Tito 1

1Inee, i nej i'i Pablo, ayée nu tí'ivaɨre'e ɨ́ Dios jemi. Ajta a'ɨ́ɨn ɨ́ Jesús tɨ ajta i'i Cɨríistu'u, a'ɨ́ɨ pu na'antíhuau nej ni niyen tiu'utévaɨre'en ne'ɨ́jna jɨme'e mej mi jaítze'e té'atzaahuate'e a'ɨ́ɨme ɨ́ Dios tɨ hua'antíhuau, mej mi majta jaítze'e yaú'itɨée muá'ara'ani tzáahuati'ira'a jɨme'e. Tɨ́ pua'a meri yaú'itɨée muá'ara'ani tzáahuati'ira'a jɨme'e, aj mú mi rɨ́'ɨ titetiújcha'ɨɨ muá'aju'u me'ɨ́jna jɨme'e ɨ́ ruye'irá. 2A'ɨ́j mú jɨ́n rachú'eve'e muá'aju'u mej miyen ruuri muá'ara'ani tɨ́j na'a rusén jɨme'e, a'iné ayée pu te'ataújratziiri'i ɨ́ Dios jéjcua ɨmuá. Ajta a'ɨ́jna ɨ́ Dios, capu tí'ihua'itaca. 3Ajta a'ɨ́ɨn Dios, a'iné pu'uri teja'uré'ene ja'anáj tɨ pua'a huaújxɨ'epɨ'ɨntari'ire, a'ɨ́ɨ pu taatá'a tej ráamua'aree ɨ́ runiuuca jɨme'e. A'ɨ́j pu jɨ́n ayén tinaata'aíj a'ɨ́jna ɨ́ Dios tɨ tu'irájtuaani nej ni tihua'utá'ixaate'en a'ɨ́jna jɨme'e tɨ Dios te'ataújratziiri'i. Jee xaa ne'u, a'ɨ́j nu jɨ́n ti'itéjvee ɨ́ tavástara'a jemi. 4Ayee nu tí'imuayu'use'e, mɨ pej i'i Tito, mɨ pej pajta niyauj pu'éene'e pua'araa tzáahuati'ira'a jɨme'e pe'ɨ́jna jɨme'e pej piyen che'atá pena'a té'atzaahuate'e netɨ́j inee. Ayee nu tí'ijxe'eve'e mej miyen muáruuren a'ɨ́jna ɨ́ Dios ɨ́ tej rájya'upua, ajta a'ɨ́ɨn ɨ́ Cɨríistu'u tɨ ajta i'i Jesús, ɨ́ tɨ tu'irájtuaani, miché'e rɨ́'ɨ timuáacha'ɨn, miché'e majta mua'anpuá'ajte'en ɨ́ á'a tzajta'a. 5Ayee nu 'een jɨ́n muaja'uteájtuaa a'ujna u Creta ɨ́ chuej tɨ e'eráahuachi ɨ́ jaj japua pej pi rɨ́'ɨ ráaruuren ɨ́ tɨ á'aturaacaj, pej pi pajta hua'antíhuauni a'ij nej neri timuá'ixaa a'ɨ́mej ɨ́ mej te'enteárute vaujsi jɨme'e nain japua matɨ́j mena'a mej huachéjme a'ujna u Creta. 6Ajta ayée pu ruxe'eve'e tɨ ayén 'een a'ɨ́jna ɨ́ ja'atɨ tɨ te'enteárute vásta'a jɨme'e, tɨ caí ti'itɨ́j jɨ́n a'aturáa, ajta tɨ seɨj na'a tévi'itɨne'en ɨ́ 'ɨ́ita'a. Majta ɨ́ yaújmua'ame'en a'ɨ́jna ɨ́ ja'atɨ, ayée pu ruxe'eve'e mej té'atzaahuate'e, tɨ́'ij caí ja'atɨ́ a'ɨ́jna jɨ́n huá'a jetze te'upuá'ajte'en mej a'ij pua'a titetiújcha'ɨɨ na'ari mej caí ti'itɨ́j á'astijre'e. 7Ja'atɨ́ tɨ ayén vásta'a jɨ́n ti'itéjvee, a'ɨ́ɨ pu xaa ayén antiújmua'aree a'ɨ́jna jɨme'e tɨ Dios jetze me'ecan tí'ivaɨre'e a'ɨ́mej jemi ɨ́ teɨte. A'ɨ́j pu jɨ́n ayén ruxe'eve'e tɨ rɨ́'ɨ ti'itiújcha'ɨɨ, tɨ caí ti'itɨ́j jɨ́n a'aturáa. Ruxe'eve'e tɨ caí ayén á'ujtzaahuate'e, ajta tɨ caí ca'anacan huataniú'ucan, ajta tɨ caí rutahuaíve'e. Ajta, ayén che'atá na'a ruxe'eve'e tɨ caí ayén runé'use'eve'e, ajta tɨ caí a'ɨ́jna jɨ́n ruvaɨre'e a'ɨ́jna jɨme'e ɨ́ tumin mej tí'ipua'ivi u teyujta'a, na'ari tɨ caí tí'inecua'atze tɨ jeíhua tí'ijcha'ɨɨ. 8Mɨ́ ajta a'ɨ́ɨn, ché'e ayén éene'e á'ara'ani tɨ ruxɨ́'evi'ira'a jɨme'e hua'ancuré'evi'itɨn matɨ́j mena'a pua'amé ramuáaren, tɨ ajta a'ɨ́jna jetze ucarute a'ɨ́jna jɨme'e tɨ xɨ́'epɨ'ɨn 'een. Ajta pu ayén ruxe'eve'e tɨ a'ɨ́ɨn rɨ́'ɨ mé teuúmua'aree, tɨ ajta rɨ́'ɨ ti'itiújcha'ɨɨ, tɨ ajta urarɨ́'en ɨ́ ru tzajta'a. Ajta i'i, ayée pu ruxe'eve'e tɨ ruca'ané ɨ́ ru tzajta'a tɨ ij caí ti'itɨ́j jɨ́n auteáturan a'ɨ́jna jɨme'e tɨ a'ij pua'a 'een. 9Ruxe'eve'e tɨ a'ɨ́ɨn ajta yaú'itɨée temua'a naa ɨ́ niuucari tɨ ayén ti'ayajna a'ij tej teri tihua'umuá'ate tɨ ij caí ja'anáj yá'uhua'anan. Tɨ́ pua'a ayén huárɨni, aj pu xaa raayɨ́'ɨtɨhua'a a'ame tɨ ij tihuá'umua'aten tzáahuati'ira'a jɨme'e a'ij tɨ ayén tiraavíjte'e. A'ɨ́ɨ pu ajta raayɨ́'ɨtɨhua'a a'ame tɨ hua'utémua'itɨn a'ɨ́mej ɨ́ mej seɨcɨé tí'ixaxa'a. 10Ayee pu ruxe'eve'e a'iné mu'iitɨ́ mú mé á'ujujhua'an ɨ́ mej caí ti'itɨ́j á'astijre'e. Jéihua mú tihuá'amua'ate me'ɨ́jna jɨme'e ɨ́ niuucari tɨ caí ti'itɨ́j vaɨre'e, tɨ ajta tiú'ucuanamua. A'ɨ́mej mú jetze ajtéme'ecan a'ɨ́ɨme ɨ́ mej ra'antisí'iche ɨ́ runavij. 11Jé'ecan pu ruxe'eve'e tej hua'utá'ijmɨi mej mi caí ché'e miyen tí'ixajta a'iné jeíhua mú tihua'antiú'uuni'ira matɨ́j mena'a pua'amé ruteɨ́testemua'a seɨj ɨ́ ja'atɨ, majta méyee. Ayee mú 'een jɨ́n miyen tihuá'amua'ate a'ɨ́jna jɨme'e ɨ́ tɨ caí ayén tiraavíjte'e mej mi avíitzi jɨ́n raamuá'itɨn ɨ́ tumin ɨ́ mej rujɨ́ɨmua'a huateújvaɨre'en. 12Seɨj tɨ huá'a jetze ajtéme'ecan, tɨ nu'u huá'a jetze me'ecan tí'ixaxa'a, ayén tiu'utaxájtaca'a a'ɨ́mej jɨme'e tɨjɨ́n: “Naími'i mú tí'ihua'itaca a'ɨ́ɨme ɨ́ mej Creta huachéjme. A'ij mú hui pua'a tí'iruure a'ɨ́ɨme ɨ́ mej huá'ɨna'ase'e. Majta jeíhua huápɨ'ɨ juxaaveca ajta mena'a caí anajúcataxɨ'ɨn.” 13- 14Jee xaa, ayée pu ti'ayajna a'ij tɨ tiraataxájtaca'a. A'ɨ́j pu jɨ́n, ayée pu ruxe'eve'e pej piyen huárɨni. Patá'aj ca'anín jɨ́n hua'ajteá'axɨ'ɨn mej mi té'antzaahuate'en tzáahuati'ira'a jɨme'e a'ij tɨ tiraavíjte'e, mej mi caí ché'e ranamuajra ɨ́ niuucari tɨ caí ti'itɨ́j vaɨre'e tɨ ajta a'ɨ́mej jetze huanéj a'ɨ́ɨme ɨ́ mej Israél jetze ajtéme'ecan, mej mi caí ché'e ranamuajra a'ij mej tihuá'aijte'e a'ɨ́mej ɨ́ teteca ɨ́ mej caí raataxɨ́'eve ɨ́ tɨ ayén ti'ayajna ɨ́ Dios jemi. 15Ajta a'ɨ́mej jemi ɨ́ mej urarɨ́'ene'en seijre'e ɨ́ ru tzajta'a, ayée pu tihuá'amitɨejte'e tɨ naími'i tɨ́j na'a tɨ Dios ayén tiú'utaahuaca'a, a'ɨ́ɨ pu tí'ivaɨre'e ɨ́ ruye'irá jɨme'e. Majta, camu a'atzu taúra'aca tɨ ti'itɨ́j hua'utáxana'ave'en tɨ a'ij pua'a 'een. Mɨ́ ajta a'ɨ́mej jemi ɨ́ mej a'ij pua'a seijre'e ɨ́ ru tzajta'a, capu ti'itɨ́j i'irɨ́'en. Jéihua mú a'ij pua'a mé titeumuámua'aree. Majta, camu ché'e raayɨ́'ɨtɨ mej miyen huaruitɨejte'en yee a'ɨ́ɨ pu ayén tiraavíjte'e nusu a'ɨ́ɨ pu caí ayén tiraavíjte'e. 16Ayee mú tí'ixaxa'a tɨjɨ́n: “Teen tu ramua'ate ɨ́ Dios.” Mɨ́ majta caí, camu ramua'ate a'iné camu miyen rɨcɨ a'ij tɨ tí'ijxe'eve'e ɨ́ Dios. Jé'ecan mú tiú'uxana'avi'iste'e. Camu ti'itɨ́j á'astijre'e. Camu majta ti'itɨ́j jɨ́n a'ij tí'ivaɨre'e ɨ́ Dios jemi.

will be added

X\