1 Corintios 12

1Ayaa nu ti'ijxe'eve'e saj raamua'aree a'ij tɨ een aɨjna ɨ tɨ cɨn tyajamueijca ɨ xaijnyu'ucara'ara'an ɨ Dioj. 2Xu'uri sicu ramua'aree a'ij sej ti'ijrɨ'ɨrajcaa satɨ'ɨj cai xɨ tya'atzaahuatya'acaa. Aɨme xu jemi á'ujca'anyajca'a ɨ maj cai dioosi pueen, ɨ maj majta cai ti'ixaxa'a. Muan xu hua'ajaahuatya'aca'a a'ij tɨ ye'i tyajamua'amityejtya'acaa. 3Aɨj nu cɨn neyan tyaja'amue'ixaate'e. Tɨ pua'a a'atɨ ayan aɨjna jetze araujca'anyen ɨ xaijnyu'ucara'ara'an ɨ Dioj, aɨjna ɨ xaijnyu'ucara'ara'an capu a'anaj ca'anijra'a raata'asin aɨjna ɨ a'atɨ tɨ ayan tyu'utaxaj yee: “Che'e Dioj pueijtzi raata'an aɨjna ɨ Jesús.” Ma ajta, tɨ pua'a a'atɨ cai aɨjna jetze araujca'anyáa ɨ xaijnyu'ucara'ara'an ɨ Dioj, capu a'atzu ajta rɨ'ɨri tɨ aɨn ayan tyu'utaxaj yee: “Jesús pu vastara'ara'an pueen”. 4Capu ti'iseicaj na'a ɨ tɨ cɨn tyajamueijca ɨ xaijnyu'ucara'ara'an ɨ Dioj. Ma ajta, seij pu'u aɨjna ɨ xaijnyu'ucari. 5Capu ti'iseicaj na'a ɨ saj cɨn ti'ivaɨre'e ɨ Dioj jemi. Ma ajta, seij pu'u ɨ tɨ tavastara'a pueen. 6Capu ajta ti'iseicaj na'a ɨ saj cɨn ti'imuare'e. Ma ajta, seij pu'u ɨ Dioj tɨ nain cɨn ti'imuare'e hua'a jamuan ɨ tetyaca, a'achu maj pua'amua iiyan seijre'e. 7Ajta naijmi'ica jemi, aɨn xaijnyu'ucari ayan huataseijre tɨ ij ti'itɨ cɨn tihuéijcate'en seij ajta seij, mej mi maɨjna cɨn tihua'utyavaɨre'en naijmi'ica. 8Seij pu ayan aɨjna cɨn tiraijca aɨjna ɨ xaijnyu'ucari tɨ ayan tyu'utaxaj tyamua'a pu naa raayɨ'ɨtɨhua'acan cɨme'e. Ajtahua'a seij, aɨn xaijnyu'ucari rusaɨj pu ajta aɨjna cɨn tiraijca ɨ a'atɨ tɨ ayan tyu'utaxaj a'ij tɨ tiru'umua'aree. 9Aɨjna ɨ xaijnyu'ucari, rusaɨj pu ajta ca'anijra'a rata'aca tɨ a'atɨ tya'atzaahuatya'a, ajta seij pu ayan tirata'aca tɨ aɨn a'atɨ tihua'ahua'atyahua'an. 10Ajta seij, aɨ pu ayan tirata'aca ɨ a'atɨ tɨ ayan rɨjca ɨ maj cɨn rɨ'ɨ tira'utaseij. Ajta seij tɨ ayan tihua'uta'ixaate'en ɨ Dioj jetze ma'acan aɨjna cɨme'e tɨ aɨn xaijnyu'ucari ca'anijra'a rata'aca. Ajta ɨ saɨj, ayaa pu tirata'aca tɨ raayɨ'ɨtɨhua'an tɨ raatamitejte'en ti'itɨ tɨ xaijnyu'ucari pueen. Ajta seij rayɨ'ɨtɨ tɨ tyu'utaxaj seica cɨme'e ɨ hua'anyuuca ɨ mej seica chuejra'a japua e'ema'acan. Ajta seij ɨ a'atɨ, ayaa pu rata'aca tɨ rayɨ'ɨtɨhua'an tɨ ayan tyu'utaxaj a'ij tɨ huataujmua'a aɨjna tɨ raataxajtaca'a ɨ saɨj. 11Tɨj na'a mej meyan cɨn rɨcɨ, aɨ pu rusaɨj ca'anijra'a hua'ata'aca aɨjna ɨ xaijnyu'ucari. Aɨ pu rusaɨj ayan hua'ata'aca naijmi'ica, seij ajta seij, a'ij tɨ aɨn tihua'uxa'apɨ'ɨntari'iri'i. 12Ayaa pu che'eta na'a een ɨ Cɨriistu'u jemi a'ij tɨ een aɨjna cɨme'en tɨ seij ratyáhue'ira'a. Seij pu'u tɨ ratyáhue'ira'a, ajta eihua pu ti'imui'i tɨ jetzen ti'iseijre'e. Ma ajta, tɨ pua'a ayan ti'imui'i tɨ jetzen seijre'e, seij pu'u pueen ɨ tevijra'an. 13Aɨj pu cɨn, satɨ'ɨj huamuaɨ'ɨvijhuaca'a, seij pu'u ɨ xaijnyu'ucari tɨ muejmi tzajta'a huatyajturaa tɨ ij ayan amuaaruuren sej si seij sana'a tevijra'an pueenya'a xa'ara'ani jamuan ɨ Cɨriistu'u. Capu amɨn a'ij tɨ pua'a Israel jetze sa'ajtyama'acan na'ari seyan seij chuejra'a japua e'ema'acan nusu seyan ca'anyejri cɨn ti'imuare'e ca'ɨn seyan ruxaahua á'ujhua'an, seij pu'u ɨ xaijnyu'ucari saj jetzen araujca'anye. 14Ajta, capu ti'iseicaj na'a tɨ jetzen seijre'e ɨ tevijra'an silu ti'imui'i. 15Aɨj pu cɨn, tɨ pua'a aɨn ɨɨcajra'an ayan tyu'utaxaj yee a'ini canu muajca'a pueen, canu nyajta ajtyama'acan ɨ tevijra'an jetze, capu ayan ti'ayajna. Aɨ pu jauche'e aɨn tevijra'an jetze ajtyama'acan. 16Ayan cha'ata na'a, tɨ pua'a aɨn naxaira'an ayan tyu'utaxaj yee a'ini canu jɨ'ɨsi pueen, canu nyajta jetzen ajtyama'acan ɨ tevijra'an, capu ajta ayan ti'ayajna. Aɨ pu xaa tevijra'an jetze ajtyama'acan aɨjna ɨ naxaira'an. 17Tɨ pua'a nain tevijra'an aɨn pueenye'en ɨ jɨ'ɨsi, ¿a'ini ti'irɨ'ɨri tɨ huiityanamuajra? Capu a'ij ti'irɨ'ɨri. Ajta, tɨ pua'a nain tevijra'an aɨn pueenye'en ɨ tɨ cɨn huiityajnamua, ¿a'ini ti'irɨ'ɨri tɨ tyu'ɨchu? Capu xaa nya'u a'ij ti'irɨ'ɨri. 18Ma ajta aɨn Dioj, ayaa pu eenye'en tyu'utyájtua ɨ tɨ jetzen seijre'e ɨ tevijra'an ɨ Cɨriistu'u a'ij tɨ aɨn tiraaxa'apɨ'ɨntare. 19Tɨ pua'a naimi'i tɨ jetzen seijre'e ayan seij na'a pueenye'en, ¿a'uni e'eseijra'a a'ame ɨ tevijra'an? Capu ma'a a'ahua'a a'ame. 20Ma ajta, ayaa pu ti'imui'i tɨ tevijra'an jetze ti'iseijre'e, ajta seij pu'u ɨ tevijra'an. 21Aɨj pu cɨn, capu rɨ'ɨri tɨ aɨn jɨ'ɨsi ayan tiraata'ixaate'en ɨ muajca'a tɨcɨn: “Capej nyej jetze ruxe'eve'e muaa.” Capu ajta rɨ'ɨri tɨ aɨn muura'an ayan che'eta na'a tiraata'ixaate'en ɨ ɨɨca yee: “Capej nyej jetze ruxe'eve'e muaa.” 22Ma ajta, aɨn tɨ jetzen seijre'e tɨ ayan tita'amitejte'e tɨ cai ruca'anye, aɨ pu xaa ayan eitze'e ruxe'eve'e cai ɨ seica. 23Ajta, aɨn tɨ jetzen seijre'e ɨ tyej teyan ratyaxaahuata tyaɨjna cɨme'e tɨ ayan tita'amitejte'e tɨ cai ti'itɨj vaɨre'e, aɨ tu eitze'e rɨ'ɨ tirata'aca tyaɨjna cɨme'e ɨ tyaj cɨn rɨ'ɨ tiraatyechejte'en. Ajta aɨn tɨ jetzen seijre'e tɨ ajta tyu'utyevi'iraste'e tɨ pua'a ayan seijre'e me eijre'e, aɨj tu teyan rɨ'ɨ ti'iteche'ete a'ij tɨ tiraavijte'e. 24- 25Ajta, ɨ seica tɨ jetzen seijre'e, tɨ ajta cai ayan tyu'utyevi'iraste'e, catu teyan rɨ'ɨ tirateche'ete. Ma ajta Dioj, ayaa pu eenye'en huatyajtuaa ɨ tevijra'an tɨ'ij ayan eitze'e rɨ'ɨ tirata'acare'en aɨjna tɨ tira'aturaate'e mej mi cai e'ita'a a'utácɨɨnye ɨ mej tevijra'an jetze ajtyama'acan silu mej mi meyan che'eta mana'a ahuaujcu'uven seij majta seij. 26A'ini tɨ pua'a seij ayan tirajpueiitzi, naimi'i mu meyan che'eta mana'a tirajpueiitzi mua'aju'un. Ajta tɨ pua'a ayan tiraacɨ'ɨti seij tɨ ti'itɨj cɨn rɨ'ɨ tyu'utyaturan, naimi'i mu majta jamuan huataujtyamua'ave'esin. 27Ayaa pu ajta xaa nya'u ti'en muejmi cɨme'e. Muan xu tevijra'an pueen ɨ Cɨriistu'u. Naimi'i xu jetzen ajtyama'acan, seij sajta seij. 28Ajta aɨn Dioj ari hua'antihuau aɨme ɨ mej ti'itɨ cɨn tihua'utyavaɨre'en ɨ mej u e'etyujsa'ɨri teyujta'a. Anacai, aɨ pu hua'antihuau aɨme ɨ tɨ hua'utaityaca'a maj á'ujhua'anye'en metihue'ixaatya'a, ajta e'eyan aɨme ɨ mej Dioj jetze ma'acan ti'ixaxa'ata'an. Aɨ pu ajta hua'antihuau aɨme mej mi meyan tihua'umua'aten, majta ɨ mej meyan tyu'umuáre'en ɨ maj cɨn naa rɨ'ɨ tya'utaseij ɨ tyaɨte, ajta aɨme ɨ mej tihua'ahua'atyahua'an. Majta aɨme ɨ mej ti'itɨ cɨn hua'utyavaɨre'en, majta ɨ mej ti'itɨj cɨn antyujmua'aree, majta aɨme ɨ mej seica nyuucari cɨn ti'ixaxa'a, naijmi'ica pu ayan tyu'uta'a ɨ Dioj. 29¿Ni qui naijmi'ica ayan tyu'uta'a mej mi meyan á'ujhua'anye'en metihue'ixaatya'a? Capu xaa nya'u. ¿Ni qui majta naijmi'i meyan ti'ixaxa'a ɨ Dioj jetze ma'acan? Camu majta xaa nya'u. Na'ari, ¿ni qui naijmi'i meyan tihua'umua'aten? Camu xaa nya'u. ¿Ni qui naijmi'ica ayan tyu'uta'a mej mi tyu'umuare'en ɨ maj cɨn naa rɨ'ɨ tya'utaseij ɨ tyaɨte? Camu xaa nya'u. 30Cari qui aɨjna, ¿ni naijmi'i meyan tihua'ahuaate'e nusu meyan seij nyuucari cɨn ti'ixaxa'a na'ari meyan tyu'utaxaj a'ij tɨ huataujmua'a ɨ tɨ raataxajtaca'a ɨ saɨj? Camu xaa nya'u naijmi'i meyan tite'entyujmua'aree. 31Sajta muan, sata'aj seyan huatyaujca'anyen sej si seyan raatyauni ɨ Dioj jemi saɨjna tɨ eitze'e ruxe'eve'e, tɨ pua'a seyan ti'ijxe'eva'a. Me nyajta inyaa, nyauche'e nu jamuaata'itiira a'ij sej eitze'e re'enye'en cɨn ti'iteseijra'a.

will be added

X\