Apocalipsis 8

1Tɨ'ɨquí a'ɨ́ɨn Cáne'a ra'antína'acaca'a a'ɨ́jna ɨ́ tɨ jɨ́n á'avijti'ihuajme'ecaa, a'ɨ́jna ɨ́ ta'aráhua'apua. Aj pu 'i nainjapua tiu'upuá'areajraa u júte'e. Ayee pu á'atee a'achú cumu já'ita'a hora tɨ caí ti'itɨ namuajre'eca'a. 2Netɨ́'ɨj ni hua'useíj ɨ́ mej aráhua'apua, ɨ́ mej majta tí'ivaɨre'e u ta japua. A'ɨ́ɨ mú a'ɨ́ɨn pú'een ɨ́ mej Dios jemi huaté'uuca. Matɨ́'ɨj mi te'encuré'ɨ ɨ́ trompeeta, ɨ́ tɨ aráhua'apua. 3Aj pu 'i seɨj mú a'uvé'emej tɨ ajta tí'ivaɨre'e u ta japua. A'ɨ́ɨ pu jetzen ajteechaxɨ a'ɨ́jna ɨ́ mej japuan tí'imuaɨ'ɨvajtaca. Ajta ti'itɨ huiitéjajnaca'a cɨ́tzive'eri. Seɨ́j pu raatatɨ́ste ɨ́ cuaane'e tɨ ij a'ɨ́jna rajnájchite'en a'ɨ́jna jamuan ɨ́ niuucari ɨ́ mej jɨ́n raatáhuaucare'e ɨ́ Dios jemi matɨ́j mena'a pua'amé ɨ́ mej rɨ́'ɨ tí'iteseijre'e ɨ́ Dios jemi. Ajta, a'ɨ́jna ɨ́ hua'aniuuca, án pu jé'eseijre'eca'a japuan a'ɨ́jna ɨ́ tɨ oro jɨ́n taavíjhua ɨ́ mej japuan tí'imuaɨ'ɨvajtaca tɨ ajta jemin a'utéjvee a'ɨ́jna ɨ́ ɨpuari. 4Aj pu 'i temua'a té'ejcɨtziujtarixɨ a'ɨ́jna ɨ́ cuaane'e a'ɨ́jna jamuan ɨ́ niuucari ɨ́ mej jɨ́n raatáhuaucare'e ɨ́ Dios jemi. A'ɨ́j pu jetzen ájcɨtziujtareca'a a'ɨ́jna ɨ́ muájca'are'ara'an a'ɨ́jna ɨ́ tɨ tí'ivaɨre'e u ta japua. 5Aj pu 'i rájtɨɨ a'ɨ́jna ɨ́ cɨ́tzive'eri, ajta ra'avé'ejɨste a'ɨ́jna ɨ́ taij tɨ a'uun a'uvé'emej a'ɨ́jna japua ɨ́ mej japuan tí'imuaɨ'ɨvajtaca. Aj pu 'i á ya'ucáaxɨre ɨ́ chaanaca japua. Jɨ́me'en pu'u ayén huarɨ́j, aj nu ni ráanamuajri'i. Cu xɨee muatéjniuu. Jé'ecan pu temua'a ti'itéca'arajnajme'e. Majta témaxcava'ara'a. Ajta huateújca'atzɨjxɨ ɨ́ chaanaca. 6Majta a'ɨ́ɨme ɨ́ mej aráhua'apua ará'ase, ɨ́ mej majta tí'ivaɨre'e u ta japua, a'ɨ́ɨme ɨ́ mej trompeeta te'ité'ɨ'ɨca'a, a'ɨ́ɨ mú rɨ́'ɨ huaújruu mej mi me'ɨ́jna tzajta'a ucáajijhua. 7Ajta a'ɨ́jna ta'amuájca, a'ɨ́ɨ pu ucájijhuaca'a a'ɨ́jna tzajta'a ɨ́ trompeeta. Jɨ́me'en pu'u ayén huarɨ́j, matɨ́'ɨj mi téetej cáavatzɨ a'ɨ́jna jamuan ɨ́ taij, xúure'e tɨ ranaxca. Nainjapua pu huavátzɨ íiyen chaanaca japua. Ajta je'icáj pu tiu'uré'ataa. Ajta a'ɨ́ɨn ɨ́ cɨyej, je'icáj pu ajta tiu'uré'ataa. Ajta ɨ́ ɨxaj, naími'i pu huaré'ataa a'ɨ́jna. 8Ajta a'ɨ́ɨn ɨ́ tɨ hua'apua ɨ́ tɨ tí'ivaɨre'e u ta japua, a'ɨ́ɨ pu ajta ucájijhuaca'a a'ɨ́jna tzajta'a ɨ́ trompeeta. Ajta ti'itɨ pu ateájrɨe ɨ́ jaj jetze ɨ́ tɨ ve'ée. Cu xɨee jɨrí na'a a'ɨ́jna ɨ́ ti'itɨ ɨ́ tɨ ajta teátaasime'e. Tɨ'ɨquí á a'ucájrupi á jaata'a. Aj pu 'i je'icáj seɨcɨé huaújruu ɨ́ jaj tɨ́j xúure'e. 9Majta je'icáj mú huácuii ɨ́ mej me'uun é'echejca'a. Majta, me'ɨ́n ɨ́ baarcu ɨ́ mej japuan é'ecɨɨneca'a ɨ́ jaj, je'icáj mú majta huateána'axɨ. 10Ajta a'ɨ́ɨn ɨ́ tɨ huaíca, a'ɨ́ɨ pu ajta ucájijhuaca'a a'ɨ́jna tzajta'a ɨ́ trompeeta. Jɨ́me'en pu'u ucájijhuaca'a, aj pu 'i xu'ura'ave tɨ ve'ée e'icájve u júte'e. Ayee pu té'ataaca'a tɨ́j tatzari. Aj pu 'i á e'erájve je'icáca japua ɨ́ játe'ana, ajta je'icáca japua a'u tɨ e'ejaíxavi'ijme. 11Ajta a'ɨ́ɨn ɨ́ xu'ura'ave, ayée pu ántehuaaca'a tɨjɨ́n Ta'antzíjvi'i. Je'icáj pu antzíivi'i já'araa ɨ́ jaj. Majta ɨ́ teteca, mu'iitɨ́ mú huácuii me'ɨ́jna jɨme'e mej ra'í me'ɨ́jna ɨ́ jaj ɨ́ tɨ antzíjvi'i. 12Ajta a'ɨ́ɨn tɨ muáacua, a'ɨ́ɨ pu ajta ucájijhuaca'a ɨ́ trompeeta jetze. Jɨ́me'en pu'u ayén huarɨ́j, ti'itɨ pu ra'ajteátu'a ɨ́ xɨcaj, ajta ɨ́ máxcɨra'i, ajta je'icáj ɨ́ xu'ura'ave mej mi caí ché'e miyen a'atáatɨme'eni. Je'icáj tújca'ari tzajta'a, camu ché'e á'ataaca'a, ajta je'icáj tɨ́ca'ari tzajta'a, camu majta ché'e á'ataaca'a. 13Netɨ́'ɨj ni niyen á'ujneereca'a. Júte'ɨmua pu seɨ́j rá'ara'aca'a ɨ́ cua'ɨra'ave. Netɨ́'ɨj ni niyen ráanamuajri'i tɨ ayén tí'ixajtaca'a tɨjɨ́n: ―Cui'i xaa, cui'i xaa, cui'i xaa, a'ɨ́ɨme hui ɨ́ mej íiyen japuan huachéjme ɨ́ chaanaca, a'iné jeíhua mú hui rajpuaíitzi muá'aju'u matɨ́'ɨj miyen ucáajijhua ɨ́ seica ɨ́ mej huaíca ɨ́ trompeeta jetze. Pu'uri hui tɨ́n ayén teja'uré'enejsin.

will be added

X\