Apocalipsis 6

1Netɨ́'ɨj ni raaseíj tɨ a'ɨ́ɨn Cáne'a seɨ́j antína'acaca'a ɨ́ tɨ jɨ́n á'avijti'ihuaca'a ɨ́ yu'uxari. Jɨ́me'en pu'u ayén huarɨ́j, aj nu ni ráanamuajri'i seɨ́j tɨ huá'a jetze ajtéme'ecan ɨ́ mej ruuri, ɨ́ mej majta muáacua. Ayee pu ca'anín jɨ́n tiu'utaxájtaca'a. Cu xɨee mej cuj huatéjniuuni. Ayen tɨjɨ́n: ―Iiya'a jíi. 2Neajtahua'a nu atáneereca'a tɨ pua'a á a'utéjvee a'ɨ́jna ɨ́ cahuaayu'u ɨ́ tɨ cuaínara'a. Ajta a'ɨ́ɨn tɨ avé'eca, a'ɨ́ɨ pu tú'unamɨ'ɨ huitéchueeca'a rumuájca'a jetze. Ajta, a'ɨ́ɨ pu huirájraa tɨ ij hua'antimuá'itɨn. A'u tɨ na'a pu á'uye'icaa ajta na'a caí naíjmi'ica antimuá'itɨ. 3Tɨ'ɨquí ajtahua'a ra'antína'acaca'a. Netɨ́'ɨj ni niyen tiráanamuajri'i tɨ́'ɨj a'ɨ́ɨn tɨ hua'apua tɨ ajta huá'a jetze ajtéme'ecan ɨ́ mej ruuri, ɨ́ mej muáacua, ayée pu tiu'utaxájtaca'a tɨjɨ́n: ―Iiya'a jíi. Single Line Comp 4Jɨ́me'en pu'u ayén tiu'utaxájtaca'a, seɨj pu huirájraa ɨ́ cahuaayu'u tɨ pa'useáarara'a. Ajta ayée pu tiraatá'a a'ɨ́jna tɨ avé'eca tɨ ij a'ɨ́ɨn ayén huaú'ɨtziite'en ɨ́ teɨte ɨ́ mej yen seijre'e i chaanaca japua mej mi caí ché'e ru'ihuaamua'a muá'ara'ani sino mej mi huaújcui'ini seɨj ajta seɨj. A'ɨ́ɨ pu jɨ́n, a'ɨ́ɨ pu ra'ancuré'echui seɨ́j ɨ́ chun ɨ́ tɨ ve'ée, ɨ́ tɨ ajta te'ejcamɨ́ɨmɨjmee ruxɨ́'ejta'a. 5Aj pu 'i huaícacajetze ra'antína'acaca'a. Netɨ́'ɨj ni niyen tiráanamuajri'i tɨ ajta seɨj tɨ huá'a jetze ajtéme'ecan ɨ́ mej ruuri, ɨ́ mej muáacua, a'ɨ́ɨ pu ayén tiu'utaxájtaca'a tɨjɨ́n: ―Iiya'a jíi. Netɨ́'ɨj ni neajtahua'a atáneereca'a. Me'ecui xaa, á pu a'utéjvee seɨj ɨ́ cahuaayu'u tɨ xu'umuara'a. Ajta a'ɨ́ɨn ɨ́ tɨ avé'eca, a'ɨ́ɨ pu ráachuisime'e ɨ́ mej jɨ́n te'ecá'itɨeera. 6Netɨ́'ɨj ni ja'atɨ huánamuajri'i. Cu xɨee huá'a tzajta'a á'a teja'utaxájtaca'a ɨ́ mej ruuri, a'ɨ́mej ɨ́ mej muáacua. Ayen tɨjɨ́n: ―Sei medida ɨ́ triigu, ayée pu che'atá na'a ti'ijnáache a'ame tɨ́j ja'atɨ ayén tiraamuá'itɨn seɨ́j xɨcaj jɨme'e. Ajta hui huaíca medida ɨ́ triigu tɨ tɨ́tɨ'ɨjmé'en huíjmuaiyujme, ayée pu che'atá na'a ti'ijnáache a'ame tɨ́j ja'atɨ ayén tiraamuá'itɨn seɨ́j xɨcaj jɨme'e. Mɨ seajta mú'een, caxu yá'ujɨpuan a'u mej tejé'ehuaste'e aceituuna ti'itɨ na'ari uuva ti'itɨ sino miché'e me'ɨ́jna jɨ́n huateújvaɨre'en. ―Ayee pu tiu'utaxájtaca'a. 7Tɨ'ɨquí ayén ɨ́ tɨ muáacua antína'acaca'a. Jɨ́me'en pu'u ayén ra'antína'acaca'a, aj nu ni ráanamuajri'i tɨ a'ɨ́ɨn ɨ́ tɨ muáacua tɨ ajta huá'a jetze ajtéme'ecan ɨ́ mej ruuri. Ayee pu tiu'utaxájtaca'a tɨjɨ́n: ―Iiya'a jíi. 8Neajtahua'a nu atáneereca'a. Netɨ́'ɨj ni raaseíj ne'ɨ́jna ɨ́ cahuaayu'u ɨ́ tɨ cɨ́j tí'iteuumuara'a. Ajta a'ɨ́ɨn ɨ́ tɨ avé'eca, ayée pu ántehuaa tɨjɨ́n I nej huá'acui'ica. Ajta ɨ́ seɨj ɨ́ tɨ cujta'an huamé'ecaa, ayée pu ajta ántehuaa tɨjɨ́n I nej huá'a chi'ij pú'een ɨ́ mɨ'ɨchite. Dios pu ayén hua'utá'a mej mi me'ɨ́jna jɨ́n antiújmua'areere je'icáj a'ɨ́mej ɨ́ mej yen huachéjme ɨ́ teɨte íiyen chaanaca japua mej mi huá'ucui'ini a'ɨ́mej ɨ́ teɨte me'ɨ́jna jɨme'e mej tiújne'usi'ite'en nusu tujri jɨme'e na'ari cuí'ini'ira'a jɨme'e o a'ɨ́mej jɨme'e ɨ́ ti'itén ɨ́ mej tí'itecɨ'ɨmeca. 9Tɨ'ɨquí ɨ́ ta'anxɨ́vi antína'acaca'a. Netɨ́'ɨj ni ne'ɨ́mej huaseíj ɨ́ huá'axɨejniu'uca a'ɨ́mej ɨ́ mej me'ɨ́jna jɨ́n huácuiihuaca'a me'ɨ́jna mej ra'ará'astijre me'ɨ́jna ɨ́ niuucari tɨ jɨ́me'en raxa ɨ́ Dios, majta me'ɨ́jna jɨme'e mej ra'ancuré'a ɨ́ niuucari Cɨríistu'u tɨ raateájtuaa ɨ́ huá'a jemi. Majta a'ɨ́mej, án mú e'ejté'eca'a ɨ́ ɨpuari jete. 10Majta ca'anín jɨ́n jíjhuaca'a tɨjɨ́n: ―Tavastara'a, mɨ pej rɨ'éene'ecán jɨ́n seijre'e, mɨ pej tzáahuati'ira'a jɨ́n tí'ixaxa'a, ¿a'achúni auj á'ateeri ajta pena'a caí piyen tiraaxɨ́'epɨ'ɨntare'en pe'ɨ́mej jɨme'e ɨ́ mej táacuii, pej pi puaíjtzi hua'utá'an pe'ɨ́mej ɨ́ mej án japuan huachéjme a'ánna chaanaca japua? 11Tɨ'ɨquí hua'uré'epijte ɨ́ cɨ́ɨxuri ɨ́ tɨ tɨ́tɨ'ɨjme, tɨ ajta tí'icuaina. Ayee pu tihua'utá'ixaa mej nu'u mauj a'atzu tiu'uchú'eve'en ajta na'a caí ayén te'araúrasten a'achú tɨ ari huá'uxɨ'epɨ'ɨntari'iri'i a'ɨ́mej jemi ɨ́ mej ruxɨ́'ej ti'itɨj jɨ́n tí'ivaɨre'eca'a, ajta a'ɨ́mej ɨ́ huá'a'ihuaamua'a ɨ́ mej miyen che'atá mena'a éeni'icɨ'e cui'ini matɨ́j a'ɨ́ɨme. 12Tɨ'ɨquí ɨ́ ta'arájsevi antína'acaca'a. Netɨ́'ɨj ni neajtahua'a atáneereca'a. Me'ecui xaa ne'u. Jé'ecan pu huápɨ'ɨ huateújca'atzɨ ɨ́ chaanaca. Ajta a'ɨ́ɨn ɨ́ xɨcaj, huatéxu'umuareca'a. Ayee pu seijre'eca'a tɨ́j a'ɨ́jna ɨ́ cɨ́ɨxuri tɨ xu'umua ɨ́ mej jɨ́n ti'iteújche'etehua'a muá'aye'i tɨ pua'a maújxɨeemɨjte'e. Ajta a'ɨ́jna ɨ́ máxcɨra'i, a'ɨ́ɨ pu huatépa'ureca'a. Ayee pu seijre'eca'a tɨ́j xúure'e. 13Majta a'ɨ́ɨme ɨ́ xu'ura'ave, a'ɨ́ɨ mú miyen che'atá mena'a é'ejvatzɨjxɨ ɨ́ chuej japua tɨ́j a'ɨ́jna ɨ́ táca'ira'an ɨ́ huaréj tɨ auj seijre'e tɨ́'ɨj huáseevi'i á'aye'i. Tɨ pua'a a'ɨ́ɨn cɨ́ye'ara'an huataújruureajxɨ'ɨn eeca jɨme'e, naíjmi'i pu cávaɨjtzi ɨ́ táca'ira'an. 14Ajta ɨ́ ta japua tɨ tejé'eseijre'e, a'ɨ́ɨ pu e'ehuaújpua'arixɨ. Ayee pu che'atá na'a huatéeseijre tɨ́j ajta ja'atɨ yu'uxari huatéejire. Ajta tɨ́j na'a a'utɨ́ a'u jɨrime, ajta tɨ́j na'a a'utɨ́ e'erahuáchijmee ɨ́ jaj japua, naíjmi'i pu huaré'axɨ. Capu ché'e mu'u é'e seíire'e já'araa ɨ́ jɨrí. 15Majta naími'i ɨ́ mej yen japuan seijre'eca'a íiyen chaanaca japua, á mú ahuaúravaataca'a já'ahua'a teásta'ana tzajta'a, majta jaij tzajta'a a'ujna jɨrí jetze. Ayee mú huarɨ́j a'ɨ́ɨme ɨ́ mej ti'itɨj jɨ́n títetateí, tɨ pua'a tajtuhuan pú'een nusu presideente pú'een na'ari ɨ́ mej tihuá'aijte'e ɨ́ xantaaru'u nusu ɨ́ mecaí mej chíjteaani pú'een nusu ɨ́ mej jeíhua rucaca'anéjme. Naími'i matɨ́j mena'a pua'amé yen seijre'e íiyen chaanaca japua, miyen huateúravaataca'a. Capu amɨ́n a'ij tɨ pua'a ruxɨ́'ej mena'a á'ujujhua'ane'e a'ij tɨ tihua'aráanajche, na'ari ca'anéeri mú jɨ́n tí'imuarɨ'eca'a. 16Ayee mú tihua'utajé me'ɨ́jna ɨ́ jɨrí, majta me'ɨ́jna ɨ́ tetej tɨjɨ́n: ―Setá'aj yeehui ta japua rájveti sej si ta'avé'enan tɨ ij caí taaseíj a'ɨ́jna ɨ́ tɨ acájca ɨ́ ɨpuari japua, ajta tɨ ij caí puaíjtzi táacɨ'ɨti a'ɨ́jna jemi ɨ́ Cáne'a ɨ́ tɨ ari niu'ucamɨ'ɨ. 17Jee xaa, pu'uri yeehui ayén teja'uré'ene a'ɨ́jna xɨcáara'a mej jetzen puaíjtzi taatá'asin me'ɨ́jna jɨme'e mej meri níniu'ucacu, majta capu ja'atɨ raayɨ́'ɨtɨ tɨ te'utáviicua'i a'ɨ́jna jɨme'e.

will be added

X\