Romanos 14

1Tɨ́ pua'a ja'atɨ́ caí xɨ tirú'umua'aree a'ij tɨ huataújmua'a tɨ ayén ra'ará'astijre'en ɨ́ tavástara'a, setá'aj ra'ancuré'evi'itɨn ruxɨ́'evi'ira'a jɨme'e. Caxu siyen sena'a rá'axɨjte'e se'ɨ́jna jɨme'e a'ij tɨ tirá'amitɨejte'e a'ɨ́jna. 2Ayee pu tí'ijmua'aree ruseɨ́j ɨ́ Dios jemi tɨ nú'u ayén ti'itá'aca tɨ nain tiu'uca'aní, ajta a'ɨ́jna ɨ́ seɨj, tɨ caí temua'a naa tirú'umua'aree a'ij tɨ 'een ɨ́ Dios jemi, ayée pu tirá'amitɨejte'e tɨ ayée na'a ti'itá'aca tɨ ráacua'ani tɨ te'ejnéj á chuaata'a. 3Ayee pu tiú'ujxe'eve'e tɨ a'ɨ́ɨn ɨ́ tɨ nain tí'icua'a caí ayén raxɨéehuata a'ɨ́jna tɨ caí nain tí'icua'a. Ajta a'ɨ́ɨn tɨ caí nain tí'icua'a, ayée pu che'atá na'a ruxe'eve'e tɨ a'ɨ́ɨn caí rá'axɨjte'e a'ɨ́jna tɨ nain tí'icua'a, a'iné Dios pu ajta ayén ra'ancuré'evi'itɨ a'ɨ́jna ɨ́ ja'atɨ. 4Pajta mú'ee, mɨ pej caí nain tí'icua'a, ¿a'atani ayén a'ɨ́jna jɨ́n timua'íjca pej piyen rá'axɨjte'en ɨ́ ja'atɨ tɨ seɨ́j jemi tí'ivaɨre'e? Capu ja'atɨ́, a'iné seɨ́j pu'u tí'ira'aijte'e. Ajta a'ɨ́ɨn ɨ́ ja'atɨ, a'ɨ́ɨ pu ará'astijre'esin a'ɨ́jna tɨ tí'ira'aijte'e. Na'ari tɨ pua'a caí ayén huárɨni, a'ɨ́ɨ pu jemin muá'itɨche'en. Mɨ́ ajta, a'ɨ́jna tɨ nain tí'icua'a, a'ɨ́ɨ pu xaa ará'astijre'esin, a'iné tavástara'a pu ca'aníjra'a raatá'asin tɨ ij ayén ra'ará'astijre'en. 5Ajta seɨ́j jemi, ayée pu tirá'amitɨejte'e tɨ sei xɨcaj ayén jaítze'e ruxe'eve'e ɨ́ Dios jemi caí seica xɨcáara'an jetze. Ajta seɨ́j jemi, ayée pu tirá'amitɨejte'e tɨ ruxɨ́'ej na'a ayén 'een nain xɨcáara'an jetze. Miché'e miyen rujɨ́ɨmua'a mena'a tiraaxɨ́'epɨ'ɨntare'en temua'a naa, a'ij tɨ té'umua'atze ɨ́ ru tzajta'a ɨ́ tɨ xɨ́'epɨ'ɨn 'een ɨ́ Dios jemi. 6A'ɨ́jna tɨ ayén tirá'amitɨejte'e tɨ seɨ́j xɨcáara'an jetze jaítze'e ruxe'eve'e, ayée pu tiraaxɨ́'epɨ'ɨntare ɨ́ tavástara'a jemi. Ajta a'ɨ́ɨn tɨ nain tí'icua'a, ayée pu ajta rɨcɨ ɨ́ tavástara'a jemi, a'iné a'ɨ́jna ɨ́ ja'atɨ ajta pu rɨ́'ɨ tiratá'aca ɨ́ Dios. Ajta a'ɨ́ɨn tɨ caí nain tí'icua'a, a'ɨ́ɨ pu ayén che'atá na'a tí'icua'a ɨ́ tavástara'a jemi. A'ɨ́ɨ pu ajta rɨ́'ɨ tiratá'aca ɨ́ Dios. 7Ayee pu'u, a'iné tetɨ́j tena'a pua'amé iteen, capu ja'atɨ́ ayén ruseɨ́j ruuri. Capu ajta ayén ruseɨ́j mɨ'ɨni. 8Tɨ́ pua'a tiyen i'irúuri, ayée tu i'irúuri tej ti rɨ́'ɨ tiraatá'an ɨ́ tavástara'a na'ari tɨ pua'a tiyen huácui'ini, ayée tu che'atá tena'a cui'ini tej ti huatátatuiire'en ɨ́ tatevij jɨme'e te'ɨ́jna jemi. A'ɨ́j pu jɨ́n, capu amɨ́n a'ij tɨ pua'a tiyen i'irúuri nusu tɨ pua'a tiyen huácui'ini. Teuche'e tu tavástara'a jetze ajtéme'ecan. 9A'ɨ́j pu jɨ́n, Cɨríistu'u ayén huamɨ́'ɨ, ajta a'itáraa huá'a tzajta'a ɨ́ mɨ'ɨchite tɨ ij a'ɨ́ɨn ayén hua'avastara'a pu'éene'e á'ara'ani a'ɨ́mej ɨ́ mej meri huácuii, ajta a'ɨ́mej ɨ́ mej mauj i'irúuri. 10Pajta mú'ee, ɨ́ pej caí xɨ tirú'umua'aree temua'a naa, ¿a'iné 'een jɨ́n piyen rá'axɨjte'e ɨ́ a'ihuáara'a? Pajta mú'ee, ɨ́ pej nain jɨ́n ti'itá'aca, a'iné 'een jɨ́n piyen raxɨéehua pe'ɨ́jna ɨ́ a'ihuáara'a. Capu a'atzu ayén tiraavíjte'e sej siyen rɨjca, a'iné naíjmi'i tu tiyen huataseíjre'esin a'ɨ́jna jemi ɨ́ Dios tɨ ij a'ɨ́ɨn ayén tá'uxɨjte'en naíjmi'ica itejmi. 11Ayee pu xaa ne'u té'eyu'usi'i tɨjɨ́n: Ayee pu ti'ixa a'ɨ́jna ɨ́ tavástara'a tɨjɨ́n: A'iné nee nu ruuri, ayée pu ti'ayajna, matɨ́j mena'a pua'amé mej yen chaanaca japua seijre'e, a'ɨ́ɨ mú títunutaxɨ'ɨsin ineetzi jemi. A'ɨ́ɨ mú majta, miyen rɨ́'ɨ tinaatá'asin me'ɨ́jna jɨme'e ɨ́ nej Dios pú'een. 12A'ɨ́j pu jɨ́n, a'achú tej pua'amé tej yen seijre'e, naíjmi'i tu tiyen tiu'utaxájta mé jéjre'e ɨ́ Dios jemi a'ij tej ti'itɨ́j jɨ́n huarɨ́j. 13A'ɨ́j pu jɨ́n, tiché'e tiyen raatapuá'ajta tej tiyen té'ataxɨjte'e tajɨ́ɨmua'a. Aru tiché'e tiyen raaxɨ́'epɨ'ɨntare'en ɨ́ ta tzajta'a tej ti caí ché'e ti'itɨ́j jɨ́n raatamuárɨ'eristen ɨ́ ta'ihuaara'a, nusu tej ti caí ché'e ca'aníjra'a raatá'an tɨ ij ti'itɨ́j jɨ́n huamuá'itɨchen ɨ́ Dios jemi. 14Ayee nu tirú'umua'aree inee, a'iné ayée nu tiú'unamuajri'i ne'ɨ́jna jemi ɨ́ tavástara'a, a'ɨ́jna ɨ́ Jesús tɨ ayén ti'ayajna. Tɨ́j na'a tɨ seɨ́j racua'aca tɨ tí'icua'iri'i pú'een, capu ruseɨ́j na'a raxana'ave'e a'ɨ́jna tɨ racua'aca. Mɨ́ ajta, tɨ pua'a a'ɨ́jna jemi ɨ́ ja'atɨ ayén tirá'amitɨejte'e tɨ ti'itɨ́j ayén xána'avi'ire'e, a'ɨ́jna jemi pu xaa ayén 'een, tɨ ayén xána'avi'ire'e. 15Tɨ́ pua'a piyen ca'aníjra'a ratá'aca ɨ́ a'ihuáara'a tɨ a'ɨ́ɨn caí ayén racua'aca ɨ́ ti'itɨ́j ɨ́ pej xaa racua'aca, rɨ'ɨríista a'ame pej raapuaíjtzite'en i tzajta'an a'iné, a'ɨ́jna jemi, a'ɨ́ɨ pu xána'avi'ire'e a'ɨ́jna tɨ ráacua. Capej xɨ́'epɨ'ɨn huarɨ́j. Capej xaa ne'u raxɨ́'eve'e ɨ́ a'ihuáara'a pe'ɨ́jna jɨme'e pej ca'aníjra'a raatá'a tɨ ayén huárɨni a'ij tɨ tiraapuaíjtzitare. Capej mú'ee rá'apua'ajte'e ɨ́ a'ihuáara'a a'iné Cɨríistu'u pu ari jetzen me'ecan huamɨ́'ɨ. 16Capej ché'e piyen ti'itiá'acha'ɨɨ. Na'ari caí, ayée mú seica miyen ti'ijxáatzi'ire'e muá'ara'ani me'ɨ́jna tɨ ayén timuá'amitɨejte'e tɨ xɨ́'epɨ'ɨn 'een. 17Ayee nu tejá'amua'ixaate'e a'iné a'ɨ́jna tɨ ayén titaacɨ́'ɨ tɨ Dios ayén tí'ita'aijte'e naíjmi'ica itejmi, capu ayén a'ɨ́jna jɨ́n tej tiyen tí'icua'a na'ari tej tiyen ye'eca. Capu xaa ne'u, sino ayée tu rɨ'éene'ecán jɨ́n huateájturaa ɨ́ Dios jemi. Teajta rɨ́'ɨ titeeteájturaa ɨ́ ta tzajta'a. Ajta, a'ɨ́ɨ pu ca'aníjra'a taatá'a a'ɨ́jna ɨ́ xɨéjniu'ucare'ara'an ɨ́ Dios tej ti tiyen huatátatemua'ave'en. 18Jee xaa ne'u, ja'atɨ́ tɨ na'a tɨ ayén ravaɨre'e ɨ́ Cɨríistu'u, a'ɨ́jna ɨ́ ja'atɨ ayée pu rɨ́'ɨ tiratá'aca ɨ́ Dios. Majta me'ɨ́n ɨ́ teɨte, ayée pu ajta hua'aráanajche tɨ ayén tí'ijrɨ'ɨre a'ɨ́jna ɨ́ ja'atɨ. 19A'ɨ́j pu jɨ́n, tiché'e tiyen ahuátaca'anen tej ti tiyen rɨ́'ɨ ti'itítacha'ɨɨ tej tiyen ta'ihuaamua'a tá'ara'ani temua'a naa, tej teajta rɨ́'ɨ huátaruuren tajɨ́ɨmua'a tej ti jaítze'e raayɨ́'ɨtɨhua'an a'ij tɨ tí'ijxe'eve'e ɨ́ Dios. 20Caxu se'ɨ́jna jɨ́n raaté'uunan se'ɨ́jna tɨ Dios ayén raateájtuaa huá'a jemi ɨ́ á'amua'ihuaamua'a se'ɨ́jna jɨme'e sej nain tí'icua'a. Naa pu ti'irɨ́'een tɨ́j na'a tɨ tí'icua'iri'i. Mɨ́ ajta, tɨ pua'a ja'atɨ́ a'ɨ́jna jɨ́n ca'aníjra'a raatá'an ɨ́ ru'ihuaara'a tɨ a'ɨ́ɨn ihuáare'ara'an ayén ráacua'ani a'ɨ́jna tɨ rajpuaíjtzi ɨ́ Dios jemi, a'ɨ́j pu jɨ́n ayén auteáturaasin ɨ́ Dios jemi a'ɨ́jna ɨ́ ja'atɨ tɨ ayén ca'aníjra'a raatá'a ɨ́ ru'ihuaara'a. 21A'ɨ́j pu jɨ́n, jaítze'e pu ayén tiraavíjte'e pej caí piyen racua'aca ɨ́ hua'ira'a ca'ɨ́n pej caí piyen raye'eca ɨ́ nahuáj. Jee xaa ne'u patá'aj caí piyen ti'itɨ́j jɨ́n a'ij huárɨni tɨ ayén ca'aníjra'a raatá'acare'en tɨ a'ɨ́ɨn a'ihuáara'a ti'itɨ́j jɨ́n auteáturan ɨ́ Dios jemi. 22Tɨ́ pua'a ayén timuá'amitɨejte'e tɨ ayén ti'irɨ́'een ɨ́ Dios jemi pej piyen ti'itɨ́j huácua'ani, patá'aj piyen aseɨ́j pena'a avíitzi jɨ́n tirú'umua'areere. Capej piyen tí'ixajta mé jéjre'e, teɨte tzajta'a. Ché'e huaújtemua'ave'en a'ɨ́jna ɨ́ ja'atɨ tɨ caí rumua'atzíira'a jɨ́n á'ujxɨjte'e a'ɨ́jna jɨme'e a'ij tɨ ti'itɨ́j jɨ́n rɨcɨ, a'iné a'ɨ́ɨ pu ari ayén tiraaxɨ́'epɨ'ɨntare tɨ ayén ti'irɨ́'een ɨ́ Dios jemi. 23Mɨ́ ajta a'ɨ́ɨn ɨ́ ja'atɨ́, tɨ pua'a caí xɨ temua'a naa tiraaxɨ́'epɨ'ɨntare tɨ ayén ti'irɨ́'een ɨ́ Dios jemi tɨ ij ti'itɨ́j huácua'ani, tɨ pua'a ayén racua'aca, a'ɨ́ɨ pu a'ɨ́jna jɨ́n a'uxɨ́jte'en tɨ a'ij pua'a rɨcɨ a'iné a'ɨ́ɨ pu caí té'atzaahuate'e ayén ráacua. Ajta, ti'itɨ́j tɨ na'a tɨ ja'atɨ́ ayén jɨ́n rɨcɨ, tɨ pua'a caí ayén tiraaxɨ́'epɨ'ɨntare tɨ ayén ti'irɨ́'een ɨ́ Dios jemi tɨ ayén huárɨni, a'ɨ́ɨ pu a'ɨ́jna jɨ́n auteáturaasin ɨ́ Dios jemi tɨ pua'a ayén rɨjca, a'iné capu té'atzaahuate'eca'a.

will be added

X\