Romanos 11

1A'ɨ́j nu jɨ́n niyen tejá'amua'ihua'u. ¿Ni qui ari mé hua'uhuá'axɨ ɨ́ Dios a'ɨ́mej ɨ́ mej teɨtestemua'ame'en pú'een? Capu xaa ne'u, a'iné capu mé núurɨe ineetzi, i nej neajta Israél jetze ajtéme'ecan, a'iné a'ɨ́j nu jetze 'airáanej ɨ́ Abraham teecan, neajta huá'a jetze ajtéme'ecan a'ɨ́ɨme ɨ́ mej airaújneijte me'ɨ́jna jetze ɨ́ Benjamín teecan. 2Jee xaa ne'u, capu ayén mé hua'uhuá'axɨ ɨ́ Dios a'ɨ́mej ɨ́ ruteɨ́testemua'a ɨ́ tɨ jéjcua ɨmuá hua'antíhuau. ¿Ni secaí siyen ramua'aree a'ij tɨ té'eyu'usi'i ɨ́ yu'uxari jetze tɨ a'ɨ́jna jɨ́n ayén té'axa a'ij tɨ a'ɨ́ɨn Elías ayén tiraatéjhuau ɨ́ Dios jemi tɨ ij a'ɨ́ɨn puaíjtzi hua'utá'an? 3Tɨjɨ́n: “Casi'i, nevástara'a, mu'uri huá'ucuii a'ɨ́mej ɨ́ mej mú'eetzi jetze me'ecan tí'ixaxa'a. Majta miyen tiu'uté'uunaxɨ me'ɨ́jna ɨ́ tejcuá ɨ́ mej japuan tí'imuaɨ'ɨvajtaca. Nee nu'u ni yé huatéjvee. Capu ché'e máàj ja'atɨ́. Majta meri nejé'icatacu.” Ayee pu'u tiu'utaxájtaca'a a'ɨ́jna ɨ́ Elías. 4Mɨ́ ajta a'ɨ́ɨn ɨ́ Dios, ayée pu tiu'utaniú tɨjɨ́n: “Ayee nu hua'uteájtuaa mej mi miyen huateáturan ineetzi jemi a'achú cumu aráhua'apua vi'ira'a ɨ́ teɨte, ɨ́ mej caí ja'anáj ranajcheca'a me'ɨ́jna ɨ́ Baal.” Ayee pu tiraata'ixaa. 5Ayee pu che'atá na'a seijre'e íjii a'ɨ́ɨme ɨ́ mej teɨtestemua'ame'en pú'een. Dios pu ruxɨ́'evi'ira'a jɨ́n hua'antíhuau. 6Ajta tɨ pua'a Dios ayén hua'antíhuau ruxɨ́'evi'ira'a jɨme'e, capu ché'e rɨ'ɨrí mej miyen ti'itɨ́j jɨ́n te'enteárute ɨ́ jemin a'ɨ́jna jɨme'e mej miyen ti'itɨ́j jɨ́n ra'ará'astijre'en. Na'ari caí, capu ti'itɨ́j a'ij ti'itéva'ɨri tɨ Dios ayén hua'antíhuau ɨ́ ruxɨ́'evi'ira'a jɨme'e. 7¿A'iné na'aqui? A'ɨ́jna ɨ́ mej a'ujca'anéecan jɨ́n rahuauca'a a'ɨ́ɨme ɨ́ mej Israél jetze ajtéme'ecantaca'a, camu ra'ancuré'a me'ɨ́jna. Mɨ́ majta, a'ɨ́ɨme ɨ́ tɨ Dios hua'antíhuau, a'ɨ́ɨ mú xaa ra'ancuré'a. Majta a'ɨ́ɨme ɨ́ seica, Dios pu ayén ca'aníjra'a hua'utá'a mej mi antaújnaamuan ɨ́ ruxɨ́ejniu'uca jetze ɨ́ jemin. 8Ayee pu'u na'a, a'iné ayée pu té'eyu'usi'i tɨjɨ́n: “Dios pu ayén huá'uruu mej mi miyen tíu'ujtɨmua'ira ɨ́ rumu'úu jetze. Ayee pu huá'uruu tɨ ij caí a'ij tihuá'amitɨejte'e ɨ́ mej rasise'i, mej mi majta caí yaú'itɨée muá'ara'ani ɨ́ mej ranamua. Ayee pu'i éene'e já'araa tɨ́j na'a tɨ yú e'iré'ene.” 9Ajta a'ɨ́ɨn ɨ́ David teecan, ayée pu tiu'utaxájtaca'a tɨjɨ́n: Miché'e caí ché'e miyen rutémua'ave'e me'ɨ́jna jɨme'e tɨ jeíhua tihua'ucɨ́'ɨ, sino miché'e seica tihuá'ari'i nain jɨme'e, majta hua'antipuá'ajte'en. Ché'e ayén huá'a japua rájveti a'ij tɨ tiraavíjte'e a'ɨ́jna jɨme'e mej auté'ɨtze ɨ́ Dios jemi. 10Ché'e caí ayén tihuá'amitɨejte'e a'ij tɨ ti'itɨ́j tihuá'ucɨ'ɨti. Miché'e miyen títeeteújca'anen tɨ́j na'a tɨ yú auca'itɨ́ a'ame me'ɨ́jna jɨme'e mej ca'anéeri jɨ́n tí'imuarɨ'e. 11Neajta nu niyen tejá'amua'ihua'u. ¿Ni qui miyen nain jɨ́n auté'ɨtze tɨ ij ayén huá'a japua rájveti mej rajpuaíitzi muá'ara'ani tɨ́j na'a rusén jɨme'e, tɨ ij caí ché'e rɨ'ɨriistan tɨ Dios hua'irájtuaani? Capu xaa ne'u a'atzu, sino ayée pu éene'e já'araa. A'iné a'ɨ́ɨ mú auteájturaa ɨ́ Dios jemi, Dios pu ayén rɨ́'ɨ tihua'utá'a a'ɨ́mej ɨ́ mej seɨj chuéjra'a japua é'eme'ecan mej mi miyen ruuri huateáturan ɨ́ jemin. Ayee pu 'een jɨ́n huarɨ́j ɨ́ Dios tɨ ij ayén huá'uruuren a'ɨ́mej ɨ́ mej Israél jetze ajtéme'ecan mej mi chueere'e muá'ara'ani. 12Ajta, tɨ pua'a Dios ayén jeíhua huápɨ'ɨ rɨ́'ɨ tihua'utá'a a'ɨ́mej ɨ́ mej seɨj chuéjra'a japua é'eme'ecan a'ɨ́jna jɨme'e ɨ́ mej miyen huamuá'itɨche ɨ́ jemin a'ɨ́ɨme ɨ́ mej Israél jetze ajtéme'ecantaca'a, jeíhua pu jaítze'e huápɨ'ɨ tihua'utá'asin naíjmi'ica a'ájna xɨcáara'an tɨ jetzen huá'anaijmire'en a'ɨ́mej ɨ́ mej Israél jetze ajtéme'ecan. 13Ayee nu tejá'amua'ixaate'e mɨ sej seɨj chuéjra'a japua é'eme'ecan, a'iné Dios pu ayén tinaata'aíj nej niyen tejámuaatá'ixaate'en mú'ejmi, ayée nu tiu'utánca'ane nej ni nain jɨ́n jamuaatévaɨre'en a'ij tɨ tiraavíjte'e. 14Ayee nu 'een jɨ́n rɨcɨ nej ne'ɨ́jna jɨ́n ca'aníjra'a hua'utá'an ne'ɨ́mej ɨ́ nexɨ́'ej teɨte tɨ pua'a rɨ'ɨriistan mej mi chueere'e muá'ara'ani nej ni je'icáca antimuá'itɨn mej miyen rá'antzaahuate'en. 15Ayee pu'u, tɨ́'ɨj a'ɨ́ɨn Dios ayén mé hua'uhuá'axɨ a'ɨ́mej ɨ́ mej Israél jetze ajtéme'ecantaca'a, aj pu i a'ɨ́ɨn hua'ancuré'evi'itɨ a'ɨ́mej ɨ́ mej seɨj chuéjra'a japua é'eme'ecantaca'a. ¿A'iné té'eme icu, tɨ́'ɨj Dios ajtahua'a hua'ancuré'evi'itɨn a'ɨ́mej ɨ́ mej Israél jetze ajtéme'ecan? ¿Ni caí ayén seíire'e a'ame tɨ́'ɨj tɨ pua'a Dios ayén hua'ajjájpuan huá'a tzajta'a ɨ́ mej meri huácuii? 16Niché'e seɨj niuucari amuaatá'ixaate'en ne'ɨ́jna jɨme'e ɨ́ cuaíjtzi ɨ́ mej jɨ́n pan ta'ahuaca. Tɨ́ pua'a Dios huateúra'ate'en a'ɨ́jna ɨ́ cuaíjtzi ɨ́ mej amuacaícan raatámuaɨ'ɨvejte, a'ɨ́ɨ pu ajta huateúra'ate'esin nain ɨ́ pan ɨ́ mej ráataahuaca'a. Ajta, tɨ pua'a Dios ayén huateúra'ate a'ɨ́jna ɨ́ naana'a tɨ jetzen ajtanéj ɨ́ cɨyej, a'ɨ́ɨ pu ajta huateúra'ate naíjmi'i ɨ́ pi'ista tɨ jetzen ajta'ú'upu'u ɨ́ cɨyej jetze. Ayee pu che'atá na'a 'een mú'ejmi jemi. 17Tiché'e tiyen raataxáj tɨ Dios ayén ra'antiná'axɨ jetzen ɨ́ aceituuna je'icáca ɨ́ pi'ista. Aj pu ij seɨ́j antiví'ijte ɨ́ pi'ista tɨ seɨ́j jetze me'ecantaca'a aceituuna tɨ ruseɨ́j ajnéj. Seajta mú'een, ayée xu se'ɨ́jna jetze ajtéme'ecantaca'a ɨ́ aceituuna tɨ ruseɨ́j ajnéj. Ajta íjii, mú'een xu seri se'ɨ́jna jetze ajtéme'ecan tɨ Dios jetze ra'antiví'ijte a'ɨ́jna ɨ́ pi'ista. Pu'uri amú'uca'anisti'i a'ɨ́jna tɨ já'ara'ara'an pɨ́rɨcɨ a'ɨ́jna ɨ́ aceituuna. 18A'ɨ́j xu jɨ́n, caxu siyen á'ujtzaahuate'e se'ɨ́jna jɨme'e ɨ́ tɨ Dios ari ra'antiná'axɨ a'ɨ́jna ɨ́ pi'ista. Tɨ́ pua'a siyen á'ujtzaahuate'e setá'aj siyen tiú'umua'ati se'ɨ́jna jetze ɨ́ niuucari tɨ ayén tɨjɨ́n yee: “Capu ayén mú'ejmi jetze araújca'ane ɨ́ naana'ara'an a'ɨ́jna ɨ́ cɨyej, sino mú'een xu se'ɨ́jna jetze araújca'ane ɨ́ naana'ara'an.” 19Rɨ'ɨrí sej siyen tí'ixajta tɨ jɨ́me'en: “Ayee pu ra'antiná'axɨ a'ɨ́jna ɨ́ pi'ista tɨ ij ayén ta'antiví'ijte'axɨ'ɨn itejmi ɨ́ cɨyej jetze.” 20- 21Jee xaa ne'u, ayée pu ti'ayajna. Capu amɨ́n a'ij. Ayee pu 'een jɨ́n huá'uruu a'ɨ́jna jɨme'e mej caí rá'antzaahua. Mɨ́ seajta mú'een, ayée xu'u sena'a se'ɨ́jna jetze ajtéme'ecan se'ɨ́jna jɨme'e sej siyen té'atzaahuate'e. Caxu siyen á'ujtzaahuate'e, sino setá'aj siyen tí'itziɨɨne'e, a'iné Dios capu ayén tiraatá'uuni'iri'i a'ɨ́jna ɨ́ pi'ista tɨ ajtaneájxɨ ɨ́ cɨyej jetze tɨ rɨ́'en. Capu ajta tejámuaatá'uuni'ira mú'ejmi. 22Setá'aj siyen se'ɨ́jna jetze tiú'umua'ati ɨ́ tɨ jɨ́n Dios amuá'ancu'uvajxɨ mú'ejmi, ajta ɨ́ tɨ jɨ́n muárɨ'eri hua'utá'a a'ɨ́mej. A'ɨ́ɨ pu muárɨ'eri hua'utá'a a'ɨ́mej ɨ́ mej auteájturaa ɨ́ jemin. A'ɨ́ɨ pu ajta amuá'ancu'uvajxɨ mú'ejmi. Ajta, ayée pu auj á'amuaruuren tɨ pua'a siyen á'ateevi'in sej se'ɨ́jna jetze araújca'ane tɨ jɨ́me'en Dios rɨ́'ɨ tejamuaatá'a. Na'ari caí, a'ɨ́ɨ pu ajta mé amúuhua'axɨjsin mú'ejmi. 23Ajta a'ɨ́ɨme, tɨ pua'a mecaí ché'e á'ateevi'in mej caí miyen té'atzaahuate'e, Dios pu ayén ajtahua'a hua'antiví'ijte'esin a'iné a'ɨ́ɨ pu raayɨ́'ɨtɨ tɨ ayén huárɨni. 24Ayej xaa ne'u ti'ayajna, Dios pu raayɨ́'ɨtɨ tɨ ayén huárɨni a'ij tɨ caí tí'irɨneca ja'anáj tɨ na'a íiyen. A'ɨ́ɨ pu amua'antiná'axɨ a'ɨ́jna jetze ɨ́ cɨyej tɨ 'ɨtzitá huanéj tɨ ij ayén amua'antiví'ijte'en jetzen ɨ́ seɨj ɨ́ mej ra'ateáhuii. Mɨ́ ajta, a'ɨ́ɨme ɨ́ mej Israél jetze ajtéme'ecan, a'iné a'ɨ́ɨme amuacaí mú ajtéme'ecantaca'a me'ɨ́jna jetze ɨ́ cɨyej, capu a'atzu muárɨ'erista a'ame tɨ Dios ajtahua'a hua'antiví'ijte'axɨ'ɨn a'ɨ́jna jetze, mej mi majtáhua'a teɨtestemua'ame'en pu'éene'e muá'ara'ani. 25Ayee nu tí'ijxe'eve'e, ne'ihuaamua'a, sej si yaú'itɨée xá'ara'ani temua'a naa a'ij tɨ huataújmua'a a'íjna tɨ rú'avaa ɨ́ Dios jemi, sej si caí á'ujtzaahuate'e ti'itɨ́j jɨme'e. Ayee nu tejá'amua'ixaate'e mej meri antaújnaamua mu'iitɨ́ a'ɨ́ɨme ɨ́ mej Israél jetze ajtéme'ecan. Maúche'e mú miyen huateáturaasin asta mena'a caí miyen ara'astɨ́ muá'ara'ani a'achú mej pua'amé tɨ Dios ayén huá'uxɨ'epɨ'ɨntare mej té'antzaahuate'en a'ɨ́ɨme ɨ́ mej seɨj chuéjra'a japua é'eme'ecan. 26Aj pu i xaa Dios hua'irájtuaani naíjmi'ica a'ɨ́mej ɨ́ mej Israél jetze ajtéme'ecan. A'ɨ́j pu jɨ́n ayén té'eyu'usi'i tɨjɨ́n: Mu pu a'uvé'emé'e a'ame a'ujna u Sión, a'ɨ́jna ɨ́ ja'atɨ tɨ hua'irájtuaani. Ayee pu rɨ́'ɨ huá'aruuren a'ɨ́ɨme ɨ́ mej Jacobo jetze airáane mej mi caí ché'e a'ij pua'a titetiújcha'ɨɨ ɨ́ Dios jemi. 27Neajta nu niyen te'atánratziiri'i a'ɨ́mej jemi nej niyen huá'uruuren ne'ájna xɨcáara'an nej jetzen tíhua'utá'uuni'ira ɨ́ mej jɨ́n auteájturaa neetzi jemi. 28A'ɨ́ɨ mú rájcha'ɨɨre'e ɨ́ Dios me'ɨ́jna jɨme'e mej raatéxɨeehuataca'a me'ɨ́jna ɨ́ niuucari ɨ́ tɨ jɨ́n Dios hua'irájtuaani. Ayee mú me'ɨ́jna jɨ́n huarɨ́j, ayée pu tejamuaacɨ́'ɨ mú'ejmi sej si seajta ráanamua se'ɨ́jna ɨ́ niuucari. Mɨ́ ajta, a'ɨ́ɨn ɨ́ Dios, aúche'e pu huá'axe'eve'e a'ɨ́jna jɨme'e tɨ jéjcua ɨmuá hua'antíhuau, ajta a'ɨ́jna jɨme'e tɨ ti'itɨ́j jɨ́n te'ataújratziiri'i a'ɨ́mej jemi ɨ́ huá'ahuaacɨxa'astemua'acɨ'ɨ. 29Jee xaa ne'u, aúche'e pu hua'utévaɨre'esin a'iné Dios pu caí ra'uré'uuna a'ɨ́jna ɨ́ niuucari tɨ ti'itɨ́j jɨ́n te'ataújratziiri'i. Capu ajta yá'uhua'ana a'ɨ́jna tɨ jɨ́n hua'utajé. 30Seajta mú'een, a'ájná'ɨmua xu caí seajta rá'astijre'eca'a. Mɨ́ ajta a'ɨ́ɨn Dios pu ayén amuá'ancu'uvajxɨ mú'ejmi, a'iné a'ɨ́ɨme ɨ́ mej Israél jetze ajtéme'ecan, camu rá'astijre'eca'a. 31Ajta íjii, ayée mú 'een jɨ́n auteájturaa ɨ́ Dios jemi tɨ ij ajta Dios huá'ancu'uvajxɨ'ɨn a'ɨ́jna jɨme'e tɨ ari amuá'ancu'uvajxɨ mú'ejmi. 32Ayee pu Dios hua'uxɨ́jte naíjmi'ica ɨ́ mej jɨ́n auteájturaa ɨ́ jemin, tɨ ij ajta huá'ancu'uvajxɨ'ɨn matɨ́j mena'a pua'amé miyen seijre'e. 33Jee xaa ne'u, ayée pu ti'ayajna. Jé'ecan pu huápɨ'ɨ tiu'uyɨ́'ɨtɨ a'ɨ́jna ɨ́ Dios. Nain pu jɨ́n tirú'umua'aree. Capu a'atzu ámitɨeere'e a'ij tɨ ti'itɨ́j jɨ́n ayén tí'ixɨ'epɨ'ɨntare'e. Capu rɨ'ɨrí tej tiyen yaú'itɨee tá'ara'ani a'ij tɨ Dios ayén ruxɨ́'evi'ira'a jɨ́n huá'aruure ɨ́ teɨte ɨ́ mej yen japuan seijre'e ɨ́ chaanaca japua. 34“¿A'ataani ramua'aree a'ij tɨ 'een ɨ́ mua'atzíire'ara'an ɨ́ Dios? ¿A'ataani ayén raatévaɨ ɨ́ Dios tɨ ij ayén tiraata'ixaate'en a'ɨ́jna ɨ́ Dios a'ij tɨ ye'í huárɨni? Capu ja'atɨ́ xaa ne'u. 35¿A'ataani ari ayén ti'itɨ́j tiraatapuaíjve ɨ́ Dios tɨ ij ayén ruxe'eve'e á'ara'ani tɨ a'ɨ́ɨn Dios ajta ti'itɨ́j jɨ́n ayén tirá'acha'ɨɨre'e a'ɨ́jna ɨ́ ja'atɨ? Capu ja'atɨ́ xaa ne'u.” 36Ayee pu'u, a'iné naíjmi'i pu jemin me'ecan. A'ɨ́ɨ pu nain tiú'utaahuaca'a. Nain pu a'ɨ́jna jɨ́n ayén tí'iseijre'e tɨ ij ayén rɨ́'ɨ tiraatá'an. Teajta iteen, tiché'e teajta rɨ́'ɨ tiraatá'an tɨ́j na'a rusén jɨme'e. Ché'e ayén teja'uré'enen.

will be added

X\