Romanos 1

1A'ij nu jetze tejá'amuayu'use'e ne'ɨ́jna jɨme'e ɨ́ nej ravaɨre'e ɨ́ Cɨríistu'u tɨ i'i Jesús. A'ɨ́ɨ pu na'antíhuau ineetzi, i nej i'i Pablo nej ni ne'ɨ́jna jɨ́n te'ará'asten a'ij tɨ a'ɨ́ɨn tinaa'íjca. Ayee pu een jɨ́n na'avé'ehuau huá'a tzajta'a ɨ́ seica, nej ni tihua'utá'ixaate'en ne'íjna jɨme'e ɨ́ niuucari tɨ jɨ́n Dios huá'a japua huániuuni. 2Jéjcua ɨmuá pu Dios ayén te'ataújratziiri'i tɨ ayén rɨ́'ɨ tihua'utá'an a'ɨ́mej ɨ́ mej tí'ixaxa'ata'a ɨ́ Dios jetze me'ecan. A'ɨ́j mú jɨ́n miyen ra'utéyu'uxaca'a me'ɨ́jna jetze ɨ́ yu'uxari tɨ yen téjmi jemi huateájturaa. 3Ajta a'ɨ́ɨn ɨ́ niuucari, a'ɨ́j pu jɨ́me'en raxa a'ɨ́jna tɨ i'i yaujra'an pú'een, tɨ ajta airáane a'ɨ́jna jetze ɨ́ David teecan. Ayee pu teja'uré'ene a'iné a'ɨ́ɨ pu teáatacan huanú'ihuaca'a matɨ́j ɨ́ seica. 4Mɨ́ ajta a'ɨ́ɨn ɨ́ Dios, a'ɨ́ɨ pu á'iyen ayén ra'antíhua'u tɨ nain jɨ́n antiújmua'areere a'ɨ́jna jɨme'e tɨ a'ɨ́jna jetze aráujca'anejca'a ɨ́ xɨéjniu'ucare'ara'an ɨ́ Dios a'ɨ́jna tɨ ayén raatamuá'a tɨjɨ́n niyauj pu yee pú'een. Dios pu ayén nain jɨ́n tira'íjca tɨ́'ɨj a'ɨ́ɨn a'itáraa huá'a tzajta'a ɨ́ mɨ'ɨchite. A'ii pu a'ɨ́ɨn pú'een a'ɨ́jna ɨ́ ja'atɨ tɨ ayén ántehuaa Jesús tɨ ajta i'i Cɨríistu'u. A'ɨ́ɨ pu tavástara'a pú'een. 5Cɨríistu'u nu jetze ra'ancuré'a a'ɨ́jna tɨ jɨ́n ɨ́ Dios rɨ́'ɨ tinaatá'a nej ni niyen jetzen me'ecan á'ura'ani huá'a tzajta'a ɨ́ teɨte nej ni niyen hua'utá'inen mej mi ra'ará'astijre'en me'ɨ́jna ɨ́ tavástara'a me'ɨ́jna jɨme'e mej té'antzaahuate'en, naími'i ɨ́ teɨte ɨ́ mej yen chaanaca japua huachéjme. 6Seajta mú'een, mú'een xu seajta huá'a jetze ajtéme'ecan a'ɨ́ɨme ɨ́ teɨte, ɨ́ tɨ Dios ajta amua'antíhua'u mú'ejmi sej si jetzen ajtéme'ecanta xá'ara'ani ɨ́ Jesús tɨ ajta i'i Cɨríistu'u. 7A'íjna yu'uxari jetze nu niyen tejá'amuayu'use'e naíjmi'ica mɨ sej se'uun huachéjme se'újna u Roma, mú'een ɨ́ tɨ Dios já'amuaxe'eve'e, tɨ ajta amua'antíhua'u sej si jemin seíire'e xá'ara'ani. Ché'e ayén teja'uré'enen tɨ a'ɨ́ɨn ɨ́ Dios, ɨ́ tej rájya'upua, ajta ɨ́ tavástara'a, a'ɨ́jna ɨ́ Jesús tɨ ajta i'i Cɨríistu'u, miché'e me'ɨ́n rɨ́'ɨ tejamuaatá'an, majta amua'anpuá'ajte'en. 8Amuacaícan jɨme'e, ayée nu naíjmi'i rɨ́'ɨ tiratá'aca ne'ɨ́jna ɨ́ Dios ɨ́ nej ravaɨre'e ne'ɨ́jna jɨme'e sej siyen tirá'astijre'e ɨ́ Dios. Jamuan ɨ́ Jesús tɨ ajta i'i Cɨríistu'u, ayée nu rɨ́'ɨ tiratá'aca, a'iné nain japua ɨ́ chaanaca mu'uri ramua'aree sej siyen té'atzaahuate'e. 9- 10Ajta a'ɨ́ɨn ɨ́ Dios, ɨ́ nej ravaɨre'e nain jɨ́n a'achú nej a'anca'anéecan jɨ́n niyen tihua'utá'ixaate'en ɨ́ niuucari tɨ jɨ́me'en raxa a'ɨ́jna tɨ yaujra'an pú'een ɨ́ Dios, a'ɨ́ɨ pu tirú'umua'aree nej ja'anáj tɨ na'a niyen amua'utámua'areeri'i netɨ́'ɨjtá rahuavíiraj ná'aye'i. Ayee nu tí'ijhuavii tɨ ayén neetá'acare'en ɨ́ Dios nej ne'uun á'amuamuaare ná'ara'ani tɨ pua'a ayén Dios tirá'aca'ane. 11Jéihua nu á'amuaseijramɨ'ɨ nej ni ca'aníjra'a amuaatá'an sej si se'ɨ́jna jetze araújca'anen ɨ́ xɨéjniu'ucare'ara'an ɨ́ Dios sej si jaítze'e te'utáviicua'i. 12Jee xaa ne'u, ayée nu tí'ijxe'eve'e inee, tej ti tiyen che'atá tena'a ca'aníjra'a huatáta'an itejmi jemi, a'ɨ́jna jɨme'e tej taxɨ́'ej té'atzaahuate'e taxɨ́'evi'ira'a jɨme'e. 13Ayee nu neajta tí'ijxe'eve'e, ne'ihuaamua'a, sej siyen ráamua'aree nej mu'iitɨ́ niyen raaxɨ́'epɨ'ɨntare nej ne'uun a'atanén mú'ejmi jemi. Tɨ́j na'a nej amuacaí niyen tiraaxɨ́'epɨ'ɨntare nej niyen huárɨni, tɨ́j na'a tɨ yú e'iré'ene, ti'itɨ́j pu naatá'ijmɨijri'i nej ni caí ne'uun á'ume'en. Ayee nu tí'ijxe'eve'eca'a nej niyen che'atá nena'a tiraamuá'itɨn mú'ejmi jɨme'e ɨ́ nej jɨ́n tiu'utátuiire'en ɨ́ Dios jemi a'ij nej neri tiraamuá'itɨ huá'a tzajta'a ɨ́ seica ɨ́ teɨte ɨ́ mej seɨj chuéjra'a japua huachéjme. 14Ayee nu neri ne'ɨ́jna jɨ́n te'atánratziiri'i ɨ́ Dios jemi nej ni tihua'utá'ixaate'en a'ɨ́ɨme ɨ́ mej raayɨ́'ɨtɨ hua'aniuuca a'ɨ́ɨme ɨ́ mej Grecia é'eme'ecan, nej ni neajta tihua'utá'ixaate'en a'ɨ́ɨme ɨ́ mej seɨj chuéjra'a japua é'eme'ecan. Capu amɨ́n a'ij tɨ pua'a jeíhua mé té'umua'aree nusu tɨ pua'a mecaí ti'itɨ́j a'ij té'umua'aree, naúche'e nu niyen tihua'utá'ixaate'esin naíjmi'ica. 15A'ɨ́j nu jɨ́n jeíhua a'anca'anéecan jɨ́n niyen raxɨ́'eve'e nej neajta tejámuaatá'ixaate'en ɨ́ niuucari jɨme'e tɨ jɨ́n Dios a'amua japua huániuuni, mú'een, mɨ sej Roma é'eche. 16Capu netévi'iraste'e a'ɨ́jna ɨ́ niuucari, sino a'ɨ́j nu jɨ́n rɨ́'ɨ tiratá'aca ɨ́ Dios, a'iné ɨ́ niuucari jetze pu me'ecan ɨ́ muárɨ'eri'ire'ara'an ɨ́ Dios ɨ́ tɨ jɨ́n huá'a japua huániuuni naíjmi'ica ɨ́ mej ra'ará'astijre'esin, amuacaícan a'ɨ́ɨme ɨ́ mej Israél jetze ajtéme'ecan, majta á'iyen a'ɨ́ɨme ɨ́ mej seɨj chuéjra'a japua é'eme'ecan. 17A'ɨ́jna ɨ́ niuucari jetze pu ajta seijre'e a'ij tɨ huarɨ́j ɨ́ Dios mej mi me'ɨ́n teɨte miyen rɨ'éene'ecán jɨ́n huateáturan ɨ́ jemin. Ayee mú xaa ne'u rɨ'éene'ecán jɨ́n huateáturaasin ɨ́ Dios jemi tɨ́j na'a rusén jɨme'e, me'ɨ́jna jɨme'e mej meri té'atzaahuate'e. A'ɨ́j pu jɨ́n ayén té'eyu'usi'i ɨ́ yu'uxari jetze tɨjɨ́n: “A'ɨ́jna tɨ urarɨ́'ene'acan jɨ́n huateájturaa ɨ́ Dios jemi ɨ́ ru tzajta'a, a'ɨ́ɨ pu ruurican huateáturaasin a'ɨ́jna jɨme'e tɨ araújca'ane a'ɨ́jna jɨme'e tɨ té'atzaahuate'e.” 18Mɨ́ ajta, júte'e pu e'evé'eme'ecan a'ɨ́jna tɨ jéjre'e seijre'e tɨ rɨ́'ɨ huápɨ'ɨ niu'ucamɨ'ɨ ɨ́ Dios a'ɨ́jna jɨme'e a'ij mej rɨcɨ ɨ́ teɨte a'ɨ́jna tɨ a'ij pua'a 'een, a'ɨ́jna jɨme'e ɨ́ mej meri mé rúurɨe ɨ́ Dios, majta a'ij pua'a tihuá'ajcha'ɨɨ ɨ́ ruxɨ́'ej teɨte, majta miyen tihuá'ijmɨi mej caí ché'e ranajche ɨ́ Dios tzáahuati'ira'a jɨme'e. Ayee mú 'een jɨ́n huá'aruure mej mi a'ij pua'a tí'iteteɨ́testa muá'ara'ani. 19Ajta tɨ́j na'a tɨ ayén í'irɨ'ɨri tɨ ja'atɨ́ ayén tirá'amitɨejte'e a'ij tɨ 'een ɨ́ Dios, matɨ́j mena'a pua'amé ɨ́ teɨte miyen tirú'umua'aree ɨ́ ru tzajta'a a'iné Dios pu ruseɨ́j ari hua'utaseíjrate. 20Tɨ́j na'a tɨ Dios raatétaahuaca'a ɨ́ chaanaca tɨ yú e'iré'ene, temua'a pu naa ayén tihuá'amitɨejte'e á'aye'i a'ɨ́ɨme a'ɨ́jna ɨ́ tej caí rasise'i tajɨ́'ɨ jɨme'e. A'ɨ́ɨ pu xaa ayén tirá'amitɨejte'e á'aye'i a'ij tɨ 'een ɨ́ muárɨ'eri'ire'ara'an ɨ́ Dios, ajta tɨ ayén huateáturan tɨ́j na'a tɨ yú auca'itɨ́ a'ame, tɨ́j na'a rusén jɨme'e, a'iné ayée pu 'een ɨ́ Dios. Ayee pu tirá'amitɨejte'e á'aye'i a'ɨ́jna jɨme'e tɨ Dios ari raatétaahuaca'a. A'ɨ́j pu jɨ́n, capu rɨ'ɨrí tɨ ja'atɨ́ ayén jetzen seɨj té'ujpuaapua'are'en. A'ɨ́ɨme mú rujɨ́ɨmua'a miyen pú'een. 21A'ɨ́ɨ mú ramua'atejca'a ɨ́ Dios. Majta raatéxɨeehuataca'a me'ɨ́jna jɨme'e mej caí ché'e ranajcheca'a me'ɨ́jna tɨ i'i Dios, camu majta rɨ́'ɨ tiraatá'acare'e. Mɨ́ majta a'ɨ́ɨme, a'ɨ́j mú jetze ucájrupi mej me'ɨ́jna jetze tiú'umua'ati ɨ́ mua'atzíira'a tɨ caí ti'itɨ́j vaɨre'eca'a. Capu ché'e huatárɨ'ɨristareca'a tɨ ayén tihua'utámitɨejte'en tzáahuati'ira'a jɨme'e. 22Matɨ́'ɨj mauj miyen tí'ixajtaca'a tɨjɨ́n teen tu yee rɨ́'ɨ metíteumuámua'aree, capu ayén te'irájraa. Jaítze'e mú caí mé uumuámua'aree muá'araa. 23Ayee pu tihuá'aruurejca'a asta mena'a caí raatapuá'ajtaca'a mej miyen rɨ́'ɨ tiraatá'an me'ɨ́jna ɨ́ Dios tɨ caí ja'anáj mɨ'ɨni. Ayee mu'u seɨj huateánajcheca'a tɨ ayén seijre'e tɨ́j tevi na'ari tɨ́j pina'a nusu tɨ́j ti'itɨ́j tɨ muáacuaca ajta'ɨ́ɨcajmee ca'ɨ́n ti'itɨ́j tɨ á'usinuuren. 24A'ɨ́j pu jɨ́n Dios ayén mé hua'uhuá'axɨ mej mi miyen ra'ará'astijre'en naíjmi'i tɨ́j na'a tɨ a'ij pua'a 'een tɨ ayén tihuá'amitɨejte'e ɨ́ huá'a tzajta'a, ti'itɨ́j tɨ na'a tɨ a'ij pua'a 'een ɨ́ mej jɨ́n huaújtemua'ave'en. A'ɨ́ɨ mú majta miyen tí'ijrɨ'ɨrée muá'araa ɨ́ ru jetze tɨ́j na'a tɨ tiu'utévi'iraste'e. 25Ayee pu a'ɨ́jna jɨ́n tihuá'uruu a'iné a'ɨ́ɨ mú ya'uhuá'axɨ me'ɨ́jna tɨ jɨ́me'en raxa ɨ́ Dios tzáahuati'ira'a jɨme'e mej mi ra'ará'astijre'en me'ɨ́jna tɨ hua'itzi na'a pú'een. A'ɨ́ɨ mú miyen hua'uténajcheca'a, majta hua'utévaɨ a'ɨ́mej tɨ Dios huá'utaahuaca'a. Camu ché'e mi ravaɨ́re'ecu muá'araa me'ɨ́jna ɨ́ Dios, ɨ́ tej tiyen rɨ́'ɨ tiratá'aca tɨ́j na'a rusén jɨme'e. Ché'e ayén teja'uré'enen. 26A'ɨ́j pu jɨ́n Dios ayén hua'utá'a mej mi miyen ra'ará'astijre'en ti'itɨ́j tɨ a'ij pua'a éene'ecan jɨ́n huiránineica ɨ́ huá'a tzajta'a, tɨ́j na'a tɨ tiu'utévi'iraste'e. Ajta a'ɨ́ɨme ɨ́ mej 'uuca ɨ́ mej huá'a jetze ajtéme'ecantaca'a, a'ɨ́ɨ mú tiratépuaapua'ajtehua'a mej miyen tite'enteújnaxca teteca jamuan a'ij tɨ a'ɨ́ɨn Dios tihua'uteájtuaa. Ayee mu'u 'een jɨ́n huarɨ́j mej mi miyen seɨcɨé huárɨni tɨ caí a'ɨ́ɨn Dios ayén éeni'icɨ'e tihua'uteájtuaa. 27Majta a'ɨ́ɨme ɨ́ teteca, ayée mú che'atá mena'a tiratépuaapua'ajtehua'a mej miyen tihua'anteánaxcan ɨ́ 'uuca a'ij tɨ tiraaxɨ́'epɨ'ɨntare ɨ́ Dios. Ayee mú éeni'icɨ'e huarɨ́j me'ɨ́jna jɨme'e mej ruxɨ́'ej teteca jamuan huaújxana'acɨra'aten a'ɨ́jna jɨme'e ɨ́ tɨ a'ij pua'a 'een tɨ huá'a tzajta'a huiiráninei. Ayee mú huarɨ́j me'ɨ́jna jɨme'e tɨ tiu'utévi'iraste'e ɨ́ ruxɨ́'ej teteca jamuan. A'ɨ́j pu jɨ́n pu'uri tihua'ucɨ́'ɨ a'ij tɨ tiraavíjte'e a'ɨ́jna jɨme'e ɨ́ mej jeíhua huápɨ'ɨ a'ij pua'a huarɨ́j. 28Ajta, a'iné capu ayén tihuá'amitɨejte'eca'a tɨ ayén raavíjte'eca'a mej miyen ráamua'ati ɨ́ Dios, a'ɨ́ɨ pu ayén hua'utá'a mej miyen tiú'umua'ati a'ij mej tirájteu rujɨ́ɨmua'a a'ɨ́jna jɨme'e ɨ́ rumua'atzíira'a. Ayee mu'u huarɨ́j me'ɨ́jna jɨme'e tɨ caí ti'itɨ́j vaɨre'e, ajta mej mi miyen tí'ijrɨ'ɨrée tɨ́j na'a tɨ caí ayén tiraavíjte'e. 29Nain pu huá'a jemi seijre'e tɨ a'ij pua'a 'een. A'ɨ́j mú jɨ́n huaújxana'acɨra'ataca'a, majta a'ij pua'a titetiújcha'ɨɨca'a. Jé'ecan mú tí'inecua'atzeca'a. Jee xaa ne'u a'ij mú pua'a tí'iteteɨtestaca'a. A'ɨ́j mú jetze ucájrupi: a'ɨ́ɨ mú ti'iteúra'ate'ecare'e ɨ́ ti'á'ara'an ɨ́ ruxɨ́'ej tevi. Majta tí'itecui'ica. Jéihua mú majta ruté'axɨ'ɨcaa. Majta rucuanamuajca'a rujɨ́ɨmua'a. Majta mú a'ij pua'a huá'aruurejca'a ɨ́ ru'ihuaamua'a. Jee xaa ne'u, ayée mú rɨcɨ. A'ij mú pua'a tiú'ujjepe'e. 30Hua'itzi mú jɨ́n tihuá'a'ixaate'e ɨ́ ruxɨ́'ej teɨte, majta rájcha'ɨɨre'e ɨ́ Dios. Majta ruxɨ́'evi'ira'a jɨ́n hua'utéxɨeehuataca'a ɨ́ ruxɨ́'ej teɨte. Majta á'ujtzaahuate'e. Ayee mú ruseíjrataca'a mej nu'u huápɨ'ɨ ruxe'eve'e. A'ɨ́j mú majta jetzen ucájrupi a'ij mej ye'í huárɨni mej mi a'ij pua'a tihua'utzeɨ́jrajmua'an. Camu majta huá'astijre'e ɨ́ ruvaújsimua'a. 31Camu a'atzu miyen tí'ijrɨ'ɨre tɨ xɨ́'epɨ'ɨn 'een seijre'e. Jéihua mú majta caí araúraste ɨ́ mej jɨ́n te'ataújratziiri'i. Camu majta huá'axe'eve'e ɨ́ ruteɨ́testemua'a. Camu a'atzu xaa ne'u hua'acu'uvée muá'aye'i ɨ́ ruxɨ́'ej teɨte. 32Rumua'atzíira'a mú jɨ́n tirú'umua'aree a'ij tɨ Dios ari tiraaxɨ́'epɨ'ɨntare tɨ ayén tiraavíjte'e tɨ ayén tiráacɨ'ɨti tɨ huámɨ'ɨni a'ɨ́jna ɨ́ ja'atɨ tɨ ayén tí'ijrɨ'ɨre. Capu huá'a jetze ruxe'eve'e. Maúche'e mú miyen rɨcɨ. Majta ca'aníjra'a hua'atá'aca ɨ́ seica mej mi miyen che'atá mena'a tí'ijrɨ'ɨrée muá'ara'ani.

will be added

X\