Romanos 15

1Teajta iteen, i tej temua'a naa tirú'umua'aree a'ij tɨ 'een ɨ́ Dios jemi, ayée pu tiraavíjte'e tej te'utáviicua'i te'ɨ́jna jɨme'e a'ij mej tí'ijrɨ'ɨre a'ɨ́ɨme ɨ́ mej caí xɨ yaú'itɨe temua'a naa ɨ́ Dios jemi. Tiché'e caí tiyen tena'a rahuauca itejmi jɨme'e a'ij tɨ titá'amitɨejte'e, sino tiché'e rɨ́'ɨ tihua'utá'an ɨ́ seica. 2Ayee pu titaavíjte'e itejmi, a'achú tej pua'amé, tej ti rɨ́'ɨ tiraatévaɨre'en ɨ́ ta'ihuaara'a tɨ ij a'ɨ́ɨn jaítze'e raayɨ́'ɨtɨhua'an a'ij tɨ tí'ijxe'eve'e ɨ́ Dios. 3Ayee pu xaa ne'u Cɨríistu'u ajta ayén huarɨ́j. Capu ayée na'a rahuauca'a a'ij tɨ tira'aránajcheca'a, sino ayée pu tira'ará'aste a'ij tɨ té'eyu'usi'i tɨjɨ́n: “Ayee pu neetzi japua rájve mej na'ajteá'axɨ'ɨn mú'eetzi jetze me'ecan.” 4Ayee pu'u, a'iné nain tɨ́j na'a tɨ a'ájná'ɨmua é'eyu'usi'ihuaca'a, ayée pu 'een jɨ́n té'eyu'usi'ihuaca'a tej ti jetzen huátamua'aten, tɨ ij a'ɨ́ɨn tɨ é'eyu'usi'ihuaca'a ca'aníjra'a taatá'acare'en tej ti tiyen te'utáviicua'i, teajta tiyen rachú'eve'e tɨ Dios ayén tu'irájtuaani. 5- 6Ajta a'ɨ́ɨn Dios tɨ ayén ca'aníjra'a amuaatá'aca sej si siyen huateújca'anen, ajta sej si te'utáviicua'i, ché'e a'ɨ́ɨn ajta amuaatá'acare'en sej rɨ́'ɨ titetiújcha'ɨɨ rujɨ́ɨmua'a sej si siyen ru'ihuaamua'a xá'ara'ani temua'a naa a'achú sej pua'amé. Ché'e Dios rɨ́'ɨ tejamuaatá'acare'en a'ɨ́jna jɨme'e sej seuj siyen rá'astijre'e ɨ́ Cɨríistu'u tɨ ajta i'i Jesús, sej si naíjmi'i siyen rɨ́'ɨ tiraatá'an se'ɨ́jna ɨ́ Dios tɨ ya'upuáara'an pú'een ɨ́ tavástara'a, a'ɨ́jna ɨ́ Jesús tɨ ajta i'i Cɨríistu'u. Setá'aj siyen rɨ́'ɨ tiraatá'acare'en a'achú sej tirú'umua'aree ɨ́ á'amuatzajta'a. 7Setá'aj siyen che'atá sena'a ancuré'ujvi'itɨn seɨj seajta seɨj a'ij tɨ Cɨríistu'u ajta amua'ancuré'evi'itɨ mú'ejmi sej si siyen se'ɨ́jna jɨ́n rɨ́'ɨ tiraatá'an ɨ́ Dios. 8- 9Ayee nu tejá'amua'ixaate'e tɨ a'ɨ́ɨn Cɨríistu'u ayén a'ɨ́jna jɨ́n te'enteájrupi tɨ ij hua'utévaɨre'en a'ɨ́mej ɨ́ mej runavij a'antisí'iche a'ɨ́jna jɨme'e mej miyen ráamua'aree tɨ Dios tzáahuati'ira'a jɨ́n araúraste a'ij tɨ ari te'ataújratziiri'i. Cɨríistu'u pu nain jɨ́n te'ataújratziiri'i huá'a jemi ɨ́ huá'ahuaacɨxa'astemua'acɨ'ɨ mej mi a'ɨ́ɨme ɨ́ mej seɨj chuéjra'a japua é'eme'ecantaca'a majta miyen rɨ́'ɨ tiraatá'asin ɨ́ Dios me'ɨ́jna jɨme'e tɨ a'ɨ́ɨn huá'ancu'uvajxɨ. Ayee pu té'eyu'usi'i tɨjɨ́n: A'ɨ́j nu jɨ́n rɨ́'ɨ timuaatá'asin huá'a tzajta'a a'ɨ́mej ɨ́ mej seɨj chuéjra'a japua é'eme'ecan. Ayee nu ti'ichuíica na'ame nej ni ne'ɨ́jna jɨ́n rɨ́'ɨ timuaatá'an. 10Ajtahua'a ayén tɨjɨ́n: Setá'aj huataújtemua'ave'en huá'a jamuan ɨ́ teɨtestemua'ame'en ɨ́ Israél teecan, mú'een mɨ sej seɨj chuéjra'a japua é'eme'ecan. 11Ajtahua'a seɨ́j ayén tɨjɨ́n: Setá'aj rɨ́'ɨ tiraatá'an ɨ́ tavástara'a, naíjmi'i mú'een, a'achú sej pua'amé, mɨ sej seɨj chuéjra'a japua é'eme'ecan. Setá'aj seajta siyen tiu'utáchuiica ɨ́ jemin sej se'ɨ́jna jɨ́n rɨ́'ɨ tiraatá'an, naíjmi'i mú'een, mɨ teɨte, mɨ sej yen huachéjme chaanaca japua. 12Ajtahua'a, ayén tiu'utaxájtaca'a a'ɨ́jna ɨ́ Isaías teecan tɨjɨ́n: Seɨj pu airaújneijte'esin a'ɨ́jna jetze ɨ́ Isaí. A'ɨ́ɨ pu ayén huataseíjre'esin tɨ ij ayén tíhua'uta'aíjte'en naíjmi'ica a'ɨ́mej ɨ́ mej seɨj chuéjra'a japua é'eme'ecan. Majta a'ɨ́ɨme, ayée mú rájchu'eve'esin tɨ́'ij a'ɨ́ɨn hua'irájtuaani. 13Ajta a'ɨ́ɨn ɨ́ Dios tɨ ayén ca'aníjra'a tatá'a tej ti tiyen raachú'eve'en, ché'e a'ɨ́ɨn ayén rɨ́'ɨ tejamuaatá'an sej si jeíhua huápɨ'ɨ huataújtemua'ave'en, tɨ ij ajta amua'anpuá'ajte'en temua'a naa se'ɨ́jna jɨme'e sej siyen rá'astijre'e se'ɨ́jna ɨ́ tavástara'a. Ché'e a'ɨ́ɨn ajta ayén rɨ́'ɨ tejamuaatá'an sej si jaítze'e siyen raachú'eve'en se'ɨ́jna jɨme'e sej se'ɨ́jna jetze araújca'ane ɨ́ xɨéjniu'ucare'ara'an ɨ́ Dios. 14Ayee pu tiná'amitɨejte'e ineetzi tɨ ayén ti'ayajna mú'ejmi jɨme'e sej siyen nain jɨ́n rɨ́'ɨ titetiújcha'ɨɨ seɨj seajta seɨj. Nain xu ú'umua'aree ɨ́ tɨ ruxe'eve'e, seajta siyen raayɨ́'ɨtɨ sej si huaúritɨi seɨj seajta seɨj. 15- 16Ayee nu jeíhua ahuánca'ane nej ni niyen tejámuaatayú'use'en ti'itɨ́j jɨme'e. Capu tí'iseicaj na'a, canu neajta tí'itziɨɨne'eca'a nej niyen huarɨ́j, sino ayée nu neajtahua'a ti'itɨ́j jɨ́n amua'utámua'areeri'i ne'ɨ́jna jɨme'e, a'iné Dios pu ayén tinaa'íjca. Ayee nu ne'ɨ́jna jɨ́n te'enteájrupi nej ni tiu'utévaɨre'en ɨ́ Dios jemi. Neajta nu ne'ɨ́jna jɨ́n antínmua'aree nej niyen raatévaɨre'en ɨ́ Cɨríistu'u tɨ ajta i'i Jesús, nej ni niyen tihua'utá'ixaate'en a'ɨ́mej ɨ́ mej seɨj chuéjra'a japua é'eme'ecan a'ij tɨ ari huarɨ́j ɨ́ Dios. Ayee mú éene'e muá'aju'u tɨ́j muaɨ'ɨvéjri tɨ seɨ́j raateájtuaa ɨ́ Dios jemi tɨ ij ayén rɨ́'ɨ tiraatá'an. Jee xaa ne'u, a'ɨ́ɨn ɨ́ xɨéjniu'ucare'ara'an ɨ́ Dios, a'ɨ́ɨ pu ayén huá'aruuren mej mi miyen urarɨ́'ene'acan jɨ́n huateáturan ɨ́ Dios jemi. 17A'ɨ́j nu jɨ́n huápɨ'ɨ huatántemua'ave'e jemin ɨ́ Cɨríistu'u tɨ ajta i'i Jesús ne'ɨ́jna jɨme'e nej niyen ravaɨre'e ɨ́ Dios. 18- 19A'ɨ́j nu'u jɨ́n niyen á'anca'ane nej tejamuá'ixaate'en ne'ɨ́jna jɨme'e tɨ Cɨríistu'u ari ayén tiú'uruu a'ɨ́jna jɨme'e nej ravaɨre'e mej mi me'ɨ́n ɨ́ mej seɨj chuéjra'a japua é'eme'ecan miyen ra'ará'astijre'en me'ɨ́jna ɨ́ Dios. Ayee mú 'een jɨ́n rá'astijre'e me'ɨ́jna jɨme'e mej miyen ráanamuajri'i a'ij nej tiu'utaxájtaca'a, majta miyen naaseíj ineetzi a'ij nej ti'itɨ́j jɨ́n huarɨ́j, nej niyen huarɨ́j tɨ huápɨ'ɨ ruxe'eve'e, ɨ́ mej jɨ́n a'ij te'utaseíj, a'iné Dios pu raateájtuaa ɨ́ rumuárɨ'eri'ire'ara'an ineetzi jemi a'ɨ́jna jɨme'e nej ne'ɨ́jna jetze aránca'anejca'a ɨ́ xɨéjniu'ucare'ara'an ɨ́ Dios. A'ɨ́j nu jɨ́n nain japua neri tihua'utá'ixaa ne'ɨ́jna ɨ́ niuucari tɨ jɨ́me'en raxa ɨ́ Cɨríistu'u. Nainjapua tɨ́j na'a a'uun mej huachéjme u Jerusalén, neajta méyee a'u mej e'eré'ete'ecaa ajta nena'a caí ne'uun ɨmuá a'atanéj ne'újna a'u mej a'uchéjme tɨ́j na'a tɨ a'uun huatacá'a u Ilírico, nain nu jɨ́n tihua'utá'ixaa ɨ́ Cɨríistu'u jetze me'ecan. 20Tɨ́j na'a nej a'utéjche nej ra'ará'astijre'en ɨ́ tavástara'a tɨ yú e'iré'ene, ayée nu ahuánca'ane nej niyen tihua'utá'ixaate'en ɨ́ niuucari jɨme'e a'u mej caí xɨ ja'anáj yá'unamuajri'i, nej ni caí niyen che'atá nena'a ne'ɨ́jna jetze autéjcheni a'u tɨ ari seɨ́j teja'umuárɨej. 21Mɨ́ neajta inee, ayée nu huarɨ́j a'ij tɨ té'eyu'usi'i tɨjɨ́n: A'ɨ́ɨ mú raseijran me'ɨ́jna ɨ́ tɨ caí xɨ ja'atɨ́ a'ɨ́jna jɨ́n tihua'utá'ixaa. Majta mú yaú'itɨée muá'aju'u me'ɨ́jna ɨ́ mej caí xɨ ja'anáj ráanamuajri'i. 22A'ɨ́j pu jɨ́n, mu'iitɨ́ mú naatá'ijmɨijri'i nej caí niyen ne'uun a'atanén mú'ejmi jemi. 23- 24Aru íjii, a'iné capu ché'e mé'e é'erɨ'ɨri nej ne'uun teja'umuárɨ'en tɨ́j na'a ayun tɨ huacá'a, ajta a'iné pu'uri tejauume a'achú pua'an nine'ira'a nej niyen tí'ijxe'eve'e nej amuaja'uvé'emuaare, ayée nu tí'imua'atze nej niyen huárɨni netɨ́'ɨj ne'uun á'ume'en u España. Ayee nu tí'ijxe'eve'e inee nej ne'uun amuaja'utéseijra netɨ́'ɨj ne'uun á'ume'en, tej ti a'atzu huátatemua'ave'en tajɨ́ɨmua'a, sej si seajta naatévaɨre'en nej ni neajtahua'a u á'ume'en a'u nej á'ume. 25Mɨ́ neajta inee, íjii, u nu a'umé'e na'ame u Jerusalén nej ni hua'utévaɨre'en a'ɨ́mej ɨ́ mej me'uun é'eche ɨ́ ta'ihuaamua'a, ɨ́ mej Dios jemi seijre'e. 26Majta a'ɨ́mej ɨ́ mej me'uun Macedonia huachéjme, majta a'ɨ́mej ɨ́ mej me'uun Acaya é'eme'ecan, ayée pu hua'aránajcheca'a mej ti'itɨ́j hua'utá'an a'ɨ́mej ɨ́ mej caí a'ij tí'ijviicua'i, ɨ́ mej me'uun é'eche u Jerusalén. 27Ayee pu tihua'aránajcheca'a mej miyen huárɨni. Jee xaa ne'u, ayée mú tihuá'acha'ɨɨre'eca'a, a'iné a'ɨ́ɨme ɨ́ mej seɨj chuéjra'a japua é'eme'ecan, ayée pu tihua'ucɨ́'ɨ mej ra'ancuré'an me'ɨ́jna ɨ́ tɨ jɨ́n Dios rɨ́'ɨ tihua'utá'a a'ɨ́mej ɨ́ mej Israél jetze ajtéme'ecantaca'a. A'ɨ́j mú jɨ́n, a'ɨ́ɨme ɨ́ mej seɨ́j chuéjra'a japua é'eme'ecan miyen tihuá'acha'ɨɨre'e mej miyen ti'itɨ́j tihua'utá'an me'ɨ́jna ɨ́ mej jɨ́n huateújvaɨre'en. 28Ayee nu amuacaí hua'utátuiire'esin ne'ɨ́jna ɨ́ mej tiu'utá'a ɨ́ ta'ihuaamua'a. Netɨ́'ɨj nain jɨ́n ra'anticɨ́'ɨn, aj nu ni ne'uun a'umé mú'ejmi jemi. Neajta á'iyen u a'umé'e na'ame u España. 29Ayee nu rú'umua'aree tɨ ayén té'eme a'ájna netɨ́'ɨj ne'uun á'ume'en mú'ejmi jemi tɨ a'ɨ́ɨn tavástara'a ayén nain jɨ́n rɨ́'ɨ titaatá'an naíjmi'ica itejmi. Capu ti'itɨ́j a'ij tita'aturáate'e a'ame. 30Ayee nu tejá'amuahuavii, ne'ihuaamua'a, mɨ sej seajta ra'ará'astijre'en ɨ́ tavástara'a, a'ɨ́jna ɨ́ Jesús tɨ ajta i'i Cɨríistu'u, sej si siyen tinaatévaɨre'en se'ɨ́jna jɨme'e ɨ́ nej jɨ́n tí'itese'e. Setá'aj siyen tí'ijhuaviira ɨ́ Dios ineetzi jɨme'e. 31Setá'aj siyen tí'ijhuaviira tɨ ij a'ɨ́ɨn Dios ayén nu'irájtuaani mej mi caí a'ij neruure a'ɨ́ɨme ɨ́ mej caí miyen ra'ará'astijre'e ɨ́ tavástara'a, a'ɨ́ɨme ɨ́ mej Judea huachéjme. Setá'aj seajta siyen rahuaviira mej mi me'ɨ́n ɨ́ mej Dios jemi seijre'e, ɨ́ mej Jerusalén é'eme'ecan, mej mi miyen ra'ancuré'an ɨ́ nej jɨ́n hua'utévaɨre'en. 32Ayee xu huárɨni nej ni ne'uun á'ume'en mú'ejmi jemi tɨ pua'a Dios ayén neetá'acare'en, tej ti tajɨ́ɨmua'a huatátatemua'ave'en, tej ti teajta ca'aníjra'a huatáta'an seɨj teajta seɨj. 33Ajta a'ɨ́ɨn ɨ́ Dios tɨ rɨ́'ɨ ta'anpuá'ajte, ché'e a'ɨ́ɨn ayén huateáturan naíjmi'ica jemi, mú'ejmi. Ché'e ayén teja'uré'enen.

will be added

X\