Apocalipsis 4

1Tɨ́'ɨj raatapuá'ajtaca'a tɨ tiu'uxájtaca'a, aj nu ni niyen éeni'icɨ'e tiu'uséij. Seɨ́j nu huaseíj ɨ́ puéerta tɨ antacúuni'ihuaca'a u ta japua. Ajta a'ɨ́ɨn ɨ́ nej amuacaícan ráanamuajri'i, ajtahua'a pu tí'ine'ixaate'eca'a. Ayee pu namuajre'eca'a tɨ́j ja'atɨ tɨ ucáajijhua trompeeta jetze. Ayen tɨjɨ́n: ―Yen vejnéechi nej ni timuaataseíjrate'en a'ij tɨ tiú'ujxe'eve'e tɨ ayén teja'uré'enen méjca'i huáyee. 2Jɨ́me'en pu'u ayén tiu'utaxájtaca'a, aj pu a'ɨ́ɨn xɨéjniu'ucare'ara'an ɨ́ Dios, a'ɨ́ɨ pu neetzi jemi ru'uté'aa. Ayee nu éene'en tiu'uséij cumu a'u tɨ ɨpuari a'utéjvee u ta japua. Ajta a'ɨ́jna japua ɨ́ ɨpuari, ja'atɨ pu jetzen acájca. 3Ajta a'ɨ́ɨn tɨ jetzen acájca, ayée pu naa éene'en ti'itéechen. Ayee pu seijre'eca'a tɨ́j tetej tɨ huápɨ'ɨ tí'ijnajche, tɨ pa'u ɨ́ tetej, ajta tɨ teúumua ajta ɨ́ tɨ ranaxca. Ajta ayén seijre'eca'a tɨ́j ɨ́ seɨj ɨ́ tetej ɨ́ tɨ pa'u tɨ ajta naa tí'imesti. Cu'uxaí pu ajta ataviɨ́jca'a a'u tɨ a'utéveeca'a ɨ́ ɨpuari. Ayee pu rú'aaravi'i seijre'eca'a tɨ́j a'ɨ́jna ɨ́ tetej mej miyen ratamuá'amua tɨjɨ́n esmeralda. 4Ajta, seica ɨ́ ɨpuari atavéejme'ecaa a'u tɨ a'utéjvee a'ɨ́jna ɨ́ ɨpuari. Seité japuan muáacua pu ará'aseca'a a'ɨ́jna ɨ́ ɨpuari. Majta me'ɨ́n ɨ́ vaujsi, a'ɨ́ɨ mú acaté'etejme'ecaa jetzen ɨ́ seica ɨ́ ɨpuari. Majta miyen seité japuan muáacua ará'aseca'a a'ɨ́ɨme ɨ́ vaujsi. Majta cuaiínavi'in mú ti'itéchejca'a, majta curuun te'utearújte'emé'e tɨ oro jɨ́n taavíjhuaca'a. 5A'ájna seɨ́j japua ɨ́ ɨpuari miyen témaxcava'ara'a, majta téniuuca'a. Ajta, án tɨ e'evé'evee ɨ́ ɨpuari, tatzari pu a'atáatɨme'ecaa tɨ ayén pua'amé aráhua'apua. Ajta a'ɨ́ɨn ɨ́ tatzari, a'ii pu a'ɨ́ɨn pú'een ɨ́ xɨéjniu'ucare'ara'an ɨ́ Dios tɨ aráhua'apua jɨ́n tí'imuarɨ'e. 6Ajta a'ujna a'u tɨ e'evé'evee, ayée pu éene'e huámuan á chuaata'a a'ɨ́jna jɨme'e tɨ naa tí'imesti, tɨ ajta tí'itatzaj. Ayee pu seijre'eca'a tɨ́j a'ɨ́jna ɨ́ tetej mej miyen ratamuá'amua tɨjɨ́n cristal. Majta a'ɨ́ɨme ɨ́ mej muáacua ará'ase ɨ́ mej ruuri, a'úu mú uhua'ú'upu'ujme'ecaa tɨ́j na'a ti'ipua'amé ɨ́ ɨpuari. Tɨ́'ɨj pɨ́ na'a mú tí'iseij, nain japua, tɨ́j na'a júte'ɨmua, ajta íiyen chaanaca japua. 7Ajta a'ɨ́ɨn ɨ́ tɨ seɨ́tɨ, ayée pu araseijre'e tɨ́j muajye. Ajta ɨ́ tɨ hua'apua, ayée pu araseijre'e tɨ́j puuya. Ajta a'ɨ́ɨn tɨ ruuri tɨ huaíca, ayée pu te'ecánee tɨ́j teáata'a, ajta a'ɨ́ɨn ɨ́ tɨ muáacua, ayée pu seijre'eca'a tɨ́j cua'ɨra'ave tɨ rá'ara'ive. 8Majta a'ɨ́ɨme ɨ́ mej muáacua, ɨ́ mej majta i'i ruuri, a'ɨ́ɨ mú arajsevíca ajtá'anájmee. Tɨ́'ɨj pɨ́ na'a mú tí'iseij nainjapua tɨ́j na'a júte'ɨmua, majta íiyen chaanaca japua. Nain tújca'ari tzajta'a, majta nain tɨ́ca'ari tzajta'a, a'ɨ́ɨ mú jemin tí'ichuiicaca'a ɨ́ Dios. Camu ja'anáj raatapuá'ajta mej miyen ti'ichuíica tɨjɨ́n: Rɨ́'ɨ pu tí'iseijre'e, temua'a pu urarɨ́'ene'acan jɨ́n seijre'e, xɨ́'epɨ'ɨn pu een seijre'e tɨ́j na'a rusén jɨme'e ɨ́ tavástara'a, a'ɨ́jna ɨ́ Dios tɨ nain jɨ́n antiújmua'aree, a'ɨ́jna ɨ́ tɨ ruseɨ́j seijre'eca'a, tɨ ajta seijre'e íjii, tɨ ajta seíire'e a'ame tɨ́j na'a rusén jɨme'e. 9Majta miyen rɨ́'ɨ tiratá'aca, majta raná'amiche'e, a'ɨ́ɨ mú majta tí'ijteujtzi'ire'e muá'aye'i me'ɨ́jna tɨ a'ɨ́ɨn ɨpuari jetze acájca, tɨ ajta ruuri tɨ́j na'a rusén jɨme'e. 10Matɨ́j mena'a miyen rɨcɨ ɨ́ mej muáacua, ɨ́ mej majta ruuri, a'ɨ́ɨ mú majta miyen rɨcɨ a'ɨ́ɨme ɨ́ mej vaujsi ɨ́ mej seité japuan muáacua ará'ase. A'ɨ́ɨ mú aicaújtuuxɨjsin me'ɨ́jna jemi ɨ́ tɨ ɨpuari jetze acájca, mej mi raateánajche me'ɨ́jna tɨ i'i ruuri tɨ́j na'a rusén jɨme'e, majta raatátuiire'esin ɨ́ jemin ɨ́ tiu'ujcúrun. Majta miyen ti'ichuíica tɨjɨ́n: 11Ayee pu timuaavíjte'e mú'eetzi, mɨ pej tavástara'a pú'een, mɨ pej pajta i'i Dios. Tej ti tiyen rɨ́'ɨ timuaatá'an, tej ti tiyen muaná'amiche'en. Pej pi nain jɨ́n antí'amua'aréere, a'iné mú'ee pej nain tiú'utaahuaca'a, nain ɨ́ tɨ seijre'e íjii. Ayee mú 'een jɨ́n huataseíjre me'ɨ́jna jɨme'e pej piyen tira'utéeca'ane á'axe'evi'ira'a jɨme'e. A'ɨ́j mú jɨ́n miyen huátaavijhuaca'a.

will be added

X\