Romanos 13

1Ayee pu tiú'ujxe'eve'e tɨ ja'atɨ́ tɨ na'a ayén hua'ará'astijre'en a'ɨ́mej ɨ́ mej ti'itɨ́j jɨ́n antiújmua'aree. Dios pu ayén raaxɨ́'epɨ'ɨntare mej miyen ti'itɨ́j jɨ́n títetaté'en. A'ɨ́j pu jɨ́n Dios ayén hua'antíhuau. 2A'ɨ́j pu jɨ́n, tɨ pua'a ja'atɨ́ caí huataúra'an tɨ ij ayén hua'ará'astijre'en, a'ɨ́ɨ pu ajta mé rúuhua'ana a'ɨ́jna tɨ Dios ayén raateájtuaa íiyen chaanaca japua. Ajta, tɨ pua'a ja'atɨ́ ayén huárɨni, puaíjtzi pu a'ɨ́jna japua rávaɨjtzi. 3- 4Tɨ́ pua'a ja'atɨ́ ayén rɨ́'ɨ ti'itiújcha'ɨɨ, capu ruxe'eve'e tɨ a'ɨ́ɨn ja'atɨ́ ayén huá'atziɨɨne'e a'ɨ́mej ɨ́ mej ti'itɨ́j jɨ́n antiújmua'aree. Mɨ́ ajta, a'ɨ́jna tɨ a'ij pua'a ti'itiújcha'ɨɨ, ayée pu xaa ne'u tiraavíjte'e tɨ a'ɨ́ɨn ayén huá'atziɨɨne'e a'ɨ́ɨme ɨ́ mej tí'aijta. Tɨ́ pua'a piyen tí'ijxe'eve'e pej caí ti'itɨ́j jɨ́n rátziɨɨne'e pe'ɨ́jna tɨ tí'aijta, patá'aj piyen huárɨni ti'itɨ́j jɨme'e tɨ i'i xɨ́'epɨ'ɨn. Tɨ́ pua'a piyen huárɨni, ayée pu rɨ́'ɨ timuaatá'asin a'ɨ́jna tɨ tí'aijta, a'iné Dios pu a'ɨ́jna jɨ́n ra'antíhua'u tɨ ij a'ɨ́ɨn ti'itéva'ɨrihua'an jemin. Mɨ́ ajta, tɨ pua'a piyen a'ij pua'a títiá'acha'ɨɨ, aj pej xaa rátziɨɨne'e pua'amé, a'iné a'ɨ́ɨ pu a'ɨ́jna jɨ́n antiújmua'aree tɨ puaíjtzi jamuaatá'an. A'ɨ́ɨ pu xaa ne'u tí'ivaɨre'e ɨ́ Dios jemi tɨ ij Dios jetze me'ecan ayén puaíjtzi hua'utá'an a'ɨ́mej ɨ́ mej a'ij pua'a titetiújcha'ɨɨ. 5A'ɨ́j pu jɨ́n, ayén tiú'ujxe'eve'e sej siyen hua'ará'astijre'en a'ɨ́mej ɨ́ mej ti'itɨ́j jɨ́n títetateí tɨ ij caí ayén a'amua japua rájveti ɨ́ puaíjtzi. Ayee pu ajta ruxe'eve'e a'ɨ́jna jɨme'e sej siyen ra'ará'astijre'e ɨ́ Dios. 6Ayee pu ajta tiú'ujxe'eve'e sej seajta se'ɨ́jna jɨ́n tí'inajchita a'ɨ́jna tɨ á'amuajijve'e, a'iné a'ɨ́mej ɨ́ mej miyen á'amuajijve'e, a'ɨ́ɨ mú tí'ivaɨre'e ɨ́ Dios jemi. Tɨ́'ɨj pɨ́ na'a nain xɨcaj tzajta'a, ayée mú me'ɨ́jna jɨ́n tí'ivaɨre'e. 7Tɨ́ pua'a piyen ja'atɨ́ té'echa'ɨɨre'e, patá'aj piyen tiraanájchite'en a'achú pej caj tirá'acha'ɨɨre'e, na'ari tɨ pua'a piyen pe'ɨ́jna jɨ́n té'echa'ɨɨ ɨ́ mej Gobieerno jemi muajíjve'e, patá'aj piyen che'atá pena'a tihua'unájchite'en. Ajta tɨ pua'a piyen pe'ɨ́jna jɨ́n té'echa'ɨɨ ɨ́ mej muajíjve'e me'ɨ́jna jɨme'e ɨ́ pej tí'itu'araca, patá'aj pajta piyen pe'ɨ́jna jɨ́n tiu'unájchita. Tɨ́ pua'a ayén tiraavíjte'e pej piyen rɨ́'ɨ tihuá'ajcha'ɨɨ a'ɨ́mej ɨ́ mej tí'aijta, patá'aj piyen huárɨni. Na'ari tɨ pua'a ayén tiraavíjte'e pej rɨ́'ɨ tihua'uteájtuaani a'ɨ́mej ɨ́ mej títeté'u'upu'u, patá'aj piyen rɨ́'ɨ tihua'utá'an. 8Setá'aj nain jɨ́n tiu'unájchita sej si caí ché'e ti'itɨ́j jɨ́n té'echa'ɨɨ ɨ́ á'amuaxɨ'ej tevi jemi. Ayee xu'u sena'a se'ɨ́jna jɨ́n tirá'acha'ɨɨre'e ɨ́ seɨj sej huaújxe'eve'en seɨj seajta seɨj, a'iné a'ɨ́jna tɨ ayén raxɨ́'eve'e ɨ́ ruxɨ́'ej tevi, a'ɨ́ɨ pu a'ɨ́jna jɨ́n ari ra'ará'astijre a'ɨ́jna ɨ́ niuucari ɨ́ mej jɨ́n tí'aijta. 9Ayee pu tíhua'uta'aíj tɨjɨ́n: “Capej tí'ixana'acɨre'e.” Ajta ayén tɨjɨ́n: “Capej tí'itecui'ica.” Ajta i'i tɨ ayén tɨjɨ́n: “Capej tí'inahua'aj.” Ajta i'i tɨ ayén tɨjɨ́n: “Capej tí'inecua'atze.” Naíjmi'i ɨ́ niuucari tɨ ayén 'een, ajta ti'itɨ́j tɨ a'ij tɨ ra'ité'ase, naíjmi'i tɨ́j na'a tɨ ayén, a'ɨ́ɨ pu ará'ase a'ɨ́jna jetze ɨ́ niuucari tɨ ayén té'eyu'usi'i tɨjɨ́n: “Patá'aj piyen raxɨ́'eve'e ɨ́ axɨ́'ej tevi patɨ́j aseɨ́j tí'axe'eve'e.” 10Tɨ́ pua'a ja'atɨ́ ayén tzáahuati'ira'a jɨ́n raxɨ́'eve'e ɨ́ ruxɨ́'ej tevi, a'ɨ́ɨ pu caí ja'anáj a'ij pua'a raruuren. A'ɨ́j pu jɨ́n, a'ɨ́jna ɨ́ ja'atɨ nain jɨ́n ra'ará'astejsin a'ɨ́jna ɨ́ niuucari ɨ́ mej jɨ́n tí'aijta. 11Setá'aj siyen huárɨni se'ɨ́jna jɨme'e sej seri rú'umua'aree ti'itɨ́j tɨ xɨcáara'an jetze pɨ́tí'irɨcɨ. Pu'uri ayén teja'uré'ene sej rɨ́'ɨ huaújruuren sej si atanéjne'ere temua'a naa, a'iné pu'uri jaítze'e vejli'i a'ájna xɨcáara'an tɨ jetzen Dios ta japua niuuni. Pu'uri xaa ne'u jaítze'e vejli'i tɨ caí vejli'itaca'a tetɨ́'ɨj amuacaí té'antzaahua. 12Pu'uri jaítze'e huatɨ́ca'a a'ɨ́jna tɨ jetzen tí'aijta a'ɨ́jna tɨ a'ij pua'a 'een. Pu'uri ajta vejli'i a'ájna xɨcáara'an tɨ jetzen Cɨríistu'u ta japua niuuni. A'ɨ́j pu jɨ́n, tiché'e tiyen mé rúuhua'axɨn tɨ́j na'a tɨ a'ij pua'a 'een tej tiyen amuacaí te'ɨ́jna jɨ́n tiyen rɨjcaa. Tiché'e teajta te'ɨ́jna jetze arátaca'anen ɨ́ tej jɨ́n raatémua'itɨn te'ɨ́jna ɨ́ tej jɨ́n tí'itese'e. 13Tiché'e tiyen rɨ́'ɨ ti'itítacha'ɨɨca a'ij mej tí'ijrɨ'ɨre ɨ́ teɨte mej néeriste'e á'ujujhua'an. Tiché'e teajta caí ché'e tiyen a'ij pua'a éene'ecan jɨ́n tí'iyeste, teajta caí ché'e a'ij pua'a tí'iteta'arua, teajta caí ché'e tí'ixana'acɨre'e huá'a jamuan ɨ́ mej tiú'unecua'atziste'e, teajta caí ché'e tí'ixana'acɨre'e seɨ́j jamuan tɨ caí a'ɨ́j pú'een ɨ́ pej yá'uvi'itɨn. Tiché'e teajta caí tiyen ne'use'e tajɨ́ɨmua'a. Capu ajta xɨ́'epɨ'ɨn tej tiyen a'atachueere'e tajɨ́ɨmua'a. 14Mɨ́ seajta mú'een, setá'aj siyen rɨ́'ɨ titetiújcha'ɨɨca a'ij tɨ ti'itiújcha'ɨɨca'a ɨ́ tavástara'a, a'ɨ́jna ɨ́ Jesús tɨ ajta Cɨríistu'u pú'een. Caxu ché'e siyen se'ɨ́jna jetze tí'imuajca a'ij sej ye'í huárɨni sej si siyen ra'ará'astijre'en se'ɨ́jna tɨ a'ij pua'a 'een tɨ huiiráninei ɨ́ á'amuatzajta'a.

will be added

X\