Romanos 3

1¿Ti'itájni jɨ́n a'ij rá'amua'araj a'ɨ́jna ɨ́ ja'atɨ tɨ Israél jetze ajtéme'ecan? ¿Ni qui ti'itɨ́j a'ij tiraatéva'ɨri tɨ a'ɨ́ɨn ra'antisíjcheca'a ɨ́ runavij? 2Ayej xaa ne'u. Jéihua pu tira'ancuré'asin, ajta mu'iicáca pu jɨ́n raatéva'ɨri, a'ɨ́jna jɨme'e tɨ Dios amuacaí raateájtuaa ɨ́ runiuuca a'ɨ́mej jemi ɨ́ mej Israél jetze ajtéme'ecan. 3Mɨ́ majta seica, camu miyen tira'ará'astijre. ¿A'iné huataújmua'a a'ɨ́jna ɨ́ mej caí miyen tira'ará'astijre? ¿Ni qui miyen ra'uré'uuna me'ɨ́jna tɨ jɨ́n Dios te'ataújratziiri'i? 4Camu a'atzu xaa ne'u. Ché'e ayén éene'en ɨ́ Dios jemi tɨ a'ɨ́ɨn Dios ruseɨ́j ayén tzáahuati'ira'a jɨ́n huateáturan tɨ́j na'a rusén jɨme'e. Mɨ́ majta ɨ́ teteca, ché'e ayén éene'en mej tí'ihua'itaca. Ché'e ayén éene'en a'iné ayée pu té'eyu'usi'i tɨjɨ́n: Mej mi ráamua'aree tɨ ayén ti'ayajna a'ij pej peri tiu'utaxájtaca'a, pej pi tiu'utémua'itɨn pe'ɨ́jna jɨme'e matɨ́'ɨj me'ɨ́n muá'axɨjte'en. 5Tɨ́ pua'a ayén seijre'e tɨ Dios ayén urarɨ́'ene'acan jɨ́n huateájturaa a'ɨ́jna jɨme'e tej caí rá'astijre'e iteen, ¿a'iné huataújmua'a amɨ́jna? ¿Ni qui tiyen tiu'utaxáj a'ij mej tí'ixaxa'a a'ɨ́ɨme ɨ́ mej caí ramua'ate ɨ́ Dios? Ayee mú tɨjɨ́n: “Capu nu'u xɨ́'epɨ'ɨn rɨcɨ ɨ́ Dios a'ɨ́jna jɨme'e tɨ a'ɨ́ɨn huataniú'ucan itejmi jemi.” 6Ayee nu tejá'amua'ixaate'e, tɨ pua'a ayén ti'ayajna a'ij mej tí'ixaxa'a a'ɨ́ɨme, ¿a'iné auj tí'irɨ'ɨri tɨ a'ɨ́ɨn Dios huá'axɨjte'en naíjmi'ica ɨ́ mej yen huachéjme ɨ́ chaanaca japua? Capu xaa ne'u a'ij tí'irɨ'ɨri. 7Rɨ'ɨrí tɨ ja'atɨ́ ayén tiu'utaxáj yee: “¿A'iné 'een jɨme'e Dios ayén auj ná'axɨjte'en a'ɨ́jna jɨme'e ɨ́ nej nu'u auteájturaa ɨ́ jemin? Capu ayén tiraavíjte'e a'iné Dios pu jaítze'e tzáahuati'ira'a jɨ́n huateáturaasin a'ɨ́jna jɨme'e nej nu'u tí'ihua'itaca. Ajta jaítze'e mú miyen rɨ́'ɨ tiratá'aca ɨ́ Dios me'ɨ́jna jɨme'e.” 8Tɨ́ pua'a ayén ti'ayájnache'e a'ij tɨ ti'ixa a'ɨ́jna ɨ́ ja'atɨ, ayée pu ajta rɨ'ɨríistaca'a tej tiyen tiu'utaxájtache'e tɨjɨ́n: “Tiché'e nu'u tiyen a'ij pua'a tirájcha'ɨɨ tɨ ij ayén huateáturan ɨ́ tɨ í'ixɨ'epɨ'ɨn.” Jee xaa ne'u, ayée mú seica ta jetze tí'ijpua'ajte'e tej nu'u tiyen tí'ixaxa'a. Mu'uri xaa ne'u miyen ra'antimuá'itɨ tɨ Dios ayén a'ɨ́jna jɨ́n huá'axɨjte'en. Naími'i tu auteájturaa ɨ́ jemin. 9¿A'iné na'aqui? ¿Ni qui ayén huataújmua'a tɨ jaítze'e naa tí'itavaɨre'e itejmi i tej Israél jetze ajtéme'ecan caí a'ɨ́mej? Capu xaa ne'u a'atzu, a'iné tu'uri tiyen raataxájtaca'a tɨ a'ɨ́ɨn ɨ́ tɨ a'ij pua'a 'een, a'ɨ́ɨ pu ta'antimuá'itɨ tej ti a'uté'ɨtzee ɨ́ Dios jemi naíjmi'ica iteen i tej Israél jetze ajtéme'ecan, majta a'ɨ́ɨme ɨ́ mej seɨj chuéjra'a japua é'eme'ecan. 10Ayee pu xaa ne'u ti'ayajna a'iné ayée pu té'eyu'usi'i tɨjɨ́n: Capu nu'u mé'e ja'atɨ́ tɨ ayén urarɨ́'ene'acan jɨ́n seijre'e. Capu ja'atɨ́. 11Capu nu'u mé'e ja'atɨ́ tɨ yaú'itɨe a'ij tɨ 'een ɨ́ Dios jemi. Capu nu'u mé'e ja'atɨ́ tɨ ayén rahuauhuau tɨ ij raateánajche. 12Naíimi'i mú meri mé rúurɨe méjca'i. Camu ché'e ti'itɨ́j jɨ́n tí'ivaɨre'e ɨ́ jemin. Capu mé'e ja'atɨ́ tɨ ayén rɨ́'ɨ ti'itiújcha'ɨɨ. Capu ja'atɨ́ xaa ne'u. 13A'ij pu pua'a namuajre'e a'ij mej tí'ixaxa'a. Runeanu mú jɨ́n tí'ihua'itaca mej mi huá'ucuanamuan ɨ́ ruxɨ́'ej teɨte. Ayee pu che'atá na'a tí'ivaɨre'e ɨ́ niuucari ɨ́ mej jɨ́n tí'ixaxa'a tɨ́j ajta ɨ́ huá'ave'eri tɨ je'ihuajé'ica, a'ɨ́jna tɨ cu'ucu'u jetze 'aíjninei. 14Jéihua mú a'ij pua'a tiú'ujjepe'e, majta huápɨ'ɨ jeíhua huá'ajaaxɨejte'e ɨ́ ruxɨ́'ej teɨte. 15Ca'anacan mú a'uruáachejye'i mej mi seɨj huajé'ica mé já'ahua'a. 16A'u tɨ na'a mej é'ecɨɨnej, a'ɨ́ɨ mú a'ujca'anéecan jɨ́n raaté'uuna tɨ́j na'a tɨ a'uun tejé'eseijre'e. Jéihua mú puaíjtzi hua'atá'aca ɨ́ ruxɨ́'ej teɨte. 17Capu ayén tihuá'amitɨejte'e a'ij tɨ 'een tɨ́'ɨj Dios hua'utéjpua'ajte'en ɨ́ teɨte mej mi ru'ihuaamua'atan temua'a naa. 18Camu majta rá'atese'e ɨ́ Dios. Camu majta ratá'aca tɨ huá'a jemi seijre'e. 19Teajta iteen, tu'uri tiyen ramua'aree a'ij tɨ ti'ixa ɨ́ niuucari ɨ́ mej jɨ́n tí'aijta. Ayee pu tihuá'ixaate'e a'ɨ́mej ɨ́ mej jetzen ruxe'eve'e mej miyen ra'ará'astijre'en me'ɨ́jna ɨ́ niuucari. Ajta ayén huatétuiihuaca'a mej mi huateáturan mej caí ché'e ti'itɨ́j xajta naíjmi'i ɨ́ teɨte me'ɨ́jna jɨme'e tɨ caí ché'e mé'e ti'itɨ́j ɨ́ mej ru jetze rujpuá'ajte'en. Ayee pu'u te'irájraa tɨ ij ayén ámitɨeere'e tɨ Dios huá'axɨjte'en naíjmi'ica ɨ́ mej yen huachéjme ɨ́ chaanaca japua a'ɨ́jna jɨme'e mej auteájturaa ɨ́ jemin. 20A'ɨ́j pu jɨ́n, capu ja'atɨ́ ayén rɨ'éene'ecán jɨ́n huateáturaasin ɨ́ Dios jemi a'ɨ́jna jɨme'e tɨ a'ɨ́ɨn ja'atɨ́ ayén rá'astijre'e a'ɨ́jna ɨ́ niuucari ɨ́ mej jɨ́n tí'aijta. Mɨ́ teajta iteen, ayée tu 'een jɨ́n ramua'aree ti'itɨ́j tɨ pɨ́rɨcɨ tɨ a'ij pua'a 'een te'ɨ́jna jɨme'e tɨ caí rɨ'ɨrí tej nain jɨ́n ra'ará'astijre'en te'ɨ́jna ɨ́ niuucari. 21Ajta íjii, pu'uri ayén titaataseíjrate a'ij tɨ tí'irɨ'ɨri tej tiyen rɨ'éene'ecán jɨ́n huateáturan ɨ́ Dios jemi. Tu'uri ramua'aree tɨ caí ayén che'atá na'a tí'ivaɨre'e a'ɨ́jna ɨ́ niuucari ɨ́ mej jɨ́n tí'aijta. Jee xaa ne'u, ayée pu che'atá na'a tí'ita'ixaate'e a'ɨ́jna ɨ́ niuucari, majta a'ɨ́ɨme ɨ́ mej mejmí'i tí'ixaxa'ata'a ɨ́ Dios jetze me'ecan. 22- 23Ayee pu che'atá na'a tihuá'acɨ'ɨti naíjmi'ica mej mi miyen rɨ'éene'ecán jɨ́n huateáturan ɨ́ Dios jemi me'ɨ́jna jɨme'e mej miyen ra'ará'asten me'ɨ́jna ɨ́ Jesús tɨ ajta i'i Cɨríistu'u. Ayee pu che'atá na'a tihuá'acɨ'ɨti a'ɨ́mej ɨ́ mej Israél jetze ajtéme'ecan, majta a'ɨ́mej ɨ́ mej seɨj chuéjra'a japua é'eme'ecan, a'iné naími'i mú ruxɨ́'ej 'een ɨ́ Dios jemi. Naími'i mú majta auteájturaa ɨ́ jemin. Ajta capu ja'atɨ́ ayén raayɨ́'ɨtɨ tɨ́'ij ayén nain jɨ́n rɨ́'ɨ tiraatá'an ɨ́ Dios. 24Ajta pu Dios ruxɨ́'evi'ira'a jɨ́n ayén tíhua'uxɨ́'epɨ'ɨntari'iri'i mej mi rɨ'éene'ecán jɨ́n huateáturan ɨ́ jemin a'ɨ́jna jɨme'e tɨ a'ɨ́ɨ pu ayén rɨ́'ɨ tihua'utá'a. Ayee pu 'een jɨ́n huá'a japua huaniú a'ɨ́jna jɨme'e a'ij tɨ huarɨ́j ɨ́ Cɨríistu'u tɨ ajta i'i Jesús. 25Dios pu ayén raateájtuaa ɨ́ Jesús huá'a tzajta'a a'ɨ́ɨme ɨ́ mej yen japuan huachéjme íiyen chaanaca japua tɨ ij a'ɨ́ɨn ayén huataúra'an tɨ́j muaɨ'ɨvéjri ɨ́ tɨ jɨ́n tiu'utanájchita a'ɨ́jna jɨme'e ɨ́ mej té'echa'ɨɨca'a ɨ́ Dios jemi. Ajta tɨ ij a'ɨ́ɨn hua'utéjpua'ajte'en ɨ́ Dios jemi a'ɨ́jna jɨme'e mej rá'atzaahuate'e. Dios pu ayén huarɨ́j tɨ ij ayén tihua'utaseíjrate'en tɨ caí a'ɨ́ɨn a'ij pua'a huarɨ́j tɨ́'ɨj a'ɨ́ɨn amuacaí tihua'utá'uuni'iri'i ɨ́ mej jɨ́n auteájturaa ɨ́ jemin. Capu a'ájná'ɨmua puaíjtzi hua'atá'acare'e. 26A'ɨ́ɨ pu ajta ayén huarɨ́j mej mi me'ɨ́n ɨ́ mej huáteɨte íjii miyen raaseíj tɨ a'ɨ́ɨn xɨ́'epɨ'ɨn huarɨ́j a'ɨ́jna jɨme'e tɨ ruseɨ́j urarɨ́'en. Ayee pu ajta huarɨ́j mej mi ráamua'aree tɨ ajta xɨ́'epɨ'ɨn rɨcɨ a'ɨ́jna jɨme'e tɨ ayén tihuá'axɨ'epɨ'ɨntari'i mej mi miyen rɨ'éene'ecán jɨ́n huateáturan ɨ́ jemin, naíjmi'ica, a'achú mej pua'amé rá'astijre'e. 27Tɨ́ pua'a ayén ti'ayajna, ¿ti'itájni jɨ́n tá'atatzaahuate'e? Catu ti'itɨ́j jɨme'e, a'iné capu ché'e ayén tiraavíjte'e. ¿Ti'itájni pɨ́rɨcɨ ɨ́ niuucari tɨ taatá'ijmɨijra? ¿Ni qui a'ɨ́jna jɨme'e tej ra'ará'astijre'en te'ɨ́jna ɨ́ niuucari ɨ́ mej jɨ́n tí'aijta? Capu xaa ne'u a'ɨ́ɨn pú'een, sino a'ɨ́jna ɨ́ niuucari ɨ́ tej jɨ́n té'atzaahuate'e. 28Ayee pu xaa ti'ayajna, a'iné ayée pu titá'amitɨejte'e tɨ ja'atɨ́ ayén rɨ'éene'ecán jɨ́n huateáturaasin ɨ́ Dios jemi a'ɨ́jna jɨme'e tɨ a'ɨ́ɨn ja'atɨ́ té'atzaahuate'e. Ajta capu ti'itɨ́j jɨ́n raatéva'ɨri tɨ ayén ra'ará'astijre'en a'ɨ́jna ɨ́ niuucari ɨ́ mej jɨ́n tí'aijta. 29- 30Ajta a'ɨ́ɨn ɨ́ Dios, ¿ni qui ayée na'a pú'een huá'a Dios, ɨ́ mej Israél jetze ajtéme'ecan nusu ajta huá'a Dios pú'een a'ɨ́ɨme ɨ́ mej seɨj chuéjra'a japua é'eme'ecan? Jee xaa ne'u, a'ɨ́ɨ pu ajta huá'a Dios pú'een a'iné seɨ́j pu'u a'ɨ́ɨn pú'een ɨ́ Dios. A'ɨ́ɨ pu huá'axɨjte'en a'ɨ́ɨme ɨ́ mej Israél jetze ajtéme'ecan mej mi rɨ'éene'ecán jɨ́n huateáturan ɨ́ jemin me'ɨ́jna jɨme'e ɨ́ mej té'atzaahuate'e. A'ɨ́ɨ pu ajta ayén che'atá na'a huá'axɨjte'en a'ɨ́ɨme ɨ́ mej seɨj chuéjra'a japua é'eme'ecan mej mi miyen che'atá mena'a rɨ'éene'ecán jɨ́n huateáturan ɨ́ jemin a'iné ayée mú che'atá mena'a té'atzaahuate'e. 31¿Ni qui tiyen te'ɨ́jna jɨ́n ra'uré'uuna te'ɨ́jna ɨ́ niuucari ɨ́ mej jɨ́n tí'aijta te'ɨ́jna jɨme'e tej tiyen té'atzaahuate'e? Catu xaa ne'u. Mɨ́ teajta iteen, teen tu te'ɨ́jna jɨ́n raanaíjmire'en.

will be added

X\