1 Corintios 10

1Ayaa nu ti'ijxe'eve'e inyaa, sej ra'utamua'aree tɨ jaitɨri a'acáava'a hua'uvi'itɨjma'a ɨ tavaujsimua'acɨ'ɨ. Majta e'eyan jaata'a antacɨj. 2Aɨ mu huamuaɨ'ɨvijhuaca'a jamuan aɨjna ɨ Moisés tyaacan tɨ'ɨj auj a'acavá'acaj aɨjna ɨ jaitɨri, majta matɨ'ɨj antaju'ucaa a jaata'a. 3Naimi'i mu majta raacuaa maɨjna ɨ cue'ira tɨ aun a'uve'eme Dioj tɨ e'eseijre'e. 4Majta maɨjna anti'i ɨ jaj tɨ ajta aun a'uve'eme ɨ Dioj jemi, a'ini aɨ mu jetze ra'anti'i maɨjna jetze ɨ tetej tɨ hua'a jamuan huama'acaa. Ajta aɨn ɨ tetej, ai pu aɨn pueenya'a ɨ Cɨriistu'u. 5Ma majta aɨme, mui'itɨ mu cai rɨ'ɨ tiraata'a ɨ Dioj. Aɨj pu cɨn Dioj ayan hua'antipua'ari ajna a'u tɨ cai e'eti'itɨjcaa. 6Ajta, ayaa pu een cɨn te'eyu'usi'ihuaca'a tɨ ij ayan titaata'itii ityejmi tyej ti cai teyan tyaɨjna jetze tityaaju'un aɨjna jetze tɨ a'ij pua'a een matɨj aɨme huarɨj. 7Caxu hua'anajcha ɨ maj cai dioj pueen, matɨj seica aɨme huarɨj. Caxu hua'anajcha xaa nya'u, a'ini ayaa pu te'eyu'usi'i tɨcɨn: “Aɨme mu tyaɨte meyan a'ujrá'asaca'a mej mi tyu'ucua'ani, mej mi majta huaye'en. Matɨ'ɨj mi meyan ajhuiixɨ mej tyu'utyeenye'en.” 8Eecan pu ruxe'eve'e saj cai seyan che'eta sana'a tyu'uxana'acɨre'en matɨj seica aɨme huarɨj. Majta, ayaa mu huacuii sei xɨcaj tzajta'a a'achu cumu seite japuan hueica vi'ira'a ɨ tyaɨte. 9Tiche'e cai ti'itɨ cɨn ra'ihuau'ura ɨ tavastara'a matɨj seica aɨme meyan huarɨj. Matɨ'ɨj mi á'upua'araca'a, matɨ'ɨj cu'ucu'use hua'uchei. 10Tyata'aj tyajta cai a'ij tyana'a ti'ityenyuuca'an matɨj majta seica meyan huarɨj. Ajta aɨn tɨ tye'entipuaapua'ate, aɨ pu hua'antipua'ari aɨme. 11Ee xaa nya'u, ayaa pu een cɨn tihua'uruu tɨ ij Dioj ayan tihua'uta'itii. Ma ajta, ayaa pu te'eyu'usi'ihuaca'a aɨjna cɨme'e tɨ'i rɨ'ɨ taaruuren itejmi, a'ini pu'uri ajna tyaja'ure'enyejsin ɨ xɨcaj tɨ jetzen te'entipua'ari ɨ chaanaca i tyaj japuan yan seijre'e. 12Aɨj pu cɨn, tɨ pua'a ayan a'atɨ seij tira'amitejtya'a tɨ cai rɨ'ɨristan tɨ ti'itɨj cɨn atya'ɨtza'ara'an ɨ tavastara'a jemi, che'e aɨn rɨ'ɨ tyu'umé'en tɨ ij cai autyaturan. 13Tɨj na'a tɨ ayan a'amua japua rajve tɨ ij ca'anijra'a amuaata'an sej si ti'itɨj cɨn autyaturan ɨ Dioj jemi, ayaa pu che'eta na'a hua'a japua rajve matɨj mana'a pua'amua iiyan seijre'e chaanaca japua. Ajta aɨn Dioj, capu a'anaj atya'ɨtza'ara muejmi jemi. Aɨj pu cɨn, Dioj cai a'anaj raata'asin tɨ ti'itɨj ayan huapɨ'ɨ ca'anijra'a jamuaata'an sej si autyaturan ɨ Dioj jemi saɨjna cɨme'e saj cai che'e tya'utaviicue'i. Ma ajta aɨn, tɨ'ɨj auj ayan ca'anijra'a amuaata'an sej si ti'itɨj cɨn autyaturan, Dioj pu ajta amuaata'asin a'ij sej ye'i huarɨni sej si ajtacɨɨnye, sej si sajta tya'utaviicue'i. 14Aɨj xu cɨn, ayaa xu huarɨni, mɨ nyej a'amuaxe'eve'e. Rɨ'ɨ xu'u muan, sej si cai a'anaj hua'ana'amiche'en aɨme ɨ maj cai dioosi pueen. 15Ayaa nu tyaja'amue'ixaate'e tɨj tyaɨte ɨ maj rɨ'ɨ metityaumuámua'aree. Sata'aj rujɨɨmua'a seyan tiraaxa'apɨ'ɨntare'en tɨ pua'a xa'apɨ'ɨn nyeti'ixa na'ari nyacai. 16Aɨjna ɨ vaasu ɨ tyej jetzen ya'aca tej ti teyan rɨ'ɨ tiraata'an ɨ Dioj, aɨ pu ajta ayan huataujmua'a tyej naimi'i huatyatavaɨre'en tyaɨjna cɨme'e Cɨriistu'u tɨ raxuure'e. Ajta aɨjna ɨ pan tej ra'antita'ara'a ta'aye'i, tyan tu tyajta naimi'i huatyatavaɨre'en tyaɨjna cɨme'e tɨ Cɨriistu'u tajapua huanyúu ɨ rutevi cɨme'e. 17Ajta, a'ini saɨj pu'u ɨ pan, ayaa pu huataujmua'a i tyaj i'i mui'i, tu'uri seij tyana'a tyaɨtejra'an pueen tyej seij tyana'a jetzen ajtyama'acan, a'ini naimi'i tu seij tyana'a cua'aca ɨ pan. 18Casi'i, xu'uhuaujmua'atzɨ seijna jetze a'ij mej ti'ijrɨ'ɨre aɨme ɨ mej Israel jetze ajtyama'acan. Aɨme ɨ mej racua'aca ɨ mej ti'imuaɨ'ɨvajtaca, aɨ mu majta naimi'i ti'ivaɨre'e ɨ Dioj jemi. 19¿A'ini nya'u huataujmua'a ɨ nyej ti'ixa? ¿Ni qui eihua jetzen ruxe'eve'e ɨ cue'ira ɨ mej ti'imuaɨ'ɨvajta hua'a jemi ɨ maj cai dioosi pueen? Capu xaa nya'u. Ari aɨjna tɨ cai dioj pueen, ¿ni qui eihua jetzen ruxe'eve'e aɨjna? 20Capu xaa nya'u, sein. Ayaa pu huataujmua'a ɨ nyaj tyaja'amue'ixaate'e. Aɨjna ɨ mej ti'imuaɨ'ɨvajta ɨ mej seij chuejra'a japua e'ema'acan, camu raatamuaɨ'ɨvajta ɨ Dioj jemi silu aɨme jemi mu'u ɨ tiyaaru'use. Canu raxe'eve'e saj hua'utyavaɨre'en aɨme ɨ tiyaaru'use. 21Capu rɨ'ɨri sej seyan jetzen ya'aca ɨ vaasu ɨ maj cɨn rɨ'ɨ tiraata'aca ɨ tavastara'a tɨ pua'a sajta sauj saɨjna jetze ya'aca ɨ vaasu ɨ maj cɨn rana'amiche ɨ tɨ cai Dioj pueen. Capu ajta rɨ'ɨri sej jetzen ti'icua'aca ɨ meesa ɨ mej jetzen ra'utamua'aree ɨ tavastara'a tɨ pua'a sajta sauj saɨjna jetze ti'icua'aca ɨ meesa mej jetzen hua'ana'amiche ɨ tiyaaru'use. 22Na'ari cai, ayaa tu aɨjna cɨn rɨni, ca'anijra'a tu raata'asin ɨ Dioj tɨ aɨn chueera'a ja'ara'ani aɨme jemi ɨ tiyaaru'use tɨ ij ayan huatanyu'ucan ityejmi jemi. Ajta, aɨ pu eihua huapɨ'ɨ eitze'e ruca'anye tyacai ityan. 23Nain pu nu'u ayan tinata'aca. Ma ajta, capu nain ayan tinaatyava'ɨri. Nain pu xaa ayan tinata'aca. Ma ajta,capu nain ayan rɨ'ɨ nyaruure. 24Sajta, sata'aj seyan huaujruuren seij sajta seij. A'atɨ tɨ na'a, che'e cai ayan rahuauca ɨ tɨ cɨn rɨ'ɨ huataujvaɨre'en, silu che'e ayan rahuauca a'ij tɨ ye'i huarɨni tɨ rɨ'ɨ tiraata'an ɨ ruxa'aj tevi. 25- 26Sata'aj seyan raacua'ani ti'itɨ tɨ na'a ɨ maj ratua ajna mej e'eseijre'e ɨ mej ti'itu'araca. Caxu sajta seyan tyu'urihua'ura tɨ pua'a ayan a'ij pua'a amuaaruuren ɨ a'amuaxaijnyu'uca jetze nusu cai, a'ini tavastara'a pu ra'a ɨ chuej i tyaj japuan huachaatɨme. Aɨ pu ajta ra'a tɨj na'a tɨ iiyan ti'iseijre'e. 27Tɨ pua'a saɨj tɨ cai tya'atzaahuate'e ajta amuaata'inyen saj jamuan tyu'ucua'ani, pata'aj peyan ahua'aca'anyen paj paun a'ume'en jamuan aɨjna ɨ a'atɨ, pata'aj nain tyu'ucua'ani tɨj na'a tɨ an tyeje'etia'asin mueetzi jemi. Capaj ti'ihua'u pana'a tɨ ij cai a'ij pua'a muaruuren ɨ axaijnyu'uca jetze. 28- 29Ma ajta, tɨ pua'a a'atɨ ayan timuaata'ixaate'en yee tɨ nu'u huatamuaɨ'ɨvijti'ihuaca'a, ayaa paj huarɨni paj cai racua'aca paɨjna cɨme'e paj raxe'eve'e paj raatavaɨre'en paɨjna ɨ a'atɨ tɨ ayan timuaata'ixaa, pajta paɨjna tɨ cai a'ij pua'a raruuren ɨ xaijnyu'ucara'ara'an aɨjna ɨ a'atɨ. Ee xaa nya'u, capu a'ij raruuren ɨ a'axaijnyu'uca. ¿A'ini een cɨme'e ayan tyu'uta'ijmɨ nyeetzi jemi nyej ni cai neyan huarɨni a'ij tɨ tinata'aca nyej ni cai a'ij pua'a raruuren ɨ xaijnyu'ucara'ara'an ɨ nyaxa'aj tevi? 30¿A'ini auj ti'irɨ'ɨri tɨ a'atɨ ayan a'ij pua'a tí'inyaxajta aɨjna cɨme'e nyaj rɨ'ɨ tirata'aca ɨ Dioj nyaɨjna cɨme'e ɨ cue'ira nyaj nyaxaahua raacuaa? 31Ayaa pu'u na'a, satɨj sana'a ti'itɨj cɨn rɨcɨ, tɨ pua'a seti'icua'aca na'ari seya'aca nusu ti'itɨ saj a'ij ruure, sata'aj seyan huarɨni sata'aj rɨ'ɨ tiraata'acare'en ɨ Dioj jemi. 32Sata'aj seyan huarɨni sej si cai a'ij pua'a tihua'ata'acare'en saɨme ɨ mej Israel jetze ajtyama'acan nusu saɨme ɨ mej seij chuejra'a japua e'ema'acan na'ari saɨme ɨ mej e'etyujsa'ɨri ɨ Dioj jemi. 33Ayaa nu ti'ityese'e nyaj rɨ'ɨ tihua'ata'acare'en naijmi'ica nain cɨme'e tɨ ij ayan tihua'ucɨ'ɨti ɨ tɨ hua'atyava'ɨri, tɨ ij ajta Dioj hue'irajtuaani. Aɨj nu cɨn cai neyan nyana'a rahuauca ɨ tɨ nyeetzi tyava'ɨri.

will be added

X\