1 Corintios 11

1Nyajta inyaa, ayaa nu tyu'umé tɨj ajta Cɨriistu'u tyu'umé. Sata'aj sajta muan seyan che'eta sana'a huarɨni nyatɨj inyaa. 2Ma sajta muan, xa'apɨ'ɨn xu huarɨj saɨjna cɨme'e saj nain cɨn nyamua'aree, sajta sauj ra'astijre'e ɨ ye'ira ɨ nyaj jamuaatá'itiiri'i. 3Me nyajta inyaa, ayaa nu ti'ijxe'eve'e sej seyan raamua'ati tɨ Cɨriistu'u ayan antyujmua'aree aɨme jemi, matɨj mana'a pua'amua seijre'e ɨ tyetyaca. Ayaa mu che'eta mana'a ɨ tyetyaca tite'entyujmua'aree aɨme jemi ɨ ru'ɨstyamua'a. Ajta Dioj pu ayan antyujmua'aree ɨ Cɨriistu'u jemi. 4Aɨj nu cɨn, ayaa nu tyaja'amue'ixaate'e. A'atɨ pu ayan raatyaxaahuata aɨjna tɨ cɨn antyujmua'aree tɨ pua'a utyamuucu'utzi huatyejnyuuni. 5Ajta, tɨ pua'a jɨita'a ayan antimua'avi'i huatyejnyuuni, nusu antimua'avi'i ti'ixajta ɨ Dioj jetze ma'acan, aɨ pu ajta raatyaxaahuata aɨjna ɨ tɨ ti'ira'ijte'e. Ayaa pu che'eta na'a tyu'utyevi'iraste'e tɨj jɨita'a tɨ ayan caujyen rumu'u jetze. 6Ayaa pu xaa ti'ayajna, a'ini tɨ pua'a jɨita'a cai ayan á'ujca'anye tɨ ra'ava'anan ɨ rumu'u, ayan tiraavijte'e tɨ aɨn jɨita'a caujsisaaxɨ'ɨn ɨ rumu'u jetze. Ma ajta, tɨ pua'a ayan tira'amitejte'e tɨ tyu'utyevi'iraste'e tɨ ayan caujsisaaxɨ'ɨn, che'e aɨn ayan ra'ava'anan ɨ rumu'u. 7Ee xaa nya'u, ayaa pu ruxe'eve'e tɨ antimua'avi'i seijra'a ɨ tyaata'a a'ini aɨ pu aɨn ɨ taavijra'ara'an pueen ɨ Dioj, ajta aɨ pu aɨn pueen ɨ tɨ rɨ'ɨ tirata'aca. Ma ajta aɨn jɨita'a, aɨ pu aɨn pueen ɨ tɨ rɨ'ɨ tirata'aca ɨ tyaata'a. 8A'ini aɨjna ɨ tyaata'a, capu ayan aɨjna jetze huatyataavijhuaca'a ɨ jɨita'a jetze silu aɨn jɨita'a, aɨ pu xaa aɨjna jetze huatyataavijhuaca'a ɨ tyaata'a jetze. 9Capu ajta ayan huatyataavijhuaca'a ɨ tyaata'a aɨjna cɨme'e tɨ'i raatavaɨre'en ɨ jɨita'a silu aɨn jɨita'a, ayaa pu huatyataavijhuaca'a aɨjna cɨme'e tɨ'i raatavaɨre'en ɨ tyaata'a. 10Aɨj pu cɨn ayan ruxe'eve'e tɨ aɨn jɨita'a ayan ra'ava'anan ɨ rumu'u tɨ ij ayan seijre'e tɨ aɨn ra'astijre'e aɨjna tɨ ti'iraijte'e. Ayaa pu ajta ruxe'eve'e tɨ ij cai a'ij pua'a hua'ata'acare'en aɨme ɨ mej ti'ivaɨre'e ɨ tajapua. 11Ma ajta, camu rujɨɨmua'a seijre'e ɨ juuca ɨ tavastara'a jemi. Camu majta rujɨɨmua'a seijre'e ɨ tyetyaca jemi. 12Ayaa pu'u na'a aɨjna cɨme'e tɨ aɨn jɨita'a aɨjna jetze huatyataavijhuaca'a ɨ tyaata'a, ajta aɨn tyaata'a, ayaa pu aɨjna jetze airaujneijte ɨ jɨita'a. Ajta nain pu Dioj jemi tyaja'uve'eme. 13Sata'aj seyan rujɨɨmua'a sana'a tiraaxa'apɨ'ɨntare'en tɨ pua'a ayan tiraavijte'e tɨ pua'a jɨita'a ayan antimua'avi'i huatyejnyuuni ɨ Dioj jemi. 14¿Ni cai ayan tyajamua'amitejte'e aɨjna cɨme'e ɨ tyaj ratyáhue'ira'a tɨ ayan tyu'utyevi'iraste'e tɨ pua'a tyaata'a ayan caatɨ'ɨre? 15Ma ajta, tɨ pua'a jɨita'a ayan caatɨ'ɨre, ai pu aɨn pueen ɨ tɨ cɨn rɨ'ɨ tirata'aca ɨ Dioj a'ini ayaa pu raatyajtuaa ɨ cɨpua ɨ jemin tɨ ij ayan ra'ava'anan. 16Tɨ pua'a a'atɨ ayan huarɨni tɨ tajaaxaijvi'i aɨjna cɨme'e, sata'aj seyan tiraata'ixaate'en yee catu saɨque teyan ti'ititacha'ɨ, majta aɨme ɨ mej pua'amuaque e'etyujsa'ɨri ɨ Dioj jemi, camu yee majta saɨque meyan ti'ityujcha'ɨ. 17Ajta ɨ nyej neri jamuaata'ixaate'esin, canu rɨ'ɨ tyajamuaata'asin a'ini satɨ'ɨj muan e'etyujsaɨre'en, caxu re'en cɨn e'etyujsaɨre'en silu a'ij pua'a xu'u rɨjca. 18- 19Anacaican, ayaa nu ya raamua'areeri'i sej e'ita'a a'utacɨ́'ɨca satɨ'ɨj saun e'etyujsaɨre'en. Me nyajta inyaa, tɨmua'a nu tɨn tya'atzaahuate'e a'ini ayaa pu ruxe'eve'e mej seica airaaju'un muejmi jemi ɨ mej saɨque ti'imua'atze sej si seyan hua'utamua'ati aɨme ɨ mej muejmi jemi seijre'e, ɨ maj majta tzaahuati'ira'a cɨn meyan rɨcɨ. 20Muan xu sajta seyan huarɨni. Satɨ'ɨj e'etyujsaɨre'en, caxu saɨjna cɨn ti'icua'ani ɨ saj cɨn ra'utamua'aree tɨ tavastara'a tajapua huanyúu. 21Caxu xaa nya'u, silu tɨ'ɨj ajna tyaja'ure'enyen sej seyan tyu'ucua'ani, satɨj sana'a pua'amua seyan rɨcɨ seij sajta seij. Ayaa xu anáatyá'a ti'icua'ani ɨ sej tya'uca'inya'ama'acaa. Ajta ɨ seica ɨ maj cai meyan tya'uca'inya'ama'acaa, capu che'e tihua'acɨ'ɨti, silu mataacuj mu mua'aju'un. Majta seica meyan huapɨ'ɨ huatyata'arujsin. 22¿Ai ta'uj na'a? ¿Ni tzaa sacai huachaatɨme a'u sej tyaja'ucua'ani, a'u saj sajta a'uye'en?, ¿na'ari seri hua'axaahua aɨme ɨ mej e'etyujsa'ɨri ɨ Dioj jemi?, ¿nusu sej seyan raxe'eve'e saj a'ij pua'a tihua'uta'an aɨme ɨ maj cai ti'itɨ ticha'ɨ? ¿A'ini na'a ɨ nyaj cɨn tyaja'amue'ixaate'e? ¿Ni qui neyan rɨ'ɨ tyajamue'ixaate'en nyaɨjna cɨme'e sej seyan ti'ityujcha'ɨ? Canu xaa nya'u. 23Ayaa pu'u na'a, ɨ tɨ nyavastara'a raatyajtuaa inyeetzi jemi, aij nu'u nyajta muejmi jemi huatyajtuaa. Ajna'ɨmɨ tɨca'ari tzajta'a tɨ'ɨj aviitzi cɨn huatatuiri'ihuaca'a ɨ tavastara'a, aɨjna ɨ Jesús, aɨ pu raatyɨ'ɨpɨ ɨ pan. 24Tɨ'ɨj rɨ'ɨ tiraata'a ɨ Dioj, aj pu'i ra'antitaaraxɨ, ajta ayan tihua'uta'ixaa tɨcɨn: “Ai pu aɨn pueen i nyaj raatyahue'ira'a i nyaj cɨn muejmi japua nyuuni. Sata'aj seyan raacua'ani sej si saɨjna cɨn na'utamua'aree.” 25Matɨ'ɨj tyu'ucuaa, ayaa pu che'eta na'a huarɨj aɨjna cɨme'e ɨ vaasu ɨ mej jetzen huaye'en. Ayaa pu tihue'ixaatya'a tɨcɨn: “Ayaa pu huataujmua'a aijna i vaasu. Ai pu aɨn pueen ɨ nyuucari tɨ jajcua ɨ tɨ cɨn Dioj ti'itɨj cɨn tya'ataujratziiri'i aɨjna cɨme'e nyaj ra'iráxɨre'esin i nyaxuure'e. Ajta, aijna i ye'ira i saj cɨn huaye'en saijna jetze i vaasu, satɨj sana'a sej seyan rɨcɨ, saj seyan saɨjna cɨn na'utamua'aree”. Ayaa pu'u tihua'uta'ixaa. 26Aɨj pu cɨn, satɨj sana'a saj racua'ani saɨjna ɨ pan, sajta saj huaye'en saɨjna jetze ɨ vaasu, ayaa xu saɨjna cɨn tihua'uta'ixaate'en a'ij tɨ huataujmua'a tɨ aɨn tavastara'a huamɨ'ɨ. Muan xu seyan tihua'uta'ixaate'esin tɨj na'a tɨ yu auca'itɨ a'ame asta na'a cai uvé'enyen ɨ tavastara'a. 27Aɨj pu cɨn, a'atɨ tɨ na'a tɨ ayan cha'ana'a raacua'ani aɨjna ɨ pan, nusu cha'ana'a na'a huaye'en aɨjna jetze ɨ vaasu a'ij tɨ cai tiraavijte'e, ayaa pu jetzen újpua'ari tɨ raatyaxaahuataca'a ɨ Cɨriistu'u tɨ ayan rajpueijtzica'a ɨ rutevi cɨme'e, tɨ ajta ra'iraaxɨre ɨ ruxuure'e. 28Aɨj pu cɨn, che'e ayan huarɨni a'atɨ tɨ na'a tɨ ayan anacai ra'amityejtya'a a'ij tɨ een ɨ rutzajta'a ɨ Dioj jemi tɨ ij ayan raamua'aree tɨ ari ayan tiraavijte'e. Aj pu xaa, rɨ'ɨrista a'ame tɨ ayan raacua'ani ɨ pan, ajta tɨ huaye'en ɨ vaasu jetze. 29Ayaa pu een cɨn ayan ruxe'eve'e tɨ a'atɨ ayan ra'amityejtya'a a'ij tɨ huataujmua'a aɨjna tɨ ratyáhue'ira'a ɨ tavastara'a. Tɨ pua'a a'atɨ cai ayan ra'amityejtya'a a'ij tɨ huataujmua'a ɨ ye'ira, ajta cha'ana'a na'a raacua'ani ɨ pan, ajta cha'ana'a na'a huaye'en ɨ vaasu jetze, Dioj pu ayan pueijtzi raata'asin aɨjna cɨme'e tɨ cai huaujruu a'ij tɨ tiraavijte'e. 30Aɨj mu cɨn mui'itɨ cai che'e hua'aca'anisti'i ɨ mej a'amua jetze ajtyama'acan, majta ti'icucui'i. Majta seica meri huacuii. 31Aɨj pu cɨn, tɨ pua'a ayan anacai ta'amityejtya'a a'ij tɨ een ɨ tatzajta'a ɨ Dioj jemi, capu ayan pueijtzi taacɨ'ɨti. 32Ajta, tɨj na'a tɨ tavastara'a ayan ta'axɨjte'en, aɨ pu aɨjna cɨn pueijtzi taata'asin tɨ ij cai pueijtzi taacɨ'ɨti naijmi'ica jamuan ɨ mej yan huachaatɨme, iiyan chaanaca japua. 33Aɨj xu cɨn, muan, nye'ihuaamua'a, ayaa xu huarɨni. Satɨ'ɨj u e'etyujsaɨre'en, sata'aj huaujxe'eve'en seij sajta seij sej si naimi'i tyu'ucua'ani. 34Tɨ pua'a a'atɨ ayan eihua ti'icuata, che'e aɨn aun tyaja'ucua'ani u ruche. Na'ari cai, Dioj pu amuá'axɨjte'en satɨ'ɨj u e'etyujsaɨre'en. Nyajta inyaa, nyatɨ'ɨj nyaun a'atanyén muejmi jemi, aj nu ni eitze'e rɨ'ɨ á'amuaruuren.

will be added

X\