1 Corintios 1

1Inyaa, i nyaj i'i Pablo, ɨ tɨ Dioj na'antihuau ruxé'evi'ira'a cɨme'e nyej ni tyu'utyavaɨre'en ɨ Cɨriistu'u jetze ma'acan tɨ ajta aɨn pueen ɨ Jesús, nyaɨjna jamuan ɨ ta'ihuaara'a ɨ Sóstenes. 2Yaa nu tyaja'amuayu'use'e muan mɨ saj saun e'etyujsa'ɨri saujna Corinto sej si raatyaanajche ɨ Dioj, mɨ saj rɨ'ɨ ti'ityeseijre'e saɨjna cɨme'e tɨ aɨn Cɨriistu'u, tɨ ajta Jesús pueen, muejmi huataura'ate, ajta muejmi huatajée sej si jemin seijra'a. Muan xu sajta hua'a jemi seijre'e matɨj mana'a pua'amua mej yen seijre'e tɨj na'a ve'e ɨ chaanaca ɨ maj majta meyan ti'ixa tɨ yee Jesús pu hua'avastara'a pueen. Ee xaa nya'u, aɨ pu aɨn pueen ɨ hua'avastara'a, ajta ayan che'eta na'a tavastara'a pueen itejmi. 3Ajta aɨn ɨ Dioj ɨ tyaj rajya'upua, ajta ɨ tavastara'a aɨjna ɨ Jesús tɨ ajta Cɨriistu'u pueen, miche'e maɨn rɨ'ɨ tyajamuaata'an, majta amuaatyápua'arite'en. 4- 5A'anaj tɨ na'a nu neyan rɨ'ɨ tirata'aca ɨ Dioj nyaj ranajche muejmi cɨme'en, a'ini eihua pu rɨ'ɨ tyajamuaata'a ɨ Dioj aɨjna cɨme'e sej seri jemin seijre'e ɨ Cɨriistu'u, tɨ ajta Jesús pueen, a'ini aɨjna jemi muan xu seri nain tya'ancura'a tɨ tyajamuatyava'ɨri ɨ saj cɨn tihua'uta'ixaate'en ɨ tyaɨte, ajta ɨ saj cɨn yau'eitaa xa'ara'ani a'ij tɨ een ɨ Dioj jemi. 6Ayaa pu een cɨn amuaaruu a'ini muan xu tyamua'a naa tihua'uta'ixaa ɨ tyaɨte ɨ Cɨriistu'u jetze ma'acan. 7Aɨj pu cɨn cai ti'itɨ jama'utyaturaate ɨ tɨ cɨn Dioj rɨ'ɨ tyajamuaata'a. Aɨj xu cɨn, sauj rachu'eve'e tɨ yan huataseijre'en ɨ tavastara'a, aɨjna ɨ Jesús tɨ ajta Cɨriistu'u pueen. 8Aɨ pu ajta ca'anijra'a amuaata'asin sej si tya'utaviicue'i asta na'a cai nain tye'entipua'are, tɨ ij cai a'atɨ ti'itɨ cɨn a'amua jetze tí'ipua'ajtya'a ajna xɨcajra'a tɨ jetzen tihua'axɨjte'en ɨ tyaɨte aɨjna ɨ tavastara'a, ɨ Jesús tɨ ajta Cɨriistu'u pueen. Aɨ pu xaa tihua'axɨjte'en a'achu maj pua'amua yan huachaatɨme ɨ chaanaca japua. 9Ayaa pu te'eme a'ini Dioj pu ayan araurastejsin aɨjna cɨme'e ɨ tɨ cɨn tya'ataujratziiri'i. Ajta, aɨ pu amuaatajée sej si seyan ruuristan jamuan ɨ yaujra'an aɨjna ɨ tavastara'a, aɨjna ɨ Jesús tɨ ajta Cɨriistu'u pueen. 10Me nyajta inyaa, ayaa nu eihua tyaja'amuahuavii nyuucajtze'en aɨjna ɨ tavastara'a, aɨjna ɨ Jesús tɨ ajta i'i Cɨriistu'u sej si ruxa'aj sana'a ti'ixajta, sej si cai che'e e'ita'a a'utacɨ'ɨca'an, sej si sajtahua'a rɨ'ɨ huaujruuren, sej si saɨjna cɨn antyaujsaɨre'en náijmi'i sej si seyan che'eta seij sana'a cɨn seyan ti'ixa'apɨ'ɨntara'a. 11Ayaa nu een cɨn tyaja'amue'ixaate'e, nye'ihuaamua'a, a'ini aɨme ɨ mej Cloé jemi e'eche, aɨ mu meyan tinaata'ixaa muejmi cɨme'en saj nu'u rujaaxaijvi'i rujɨɨmua'a sana'a. 12Aɨjna cɨme'en ɨ saj nu'u rujaaxaijvi'i, ayaa pu huataujmua'a sej seyan rɨcɨ, tɨ seij ayan ti'ixa yee: “Nyaa nu Pablo jetze ajtyama'acan.” Ajta seij ayan yee: “Nyajta inyaa, Apolos nu jetze ajtyama'acan.” Ajta seij ayan yee: “Nyaa nu Pedro jetze ajtyama'acan”; na'ari yee: “Nyaa nu Cɨriistu'u jetze ajtyama'acan.” 13Niche'e a'atzu tyajamuaataihua'u. ¿Ni qui ayan saɨque huaujruu ɨ Cɨriistu'u tɨ ij ayan huatámui'ire? Capu xaa nya'u. ¿Ni qui meyan na'utatai ɨ curuu jetze inyeetzi i nyaj i'i Pablo muejmi jetze ma'acan? Camu xaa nya'u a'atzu. Ari i'i, ¿ni qui neyan á'amuamuaɨ'ɨhuaca'a nyenyuucajtze'en i nyaj i'i Pablo? Canu xaa nya'u a'atzu. 14- 15Eecan nu rɨ'ɨ tirata'aca ɨ Dioj nyaj cai a'atɨ huamuaɨ'ɨhuaca'a silu aɨme nu'u nyaɨjna ɨ Crispo, nyajta nyaɨjna ɨ Gayo. Ayaa nu'u huarɨj sej si cai saɨjna cɨn a'ujtzaahuatya'a saɨjna cɨme'e saj huamuaɨ'ɨvijhuaca'a nyenyuucajtze'e. 16- 17Nyajta nu hua'umuaɨ'ɨhuaca'a aɨme ɨ tyaɨtestyamua'ame'en aɨjna ɨ Estéfanas. Ayaa pu'u xaa nya'u, canu cui'i ramua'aree tɨ pua'a nyajtahua'a seij huamuaɨ'ɨhuaca'a nusu nyacai. Jee xaa, capu Cɨriistu'u ayan na'utaityaca'a nyej ni hua'umuaɨ'ɨhua ɨ tyaɨte silu ayaa pu een cɨn na'utaityaca'a nyej ni neyan tihua'uta'ixaate'en ɨ nyuucari cɨme'e ɨ tɨ cɨn Dioj hue'irajtuaani. Capu ayan na'utaityaca'a nyej ni nyaɨjna cɨn tihua'uta'ixaate'en nyej eihua huapɨ'ɨ raayɨ'ɨtɨ ɨ hua'amua'atziira'a aɨme ɨ tyetyaca ɨ maj nu'u rɨ'ɨ tyu'uyɨ'ɨtɨ. Capu xaa nya'u, silu ayaa pu'u aɨjna cɨn na'utaityaca'a tɨ ij ayan ti'ivaɨra'a a'ara'ani ɨ muáre'eri'ira'ara'an aɨjna ɨ nyuucari tɨ cɨme'en raxa ɨ Cɨriistu'u, ɨ maj rá'utatai ɨ curuu jetze. 18Ayaa pu'u, a'ini aɨme jemi ɨ mej a'uva'ɨtzɨ, ayaa pu tihua'amityejte'e tyaj huatyátatɨmue'i tyaɨjna cɨme'e tyej teyan tihue'ixaate'e tɨ Cɨriistu'u ayan huamɨ'ɨ hua'a jetze ma'acan ɨ curuu jetze. Me tyajta ityan, ɨ tɨ Dioj tu'irajtuaasin, tejmi pu ayan tita'amitejte'e tɨ aɨn nyuucari aɨn pueen ɨ muáre'eri'ira'ara'an ɨ Dioj. 19A'ini ayaa pu tya'asɨɨmue'i tɨcɨn: Nyaa nu yee ra'antipua'arite'esin ɨ hua'amua'atziira'a aɨme ɨ maj nu'u eihua huapɨ'ɨ raayɨ'ɨtɨ. Nyajta nu yee raatyáuuna nain ɨ mej meri raarɨ'ɨre aɨme ɨ maj tyamua'a tiru'umua'aree. 20Tɨ pua'a ayan ti'ayajna, ¿a'uni a'ij een aɨjna ɨ tɨ tyamua'a tiru'umua'aree? Capu xaa nya'u ma'a a'ahua'a. Ajta aɨn tɨ tyu'ujmua'ate, ¿a'uni a'ij een aɨjna? Capu ajta ma'a a'ahua'a. Na'ari ɨ saɨj tɨ ayan huapɨ'ɨ raayɨ'ɨtɨ tɨ tyu'utaxaj aɨme jemi ɨ mej ijii huatyaɨte, ¿a'uni e'eseijre'e? Capu che'e me'e e'eseijre'e a'ini Dioj pu ari raataseijrataca'a tɨ cai ti'itɨ a'ij huataujmua'a ɨ hua'amua'atziira'a aɨme ɨ mej yan japuan huachaatɨme ɨ chaanaca. 21Ma ajta aɨn ɨ Dioj, ayaa pu raaxa'apɨ'ɨntare rumua'atziira'a cɨme'e tɨ cai rɨ'ɨrista a'ame mej meyan maɨjna cɨn raamua'ati hua'amua'atziira'a cɨme'e aɨme ɨ mej meyan iyan seijre'e. Ayaa pu een cɨn ayan raaxa'apɨ'ɨntare ɨ Dioj a'ini ayaa pu raxe'eva'aca'a tɨ ayan hue'irajtuaani aɨjna cɨme'e mej meyan ra'atzaahuate'e aɨjna ɨ nyuucari tɨ nu'u cai a'ij huataujmua'a ɨ nyuucari tyej teyan tihue'ixaate'e. 22Majta maɨn, ɨ mej Israel jetze ajtyama'acan, ayaa mu ti'ijhuavii ɨ Dioj jemi ɨ maj cɨn rɨ'ɨ naa tya'utaseij, ajta aɨme ɨ mej seij chuejra'a japua e'ema'acan, aɨ mu rahuauhuau ɨ mua'atziira'a mej mi maɨjna cɨn nain au'eitaa mua'ara'ani. 23Me tyajta ityan, ayaa tu tihue'ixaate'e tyaɨjna cɨme'e ɨ Cɨriistu'u ɨ maj rá'utatai ɨ curuu jetze. Ajta aɨn ɨ nyuucari ɨ tyaj cɨn tihue'ixaate'e, ayaa pu aɨjna cɨn hua'utajaaxaijte'esin aɨme ɨ mej Israel jetze ajtyama'acan. Ajta aɨme ɨ mej seij chuejra'a japua e'ema'acan, ayaa pu tihua'amityejte'e tɨ cai a'ij huataujmua'a. 24Ma majta aɨme, ɨ tɨ Dioj hua'utajée, tɨ pua'a aɨme ɨ maj Israel jetze ajtyama'acan na'ari mej seij chuejra'a japua e'ema'acan, ayaa pu tihua'amityejte'e tɨ Cɨriistu'u aɨn pueen ɨ muáre'eri'ira'ara'an tɨ cɨn Dioj hue'irajtuaani, ajta aɨ pu aɨn pueen ɨ mua'atziira'a tɨ cɨn Dioj ti'ijta. 25Ee xaa nya'u, aɨjna tɨ nu'u cai a'ij huataujmua'a, aɨjna tɨ Dioj jemi e'ema'acan eitze'e pu raayɨ'ɨtɨ cai ɨ hua'amua'atziira'a ɨ tyetyaca. Ajta aɨjna tɨ nu'u cai ru'uca'anisti'i ɨ Dioj, eitze'e pu ti'ivaɨre'e cai ɨ hua'amuare'eri'ira'a ɨ tyetyaca. 26¿Ni cai ayan tyajamua'amitejte'e muejmi? Casi'i, a'ij tɨ een muejmi tzajta'a tɨ Dioj ayan amuaatajée. Caxu mui'i sana'a mɨ sej eihua huapɨ'ɨ ru'umua'aree ɨ hua'amua'atziira'a aɨmej, ɨ maj yan huachaatɨme iiyan chaanaca japua. Caxu sajta mui'i sana'a mɨ saj saɨjna cɨn antyujmua'aree ɨ tɨ eihua huapɨ'ɨ ruxe'eve'e nusu saɨjna jetze airaujneijte aɨme ɨ mej ruxaahua á'ujhua'anya'a. Caxu xaa nya'u. 27Ma ajta aɨn Dioj, aɨ pu hua'antihuau aɨme ɨ maj cai a'ij tyá'umua'areeracaa tɨ ij aɨn hua'utatyevi'iraste'en aɨme ɨ mej meyan ruseijrata maj nu'u eihua huapɨ'ɨ tya'umua'aree. Dioj pu ajta ayan hua'antihuau aɨme ɨ maj cai ti'itɨj cɨn antyujmua'aree aɨme jemi ɨ maj yan huachaatɨme chaanaca japua tɨ ij ajta hua'utatyevi'iraste'en aɨme ɨ maj va'acan cɨn tyítyatatí. 28- 29Ee xaa, Dioj pu ayan hua'antihuau aɨme ɨ maj cai hua'a jetze ti'ica'anyajca'a, ajta aɨme ɨ maj hua'axaahuataca'a. Ayaa pu xaa nya'u ti'ayajna, Dioj pu ayan aɨjna cɨn hua'antihuau aɨme ɨ maj cai seijre'e aɨme jemi ɨ tyetyaca tɨ ij ayan hua'antipua'arite'en aɨme ɨ maj títyatatí iiyan chaanaca japua, tɨ ij cai a'atɨ ayan a'ujtzaahuatya'a ɨ Dioj jemi. 30Ma sajta muan, xu'uri jemin seijre'e ɨ Cɨriistu'u aɨjna cɨme'e a'ij tɨ tyajamuaaxa'apɨ'ɨntari'iri'i ɨ Dioj. Cɨriistu'u pu jemi e'ema'acan ɨ Dioj mua'atziira'a ɨ tyaj cɨn ru'umua'aree a'ij tɨ een ɨ Dioj jemi. Aɨ pu ajta tajapua huanyúu tyej ti urare'enya'acan cɨn a'utyaturan ɨ jemin. Cɨriistu'u pu muejmi huataura'ate. Aɨ pu ajta tyu'utanajchitaca'a a'amua cɨme'en ɨ saj cɨn tye'echaɨca'a. 31Aɨj pu cɨn, ayan te'eyu'usi'i tɨcɨn: “Tɨ pua'a yee a'atɨ ayan raxe'eva'a tɨ ti'itɨj cɨn a'ujtzaahuate'en, che'e aɨn ayan huarɨni aɨjna cɨme'e a'ij tɨ tavastara'a ayan rɨ'ɨ tiraata'a.”

will be added

X\