Romanos 6

1¿A'iné huataújmua'a ɨ́ nej neri jamuá'ixa? ¿Ni qui tej teuj auté'ɨtze'ara'an ɨ́ Dios jemi tɨ ij jaítze'e Dios rɨ́'ɨ titaatá'an? 2Catu xaa ne'u. ¿A'iné tí'irɨ'ɨri tej tiyen teuj títe'uté'ɨtze'ara'an ɨ́ Dios jemi, a'iné catu ché'e rá'astijre'e te'ɨ́jna tɨ a'ij pua'a 'een? Capu xaa ne'u ché'e a'ij tí'irɨ'ɨri tej ra'ará'asten ɨ́ tɨ a'ij pua'a 'een. 3Mɨ́ seajta mú'een, xu'uri siyen ramua'aree se'ɨ́jna, tetɨ́'ɨj huámuaɨ'ɨvijhuaca'a te'ɨ́jna jɨme'e tej teri rá'astijre'e te'ɨ́jna ɨ́ Cɨríistu'u tɨ ajta i'i Jesús, teen tu teajta te'ɨ́jna jetze ajtéme'ecantaca'a tɨ́'ij a'ɨ́ɨn huamɨ́'ɨ. 4Tetɨ́'ɨj huámuaɨ'ɨvijhuaca'a, ayée pu ajta titáaruu mej ta'avé'ena a'ɨ́jna jamuan ɨ́ tɨ huamɨ́'ɨ, tej ti tiyen che'atá tena'a jéjcuacan jɨ́n ruuri tá'ara'ani a'ij tɨ ajta tiráaruu a'ɨ́jna ɨ́ Cɨríistu'u. Dios pu ayén ra'ajjáj huá'a tzajta'a ɨ́ mɨ'ɨchite a'ɨ́jna jɨme'e tɨ muárɨ'eri'ire'ara'an huataseíjre. 5Tɨ́ pua'a tiyen te'ɨ́jna jetze ajtéme'ecantaca'a tɨ́'ɨj a'ɨ́ɨn huamɨ́'ɨ, ayée pu ti'ayajna tej teajta jetzen ajtéme'ecanta tá'aju'un te'ɨ́jna tɨ́'ɨj Dios ayén ra'ajjáj huá'a tzajta'a ɨ́ mɨ'ɨchite. 6Ayee pu'u, ayée pu titá'amitɨejte'e, tɨ a'ɨ́ɨn tɨ a'ij pua'a 'een, ɨ́ tej jɨ́n a'ij pua'a ti'itítacha'ɨɨca'a, Dios pu ajta ra'uxɨ́jte jamuan ɨ́ Cɨríistu'u matɨ́'ɨj rá'utatai ɨ́ Cúruu jetze, tɨ ij ayén antipuá'are a'ɨ́jna tɨ a'ij pua'a 'een ɨ́ tej jɨ́n a'ij pua'a ti'itítacha'ɨɨca'a tɨ ij caí ché'e ca'aníjra'a tejámuaata'aíjte'en a'ɨ́jna tɨ a'ij pua'a 'een. 7Tɨ́ pua'a ja'atɨ́ ari huámɨ'ɨni, capu ché'e rɨ'ɨríista a'ame tɨ a'ɨ́ɨn ɨ́ tɨ a'ij pua'a 'een ayén tiraata'aíjte'en. 8Mɨ teajta iteen, ayée pu titá'amitɨejte'e tɨ ayén ti'ayajna. Tɨ́ pua'a iteen Cɨríistu'u jetze ajtéme'ecan a'ɨ́jna jɨme'e tɨ huamɨ́'ɨ, teen tu teajtáhua'a ruuri tá'aju'un te'ɨ́jna jamuan. 9Ayej xaa ne'u ti'ayajna, a'iné Dios pu ari ra'ajjáj a'ɨ́jna ɨ́ Cɨríistu'u huá'a tzajta'a ɨ́ mɨ'ɨchite, a'ɨ́j pu jɨ́n, capu ché'e rɨ'ɨrí tɨ Cɨríistu'u ajtahua'a huámɨ'ɨni. Capu ché'e rɨ'ɨrí tɨ ra'antimuá'itɨn a'ɨ́jna ɨ́ muárɨ'eri'ire'ara'an ɨ́ mej jɨ́n huácui'ini. 10Tɨ́'ɨj a'ɨ́ɨn huamɨ́'ɨ, ayée pu 'een jɨ́n huamɨ́'ɨ tɨ ij ra'upuá'ajte'en a'ɨ́jna tɨ a'ij pua'a 'een ɨ́ mej jɨ́n a'ij pua'a titetiújcha'ɨɨca'a. Ajta íjii, tɨ Cɨríistu'u ajtahua'a i'irúuri, a'ɨ́ɨ pu ayén a'ɨ́jna jɨ́n ruuri tɨ ij rɨ́'ɨ tiraatá'an ɨ́ Dios. 11Ché'e ayén che'atá na'a tejamuá'amitɨejte'e sej seri huácuii sej si caí ché'e siyen ratéva'ɨrihua'an se'ɨ́jna tɨ a'ij pua'a 'een. Ché'e ajta ayén tejamuá'amitɨejte'e sej ruurican huateájturaa ɨ́ Dios jemi a'ɨ́jna jɨme'e sej seri se'ɨ́jna jetze ajtéme'ecan ɨ́ Cɨríistu'u tɨ ajta i'i Jesús. 12A'ɨ́j pu jɨ́n, caxu siyen ratá'acare'en tɨ a'ɨ́ɨn ɨ́ tɨ a'ij pua'a 'een ayén tejá'amua'ijte'e ɨ́ a'amua tzajta'a. Caxu seajta rá'astijre'e a'ɨ́jna tɨ a'ij pua'a 'een tɨ huiiráninei ɨ́ a'amua tzajta'a. 13Caxu seajta ratuiire'e tɨ́j na'a tɨ seijre'e ɨ́ á'amuajetze se'ɨ́jna jemi ɨ́ tɨ a'ij pua'a 'een sej si siyen ratéva'ɨrihua'an, sino setá'aj siyen huataújtuiire'en ɨ́ Dios jemi se'ɨ́jna jɨme'e tɨ ayén tejamuá'amitɨejte'e tɨ a'ɨ́ɨn ari amua'irájtua huá'a tzajta'a a'ɨ́ɨme ɨ́ mej meri huácuii. Setá'aj siyen tiraatátuire'e tɨ́j na'a tɨ seijre'e á'amuajetze sej si siyen se'ɨ́jna jɨ́n ratéva'ɨrihua'an ti'itɨ́j jɨme'e tɨ xɨ́'epɨ'ɨn 'een. 14Tɨ́ pua'a siyen huárɨni, capu ja'anáj tejámuaata'aíjte'esin a'ɨ́jna tɨ a'ij pua'a 'een, a'iné xu'uri siyen se'ɨ́jna jetze araújca'ane tɨ Dios ruxɨ́'evi'ira'a jɨ́n rɨ́'ɨ tejamuatá'aca. Caxu ché'e siyen ca'anéeri jɨ́n rá'astijre'e se'ɨ́jna ɨ́ niuucari ɨ́ mej jɨ́n tí'aijta. 15¿A'iné tejamuá'amitɨejte'e mú'ejmi? ¿Ni qui tiyen teuj a'ij pua'a ti'itítacha'ɨɨ tá'ara'ani te'ɨ́jna jɨme'e tɨ Dios ruxɨ́'evi'ira'a jɨ́n rɨ́'ɨ titaatá'aca, teajta caí ché'e rá'astijre'e te'ɨ́jna ɨ́ niuucari ɨ́ mej jɨ́n tí'aijta? Catu xaa ne'u a'atzu. 16Mú'een xu siyen ramua'aree tɨ pua'a siyen huataújtuiire'en ja'atɨ́ jemi sej si ca'anéeri jɨ́n ra'ará'astijre'en, mú'een xu ca'anéeri jɨ́n raatéva'ɨrihua'a xá'aju'un, xaa ne'u. Capu amɨ́n a'ij, tɨ pua'a siyen tiraatéva'ɨrihua'an se'ɨ́jna tɨ a'ij pua'a 'een, tɨ ajta ayén amuaatá'asin sej huácui'ini, na'ari tɨ pua'a siyen sena'a tiraatéva'ɨrihua'an se'ɨ́jna tɨ xɨ́'epɨ'ɨn 'een sej si siyen ruuri huateáturan ɨ́ Dios jemi. 17A'ajná'ɨmua xu xaa siyen ca'anéeri jɨ́n raatévaɨ se'ɨ́jna tɨ a'ij pua'a 'een. Ajta íjii, ayée nu 'een jɨ́n rɨ́'ɨ tiraatá'aca ɨ́ Dios ne'ɨ́jna jɨme'e sej a'ujca'anéecan jɨ́n ra'ará'astijre'e se'ɨ́jna ɨ́ niuucari ɨ́ mej jɨ́n tejamuaamuá'ate, ɨ́ sej seajta ra'ancuré'a. 18Dios pu amua'irájtua sej si caí ché'e ca'anéeri jɨ́n ratéva'ɨrihua'an se'ɨ́jna tɨ a'ij pua'a 'een. Mɨ́ ajta, ayée pu amuáaruu sej si ca'anéeri jɨ́n raatévaɨre'en se'ɨ́jna tɨ xɨ́'epɨ'ɨn 'een a'ɨ́jna jemi ɨ́ Dios. 19Ayee nu ne'ɨ́jna jɨ́n e'ehuauritɨéecan jɨ́n tejá'amua'ixaate'e a'ij tɨ tihuá'aruurejca'a huá'a tzajta'a ɨ́ teɨte a'iné ayée pu tejamuá'aturaate'e sej caí nain jaú'itɨe. Ayee xu sejmí'i tiú'ujtuiiraca'a setɨ́j sena'a sej ratéhua'ira'a sej si siyen raatéva'ɨrihua'an ɨ́ sej jɨ́n huateújxana'acɨra'aten, sej si seajta siyen huárɨni tɨ́j na'a tɨ caí xɨ́'epɨ'ɨn 'een ɨ́ Dios jemi. A'ɨ́j pu jɨ́n, ayée pu ruxe'eve'e sej siyen che'atá sena'a huataújtuiire'en nain jɨme'e setɨ́j sena'a sej ratéhua'ira'a sej si siyen raatéva'ɨrihua'an ɨ́ tɨ xɨ́'epɨ'ɨn 'een sej si siyen rɨ'éene'ecán jɨ́n huateáturan ɨ́ Dios jemi. 20Setɨ́'ɨj seuj raatéva'ɨrihua'a se'ɨ́jna tɨ a'ij pua'a 'een, capu a'amua jetze ruxe'eve'eca'a sej siyen ra'ará'astijre'en se'ɨ́jna tɨ xɨ́'epɨ'ɨn 'een ɨ́ Dios jemi. 21¿Ti'itájni jɨ́n a'ij tejámuaatévaɨ a'ájná'ɨmua a'ɨ́jna, tɨ́j na'a tɨ ari já'amuatevi'iraste'e? Capu sein ti'itɨ́j, a'iné tɨ́j na'a tɨ ayén a'ij pua'a 'een, ayée pu hua'atéva'ɨrihua'a mej mi me'ɨ́jna jɨ́n huácui'ini. 22Mɨ́ ajta íjii, tɨ́'ɨj Dios amua'irájtua sej si caí ché'e ratéva'ɨrihua'an a'ɨ́jna ɨ́ tɨ a'ij pua'a 'een, ayée xu seri ca'anéeri jɨ́n raatéva'ɨri se'ɨ́jna ɨ́ Dios. Ajta, ayée pu tejá'amuacɨ'ɨti sej siyen rɨ'éene'ecán jɨ́n huateáturan ɨ́ Dios jemi, sej si siyen seíire'e xá'ara'ani ɨ́ jemin tɨ́j na'a rusén jɨme'e. 23Ayee pu'u xaa ne'u ti'ayajna. Ayee pu raamuá'itɨn ɨ́ ja'atɨ tɨ huámɨ'ɨni tɨ pua'a ayén raatévaɨre'e a'ɨ́jna tɨ a'ij pua'a 'een. Ajta, ayée pu 'een jɨ́n Dios rɨ́'ɨ titaatá'a ruxɨ́'evi'ira'a jɨme'e tej ti tiyen ruuri huateáturan ɨ́ jemin, a'ɨ́jna jɨme'e tej te'ɨ́jna jetze ajtéme'ecan te'ɨ́jna ɨ́ Cɨríistu'u tɨ ajta i'i Jesús, ɨ́ tavástara'a.

will be added

X\