Romanos 7

1Ne'ihuaamua'a, mɨ sej ramua'aree a'ij tɨ té'axa ɨ́ yu'uxari jetze ɨ́ mej jɨ́n tí'aijta, ayée nu tejá'amua'ixaate'e tɨ a'ɨ́ɨn niuucari ayée na'a tí'ira'aijte'e ɨ́ ja'atɨ tɨ́j na'a tɨ auj ruuri. Capu ché'e tí'ira'aíite'e a'ame tɨ́'ɨj huámɨ'ɨni. 2Ayee pu ti'ayajna, tɨ pua'a 'ɨ́ita'a ayén ari viɨ́che'e, ayée pu tí'ira'aijte'e a'ɨ́jna ɨ́ niuucari tɨ nu'u ayén ruxe'eve'e tɨ a'ɨ́ɨn 'ɨ́ita'a ayén huateáturan jamuan ɨ́ rucɨ́n tɨ́j na'a tɨ auj ruuri. Ajta tɨ pua'a a'ɨ́ɨn cɨ́na'ara'an ɨ́ 'ɨ́ita'a huámɨ'ɨni, capu ché'e ayén tí'ira'aíite'e a'ame. 3A'ɨ́j pu jɨ́n, tɨ pua'a nu'u seɨj jamuan huatéviche'en tɨ pua'a auj ruuri ɨ́ cɨ́na'ara'an, ayée mú tiraatamuá'amuate'e muá'aju'u me'ɨ́jna ɨ́ 'ɨ́ita'a tɨjɨ́n tɨ huaújxana'acɨra'ate. Mɨ́ ajta tɨ pua'a a'ɨ́ɨn cɨ́na'ara'an ayén huámɨ'ɨni, a'ɨ́jna ɨ́ niuucari capu ché'e tí'ira'aíite'e a'ame. Ajta camu ché'e miyen raatamuá'amuate'e muá'aju'u tɨjɨ́n tɨ huaújxana'acɨra'ate, tɨ pua'a seɨj jamuan huatéviche'en. 4Seajta mú'een, ne'ihuaamua'a, a'iné Cɨríistu'u pu ayén rajpuaíjtzi já'araa ɨ́ rutevij jɨme'e mú'ejmi jetze me'ecan a'ɨ́jna jɨme'e tɨ huamɨ́'ɨ ɨ́ cúruu jetze, capu ché'e tejá'amua'aíite'e a'ame a'ɨ́jna ɨ́ niuucari ɨ́ mej jɨ́n tí'aijta. A'ɨ́j xu jɨ́n, mú'een seɨj jetze xu ajtéme'ecan. A'ii pu a'ɨ́ɨn pú'een a'ɨ́jna tɨ Dios ayén ra'ajjáj huá'a tzajta'a ɨ́ mɨ'ɨchite sej si siyen raatátuiire'en ɨ́ Dios jemi setɨ́j sena'a sej se'ɨ́jna jɨ́n huarɨ́j tɨ í'ixɨ'epɨ'ɨn. 5Ayee pu'u xaa ne'u titáaruu tɨ́'ɨj ayén tí'ita'aijte'eca'a a'ɨ́jna tɨ a'ij pua'a 'een. A'ɨ́jna ɨ́ niuucari ɨ́ mej jɨ́n tí'aijta, a'ɨ́ɨ pu ca'aníjra'a raatá'a a'ɨ́jna tɨ a'ij pua'a 'een tɨ huiiráninei ɨ́ ta tzajta'a. Ajta a'ɨ́ɨn tɨ a'ij pua'a 'een, ayée pu tí'imuarɨ'eca'a ɨ́ ta tzajta'a, tetɨ́j tena'a ve'ée ɨ́ ta jetze, tej ti tiyen raamuá'itɨn tej huácui'ini. 6Ajta íjii, capu ché'e tí'ita'aíite'e a'ame a'ɨ́jna ɨ́ niuucari ɨ́ mej jɨ́n tí'aijta, a'iné Cɨríistu'u pu huamɨ́'ɨ ta jetze me'ecan. A'ɨ́ɨ pu a'ɨ́jna jetze taateájtuaa tej ti jéjcuacan jɨ́n ti'itéva'ɨrihua'an te'ɨ́jna jɨme'e ɨ́ ye'irá tɨ a'ɨ́jna jetze me'ecan ɨ́ xɨéjniu'ucare'ara'an ɨ́ Dios, tej ti caí ché'e tiyen ti'itéva'ɨrihua'an ɨ́ ye'irá jɨme'e tɨ mí'ime'ecan, tɨ ajta té'eyu'usi'ihuaca'a. 7¿A'iné huataújmua'a a'ɨ́jna? ¿Ni ayén huataújmua'a, tɨ a'ɨ́ɨn niuucari ɨ́ mej jɨ́n tí'aijta, ni caí a'ɨ́ɨn pú'een ɨ́ tɨ a'ij pua'a 'een? Capu xaa ne'u, a'iné canu niyen ramua'aréerenche'e ti'itɨ́j tɨ pɨ́rɨcɨ tɨ a'ij pua'a 'een tɨ pua'a caí huateáturanche'e itejmi jemi a'ɨ́jna ɨ́ niuucari ɨ́ mej jɨ́n tí'aijta. Tɨ́ pua'a caí ayén tinaatá'ixaate'enche'e a'ɨ́jna ɨ́ niuucari tɨjɨ́n: “Capej tí'inecua'atze”, canu ja'anáj ramua'aréerenche'e tɨ ayén a'ij pua'a 'een tɨ pua'a niyen tí'inecua'atze. 8Ajta a'ɨ́jna tɨ a'ij pua'a 'een tɨ huiiráninei yú ne tzajta'a, a'ɨ́ɨ pu ayén ti'ihuaújxe'eviste neetzi jetze nej ni jeíhua huápɨ'ɨ tí'inecua'atze a'ɨ́jna jɨme'e tɨ a'ɨ́ɨn niuucari ayén tinaamuá'ate a'ij tɨ huataújmua'a a'ɨ́jna ɨ́ niuucari tɨ jɨ́me'en yee “capej tí'inecua'atze.” Ayee pu'u, a'iné tɨ pua'a caí ayén seijre'e ɨ́ niuucari ɨ́ mej jɨ́n tí'aijta, capu rɨ'ɨrí tej tiyen tí'iramua'areere ti'itɨ́j tɨ pɨ́rɨcɨ tɨ a'ij pua'a 'een. 9Ajta jéjcua ɨmuá nu niyen nexɨéehua á'uche'ecane'e; canu ti'itɨ́j tí'ijmua'areereca'a. Capu tí'ine'aijte'eca'a a'ɨ́jna ɨ́ niuucari ɨ́ mej jɨ́n tí'aijta. Aj nu ni niyen ra'utámua'areeri'i ne'ɨ́jna ɨ́ niuucari. Netɨ́'ɨj ni niyen tiráamua'areeri'i tɨ́j na'a ɨ́ nej jɨ́n auteájturaa ne'ɨ́jna jemi ɨ́ niuucari. Canu ché'e rɨ́'ɨ mé te'uché'ecane'e. 10Ajta, ayée pu tiná'amitɨejte'eca'a tɨ ayén tiu'urɨ́j. A'ɨ́jna ɨ́ niuucari tɨ jɨ́n Dios ayén tiraaxɨ́'epɨ'ɨntare tɨ nu'u jɨ́n rɨ́'ɨ titaatá'acare'enche'e, capu ayén rɨ́'ɨ titaatá'a tzɨ́te'e, sino ayée pu'u na'uxɨ́jte nej ni niyen huámɨ'ɨni ne'ɨ́jna jɨme'e nej caí ra'ará'aste ne'ɨ́jna ɨ́ niuucari. 11Ayee pu a'ɨ́jna jɨ́n te'irájraa. A'ɨ́jna tɨ a'ij pua'a 'een, ayée pu ti'ihuaújxe'eviste ineetzi jetze a'ɨ́jna jɨme'e tɨ a'ɨ́ɨn niuucari ayén tiu'utaxájtaca'a ti'itɨ́j tɨ pɨ́rɨcɨ tɨ a'ij pua'a 'een. Ajta á'iyen, a'ɨ́ɨn tɨ a'ij pua'a 'een ayén náacuanamua nej ni caí niyen ra'ará'asten ne'ɨ́jna ɨ́ niuucari. Ayee pu a'ɨ́jna jɨ́n huarɨ́j, a'ɨ́ɨ pu ɨ́ niuucari ayén na'uxɨ́jte nej ni huámɨ'ɨni a'ɨ́jna jɨme'e nej caí ra'ará'astijre. 12A'ɨ́j pu jɨ́n, capu ti'itɨ́j rá'aturaate'e a'ɨ́jna ɨ́ niuucari ɨ́ mej jɨ́n tí'aijta. Ajta a'ɨ́jna tɨ jɨ́n ayén tihuá'aijte'e, capu ajta ti'itɨ́j rá'aturaate'e. Ayee pu 'een jɨ́n tí'aijta a'ij tɨ tiraavíjte'e, ajta nain pu jɨ́n i'i xɨ́'epɨ'ɨn. 13¿Ni qui ayén huataújmua'a tɨ a'ɨ́jna tɨ i'i xɨ́'epɨ'ɨn ayén na'uxɨ́jte nej ni niyen huámɨ'ɨni? Capu xaa ne'u a'atzu. Mɨ́ ajta, ayée pu ruxe'eve'eca'a tej tiyen tiraatámua'ati ti'itɨ́j tɨ pɨ́rɨcɨ tɨ a'ij pua'a 'een, tej ti tiyen tiráamua'aree tɨ a'ɨ́ɨn pɨ́rɨcɨ a'ɨ́jna tɨ xaa a'ij pua'a 'een ɨ́ Dios jemi. A'ɨ́j pu jɨ́n a'ɨ́jna tɨ a'ij pua'a 'een ayén ti'ihuaújxe'eviste ineetzi jetze, tɨ i a'ɨ́ɨn tɨ i'i xɨ́'epɨ'ɨn, ayén na'uxɨ́jte'en nej ni ne'ɨ́jna jɨ́n huámɨ'ɨni, nej caí rá'aste ne'ɨ́jna ɨ́ niuucari, tɨ ij ajta ayén seíire'e á'ara'ani tɨ jeíhua huápɨ'ɨ a'ij pua'a seijre'e ɨ́ Dios jemi a'ɨ́jna ɨ́ ti'itɨ́j tɨ a'ɨ́ɨn niuucari raatá'ijmɨi. 14Ayee tu ramua'aree tɨ a'ɨ́ɨn niuucari a'ɨ́jna jetze me'ecan ɨ́ xɨéjniu'ucare'ara'an ɨ́ Dios. Mɨ́ neajta inee, i nej jɨ́n ratéhua'ira'a, nee nu neajta tí'ivaɨre'e nain jɨme'e ne'ɨ́jna tɨ a'ij pua'a 'een. 15Ayee pu'u, canu yaú'itɨe a'ij nej 'een jɨ́n niyen ti'itíncha'ɨɨ. A'iné ɨ́ ti'itɨ́j ɨ́ nej niyen raxɨ́'eve'e nej jɨ́n niyen huárɨni, canu xaa ne'u niyen rɨcɨ. Ajta, a'ɨ́jna tɨ caí a'atzu na'aráanajche, ayée nu ne'ɨ́jna jɨ́n rɨcɨ. 16Ayee pu'u, tɨ pua'a niyen rɨcɨ ne'ɨ́jna jɨme'e tɨ caí a'atzu na'aráanajche, aj nu xaa ne'ɨ́jna jɨ́n niyen tiu'utaxáj yee a'ɨ́ɨ pu nu'u i'i xɨ́'epɨ'ɨn a'ɨ́jna ɨ́ niuucari ɨ́ mej jɨ́n tí'aijta. 17A'ɨ́j pu jɨ́n, ayée na'a 'een. Canu ché'e ne'ɨ́n pú'een ɨ́ nej neseɨ́j niyen rɨcɨ, sino a'ɨ́ɨ pu a'ɨ́ɨn pú'een ɨ́ tɨ a'ij pua'a 'een tɨ tásiseiiri yú ne tzajta'a. 18Ayee nu ramua'aree tɨ yú ne tzajta'a a'ɨ́jna jetze ɨ́ nej ratéhua'ira'a, capu ti'itɨ́j ú'useijre'e tɨ xɨ́'epɨ'ɨn 'een. Nee nu xaa niyen á'anca'ane nej niyen huárɨni ne'ɨ́jna jɨme'e tɨ i'i xɨ́'epɨ'ɨn. Mɨ́ neajta inee, capu rɨ'ɨrí nej niyen rɨjca. 19Mɨ́ ajta, ɨ́ nej jɨ́n niyen rɨcɨ, capu a'ɨ́ɨn pú'een ɨ́ tɨ i'i xɨ́'epɨ'ɨn tɨ ajta na'aráanajche nej niyen huárɨni. Ca pu xaa ne'u. Ajta, a'ɨ́jna tɨ a'ij pua'a 'een, tɨ ajta caí a'atzu na'aráanajche nej niyen rɨjca, naúche'e nu ne'ɨ́jna jɨ́n niyen rɨcɨ. 20A'ɨ́j pu jɨ́n, tɨ pua'a niyen ne'ɨ́jna jɨ́n rɨjca a'ij tɨ caí tina'aráanajche, canu ché'e ne'ɨ́n pú'een inee, i nej niyen rɨcɨ, sino a'ɨ́jna tɨ a'ij pua'a 'een tɨ ú'useijre'e yú ne tzajta'a, a'ɨ́ɨ pu xaa a'ɨ́ɨn pú'een ɨ́ tɨ a'ɨ́jna jɨ́n ayén rɨcɨ. 21A'ɨ́j pu jɨ́n, ayée pu tiná'amitɨejte'e tɨ ayén tí'ineruure. Netɨ́j nena'a nej niyen ne'ɨ́jna jɨ́n á'anca'ane nej niyen huárɨni ɨ́ tɨ i'i xɨ́'epɨ'ɨn jɨme'e, a'ɨ́ɨ pu ajta neetzi jemi seijre'e a'ɨ́jna tɨ a'ij pua'a 'een. 22Jee xaa ne'u, nexɨejniu'uca nu jɨ́n niyen tí'ijxe'eve'e nej niyen ra'ará'astijre'en tɨ́j na'a tɨ taateájtuaa ɨ́ Dios. 23Ayee pu ajta tiná'amitɨejte'e tɨ ayén tí'ineruure netɨ́j nena'a ti'itéjvee ɨ́ ne jetze. A'ɨ́ɨ pu ne'use'e a'ɨ́jna tɨ a'ij pua'a 'een a'ɨ́jna jamuan ɨ́ tɨ tí'aijta yú nexɨejniu'uca jetze. A'ɨ́ɨ pu ajta na'antimuá'itɨ nej ni ca'anéeri jɨ́n raatéva'ɨrihua'a ne'ɨ́jna tɨ a'ij pua'a 'een tɨ ayén tí'aijta yú nej jetze netɨ́j nena'a ti'itéjvee. 24Cui'i xaa ineetzi. ¿A'ataani ayén nu'irájtuaasin a'ɨ́jna jetze i nej ratéhua'ira'a tɨ i caí ayén tináacɨ'ɨti nej niyen huámɨ'ɨni? 25Jee xaa ne'u, jé'ecan nu huápɨ'ɨ rɨ́'ɨ tiratá'aca ɨ́ Dios ne'ɨ́jna jɨme'e a'ij tɨ huarɨ́j ta jetze me'ecan a'ɨ́jna ɨ́ Jesús, ɨ́ Cɨríistu'u tɨ ajta tavástara'a pú'een. Mɨ́ neajta inee, nexɨejniu'uca nu jɨ́n ratéva'ɨri a'ij tɨ titaateájtuaa a'ɨ́jna ɨ́ Dios. Netɨ́j nena'a ti'itéjvee yú ne jetze, ayée nu neajta ratéva'ɨri a'ij tɨ tí'ine'aijte'e a'ɨ́jna tɨ a'ij pua'a 'een. Tej nu'u tiyen rɨ́'ɨ tí'itacha'ɨɨ taajú'un a'ij tɨ tí'ijxe'eve'e ɨ́ xɨéjniu'ucare'ara'an ɨ́ Dios.

will be added

X\