Tito 2

1Mɨ́ pajta mú'ee, ayée pu ruxe'eve'e pej piyen tihuá'umua'aten mej mi miyen rɨ́'ɨ titetiújcha'ɨɨ a'ij tɨ tiraavíjte'e a'ɨ́jna jɨme'e mej té'atzaahuate'e tzáahuati'ira'a jɨme'e. 2Patá'aj piyen tihuá'umua'aten ɨ́ mej vaújsicɨra'i mej caí jeíhua rayé'ecare'en ɨ́ nahuáj, sino cɨ́j mu'u, mej mi seica rɨ́'ɨ tihua'useíj. Ruxe'eve'e mej mi rɨ́'ɨ mé titeumuámua'are'en, majta mej rɨ́'ɨ titetiújcha'ɨɨ me'ɨ́jna jɨme'e mej rá'astijre'e ɨ́ tavástara'a. Ajta ayén ruxe'eve'e mej huá'uxe'eve'en ɨ́ ruxɨ́'ej teɨte, ajta mej mi te'utáviicua'i temua'a naa. 3Patá'aj piyen che'atá pena'a tihuá'umua'aten a'ɨ́mej ɨ́ ucarijse mej mi majta rɨ́'ɨ titetiújcha'ɨɨ. Capej hua'atá'acare'en mej a'ij pua'a tiú'ujeeve seɨj ajta seɨj. Capu ajta ayén tiraavíjte'e mej jeíhua rayé'ecare'en ɨ́ nahuáj, sino mej mi ráarɨ'ɨren mej tihuá'umua'aten ti'itɨ́j tɨ a'ij tí'ivaɨre'e. 4Miché'e me'ɨ́n jucarijse miyen tihuá'umua'aten ɨ́ mej 'uuca ɨ́ mej mauj teemua mej mi miyen tihuá'uxe'eve'en ɨ́ rucɨ́na'astemua'a, majta ɨ́ ruyaujmua'a. 5Ayee pu ruxe'eve'e mej rɨ́'ɨ metíteumuámua'aree a'ɨ́ɨme ɨ́ mej mauj teemua, mej mi caí tiú'uxana'acɨra'aten. Ajta, ayée pu ruxe'eve'e mej nain jɨ́n tí'ijcha'ɨɨ ɨ́ ruche. Ajta, mej mi rɨ́'ɨ huá'acha'ɨɨ ɨ́ ruteɨ́testemua'a. Miché'e majta hua'ará'astijre'en ɨ́ rucɨ́na'astemua'a. Na'ari, tɨ pua'a mecaí miyen huárɨni, ɨ́ seica ɨ́ mej huá'aseij, camu ché'e raataxɨ́'eve'esin mej ra'ará'astijre'en ɨ́ tavástara'a. 6Ayee pej che'atá pena'a ca'aníjra'a hua'utá'an ɨ́ teteca ɨ́ mej mauj teemua mej mi rɨ́'ɨ mé titeumuámua'are'en me'ɨ́jna jɨme'e a'ij mej rɨcɨ. 7Pajta mú'ee, patá'aj piyen aseíjrata huá'a jemi tɨ́j seɨ́j tɨ ari araúraste nain jɨme'e a'ij nej neuchén timuá'ixaa, a'ɨ́jna jɨme'e a'ij pej rɨcɨ tɨ i'i xɨ́'epɨ'ɨn jɨme'e. Patá'aj tihuá'umua'aten tzáahuati'ira'a jɨme'e, pajta piyen tihua'utaseíjrate'en tɨ huápɨ'ɨ ruxe'eve'e mej mi miyen huárɨni. 8Patá'aj piyen tihua'utá'ixaate'en temua'a naa e'ehuauritɨéecan jɨme'e a'ij tɨ tiraavíjte'e mej mi caí miyen seɨcɨé tí'ixajta. Ayee pej huárɨni tɨ i hua'utatévi'iraste'en a'ɨ́mej ɨ́ mej muájcha'ɨɨre'e me'ɨ́jna jɨme'e mej caí ti'itɨ́j jɨ́n huatániuusin tɨ a'ij pua'a namuajre'e mej jɨ́n titaaxájtzi'i. 9Patá'aj piyen tihua'utájeeve a'ɨ́mej ɨ́ mej tí'imuarɨ'e ca'anéeri jɨme'e, mej mi hua'ará'astijre'en a'ɨ́mej ɨ́ mej tihuá'aijte'e. Miché'e miyen tiu'umuárɨ'en mej mi nain jɨ́n rɨ́'ɨ tihua'utá'an. Ayee pu ruxe'eve'e mej caí a'ij mena'a tihuá'ajeeve a'ɨ́mej ɨ́ mej tihuá'aijte'e. 10Mej mi majta caí tihua'anáhua'ira, sino mej mi nain jɨ́n hua'ará'astijre'en, matá'aj caí ti'itɨ́j jɨ́n até'ɨtze'ara'an. Tɨ́ pua'a miyen huárɨni, ayée mú 'een jɨ́n ca'aníjra'a hua'utá'asin ɨ́ seica mej mi majta raataxɨ́'eve'en, mej majta ra'ará'astijre'en a'ij tej tihuá'amua'ate a'ɨ́jna jɨme'e tɨ Dios tu'irájtuaani. 11Jee xaa, pu'uri mé jéjre'e seijre'e tɨ Dios ari rɨ́'ɨ tihuá'acha'ɨɨ ɨ́ teteca a'ɨ́jna jɨme'e tɨ Dios jírá'ujca'ane tɨ hua'irájtuaani naíjmi'ica. 12A'ɨ́j tu jɨ́n ramua'aree tɨ ayén ruxe'eve'e tej ra'antipuá'ajte'en nain jɨme'e tɨ a'ij pua'a 'een ɨ́ Dios jemi, ajta nain jɨ́n tej rájhuausin íiyen chaanaca japua, tɨ caí ayén á'ateere rusén jɨme'e. Ajta, ayée pu ruxe'eve'e tej tiyen rɨ́'ɨ ti'itítacha'ɨɨ a'ij tɨ tiraavíjte'e, a'ij tɨ tí'ijxe'eve'e ɨ́ Dios. Ajta ayén ruxe'eve'e tej rɨ́'ɨ mé titeumuámua'are'en tetɨ́j tena'a tej tiyen á'ateeri íiyen japuan ɨ́ chaanaca tɨ yen seijre'e. 13Teajtáhua'a tu teuj rachú'eve'en ɨ́ tej jɨ́n huatátatemua'ave'e a'ájna xɨcáara'an tɨ jetzen teja'uré'enejsin ɨ́ tej rachú'eve'en tɨ ajtahua'a yé huataseíjre'esin a'ɨ́jna ɨ́ Dios tɨ nain jɨ́n antiújmua'aree, tɨ ajta tu'irájtuaani. A'ii pu a'ɨ́ɨn pú'een ɨ́ Jesús tɨ ajta i'i Cɨríistu'u. 14A'ɨ́ɨ pu huataúra'a tɨ huámɨ'ɨni ta jetze me'ecan tɨ ij a'ɨ́ɨn tiu'unájchita nain jɨme'e a'ij tej té'echa'ɨɨca'a iteen, te'ɨ́jna jɨme'e tej caí a'atzu ra'ará'astijre ɨ́ Dios. Ayee pu 'een jɨ́n ajta huamɨ́'ɨ ta jetze me'ecan tɨ ij rɨ́'ɨ táaruuren ɨ́ tatzajta'a tej ti teɨtestemua'ame'en pu'éene'e tá'ara'ani, tej ti ahuátaca'anen tej ti tiyen huárɨni i tɨ í'ixɨ'epɨ'ɨn jɨme'e. 15A'ɨ́ɨ pu a'ɨ́ɨn pú'een ɨ́ tɨ ruxe'eve'e pej piyen tihuá'umua'aten. Patá'aj ca'aníjra'a hua'utá'an nain jɨme'e ɨ́ pej jɨ́n antí'amua'aree. Patá'aj pajta hua'ajteá'axɨ'ɨn. Capej hua'atá'acare'en tɨ ja'atɨ́ a'ij pua'a tí'imuaseijra.

will be added

X\