɨcajra'a tɨ me'e ve'eme, aj tu xaa raseijran ɨ jetzen, tyamua'a naa. Ijii, e'icaj nu caj tya'umua'aree. Ma ajta, ajna xɨcajra'a jetze, nain nu cɨn yau'eitaa na'ame tɨj ajta Dioj ti'inyamua'ate. 13Aɨj pu cɨn, ti'ihueica tɨ ijii ayan seijre'e ityejmi jemi. Ai pu'u aɨn pueen: tyej tya'atzaahuate'e, tyej rachu'eve'e tɨ Dioj nain cɨn ranaijmire'en, tyej huátaxe'eve'en. Ajta ai pu aɨn pueen ɨ tɨ eitze'e ruxe'eve'e, tyej huátaxe'eve'en seij tyajta seij.

will be added

X\