Tito 3

1Patá'aj hua'u'íjcate'en ɨ́ teɨte mej mi miyen huá'astijre'en a'ɨ́mej ɨ́ mej tí'aijta, majta a'ɨ́mej ɨ́ mej ti'itɨ́j jɨ́n antiújmua'aree. Miché'e miyen huárɨni a'ij mej tí'ijxe'eve'e ɨ́ mej tí'aijta. Miché'e majta ahuaújca'anen mej mi me'ɨ́jna jɨ́n tiu'umuárɨ'en ti'itɨ́j tɨ a'ij tí'ixɨ'epɨ'ɨn. 2Capej hua'atá'acare'en mej a'ij pua'a tihuá'ajeeve ɨ́ ruxɨ́'ej teɨte sino patá'aj ca'aníjra'a hua'utá'an mej mi ru'ihuaamua'a muá'ara'ani temua'a naa, mej mi majta rɨ́'ɨ tihuá'ucha'ɨn ɨ́ seica. Miché'e majta rɨ́'ɨ ti'ihuaúrixaate'en mej caí a'ij mena'a pua'a tiú'ujeeve. 3Capej yá'uhua'anan a'ij tej éene'e jéjcua ɨmuá tetɨ́'ɨj caí xɨ té'atzaahuate'eca'a. Catu ti'itɨ́j ú'umua'areereca'a. Catu teajta ti'itɨ́j á'astijre'eca'a. Ti'itɨ́j tɨ na'a pu tacuanamuajca'a. Cu xɨee tej ravaɨre'eca'a ca'anéeri jɨme'e ɨ́ tɨ ta tzajta'a seijre'eca'a tɨ a'ij pua'a 'een. Ajta ti'itɨ́j tɨ ta'aránajcheca'a tɨ caí xɨ́'epɨ'ɨn jɨme'e, a'ɨ́j tu teajta vaɨre'eca'a. Ayee tu ti'itítacha'ɨɨca'a tej huá'ajcha'ɨre'eca ɨ́ taxɨ́'ej teɨte. Seica mú majta tájcha'ɨɨre'eca'a itejmi. Teajta iteen, ayée tu che'atá tena'a iteen tajɨ́ɨmua'a tu tájaaxɨejvi'iraca'a seɨj teajta seɨj. 4Mɨ́ ajta a'ɨ́ɨn ɨ́ Dios ɨ́ tɨ tu'irájtuaa, a'ɨ́ɨ pu taatá'a tej tiyen raaseíj tɨ a'ɨ́ɨn rɨ́'ɨ temua'a tí'itacha'ɨɨ. A'ɨ́ɨ pu ajta taxe'eve'e. 5A'ɨ́ɨ pu xaa tu'irájtuaa. Capu a'ɨ́jna jɨ́n tu'irájtuaa a'ɨ́jna jɨme'e tej tiyen huarɨ́j ɨ́ tɨ í'ixɨ'epɨ'ɨn sino a'ɨ́jna jɨme'e tɨ a'ɨ́ɨn tá'ancu'uvajxɨ. A'ɨ́ɨ pu taajéjcuare ɨ́ ruxɨ́ejniu'uca jɨme'e. Cu xɨee tej teajtáhua'a huanúnu'ihuaca'a ɨ́ Dios jemi, a'ɨ́jna jɨme'e tɨ tá'ari'iri'i tɨ xána'avi'ire'eca'a ɨ́ ta jetze. 6Ruxɨejniu'uca pu xaa huateájtuaa itejmi jemi nain jɨme'e ɨ́ ruxɨ́'evi'ira'a a'ɨ́jna jɨme'e tɨ ta japua huaniú a'ɨ́jna ɨ́ Jesús tɨ ajta i'i Cɨríistu'u. 7Ayee pu 'een jɨ́n raateájtuaa téjmi jemi tɨ i a'ɨ́ɨn ayén tiraaxɨ́'epɨ'ɨntare'en tej ti caí ché'e ti'itɨ́j jɨ́n auteáturan ɨ́ jemin a'ɨ́jna jɨme'e tɨ tá'ancu'uvajxɨ. Ayee tu 'een jɨ́n seijre'e tej ti teri rachú'eve'e tɨ́'ij titáacɨ'ɨti méjca'ihua yee tej ruuri tá'ara'ani jemin tɨ́j na'a rusén jɨme'e. 8Ayee pu xaa ne'u ti'ayajna. A'ɨ́j nu jɨ́n niyen tí'ijxe'eve'e pej mú'ee ca'aníjra'a hua'utá'an mej mi rá'antzaahuate'en netɨ́j nena'a neri timuá'ixaa a'ɨ́mej ɨ́ mej meri rá'astijre'e ɨ́ Dios. Miché'e majta rɨ́'ɨ mena'a me'ɨ́jna jetze ucarute mej rɨ́'ɨ titetiújcha'ɨɨca me'ɨ́jna jɨme'e tɨ í'ixɨ'epɨ'ɨn. Tɨ́ pua'a miyen huárɨni, a'ɨ́ɨ mú xaa rɨ́'ɨ tiraatá'asin ɨ́ Dios, majta hua'utévaɨre'en naíjmi'ica. 9Mɨ́ majta seica, jeíhua mú me'ɨ́jna jɨ́n tiú'urihua'ura muá'aju'u me'ɨ́jna jɨme'e tɨ caí ámitɨeere'e, majta seica me'ɨ́jna jetze ucáruti mej miyen ti'ixáata muá'aju'u yee a'atani tévira'an jetze huanéj ɨ́ ruhuáacɨxa'astemua'acɨ'ɨ. Majta seica, ayée mú tiú'urihua'ura muá'aju'u me'ɨ́jna jɨme'e yee a'iquí huataújmua'a a'ɨ́jna ɨ́ niuucari tɨ ra'uyú'uxaca'a a'ɨ́jna ɨ́ Moisés teecan. Ayee mú 'een jɨ́n miyen autéhuijsin mej mi já'ita'a a'utácɨɨne, majta mej mi huateújne'usi'ite'en. Naíjmi'i matɨ́j mena'a miyen 'een matɨ́j a'ɨ́ɨme, camu ti'itɨ́j vaɨre'e. Capej huá'ajaahuate'e. 10Tɨ́ pua'a ja'atɨ́ ayén tejá'amua'ɨtziite'e sej si siyen a'utehuiini sej si já'ita'a a'utácɨɨne, ayée pej ráaruuren. Patá'aj seɨj pana'a raatá'ijmɨi na'ari hua'apua. Tɨ́ pua'a auj ayén rɨjca tɨ caí muá'astijre'e, patá'aj raata'íte mé já'ahua'a. 11Tɨ́ pua'a caí muá'astijre'e, ayée pepu'u 'een jɨ́n piyen tiráamua'aree tɨ a'ɨ́ɨn ɨ́ tevi seɨcɨé na'a tí'imua'atze tɨ caí ayén tiraavíjte'e. Pu'uri Dios raaxɨ́'epɨ'ɨntari'iri'i a'ɨ́jna jɨme'e tɨ puaíjtzi raatá'asin. 12Nee nu muaata'íti'ira mú'eetzi jemi ne'ɨ́jna ɨ́ Artemas, neajta ne'ɨ́jna ɨ́ Tíquico. Matɨ́'ɨj me'uun e'ará'asti a'u pej a'utéjvee, aj pej xaa ahua'aca'anen a'achú pej caj tirú'umua'aree pej yé tanén neetzi jemi, ayujna Nicópolis. Ayee nu tiraaxɨ́'epɨ'ɨntare nej niyen neyun á'ateeri tɨ́j na'a a'ájna tɨ huáseevi'i a'ame. 13Patá'aj piyen huárɨni nain tɨ́j na'a tɨ í'irɨ'ɨri pej hua'utévaɨre'en pe'ɨ́jna ɨ́ Zenas, pajta pe'ɨ́jna ɨ́ Apolos. A'ɨ́jna ɨ́ Zenas, a'ii pu a'ɨ́ɨn pú'een seɨj tɨ tí'ixɨ'epɨ'ɨntare'e. Patá'aj hua'utévaɨre'en mej mi me'uun a'arácɨɨne. Patá'aj piyen rɨ́'ɨ ráaruuren tɨ ij caí ti'itɨ́j tihuá'aturaate'e. 14Majta a'ɨ́ɨme ɨ́ tateɨ́testemua'a, ayée pu ruxe'eve'e mej miyen tiraayɨ́'ɨtɨhua'an mej me'ɨ́jna jetze ucarute mej miyen rɨjca ɨ́ tɨ í'ixɨ'epɨ'ɨn jɨme'e mej mi me'ɨ́jna jɨ́n huateújvaɨre'esin. Na'ari caí, camu ti'itɨ́j jɨ́n huateújvaɨre'esin. 15A'ɨ́ɨ mú yee muateujte'e matɨ́j mena'a pua'amé mej yé huaté'uu ne jamuan. Patá'aj piyen tihua'utateújte'en ta jetze me'ecan a'ɨ́mej ɨ́ mej taxe'eve'e, ɨ́ mej miyen che'atá mena'a té'atzaahuate'e. Ché'e rɨ́'ɨ tejá'amuavaɨre'e.

will be added

X\