Romanos 10

1Ayee nu tejá'amua'ixaate'e, ne'ihuaamua'a, nej niyen a'anca'anéecan jɨ́n tí'ijxe'eve'e yú ne tzajta'a, neajta nu rahuauhuau ɨ́ Dios tɨ ij a'ɨ́ɨn Dios ayén hua'irájtuaani. 2A'ɨ́ɨme nu jɨ́n niyen ti'ixa ɨ́ mej a'ujca'anéecan jɨ́n rana'amiche ɨ́ Dios. Aru camu tzáahuati'ira'a jɨ́n rana'amiche. 3Matɨ́'ɨj miyen rahuauca a'ij mej ye'í huárɨni mej mi miyen rɨ'éene'ecán jɨ́n huateáturan ɨ́ Dios jemi, camu a'atzu ramua'areereca'a a'ij tɨ Dios ari tiraaxɨ́'epɨ'ɨntare tɨ ij ja'atɨ́ ayén rɨ'éene'ecán jɨ́n huateáturan ɨ́ jemin. Ayee mu'u rahuauca me'ɨ́jna ɨ́ mej jɨ́n rujɨ́ɨmua'a mena'a rájteu. A'ɨ́j mú jɨ́n miyen raatéxɨeehuataca'a me'ɨ́jna ɨ́ tɨ Dios ari ayén tiraaxɨ́'epɨ'ɨntare. 4Ayee pu'u na'a, a'iné Cɨríistu'u pu nain jɨ́n ra'ará'astijre a'ɨ́jna ɨ́ niuucari ɨ́ mej jɨ́n tí'aijta tɨ ij ja'atɨ́ tɨ na'a ayén rɨ'éene'ecán jɨ́n huateáturan ɨ́ Dios jemi a'ɨ́jna jɨme'e tɨ a'ɨ́ɨn ɨ́ ja'atɨ́ ayén té'atzaahuate'e. 5Ajta a'ɨ́jna ɨ́ Moisés teecan, ayée pu ra'uyú'uxaca'a tɨ nu'u a'ɨ́ɨn ɨ́ ja'atɨ tɨ rá'astijre'e a'ɨ́jna ɨ́ niuucari ɨ́ mej jɨ́n tí'aijta, ayée pu nu'u ajta tiú'ujxe'eve'e tɨ a'ɨ́ɨn a'ɨ́jna jetze araújca'ane ɨ́ niuucari. 6- 7Ajta a'ɨ́jna ɨ́ ja'atɨ tɨ ari rɨ'éene'ecán jɨ́n huateájturaa ɨ́ Dios jemi, ayée pu tí'imua'atze tɨjɨ́n: “Capej piyen té'umua'atze ɨ́ a'atzajta'a tɨ ayén ruxe'eve'e peja'ujnén u ta japua pej yé rave'ecájneijte'en pe'ɨ́jna ɨ́ Cɨríistu'u.” Ajta ayén tɨ a'ɨ́jna jɨ́me'en: “Capej piyen pej téte'ɨmua a'ucáanen ɨ́ tajete pej ra'itátuaani ɨ́ Cɨríistu'u huá'a tzajta'a ɨ́ mej meri huácuii.” 8Mɨ́ ajta, ayée pu ti'ixa a'ɨ́jna tɨ tzáahuati'ira'a jɨ́n huateájturaa rɨ'éene'ecán jɨ́n ɨ́ Dios jemi tɨjɨ́n: “Pu'uri mú'eetzi jemi seijre'e ɨ́ niuucari pej piyen tihua'utá'ixaate'en, pajta pe'ɨ́jna jetze piyen tí'imua'atze ɨ́ á'a tzajta'a.” A'ii pu a'ɨ́ɨn pú'een ɨ́ niuucari ɨ́ tej tiyen tihuá'a'ixaate'e tá'aye'i. 9Ayee pu'u na'a, a'iné tɨ pua'a mémuaseiiraca'a ɨ́ teɨte, pej piyen raataxáj yee Jesús pu tavástara'a pú'een, ajta tɨ pua'a piyen té'atzaahuate'e ɨ́ á'a tzajta'a tɨ Dios ayén ra'ajjáj huá'a tzajta'a ɨ́ mɨ'ɨchite, aj pu xaa Dios mua'irájtuaani. 10Jee xaa ne'u, ayée pu ti'ayajna, ja'atɨ́ pu ayén rɨ'éene'ecán jɨ́n huateáturaasin ɨ́ Dios jemi a'ɨ́jna jɨme'e tɨ té'atzaahuate'e ɨ́ ru tzajta'a. Dios pu ajta ru'irátuaasin a'ɨ́jna jɨme'e tɨ a'ɨ́ɨn ja'atɨ́ ayén tiu'utaxájtaca'a tɨ Dios jetze ajtéme'ecan, meti'iseíiraca'a ɨ́ teɨte. 11Ayej xaa ne'u ti'ayajna, a'iné ayée pu té'eyu'usi'i ɨ́ niuucari jetze tɨjɨ́n: “Capu ja'anáj ratatévi'iraste'esin ja'atɨ́ tɨ na'a tɨ rá'antzaahuate'en a'ɨ́jna ɨ́ Cɨríistu'u.” 12Ayee pu'u, naími'i mú ruxɨ́'ej 'een, a'ɨ́ɨme ɨ́ mej Israél jetze ajtéme'ecan, majta a'ɨ́ɨme ɨ́ mej seɨj chuéjra'a japua é'eme'ecan, a'iné seɨj pu'u a'ɨ́ɨn pú'een ɨ́ tavástara'a tɨ ayén tí'ita'aijte'e naíjmi'ica itejmi, tɨ ajta nain jɨ́n rɨ́'ɨ tihua'atá'aca a'ɨ́mej ɨ́ mej miyen rahuavii tɨ a'ɨ́ɨn hua'utévaɨre'en. 13Ajta ayén té'eyu'usi'i tɨjɨ́n: “Ja'atɨ́ tɨ na'a tɨ ayén rahuauhuau ɨ́ tavástara'a jemi tɨ a'ɨ́ɨn raatévaɨre'en, Dios pu ayén ru'irátuaasin a'ɨ́jna ɨ́ ja'atɨ.” 14Aru, ¿a'iné tí'irɨ'ɨri mej miyen rahuaviira me'ɨ́jna ɨ́ tavástara'a tɨ pua'a mej caí xɨ rá'atzaahuate'e? Capu a'ij tí'irɨ'ɨri xaa ne'u. Ajta, ¿a'iné tí'irɨ'ɨri mej miyen rá'antzaahuate'en tɨ pua'a mej caí xɨ ráanamuajri'i me'ɨ́jna ja'atɨ́ tɨ pɨ́rɨcɨ? Capu a'atzu a'ij tí'irɨ'ɨri. Ajta, ¿a'iné tí'irɨ'ɨri mej miyen ráanamua tɨ pua'a caí ja'atɨ́ ayén tihua'utá'ixaate'en? Capu xaa ne'u a'ij tí'irɨ'ɨri. 15Ajta, ¿a'iné tí'irɨ'ɨri mej miyen tihua'utá'ixaate'en tɨ pua'a mé caí huata'íti'ihuaca'a mej me'uun á'uju'un huá'a jemi? Capu xaa ne'u a'ij tí'irɨ'ɨri. A'ɨ́j pu jɨ́n ayén té'eyu'usi'i tɨjɨ́n: “Jé'ecan tu huápɨ'ɨ naa huá'aseijrate'e a'ɨ́mej ɨ́ mej huata'íti'ihuaca'a téjmi jemi mej mi taatá'ixaate'en me'ɨ́jna jɨ́me'en ɨ́ tavástara'a.” 16Mɨ́ ajta, camu naími'i miyen ra'ancuré'a me'ɨ́jna ɨ́ niuucari ɨ́ tej jɨ́n tátemua'ave'e, a'iné ayée pu tiu'utaxájtaca'a a'ɨ́jna ɨ́ Isaías teecan tɨjɨ́n: “Tavastara'a, capu ja'atɨ́ ayén rá'antzaahua a'ij tej tihua'utá'ixaa.” 17Ayee pu'u. Ja'atɨ́ pu ayén té'atzaahuate'e a'ɨ́jna jɨme'e tɨ ayén ráanamuajri'i ɨ́ mej tiu'utaxájtaca'a. Ajta a'ɨ́ɨn ɨ́ niuucari ɨ́ mej miyen raataxájtaca'a, ayée mú 'een jɨ́n raataxájtaca'a a'iné Cɨríistu'u pu ayén hua'uta'aíj. 18Neajta inee, ayée nu tejá'amua'ihua'u tɨ pua'a mecaí ráanamuajri'i. A'iné mijta, xaa ne'u. Ayen té'eyu'usi'i tɨjɨ́n: Ayee pu nainjapua namuajre'e a'ij mej tí'ixaxa'a íiyen chaanaca japua. Ajta hua'aniuuca, mu'uri miyen ráanamuajri'i a'u tɨ na'a yen japuan ɨ́ chaanaca tɨ́j na'a auuyaúj. 19Neajtahua'a nu niyen tejá'amua'ihua'u tɨ pua'a mecaí yaú'itɨee muá'araa a'ɨ́ɨme ɨ́ mej Israél jetze ajtéme'ecan. Ajmí'i pu ayén tiu'utaniú a'ɨ́jna ɨ́ Moisés teecan. Ayen tɨjɨ́n: Ayee nu ca'anéeri jɨ́n amuaatá'asin sej ahuaújchueere'en ne'ɨ́jna jɨme'e nej rɨ́'ɨ tihua'utá'asin a'ɨ́mej ɨ́ mej caí Israél jetze ajtéme'ecan. Neajta nu amuaataniú'ucaste'esin ne'ɨ́jna jɨme'e nej ni rɨ́'ɨ tihua'utá'asin a'ɨ́mej ɨ́ teɨte ɨ́ mej caí rɨ́'ɨ mé tite'umuámua'aree. 20Ajta a'ɨ́ɨn Isaías, ayée pu huataúra'a tɨ ayén á jéjre'e tiu'utaxáj tɨjɨ́n: Ayee mú na'antinájcheca'a a'ɨ́ɨme ɨ́ mej caí náahuausime'e. Neajta nu huatánseijrataca'a a'ɨ́mej jemi ɨ́ mej caí nehuauca'a. 21Mɨ́ ajta a'ɨ́ɨn, ayée pu tiu'utaxájtaca'a a'ɨ́ɨme jɨme'e ɨ́ mej Israél jetze ajtéme'ecantaca'a tɨjɨ́n: Tɨ́'ɨj pɨ́ na'a nain xɨcaj tzajta'a, ayée nu huá'ahuavii mej mi seɨcɨé tiú'umua'ati ineetzi jemi. Mɨ́ ajta, camu a'atzu ná'astijre'e. Temua'a mú tite'entaújnaamua ineetzi jemi.

will be added

X\