Romanos 8

1- 2Rumuárɨ'eri'ire'ara'an pu jɨ́n amua'irájtua a'ɨ́jna ɨ́ xɨéjniu'ucare'ara'an ɨ́ Dios sej si siyen ruuri huateáturan ɨ́ jemin a'ɨ́jna ɨ́ Cɨríistu'u tɨ ajta i'i Jesús. Capu ché'e ja'anáj tejá'amua'aíite'e a'ame a'ɨ́jna ɨ́ muárɨ'eri'ire'ara'an a'ɨ́jna tɨ a'ij pua'a 'een tɨ ajta jamuatá'aca sej huácui'ini. A'ɨ́j pu jɨ́n, capu ché'e Dios ti'itɨ́j jɨ́n mú'ejmi jetze te'upuá'ajte'esin. 3Ajta a'ɨ́ɨn ɨ́ Dios, a'ɨ́ɨ pu ayén huarɨ́j a'ij tɨ caí tiu'utárɨ'ɨristareca'a tɨ ayén huárɨni itejmi jemi a'ɨ́jna ɨ́ niuucari ɨ́ mej jɨ́n tí'aijta. Capu a'atzu tavaɨre'eca'a a'ɨ́jna ɨ́ niuucari a'ɨ́jna jɨme'e tej caí te'evíicua'ira tej ra'ará'asten. A'ɨ́j pu jɨ́n Dios mú ya'uta'íteca'a ɨ́ ruyauj tɨ ij a'ɨ́ɨn ayén che'atá na'a huataseíjre'en matɨ́j a'ɨ́ɨme ɨ́ teteca ɨ́ mej a'ij pua'a titetiújcha'ɨɨ ɨ́ Dios jemi, tɨ ij ajta a'ɨ́ɨn huataújmuaɨ'ɨvejta a'ɨ́mej jetze me'ecan ɨ́ mej jɨ́n auteájturaa ɨ́ Dios jemi. Ayee pu a'ɨ́jna jɨ́n huarɨ́j tɨ́'ij ayén ra'uxɨ́jte'en tɨ caí ché'e tí'ita'aíite'e á'ara'ani a'ɨ́jna tɨ a'ij pua'a 'een. 4A'ɨ́ɨ pu ayén huarɨ́j tej ti te'ɨ́jna jɨ́n tiyen ra'ará'astijre'en a'ij tɨ tiraavíjte'e, a'ij tɨ a'ɨ́ɨn tí'ijxe'eve'e a'ɨ́jna ɨ́ niuucari. Ayee tu xaa teri tiyen ra'ará'astijre a'iné catu ché'e tiyen ti'itítacha'ɨɨ te'ɨ́jna jɨme'e tɨ a'ij pua'a 'een tɨ huiiráninei ɨ́ ta tzajta'a, sino tej tiyen te'ɨ́jna jetze arátaca'ane te'ɨ́jna ɨ́ xɨéjniu'ucare'ara'an ɨ́ Dios. 5Majta a'ɨ́ɨme ɨ́ mej miyen ti'itiújcha'ɨɨ me'ɨ́jna jɨme'e tɨ a'ij pua'a 'een tɨ huiiráninei ɨ́ huá'a tzajta'a a'ɨ́mej, ayée mú me'ɨ́jna jɨ́n tí'imua'atze a'ij tɨ a'ɨ́ɨn ca'aníjra'a tihua'atá'aca a'ɨ́jna tɨ a'ij pua'a 'een. Majta a'ɨ́ɨme ɨ́ mej me'ɨ́jna jetze araújca'ane ɨ́ xɨéjniu'ucare'ara'an ɨ́ Dios, ayée mú me'ɨ́jna jɨ́n rahuauhuau a'ij tɨ tí'ijxe'eve'e a'ɨ́jna ɨ́ xɨéjniu'ucare'ara'an ɨ́ Dios. 6Tɨ́ pua'a ja'atɨ́ ayén na'a a'ɨ́jna jetze tí'imuajca tɨ a'ij pua'a 'een tɨ huiiráninei ɨ́ tzajta'an, ayée pu tí'ijcɨ'ɨti tɨ huámɨ'ɨni. Mɨ́ ajta tɨ pua'a a'ɨ́ɨn ja'atɨ́ ayén tiu'utaúra'an tɨ ayén ti'itiújcha'ɨɨ a'ij tɨ a'ɨ́ɨn tí'ijxe'eve'e a'ɨ́jna ɨ́ xɨéjniu'ucare'ara'an ɨ́ Dios, ayée pu Dios ra'anpuá'ajte'en ɨ́ tzajta'an, ajta ayén raatá'acare'en tɨ ayén ruurican huateáturan ɨ́ jemin. 7Ajta a'ɨ́jna ɨ́ ja'atɨ tɨ a'ɨ́jna jetze tiú'umua'ati tɨ a'ij pua'a 'een, a'ɨ́ɨ pu rájcha'ɨɨre'e ɨ́ Dios. Capu taúra'aca tɨ a'ɨ́ɨn tí'ira'aíite'e á'ara'ani a'ɨ́jna ɨ́ niuucari tɨ Dios jetze airáninei. Jee xaa ne'u, capu a'atzu a'ij tí'irɨ'ɨri tɨ a'ɨ́ɨn ja'atɨ́ ayén ra'ará'asten ruseɨ́j. 8Ayee pu'u na'a. Capu a'ij tí'irɨ'ɨri mej rɨ́'ɨ tiraatá'an ɨ́ Dios a'ɨ́ɨme ɨ́ mej mena'a miyen rá'astijre'e me'ɨ́jna tɨ a'ij pua'a 'een tɨ huiiráninei ɨ́ huá'a tzajta'a. 9Mɨ́ seajta mú'een, caxu siyen titetaúra'acare'en tɨ a'ɨ́ɨn ɨ́ tɨ a'ij pua'a 'een ayén tejá'amua'aíite'e á'ara'ani, a'iné a'ɨ́j pu ari huateájturaa mú'ejmi jemi a'ɨ́jna ɨ́ xɨéjniu'ucare'ara'an ɨ́ Dios. A'ɨ́j pu jɨ́n, a'ɨ́ɨ pu tejá'amua'aíite'e a'ame. Ajta, tɨ pua'a caí ayén seɨj jemi huateájturaa a'ɨ́jna ɨ́ xɨéjniu'ucare'ara'an ɨ́ Cɨríistu'u, a'ɨ́jna ɨ́ ja'atɨ, capu Cɨríistu'u jetze ajtéme'ecan. 10Ajta, tɨ pua'a Cɨríistu'u ayén huateájturaa ɨ́ a'amua tzajta'a, ayée pu já'amuacɨ'ɨti tɨ a'ɨ́ɨn auupuá'are ɨ́ sej ratéhua'ira'a. Á'apua'aren xaa ne'u a'ɨ́jna jɨme'e tɨ huiiránineica'a á'aye'i tɨ a'ij pua'a 'een ɨ́ a'amua tzajta'a. Mɨ́ ajta, ayée xu ruuri huateájturaa ɨ́ a'amua tzajta'a a'ɨ́jna jɨme'e tɨ Dios ayén amua'uxɨjte sej si siyen rɨ'éene'ecán jɨ́n huateáturan ɨ́ jemin. 11Ajta, tɨ pua'a ayén huateájturaa mú'ejmi tzajta'a ɨ́ xɨéjniu'ucare'ara'an a'ɨ́jna ɨ́ Dios tɨ ra'ajjáj a'ɨ́jna ɨ́ Jesús huá'a tzajta'a ɨ́ mɨ'ɨchite, a'ɨ́jna tɨ ra'ajjáj ɨ́ Cɨríistu'u huá'a tzajta'a ɨ́ mej meri huácuii, a'ɨ́ɨ pu ajta rarújte'en ɨ́ sej ratéhua'ira'a a'ɨ́jna jɨme'e tɨ a'ɨ́ɨn xɨéjniu'ucare'ara'an ari seijre'e ɨ́ a'amua tzajta'a. 12A'ɨ́j pu jɨ́n, ayén ruxe'eve'e itejmi jemi tej ti caí ché'e tiyen rá'astijre'e te'ɨ́jna tɨ a'ij pua'a 'een tɨ huiiráninei ɨ́ ta tzajta'a. 13- 14Ayee pu'u na'a, a'iné tɨ pua'a siyen ra'ará'astijre'e se'ɨ́jna tɨ a'ij pua'a 'een tɨ huiiráninei ɨ́ a'amua tzajta'a, ayée pu tejá'amuacɨ'ɨti sej huácui'ini. Mɨ́ seajta mú'een, tɨ pua'a siyen tira'antipuá'ajte'en se'ɨ́jna tɨ a'ij pua'a 'een tɨ ayén huiiráninei ɨ́ a'amua tzajta'a, tɨ pua'a seajta siyen huárɨni se'ɨ́jna jɨme'e sej jetzen araújca'ane ɨ́ xɨéjniu'ucare'ara'an ɨ́ Dios, ayée pu tejá'amuacɨ'ɨti sej siyen ruuri huateáturan ɨ́ Dios jemi, a'iné a'ɨ́ɨme ɨ́ mej miyen jetzen araújca'ane ɨ́ xɨéjniu'ucare'ara'an ɨ́ Dios, a'ɨ́ɨ mú yaújmua'ame'en pú'een ɨ́ Dios. 15Ajta a'ɨ́ɨn ɨ́ xɨéjniu'ucare'ara'an ɨ́ sej ra'ancuré'a, capu ayén tejá'amua'aijte'e sej ca'anéeri jɨ́n tiu'umuárɨ'en, sej si seajtáhua'a rátziɨɨne'e se'ɨ́jna tɨ tejá'amua'aijte'e. Capu xaa ne'u, sino a'ii pu'u a'ɨ́ɨn pú'een ɨ́ xɨéjniu'ucari tɨ ayén á'amuaya'upuajtaca'a. A'ɨ́j tu jɨ́n tiyen rá'anjee ɨ́ Dios, tɨjɨ́n: “Táàta yee, taata.” 16Ajta a'ɨ́jna ɨ́ xɨéjniu'ucare'ara'an ɨ́ Dios, ajta ɨ́ tamua'atzíira'a, ayée mú che'atá mena'a tí'ijmua'aree tej nu'u tiyen yaújmua'ame'en pú'een ɨ́ Dios, ɨ́ tɨ tá'iya'upua. 17Ajta, tɨ pua'a teri tiyen yaújmua'ame'en pu'éene'en ɨ́ Dios, ti'itɨ́j pu a'ɨ́jna jɨ́n ajta tí'itacɨ'ɨti. Ayee pu tí'itacɨ'ɨti ɨ́ Dios jemi tɨ́j ajta ayén tiraacɨ́'ɨ ɨ́ Cɨríistu'u. Tɨ́ pua'a tiyen teajta jamuan Cɨríistu'u rajpuaíjtzi, teen tu teajta jamuan Cɨríistu'u ra'ancuré'asin te'ɨ́jna tɨ rɨ́'ɨ huápɨ'ɨ naa seíire'e a'ame tɨ́j na'a rusén jɨme'e. 18Ayee pu xaa ne'u tiná'amitɨejte'e ineetzi. A'ɨ́jna tɨ caí xɨ seijre'e itejmi jemi, ɨ́ tɨ huápɨ'ɨ naa seíire'e a'ame tɨ ajta tí'itacɨ'ɨti tɨ́'ɨjtáhua'a huataseíjre'en ɨ́ tavástara'a, jeíhua pu jaítze'e huápɨ'ɨ ruxe'eve'e a'ɨ́jna caí a'ɨ́jna ɨ́ tej jɨ́n rajpuaíjtzi íiyen chaanaca japua. 19Ajta, tɨ́j na'a tɨ ayén tí'iseijre'e tɨ Dios ayén tiú'utaahuaca'a, a'ɨ́ɨ pu ari a'ujca'anéecan jɨ́n rachú'eve'e a'ájna xɨcáara'an tɨ jetzen Dios hua'utaseíjrata a'ɨ́mej ɨ́ mej yaújmua'ame'en pú'een. 20Ajta nain tɨ́j na'a a'ɨ́jna tɨ tí'iseijre'e, ayée pu seɨcɨé huaújruu tɨ ij caí ayén éene'e á'ara'ani a'ij tɨ tí'ijxe'eve'eca'a ɨ́ Dios. Mɨ́ ajta, capu ayén ruseɨ́j huaújruu sino Dios pu ruxɨ́'evi'ira'a jɨ́n ayén raateájtuaa tɨ ij ayén raajéjcuare'en mejca'ihuáyee. 21Nain tɨ tí'iseijre'e, ayée pu ti'ijchú'eve'e a'ájna xɨcáara'an tɨ jetzen Dios ayén raateájtuaani tɨ ij caí ché'e ayén ca'anéeri jɨ́n ratéva'ɨrihua'an a'ɨ́jna tɨ ra'antipuá'ajte'esin. Aj pu xaa ayén che'atá na'a huataujseíirata a'ame tɨ́j na'a ɨ́ tɨ Dios raatétaahuaca'a jamuan ɨ́ mej yaújmua'ame'en pú'een ɨ́ Dios. Ruxɨéehua pu jɨ́n naa seíire'e a'ame. 22Ayee tu tí'ijmua'aree tɨ ayén éene'e á'aye'i tɨ́j na'a jéjcua ɨmuá tɨ yú e'iré'ene, tɨ ayén che'atá na'a tí'iseijre'e tɨ taújye'in a'ɨ́jna jɨme'e tɨ temua'a tirajpuaíitzi á'aye'i tɨ́j 'ɨ́ita'a tɨ pua'a ayén tira'utacuí'ine. 23Mɨ́ teajta iteen, teen tu tiyen che'atá tena'a tataye'in a'iné pu'uri seijre'e itejmi jemi a'ɨ́jna ɨ́ xɨéjniu'ucare'ara'an ɨ́ Dios, tɨ a'ɨ́ɨn pú'een ɨ́ ta'amuájca tɨ Dios ayén jɨ́n te'ataújratziiri'i. Ta'ataca'anéecan tu jɨ́n tiyen rachú'eve'e tɨ ij ayén nain jɨ́n titáacɨ'ɨti a'ɨ́jna jɨme'e tej yaújmua'ame'en pú'een ɨ́ Dios, tɨ ij ajta Dios ayén ru'irájtuaani ɨ́ tej ratéhua'ira'a. 24Ayee pu 'een jɨ́n Dios tu'irájtuaa tej ti tiyen rachú'eve'en te'ɨ́jna ɨ́ tej caí xɨ raseíj. Mɨ́ ajta, tɨ pua'a teri raseíj ɨ́ tej rachú'eve'e, capu ché'e ruxe'eve'e tej rachú'eve'e. ¿Ni caí ayén ti'ayajna tɨ caí mé'e ja'atɨ́ tɨ ayén rachú'eve'e a'ɨ́jna tɨ ari raseíj? Capu xaa ne'u mé'e ja'atɨ́. 25A'iné tu'uri rachú'eve'e te'ɨ́jna tɨ caí xɨ taacɨ́'ɨ, a'ɨ́j pu jɨ́n ayén tiú'ujxe'eve'e tej tiyen rachú'eve'en tecaí tiyen cátaxɨeehuata. 26Ajta a'ɨ́ɨn xɨéjniu'ucare'ara'an ɨ́ Dios, a'ɨ́ɨ pu tavaɨre'e a'ɨ́jna jɨme'e ɨ́ tej rahuavíiraca ɨ́ Dios jemi, a'iné catu a'ij rɨni tajɨ́ɨmua'a, ni catu a'atzu ramua'aree ti'itɨ́j tɨ niuucarijra'a ayén ruxe'eve'e tej ti tiyen tiu'utéjniuuni ɨ́ jemin. A'ɨ́j pu jɨ́n a'ɨ́ɨ pu ta jetze me'ecan téniuusin. Ayee pu tí'icɨ'ɨxɨ, cumu tɨ́caí té'anrɨ'ɨre, a'iné capu ja'atɨ́ raayɨ́'ɨtɨ tɨ ayén tiu'utaxáj. 27Ajta a'ɨ́jna tɨ ayén tirú'umua'aree nain jɨme'e a'ij tej tí'imua'atze ɨ́ ta tzajta'a, a'ɨ́ɨ pu ajta ramua'aree a'ij tɨ huataújmua'a a'ɨ́jna tɨ rahuavii a'ɨ́jna ɨ́ xɨéjniu'ucare'ara'an ɨ́ Dios a'iné a'ɨ́ɨ pu ayén huá'a japua huatániuusin a'ij tɨ a'ɨ́ɨn ayén tí'ijxe'eve'e ɨ́ Dios. 28Teen tu teajta tiyen ramua'aree tɨ Dios ayén tavaɨre'e tɨ ij nain jɨ́n ayén te'irájra'ani tɨ i a'ɨ́jna jɨ́n rɨ́'ɨ titaatá'an itejmi, i tej raxɨ́'eve'e ɨ́ Dios. Ajta Dios pu a'ɨ́jna jɨ́n ayén taatajé tej ti tiyen ratéva'ɨrihua'an a'ij tɨ a'ɨ́ɨn ari titaaxɨ́'epɨ'ɨntari'iri'i. 29Ajta a'ɨ́ɨme ɨ́ tɨ Dios jéjcua ɨmuá huá'amuajtejca'a tɨ ayén hua'irájtuaani, a'ɨ́ɨ pu ajta jéjcua ɨmuá hua'antíhuau tɨ ij ayén huá'uruuren mej mi miyen che'atá mena'a seíire'e muá'ara'ani tɨ a'ɨ́jna ɨ́ yaujra'an. Ajta ayén tiraaxɨ́'epɨ'ɨntare tɨ ij ayén hua'ajá'a pu'éene'e á'ara'ani, a'ɨ́ɨ pu ajta jaítze'e vásta'a pu'éene'e á'ara'ani mecaí ɨ́ seica ɨ́ ru'ihuaamua'a ɨ́ mej mu'íi tɨ Dios huá'aya'upuaca'a. 30Ajta a'ɨ́ɨme ɨ́ tɨ ayén jéjcua ɨmuá hua'antíhuau, a'ɨ́ɨ pu ajta hua'utajé. Ajta a'ɨ́ɨme ɨ́ tɨ ayén hua'utajé, a'ɨ́ɨ pu ajta ayén tíhua'uxɨ́'epɨ'ɨntari'iri'i mej nu'u rɨ'éene'ecán jɨ́n huateáturan ɨ́ jemin. Ajta a'ɨ́ɨme ɨ́ tɨ ayén tíhua'uxɨ́'epɨ'ɨntari'iri'i, a'ɨ́ɨ pu ajta ayén hua'utá'a mej mi nain jɨ́n miyen che'atá mena'a seíire'e tɨ́j ajta a'uun seijre'e ɨ́ yaujra'an tɨ́j na'a rusén jɨme'e. 31A'ɨ́j pu jɨ́n, ¿a'iné tetiu'utaxájta? Tɨ́ pua'a Dios ayén ta japua niuucari, ¿ni qui auj ayén tí'irɨ'ɨri tɨ ja'atɨ́ ayén ta'antipuá'ajte'en itejmi? Capu xaa ne'u. 32Capu Dios ayén tiraatá'uuni'iri'i ɨ́ ruyauj tɨ ij caí huámɨ'ɨni ɨ́ cúruu jetze, sino ayée pu tihua'utátuii ta jetze me'ecan naíjmi'ica, tetɨ́j tena'a pua'amé iteen. A'ɨ́j pu jɨ́n, ayén che'atá na'a ruxɨ́'evi'ira'a jɨ́n ayén nain taatapuaíjve'esin, nain tɨ́j na'a tɨ tí'iseijre'e ɨ́ Cɨríistu'u jemi. 33¿A'ataani ayén tihuá'axajtzi'iran a'ɨ́mej tɨ Dios ayén hua'antíhuau? Capu ja'atɨ́ xaa ne'u, a'iné Dios pu ruseɨ́j ayén tíhua'uxɨ́'epɨ'ɨntari'iri'i mej mi miyen rɨ'éene'ecán jɨ́n huateáturan ɨ́ jemin. 34¿A'ataani ayén tí'ijxɨ'epɨ'ɨntare'en tɨ ayén puaíjtzi taatá'an itejmi? Capu ja'atɨ́, a'iné seɨ́j pu'u ta jetze me'ecan niuu a'ame. A'ɨ́ɨ pu ajta a'uun é'eseijre'e rɨ'ɨríinta'an ɨ́ Dios. A'ii pu a'ɨ́ɨn pú'een ɨ́ Cɨríistu'u tɨ huamɨ́'ɨ ta jetze me'ecan. Jee xaa ne'u, jaítze'e pu ayén tiraavíjte'e tej tiyen raataxáj yee a'ii pu a'ɨ́ɨn pú'een tɨ ajta a'itáraa huá'a tzajta'a ɨ́ mej meri huácuii. 35¿A'ataani ayén te'entiú'uuna ɨ́ Cɨríistu'u jemi tɨ ij caí ché'e ayén taxe'eve'e? ¿Ni qui ayén tí'ijruuren tɨ pua'a ti'itɨ́j tamuárɨ'eriste'e na'ari tɨ pua'a ti'itɨ́j ayén tá'ɨtziite'e? Capu xaa ne'u. ¿Arí tɨ pua'a miyen a'ij pua'a táaruuren nusu tɨ pua'a tiyen tɨejcu? Capu ajta a'ɨ́jna. ¿Ari tɨ pua'a tej caí a'ij tí'ijviicua'i?, ca'ɨ́n ¿tɨ́ pua'a ayén titáacɨ'ɨti tɨ tziɨ́ɨni'ire'e ɨ́ tej te'ɨ́jna jɨ́n huácui'ini? Capu xaa ne'u ayén te'entiú'uuna ɨ́ Cɨríistu'u jemi. ¿Arí tɨ pua'a miyen táacui'ini? Capu ajta xaa ne'u. 36Ayee pu té'eyu'usi'i tɨjɨ́n: Tɨ́j na'a tɨ 'eíjninei ɨ́ xɨcaj, asta na'a caí u e'eteárute, tɨ́'ɨj pɨ́na'a mú miyen huá'atu'ire'e a'ɨ́mej mej mi táacui'ini. Ayee pu tihuá'amitɨejte'e tej tiyen che'atá tena'a ti'itéva'ɨri matɨ́j a'ɨ́ɨme ɨ́ cáne'axɨ ɨ́ mej huá'acui'ica mej mi miyen ráatuaani ɨ́ huá'ahua'ira'a ɨ́ cáne'axɨ. 37Capu xaa ne'u ayén ja'atɨ́ te'entiú'uuna. Tɨ́j na'a tɨ ayén tí'itaruure, nain tu jɨ́n tiyen tiu'utémua'itɨ a'ɨ́jna jɨme'e tɨ Cɨríistu'u ayén taataxɨ́'eve tɨ ij ayén huámɨ'ɨni ta jetze me'ecan. 38- 39Ayej xaa ne'u ti'ayajna. Ayee pu tiná'amitɨejte'e ineetzi tɨ ayén ti'ayajna tɨ caí ti'itɨ́j ayén te'entiú'uuna tɨ ij caí ché'e ayén titáacɨ'ɨti a'ɨ́jna tɨ jɨ́n Dios taataxɨ́'eve. Capu amɨ́n a'ij tɨ pua'a tiyen ruuri huateáturan na'ari tɨ pua'a tiyen huácui'ini. Camu majta miyen te'entiú'uuna a'ɨ́ɨme ɨ́ mej ta japua tí'ivaɨre'e ɨ́ Dios jemi, na'ari a'ɨ́ɨme ɨ́ mej miyen tí'ivaɨre'e ɨ́ tiyaaru'u jemi. Ti'itɨ́j tɨ na'a tɨ a'ij seijre'e, tɨ pua'a auj teja'uré'enejsin na'ari tɨ pua'a ari ayén te'irájraa nusu muárɨ'eri'ire'ara'an pú'een ɨ́ ja'atɨ, capu ajta ayén te'entiú'uuna. Capu amɨ́n a'ij tɨ pua'a a'ɨ́ɨn pu'éene'en tɨ ta japua é'eseijre'e na'ari u tajete, ti'itɨ́j tɨ na'a tɨ ayén seijre'e, capu a'atzu a'ij tí'irɨ'ɨri tɨ ayén te'entiú'uuna ɨ́ Cɨríistu'u jemi, a'ɨ́jna ɨ́ Jesús tɨ ajta tavástara'a pú'een.

will be added

X\