Apocalipsis 5

1Netɨ́'ɨj ni ayén éene'en tiu'uséij, tɨ a'ɨ́jna ɨ́ tɨ acájca ɨ́ ɨpuari jetze, rurɨ'ɨríinta'a pu ru'itépijcaa ɨ́ yu'uxari ɨ́ tɨ ruxɨ́'ejta'a té'esiɨɨmua'ihuaca'a, ajta, á'avijti'ihuaca'a arahua'apuáca jɨme'e ɨ́ xɨjca. 2Neajta ja'atɨ huaseíj tɨ júte'e tí'ivaɨre'e. A'ɨjna ɨ́ ja'atɨ jé'ecan pu huápɨ'ɨ uráca'anée. Ca'anín pu jɨ́n tiu'utáhuau. Ayee pu tɨjɨ́n: ―¿A'ataani ayén huataújcɨ'ɨpua tɨ a'ɨ́ɨn ra'ajsiújtza'anaxɨ'ɨn ɨ́ tɨ jɨ́n á'avi'ijti'ihuajmee, ajta ɨ́ tɨ raatáxɨjta ɨ́ yu'uxari? ―Ayee pu tiu'utaxájtaca'a. 3Tɨ'ɨquí ayén te'irájraa. Tɨ́j na'a a'ujna já'ahua'a u júte'e, ajta íiyen chaanaca japua, ajta u tajete, capu mé'e ja'atɨ tɨ ayén tiu'utaúcɨ'ɨpua ɨ́ tɨ ayén tiraatáxɨjta, ajta tɨ ra'useíj a'ij tɨ té'eyu'usi'ihuaca'a. 4Neajta inee, jeíhua nu huápɨ'ɨ neyeineca'a ne'ɨ́jna jɨme'e mej caí rateuve'eca'a seɨ́j tɨ ayén tiu'utaúcɨ'ɨpua ɨ́ tɨ ayén tiraatáxɨjta ɨ́ yu'uxari nusu tɨ ra'useíj, ajta tɨ ra'ujíjve'en. 5Tɨ'ɨquí seɨj tɨ huá'a jetze ajtéme'ecantaca'a a'ɨ́mej ɨ́ vaujsi, ayée pu tinaatá'ixaa tɨjɨ́n: ―Capej ayeine. Me'ecui xaa, a'ɨ́jna mej miyen ratamuá'amua tɨjɨ́n ɨ́ Muajye ɨ́ tɨ huá'a jetze ajtéme'ecan a'ɨ́mej ɨ́ mej Israél jetze airáane, a'ɨ́jna ɨ́ mej majta miyen ratamuá'amua tɨjɨ́n A'ɨjna ɨ́ tɨ David jetze airaújneijte, a'ɨ́ɨ pu ari tiu'utéemua'itɨ tɨ́'ij a'ɨ́ɨn ayén tira'ajsiújtza'anaxɨ'ɨn ɨ́ ta'aráhua'apuáca jɨ́n á'avi'ijti'ihuajmee, tɨ ajta raatáxɨjta. 6Neajta niyen éene'en tiu'uséij tɨ́j ti'itɨ ɨ́ Cáne'a, ayée seijre'eca'a tɨ́j ɨ́ mej meri raajé'ica. A'uu pu a'utéveeca'a jemin ɨ́ ɨpuari. A'ɨ́ɨ pu ajta huá'a tzajta'a seijre'eca'a ɨ́ mej muáacua ɨ́ mej ruuri, majta a'ɨ́mej ɨ́ mej aitecaíjme'ecaa a'ɨ́ɨme ɨ́ vaujsi. Ajta a'ɨ́jna ɨ́ Cáne'a, arahua'apuáca pu ájta'ehuájme'ecaa, ajta arahua'apuájmé'en pu ájjɨ'ɨsijme'ecaa. Ajta a'ɨ́ɨn jɨ'ɨseáara'an ɨ́ ta'aráhua'apua, a'ii pu a'ɨ́ɨn pú'een ɨ́ xɨéjniu'ucare'ara'an ɨ́ Dios ɨ́ tɨ nainjapua u ya'uta'íteca'a íiyen chaanaca japua. 7Ajta a'ɨ́ɨn ɨ́ Cáne'a, a'úu pu a'uvé'emej a'ɨ́jna jemi ɨ́ tɨ e'ecájca ɨ́ ɨpuari jetze. Tɨ'ɨquí ra'ancuré'epi a'ɨ́jna ɨ́ yu'uxari ɨ́ tɨ rɨ'ɨríinta'a seijre'eca'a a'ɨ́jna ɨ́ tɨ ɨpuari jetze acájca. 8Tɨ́'ɨj ra'ancuré'epi a'ɨ́jna ɨ́ yu'uxari, a'ɨ́ɨme ɨ́ mej muáacua ɨ́ mej ruuri, majta a'ɨ́ɨme ɨ́ vaujsi ɨ́ mej seité japuan muáacua ará'ase, a'ɨ́ɨ mú miyen a'ɨmuá aicaújtuuxɨ me'ɨ́jna jemi ɨ́ Cáne'a. Matɨ́j mena'a pua'amé te'ité'ɨ'ɨca'a me'ɨ́jna ɨ́ aarpa, majta tuxa'a tɨ oro jɨ́n tí'itaavijhuaca'a. Cuaane'e pu avé'ejɨstíjme'ecaa a'ɨ́jna jetze ɨ́ tuxa'a. Ajta a'ɨ́jna ɨ́ cuaane'e, a'ii pu a'ɨ́ɨn pú'een ɨ́ mej raatáhuaviiri'i ɨ́ Dios a'ɨ́ɨme ɨ́ mej rɨ́'ɨ tí'iteseijre'e ɨ́ Dios jemi. 9Matɨ́'ɨj mi miyen jéjcuacan jɨ́n tiu'utáchuiicaca'a tɨjɨ́n: Ayee pu tiraavíjte'e pej mú'ee piyen ra'ancuré'epin, pajta raatáxɨjta a'iné memuaajé'ica. Pajta mú'ee, pepu'uri tiu'utanájchitaca'a pe'ɨ́jna jɨme'e ɨ́ á'axuure'e ɨ́ mej jɨ́n té'echa'ɨca'a ɨ́ Dios jemi, pej pi tiu'utátuiire'en ɨ́ Dios jemi ɨ́ teɨte mej nainjapua é'eme'ecan. A'ɨ́ɨ mú huá'a jetze ajtéme'ecan matɨ́j mena'a seɨ́j jetze mej airaújneijte nusu a'achú pua'amé ɨ́ mej seɨ́j niuucari jɨ́n tí'ixaxa'a nusu matɨ́j mena'a pua'amé ɨ́ mej teɨtestemua'ame'en pú'een. A'u tɨ na'a mej é'eseijre'e seɨ́j japua ɨ́ chuej, a'úu mú é'eme'ecan. 10Pajta mú'ee, pepu'uri piyen rɨ́'ɨ huá'uruu mej mi miyen me'ɨ́n teɨtestemua'ame'en pú'eene'en muá'ara'ani a'ɨ́jna ɨ́ tɨ tí'aijta, mej mi majta ti'itɨj jɨ́n tiu'utévaɨre'en me'ɨ́jna jemi ɨ́ Dios. Mɨ majta a'ɨ́ɨme, a'ɨ́ɨ mú tiu'uta'aíjta íiyen chaanaca japua. Ayee mú tiu'utáchuiicaca'a. 11Netɨ́'ɨj ni atáneereca'a. Netɨ́'ɨj ni huá'unamuajri'i a'ɨ́mej ɨ́ mej u ta japua tí'ivaɨre'e. Mé mu'iicáa huápɨ'ɨ. Capu a'atzu rɨ'ɨrí tɨ hua'uté'itɨen, ni capu ámitɨeere'e a'achú mej pua'amé. Ayee mú pua'amé matɨ́j ɨ́ xu'ura'ave. A'ɨ́ɨ mú me'uun atavéejme'ecaa me'ɨ́jna jetze ɨ́ ɨpuari, majta a'ɨ́mej jetze ɨ́ mej muáacua ɨ́ mej ruuri, majta a'ɨ́mej jetze ɨ́ vaujsi. 12A'ɨ́ɨ mú miyen ca'anín jɨ́n tiu'utáchuiicaca'a tɨjɨ́n: Tiché'e tiyen rɨ́'ɨ tiraatá'an te'ɨ́jna ɨ́ Cáne'a ɨ́ mej raajé'ica. Jee xaa, ayée pu tiraavíjte'e tɨ a'ɨ́ɨn ayén tira'ancuré'an a'ɨ́jna tɨ Dios jɨ́n tira'íjcate'e, ajta tɨ́j na'a tɨ jemin tí'iseijre'e ɨ́ Dios, ajta ɨ́ mua'atzíira'a ɨ́ tɨ jɨ́n tiu'uta'aíjta, ajta ɨ́ muárɨ'eri'ire'ara'an ɨ́ tɨ jɨ́n nain jɨ́n tiu'utémua'itɨn. Tiché'e rɨ́'ɨ tiraatá'an, teajta ahuátatzaahuate'en te'ɨ́jna jemi, tiché'e teajta huátatemua'ave'en te'ɨ́jna jemi ɨ́ Cáne'a. Ayee mú tiu'utáchuiicaca'a. 13Netɨ́'ɨj ni niyen tíhuá'unamuajri'i ɨ́ mej ti'ichuíica, matɨ́j mena'a pua'amé mej u ta japua é'eseijre'e, majta a'ɨ́mej mej íiyen seijre'e ɨ́ chaanaca japua, majta a'ɨ́ɨme, matɨ́j pua'amé u tajete mej é'eseijre'e, majta a'ɨ́mej ɨ́ mej japuan é'eseijre'e ɨ́ jaj tɨ ve'ée, majta matɨ́j mena'a pua'amé a'aseijre'e ɨ́ jaj tzajta'a. Naími'i mú miyen tí'ichuiicaca'a tɨjɨ́n: Tiché'e rɨ́'ɨ tiraatá'an te'ɨ́jna ɨ́ tɨ acájca ɨ́ ɨpuari jetze, teajta te'ɨ́jna ɨ́ Cáne'a. Tiché'e rɨ́'ɨ tiraatá'an, tiché'e teajta rɨ́'ɨ tirájcha'ɨɨ, teajta rɨ́'ɨ tiraateájtuaani, teajta raatá'an tɨ nain jɨ́n antiújmua'areere á'ara'ani tɨ́j na'a tɨ yú auca'itɨ́ a'ame tɨ́j na'a rusén jɨme'e. 14Majta a'ɨ́ɨme ɨ́ mej muáacua ɨ́ mej ruuri, ayée mú tiu'utaxájtaca'a tɨjɨ́n: ―Ché'e ayén teja'uré'enen. Majta a'ɨ́ɨme ɨ́ vaujsi, a'ɨ́ɨ mú aicaújtuuxɨ, majta raateánajcheca'a ɨ́ Dios.

will be added

X\