Romanos 12

1A'iné Dios pu ari amuá'ancu'uvajxɨ, ayée nu tejá'amuahuavii, ne'ihuaamua'a, sej si huataújtuaani ɨ́ Dios jemi ɨ́ rutevij jɨme'e, setá'aj raateájtuaani ɨ́ Dios jemi ɨ́ sej seajta jɨ́n rɨ́'ɨ tiraatá'an. Tɨ́ pua'a seri siyen huárɨni, aj xu si raatévaɨre'en a'ij tɨ tiraavíjte'e, sej ruuri jɨ́n huataújmuaɨ'ɨvejta. 2Caxu siyen titetaúra'acare'en sej siyen che'atá sena'a titetiújcha'ɨɨ matɨ́j a'ɨ́ɨme ɨ́ seica ɨ́ mej yen japuan seijre'e i chaanaca. Caxu xaa ne'u siyen rɨjca mú'een, sino setá'aj siyen seɨcɨé huaújruuren se'ɨ́jna jɨme'e sej seri huaújjejcuare ɨ́ á'amuamua'atziira'a jetze. Aj xu siyen ramua'aréeren a'ij tɨ tí'ijxe'eve'e ɨ́ Dios, seajta siyen ramua'aréeren ti'itɨ́j tɨ i'i xɨ́'epɨ'ɨn ɨ́ Dios jemi, ti'itɨ́j tɨ ayén tira'aráanajche, nusu a'ij sej huárɨni sej si nain jɨ́n ra'ará'astijre'en a'ij tɨ Dios tí'ijxe'eve'e. 3A'iné Dios pu a'ɨ́jna jɨ́n tinaa'íjca nej ni niyen tejamuáamua'aten, ayée nu tejá'amua'ixaate'e naíjmi'ica mú'ejmi. Ché'e caí ja'atɨ́ ayén á'ujtzaahuate'e, a'iné capu ayén tiraavíjte'e. Caxu xaa ne'u siyen rɨjca, sino setá'aj siyen rɨ́'ɨ mé tite'umuámua'aree ɨ́ ru jetze. Setá'aj siyen se'ɨ́jna jetze tiú'umua'ati a'ij tɨ ti'itɨ́j jɨ́n Dios ari tejámua'íjca, seɨj ajta seɨj. Ayee pu xaa ne'u tiraavíjte'e. 4Ayee pu'u na'a. Tetɨ́j tena'a pua'amé tej tiyen ratéhua'ira'a, ajta capu tí'iseicaj na'a tɨ́j na'a ti'itéjvee ɨ́ ta jetze. Capu ajta tí'iseicaj na'a ɨ́ tɨ jɨ́n titaatéva'ɨri tetɨ́j tena'a tiyen ti'itéjvee, sino ayée pu'u ti'imu'íi. 5Ayee pu che'atá na'a 'een tej teri Cɨríistu'u jetze ajtéme'ecan. I tej mu'iitɨ́ ará'ase, ayée tu naíjmi'i tí'itaseijrata tej seɨj tena'a jetze ajtéme'ecan ɨ́ tevi. Ajta ja'atɨ́ tɨ na'a tɨ ta jetze ajtéme'ecan, a'ɨ́ɨ pu ajta huá'a jetze ajtéme'ecan ɨ́ seica, a'achú mej pua'amé. 6Capu ayén ruxɨ́'ej na'a titaacɨ́'ɨ itejmi a'ɨ́jna ɨ́ tej jɨ́n teri ratéva'ɨri. A'ɨ́j pu jɨ́n, tiché'e tiyen tiraatévaɨre'en, a'ij tɨ a'ɨ́ɨn Cɨríistu'u ayén rɨ́'ɨ titaatá'a. Tɨ́ pua'a ayén tiraacɨ́'ɨ seɨj ɨ́ ja'atɨ tɨ ayén tiu'utaxáj ɨ́ Dios jetze me'ecan, ché'e a'ɨ́ɨn ayén jetzen me'ecan tiu'utaxájta a'achú tɨ caj tirú'umua'aree. 7Tɨ́ pua'a ayén tiraacɨ́'ɨ seɨj ɨ́ ja'atɨ tɨ ayén hua'utévaɨre'en ɨ́ seica, ché'e ayén hua'utévaɨre'en, na'ari tɨ pua'a ayén tiraacɨ́'ɨ tɨ ayén tihuá'umua'aten ɨ́ seica, ché'e ayén tihuá'umua'aten. 8Tɨ́ pua'a ayén tiraacɨ́'ɨ a'ɨ́jna ɨ́ ja'atɨ tɨ ayén raayɨ́'ɨtɨhua'an tɨ ca'aníjra'a hua'utá'an ɨ́ seica, ché'e ayén ca'aníjra'a hua'utá'an. Seica pu ayén tihua'ucɨ́'ɨ mej miyen tíhua'utapuaíjve'en a'ɨ́mej ɨ́ mej caí a'ij tí'ijviicua'i. Miché'e miyen ruxɨ́'evi'ira'a jɨ́n temua'a naa tíhua'utapuaíjve'en. Ajta a'ɨ́ɨn tɨ ayén antiújmua'aree a'ɨ́jna jɨme'e tɨ tí'aijta teyujta'a, ché'e a'ɨ́ɨn a'ujca'anéecan jɨ́n tí'ivaɨre'e. Ajta a'ɨ́ɨn tɨ huá'acu'uve a'ɨ́mej ɨ́ mej caí a'ij tí'ijviicua'i, ché'e a'ɨ́ɨn rutémua'ave'ecan jɨ́n huá'ancu'uvajxɨ'ɨn. 9Ayee pu ruxe'eve'e sej tzáahuati'ira'a jɨ́n huaújxe'eve'en seɨj seajta seɨj. Setá'aj raatéxɨeehuate'en se'ɨ́jna tɨ a'ij pua'a 'een, seajta ra'ará'astijre'en se'ɨ́jna tɨ i'i xɨ́'epɨ'ɨn. 10Setá'aj siyen huaújxe'eve'en seɨj seajta seɨj tɨ́j ru'ihuaamua'a naa. Setá'aj seajta huateújca'anen temua'a naa se'ɨ́jna jɨme'e sej rɨ́'ɨ tiu'utá'an seɨj seajta seɨj. 11Caxu raaxɨéehuata sej ratéva'ɨrihua'an ɨ́ tavástara'a, sino sa'ujca'anéecan xu jɨ́n siyen se'ɨ́jna jetze huateújca'anen ɨ́ xɨéjniu'ucare'ara'an ɨ́ Dios. 12Setá'aj huaújtemua'ave'en se'ɨ́jna jɨme'e sej siyen ti'itɨ́j jɨ́n tí'ichu'eve'e tɨ Dios jemi é'eme'ecan. Setá'aj seajta siyen te'utáviicua'i se'ɨ́jna jɨme'e ɨ́ sej jɨ́n rajpuaíitzi xa'aye'i. Seuche'e xu rahuaviira ɨ́ Dios. Caxu raatápuaapua'ata'an. 13Setá'aj siyen tihua'uré'an ɨ́ sej tí'ijcha'ɨɨ a'ɨ́mej jemi ɨ́ mej caí a'ij tí'ijviicua'i. Setá'aj seajta siyen ruxɨ́'evi'ira'a jɨ́n hua'ancuré'evi'itɨn ɨ́ á'amuaxɨ'ej teɨte ɨ́ ruche. 14Ayee xu seajta siyen huá'uruuren a'ɨ́mej ɨ́ mej a'ij pua'a á'amuaruure. Setá'aj rɨ́'ɨ tihua'utá'an. Caxu siyen rahuaviira ɨ́ Dios jemi tɨ ij a'ɨ́ɨn puaíjtzi hua'utá'an, sino rɨ́'ɨ xu tihua'utá'an. 15Setá'aj siyen huaújtemua'ave'en a'ɨ́mej jamuan ɨ́ mej rutémua'ave'e. Ayee xu seajta huárɨni sej huataújxɨeemɨste'en a'ɨ́mej jamuan ɨ́ mej ruxɨéemɨste'e. 16Setá'aj siyen rɨ́'ɨ tí'itechejca tɨ́j ɨ́ ru'ihuaamua'a naa. Caxu á'ujtzaahuate'e, sino setá'aj siyen anteújseɨre'en huá'a jamuan ɨ́ mej caí ti'itɨ́j jɨ́n títeté'u'upu'u tɨ jeíhua ruxe'eve'e. Caxu siyen á'ujtzaahuate'e ɨ́ ru tzajta'a sej nu'u rɨ́'ɨ mé tite'umuámua'aree temua'a naa caí máàj ja'atɨ́. 17Tɨ́ pua'a ja'atɨ́ ayén a'ij pua'a á'amuaruure mú'ejmi, caxu siyen che'atá sena'a a'ij pua'a raruure mú'een. Rɨ́'ɨ xu'u setá'aj siyen sena'a huárɨni tɨ́'ij ayén rɨ́'ɨ tihuá'amitɨejte'e naíjmi'ica ɨ́ teɨte sej xɨ́'epɨ'ɨn rɨcɨ. 18Setá'aj siyen huárɨni, setɨ́j sena'a sej caj tirú'umua'aree, tɨ pua'a rɨ'ɨriistan, setá'aj rɨ́'ɨ titetiújcha'ɨɨ huá'a jemi ɨ́ seica ɨ́ teɨte, a'achú mej pua'amé. 19Caxu puaíjtzi ratá'acare'en ɨ́ ja'atɨ tɨ ari a'ij pua'a amuáaruu, sino ché'e a'ɨ́ɨn Dios ayén puaíjtzi raatá'an. Ayee xu huárɨni, a'iné ayée pu té'eyu'usi'i tɨjɨ́n: “Ayee pu tí'inecɨ'ɨpua ineetzi nej puaíjtzi raatá'an ne'ɨ́jna ɨ́ ja'atɨ tɨ a'ij pua'a muáaruu. Nee nu raatá'asin ne'ɨ́jna a'ij tɨ tiraavíjte'e.” 20Mɨ́ seajta mú'een, ayée xu huárɨni a'ij tɨ té'eyu'usi'i tɨjɨ́n: “Tɨ́ pua'a i'icuatá a'ɨ́jna tɨ muájcha'ɨɨre'e, patá'aj tiraamín. Ajta tɨ pua'a huata'í'imɨn a'ɨ́jna ɨ́ ja'atɨ, patá'aj jaj raatá'an. Tɨ́ pua'a piyen huárɨni, ayée pej puaíjtzi raatá'asin pe'ɨ́jna jɨme'e pej xɨ́'epɨ'ɨn ráaruu. A'ɨ́ɨ pu xaa, a'ɨ́ɨ pu tirajpuaíitzi a'ame temua'a naa.” 21Caxu ratá'acare'en tɨ a'ɨ́jna tɨ a'ij pua'a 'een ayén amuaamuá'itɨn, sino setá'aj siyen tiraamuá'itɨn se'ɨ́jna tɨ a'ij pua'a 'een se'ɨ́jna jɨme'e sej xɨ́'epɨ'ɨn rɨcɨ.

will be added

X\