Apocalipsis 22

1Aj pu 'i tinaataseíjrate a'ɨ́jna ɨ́ játe'ana tɨ jetzen 'airáanej a'u tɨ a'utéjvee ɨ́ ɨpuari tɨ jetzen acájca ɨ́ Dios, ajta a'ɨ́jna ɨ́ Cáne'a. Ajta a'ɨ́jna ɨ́ jaj tɨ mɨ'ɨye, temua'a pu naa tiú'ujmua'atɨ. Naa pu ajta tí'itatzaj tɨ́j ɨ́ cristal. A'ii pu a'ɨ́ɨn pú'een ɨ́ jaj ɨ́ tɨ caí ja'anáj ateáxɨ'ɨsin. 2Já'ita'a pu mɨ'ɨye ɨ́ caaye jetze tɨ a'uun a'utaníne'i ɨ́ chajta'a jetze. Ajta, cɨyej atavéejme'ecaa a'utɨ́ e'eve'e'ástɨme ɨ́ jaj, seica a'u tɨ pújme'en, ajta seica u jetze pújme'en. A'ii pu a'ɨ́ɨn pú'een a'ɨ́jna ɨ́ cɨyej ɨ́ mej jɨ́n ruuri muá'ara'ani. Tamuáamuata'a japuan hua'apua pu ará'ase ɨ́ tɨ jɨ́n taaca tɨ́j na'a seɨ́j máxcɨra'i jetze pɨ́tí'irɨjca, aj pu 'ij ajta seica jɨ́n taca'an a'ɨ́jna ɨ́ cɨyej. Ajta ɨ́ xamua'ira'an, ayée pu tí'ivaɨre'e mej mi me'ɨ́jna jɨ́n huaújrujte'en a'ɨ́ɨme ɨ́ mej seɨj chuéjra'a japua é'eme'ecan. 3Capu ché'e a'uun seíire'e a'ame ɨ́ ti'itɨ tɨ Dios ayén tiraaxɨ́'epɨ'ɨntare tɨ ayén puaíjtzi tiraatá'an sino a'úu mú a'ujté'e muá'aju'u ɨ́ Dios jamuan, majta a'ɨ́ɨme ɨ́ mej me'uun huachéjme me'újna chajta'a jamuan a'ɨ́jna ɨ́ Cáne'a. A'ɨ́ɨ mú tiu'uta'aíjta, majta a'ɨ́ɨme ɨ́ mej tí'ivaɨre'e, a'ɨ́ɨ mú raná'amiche'e muá'aju'u. 4A'ɨ́ɨ mú jemin seíire'e muá'aju'u, ajta aj pu e'eseíire'e a'ame aj huá'acuaatze'e a'ij tɨ ántehuaa a'ɨ́jna. 5Capu ché'e ja'anáj huatétɨca'ari a'ujna. Capu ché'e ruxe'eve'e a'ame mej miyen tatzari jɨ́n huateújtatzavi'i na'ari ayén tɨ hua'utétatzavi'in ɨ́ xɨcaj, a'iné a'ɨ́ɨ pu tavástara'a tɨ ajta Dios pú'een, a'ɨ́ɨ pu hua'atátzavi'ira a'ame. Majta a'ɨ́ɨme, a'ɨ́ɨ mú tí'aíita muá'aju'u tɨ́j na'a rusén jɨme'e. 6Aj pu 'i ayén tinaatá'ixaa tɨjɨ́n: ―Ayee pu hui ti'ayajna a'ij nej tí'imua'ixaate'e a'iné tzáahuati'ira'a nu jɨ́n ti'ixa. Ajta a'ɨ́ɨn tavástara'a, a'ɨ́jna tɨ u ya'uta'íteca'a ɨ́ ruxɨ́ejniu'uca tɨ́'ij huá'a jemi huateáturan a'ɨ́mej ɨ́ mej Dios jetze me'ecan tí'ixaxa'ata'a, a'ɨ́ɨ pu ari naata'íteca'a i nej ta japua tí'ivaɨre'e nej ni tihua'utaseíjrate'en a'ɨ́mej ɨ́ mej ravaɨre'e ɨ́ Dios a'ij tɨ tiú'ujxe'eve'e tɨ ca'anacan ayén teja'uré'enen. 7―Me'ecui xaa, nee nu hui mú a'uvé'emé'e na'ame. Rɨ́'ɨ pu tiraatá'aca a'ɨ́jna tɨ ayén araúrasten a'ij tɨ té'eyu'usi'i a'íjna i yu'uxari jetze. 8Neajta inee, i nej i'i Juan, nee nu ne'ɨ́n pú'een nej ráanamuajri'i, neajta nej raaseíj a'ij tɨ té'eyu'usi'i a'íjna jetze i yu'uxari. Jɨ́me'en nu'u niyen tiráanamuajri'i, neajta tiu'uséij, aj nu ni niyen aicántutzi a'u tɨ e'era'ɨ́ɨcajme a'ɨ́jna ɨ́ tɨ ta japua tí'ivaɨre'e, tɨ ajta tinaataseíjrate nej ni raateánajche. Aj nu ni raatenáachejche'en nicu. 9Ajta a'ɨ́ɨn, ayée pu tinaatá'ixaa tɨjɨ́n: ―Capej hui piyen neruure, mú'ee, a'iné ayée nu che'atá nena'a tí'ivaɨre'e ɨ́ Dios jemi patɨ́j mú'ee, ajta matɨ́j majta a'ɨ́ɨme ɨ́ a'ihuáamua'a ɨ́ mej Dios jetze me'ecan tí'ixaxa'ata'a, majta matɨ́j mena'a pua'amé araúraste a'ij tɨ té'eyu'usi'i a'íjna jetze i yu'uxari. Patá'aj pe'ɨ́jna huateánajche ɨ́ Dios. 10Aj pu 'i ayén tinaatá'ixaa tɨjɨ́n: ―Capej hui rá'avaata ɨ́ niuucari tɨ a'íjna jetze á'ayu'usi'i i yu'uxari, tɨ ajta Dios jetze me'ecan ti'ixa, a'iné pu'uri tɨ́n a'ájna teja'uré'enejsin a'ájna xɨcáara'an jetze tɨ́'ɨj naíjmi'i te'entipuá'ari. 11’Ajta ɨ́ tɨ hui a'ij pua'a ti'itiújcha'ɨɨ, ché'e auj ayén a'ij pua'a ti'itiújcha'ɨɨ. Ajta ɨ́ tɨ xána'avi'ire'e, ché'e auj xána'avisi'i seijre'e. Ajta ɨ́ tɨ rɨ'éene'ecán jɨ́n seijre'e ɨ́ Dios jemi, ché'e auj ayén rɨ́'ɨ ti'iseíire'e á'ara'ani. 12’¡Me'ecui xaa! Nee nu hui ca'anacan mú a'uvé'emé'e na'ame nej ni hua'utá'an a'ij tɨ tiraamuá'itɨn, nej ni niyen tihua'utá'an matɨ́j mena'a pua'amé ɨ́ mej tiraamuá'itɨ, seɨj ajta seɨj, a'ij tɨ tiraavíjte'e. 13’Nee nu ne'ɨ́n pú'een i ta'amuájca, neajta i nej tu'uvé'eteajtɨ, neajta ne'ɨ́n pú'een i nej jéjcua ɨmuá huataseíjre, neajta ne'ɨ́n pú'een i nej yen seíire'e na'ame tɨ́j na'a rusén jɨme'e. Nee nu neajta ne'ɨ́n pú'een i nej nejmí'i huataseíjre tɨ́'ɨj caí xɨ ti'itɨ mé'e seijre'eca'a, neajta nu ne'ɨ́n pú'een i nej nain ancuré'asin tɨ́'ɨj te'entipuá'ari tɨ́j na'a tɨ íjii tí'iseijre'e. 14Rɨ́'ɨ pu tihua'atá'aca a'ɨ́mej ɨ́ mej tí'ija'usica ɨ́ tiú'ujcɨɨxɨ tɨ́'ij ayén tihuá'ucɨ'ɨti mej me'ɨ́jna jetze ráacua'ani ɨ́ cɨyej ɨ́ mej jɨ́n ruuri huateáturan, mej mi majta me'uun a'uteárute me'újna chajta'a me'ɨ́jna jetze a'u tɨ é'epueerta. 15Ajta á pua'acɨé, a'úu mú a'uté'uu muá'aju'un a'ɨ́ɨme ɨ́ mej a'ij pua'a titetiújcha'ɨɨ, majta a'ɨ́ɨme ɨ́ mej tí'ichahuaara, majta a'ɨ́ɨme ɨ́ mej ruxána'acɨre'e. A'ɨ́ɨ mú majta á pua'acɨé a'uté'uu muá'aju'un a'ɨ́ɨme ɨ́ mej tí'itecui'ica, majta ɨ́ mej rana'amiche ɨ́ tɨ caí Dios pú'een, majta matɨ́j mena'a pua'amé ɨ́ tɨ ayén tihua'aráanajche tɨ hua'itzi pú'een, majta ɨ́ mej tí'ihua'itaca. 16―Inee, i nej Jesús pú'een, nee nu u ya'uta'íteca'a mú'ejmi jemi ne'ɨ́jna tɨ nevaɨre'e tɨ́'ij a'ɨ́ɨn te'anxájta huá'a jemi a'ɨ́mej ɨ́ mej me'uun e'etiújse'ɨri mej mi raateánajche ɨ́ Dios. Nee nu ne'ɨ́jna jetze huanéj ɨ́ David teecan. Nee nu huáacɨxa'ara'an pú'een a'ɨ́jna ɨ́ David. 17Ajta a'ɨ́ɨn xɨéjniu'ucare'ara'an ɨ́ Dios, ajta a'ɨ́ɨn tɨ auchén huatéeviche, ayée mú ti'ixa tɨjɨ́n: ―Ché'e mú a'uvé'eme'en. Ajta ɨ́ tɨ ranamua, ché'e ajta a'ɨ́ɨn ayén tiu'utaxáj yee: ―Ché'e a'ɨ́ɨn mú a'uvé'eme'en. Ajta ɨ́ tɨ jetzen á'ujca'ane tɨ ayén tira'ará'astijre'en, ché'e ja'atɨ tɨ na'a ayén mú a'uvé'eme'en, ché'e ajta huáapua'a ra'ancuré'an ɨ́ jaj tɨ jɨ́n ruuri huateáturan. 18Ayee nu niyen tihua'a'íjcate'e ja'atɨ tɨ na'a tɨ ranamua a'ij tɨ té'eyu'usi'i a'íjna i yu'uxari jetze tɨ Dios jetze me'ecan ti'ixa, tɨ pua'a ja'atɨ ayén seɨcɨé tiu'utaxáj, Dios pu puaíjtzi raatá'asin a'ij tɨ té'eyu'usi'i a'íjna jetze i yu'uxari. 19Ajta tɨ pua'a ja'atɨ ra'uré'uuna ɨ́ ti'itɨ tɨ a'íjna jetze té'eyu'usi'i tɨ Dios jetze me'ecan ti'ixa, Dios pu ajta rá'ari'ira a'ɨ́jna tɨ́'ij caí ché'e ráacɨ'ɨti tɨ a'ɨ́ɨn a'ɨ́jna jetze ráacua'ani a'ɨ́jna ɨ́ cɨyej tɨ jɨ́n ruuri á'ara'ani. Capu ajta ché'e ayén tí'ijcɨ'ɨti tɨ a'ɨ́ɨn a'uun a'uteárute ɨ́ chajta'a jetze a'u tɨ Dios huateúra'ate. Ayej té'eyu'usi'i a'íjna i yu'uxari jetze. 20Neajta inee, i nej te'anxájta ne'ɨ́jna jɨme'e, ayée nu ti'ixa ne'íjna jɨme'e tɨ ayén ti'ayajna nej ca'anacan mú a'uvé'emé'e na'ame. Ché'e ayén teja'uré'enen, patá'aj yé uvé'enen, tavástara'a, mɨ pej Jesús pú'een. 21Ché'e a'ɨ́ɨn tavástara'a tɨ ajta Jesús pú'een, ché'e a'ɨ́ɨn rɨ́'ɨ tihua'utá'an a'ɨ́mej ɨ́ mej teɨtestemua'ame'en pú'een ɨ́ Dios. Ché'e ayén teja'uré'enen. Ayee pu te'entipuá'areca'a í niúucare'ara'an ɨ́ tavástara'a.

will be added

X\