Apocalipsis 18

1Neajta seɨ́j huaseíj ɨ́ tɨ ta japua tí'ivaɨre'e. Aa pu ta japua ve'ecáme'ecaa a'ɨ́jna. Jéihua pu huápɨ'ɨ ti'itɨj jɨ́n antiújmua'aree. Nain japua pu ajta huatátzareajraa íiyen chaanaca japua a'ɨ́jna jɨme'e tɨ tétaave'e á ru jetze. 2Aj pu 'i ca'anín jɨ́n huajíjhuaca'a ayén tɨjɨ́n: ―Pu'uri hui é'evatzɨjxɨ, pu'uri xaa hui é'evatzɨjxɨ a'ujna u Babilonia, ɨ́ chajta'a tɨ vivéjme. Mu'uri hui me'uun a'uchéjme a'ɨ́ɨme ɨ́ tiyaaru'u. Pu'uri ajta huá'achi'i pú'een ɨ́ xɨéjniu'ucari ɨ́ mej xána'avisi'i seijre'e. A'uu mú 'é'e á'aseca, matɨ́j mena'a pua'amé ɨ́ pina'ase ɨ́ mej xána'avisi'i seijre'e, ɨ́ tej caí a'atzu huá'axe'eve'e. 3’Ayee pu hui tiráaruu, a'iné a'ɨ́ɨ pu ca'aníjra'a hua'utá'a matɨ́j mena'a pua'amé ɨ́ mej seɨj chuéjra'a japua é'eme'ecan mej mi miyen che'atá mena'a a'ij pua'a huárɨni tɨ́j ajta huarɨ́j a'ɨ́jna ɨ́ Babilonia. A'ɨ́j pu hui jɨ́n Dios ayén che'atá na'a puaíjtzi tihua'utá'asin a'iné jé'ecan pu huápɨ'ɨ niu'ucamɨ'ɨ a'ɨ́jna ɨ́ Dios. A'ɨ́ɨme ɨ́ mej íiyen tí'aijta ɨ́ chaanaca japua, matɨ́j mena'a pua'amé jamuan huateújxana'acɨre. Majta a'ɨ́ɨme ɨ́ mej tí'itua'araca íiyen chaanaca japua, a'ɨ́ɨ mú hui meri huateújchijteaanitaca'a me'ɨ́jna jɨme'e mej jeíhua huápɨ'ɨ tí'inecua'atzeca'a mej huápɨ'ɨ tí'ijcha'ɨɨca a'ɨ́ɨme. ―Ayee pu tiu'utaxájtaca'a a'ɨ́jna ɨ́ tɨ ta japua tí'ivaɨre'e. 4Netɨ́'ɨj ni seɨ́j huánamuajri'i tɨ júte'e teje'icáxajtaca'a ayén tɨjɨ́n: ―Setá'aj hui se'uun huirácɨɨne mɨ sej neteɨ́testemua'a pú'een, sej si caí seajta siyen auté'ɨtzen tɨ́j a'ɨ́jna, tɨ ij caí puaíjtzi amuaatá'an ɨ́ Dios a'ij tɨ a'ɨ́ɨn raatá'asin a'ɨ́jna ɨ́ 'ɨ́ita'a. 5’Jee xaa, a'ɨ́jna ɨ́ tɨ jɨ́n ayén huarɨ́j, a'ɨ́ɨ pu hui ari nain jɨ́n auteájturaa ɨ́ Dios jemi. Pu'uri xáahuí ámitɨeere'e íjii u ta japua Dios tɨ é'eseijre'e. Ajta a'ɨ́ɨn Dios, a'ɨ́ɨ pu ari ra'utámua'areeri'i tɨ́j na'a tɨ jɨ́n a'ij pua'a ti'itiújcha'ɨɨ. 6’Ché'e ayén tí'iracɨ'ɨti tɨ́j ajta a'ɨ́ɨn puaíjtzi tihua'utá'a ɨ́ tɨ hua'utéemua'itɨ. Ché'e ajta hui hua'apua tiu'utanájchita tɨ́j na'a seɨ́j jɨme'e tɨ ayén huarɨ́j tɨ a'ij pua'a een. Ajta a'ɨ́ɨn ɨ́ vaasu tɨ jetzen raye'eca a'ɨ́jna tɨ jɨ́n huateújtɨmua'ira, ché'e hui ayén ra'avé'ejɨsten a'ɨ́jna jɨme'e ɨ́ tɨ hua'apua ará'ase ɨ́ tɨ jɨ́n huateátahuan. 7’A'ɨ́ɨ pu hui ahuáujtzaahua ruseɨ́j, ajta huataújseijrataca'a a'ɨ́jna jɨme'e tɨ jeíhua huápɨ'ɨ tí'ijcha'ɨɨca'a. Ché'e ruxɨ́'ej na'a tiráacɨ'ɨti tɨ́'ij rajpuaíitzi á'ara'ani, ajta tɨ huataújxɨeemɨste'en. Ayee pu hui ti'ixa ɨ́ ru tzajta'a tɨjɨ́n yee: “A'ɨ́ɨ pu a'ɨ́jna jɨ́n ti'itéjvee ɨ́ 'ɨ́ita'a tɨ tí'aijta, ajta ayén tɨjɨ́n tɨ caí ruseɨ́jtaca'a, tɨ caí ja'anáj ruxɨeemɨ́jte'e a'ame.” 8’A'ɨ́j pu hui jɨ́n ca'anacan japuan rávaɨjtzi seɨ́j xɨcaj jɨme'e tɨ rajpuaíitzi á'ara'ani. Aj pu xaa tijcuí'ini, ajta ruxɨeemɨ́jte'e a'ame. Ajta ayén tirajpuaíitzi a'ame tujri jɨme'e. Ajta huateáta'iri'ihua, a'iné jeíhua pu raayɨ́'ɨtɨ ɨ́ rumuárɨ'eri'ire'ara'an jɨme'e ɨ́ tavástara'a, a'ɨ́jna ɨ́ Dios tɨ ra'uxɨ́jte'en. ―Ayee pu tiu'utaxájtaca'a a'ɨ́jna ɨ́ ja'atɨ tɨ ta japua tí'ivaɨre'e. 9Ajta a'ɨ́ɨme ɨ́ tajtúhuaani ɨ́ mej tí'aijta íiyen chaanaca japua, ɨ́ mej majta jamuan huateújxana'acɨre, majta jamuan huateújchijteaanitaca'a, matɨ́'ɨj raaseíj a'utɨ́ é'ejcɨtziu a'ɨ́jna jɨme'e tɨ teátaasin, a'ɨ́ɨ mú ruyeinixɨ'ɨn, majta jíjhuan me'ɨ́jna jɨme'e ɨ́ chajta'a. 10Majta me'ɨ́n, á mú ɨmuá a'uhuístɨra'asin me'ɨ́jna jɨme'e mej rátziɨɨne'e ɨ́ tɨ jɨ́n rajpuaíitzi a'ame. Ayee mú ti'ixáata muá'aju'u tɨjɨ́n: ―Cui'i xaa, cui'i xaa, mú'ee mɨ hui pej chajta'a pú'een tɨ ve'ée, mɨ pej jeíhua ti'itɨj jɨ́n antí'amua'aree, mɨ pej hui Babilonia pú'een, seɨ́j xɨcaj pu jɨ́n ayén teja'uré'ene tɨ Dios ma'uxɨ́jte'e. 11- 12Majta a'ɨ́ɨme ɨ́ mej tí'itu'araca íiyen chaanaca japua, a'ɨ́ɨ mú majta ruyeinixɨ'ɨn, majta ruxɨeemɨ́jte'e muá'aju'u me'ɨ́jna jɨme'e ɨ́ chajta'a a'iné capu ché'e mé'e ja'atɨ tɨ tihuá'unanai ɨ́ mej tí'itua'araca ti'itɨ tɨ na'a mej tí'itɨcɨ, tɨ pua'a oro, nusu plata, na'ari tetej tɨ temua'a tí'ijnajche, ti'itɨ perla. Majta seica cɨ́ɨxuri tí'itua'araca. Capu ché'e ja'atɨ tihuá'ananairan ɨ́ tɨ tí'imesti, ɨ́ tɨ nacamua, tɨ ta'atí, tɨ pa'u. Camu majta ché'e huá'ananaira muá'aju'u ɨ́ cɨyej mej tu'araca tɨ jeíhua tí'ijnajche na'ari ti'itɨ cobre nusu tepúusti'i nusu a'ɨ́jna ɨ́ tetej ɨ́ mej racaamete, ɨ́ mej jɨ́n te'entámɨɨmɨte'en ɨ́ tepuaij na'ari ɨ́ chun. 13Camu majta ché'e miyen tihuá'ananairan ɨ́ mej cua'ira tijnájchite'en ti'itɨ tzencá, na'ari ti'itɨ tɨ na'a tɨ naa té'eeca nusu cuaane'e na'ari ti'itɨ mirra, na'ari cuaane'e tɨ cuaiina, ti'itɨ nahuáj, na'ari aceite, na'ari hariina tɨ rɨ́'en, ti'itɨ triigu, ajta ye'emuaate mej seijre'e huáacasi, na'ari cáne'axɨ, ajta cahuaayu'u. Ajta, a'ɨ́jna ɨ́ carreta mej ru'uve'ejáapuaj muá'aye'i ɨ́ cahuaayu'u, majta a'ɨ́mej ɨ́ mej ca'anéeri jɨ́n tí'imuarɨ'e ruxɨ́'ej teɨte jemi, camu mi ché'e tihuá'ananairan. 14Ayee pu teja'uré'ene a'ij tɨ ajmí'i té'eyu'usi'ihuaca'a ayén tɨjɨ́n: “A'ɨjna tɨ temua'a ti'irɨ́'een, ɨ́ pej huápɨ'ɨ raxɨ́'eve'eca'a, capu ché'e seíire'e a'ame mú'eetzi jemi. Ajta, naíjmi'i tɨ́j na'a tɨ huápɨ'ɨ tí'ijnajche, ajta tɨ naa seijre'e ɨ́ pej jɨ́n á'atzaahuate'e aseɨ́j, pepu'uri tejá'urɨe. Capej ché'e tí'ite'uuni.” 15Majta a'ɨ́ɨme ɨ́ mej tí'itu'araca, ɨ́ mej majta me'ɨ́jna jɨ́n huateújchijteaanitaca'a me'ɨ́jna jɨme'e mej tihuá'ananairaca'a, a'ɨ́ɨ mú a'ɨmuá huahuístɨra'asin, me'ɨ́jna jɨme'e mej rátziɨɨne'e muá'aju'u tɨ Dios puaíjtzi raatá'a. Maújyeinixɨ'ɨn, majta ca'anín jɨ́n huataújxɨeemɨste'esin. 16Ayee mú ti'ixáata muá'aju'u tɨjɨ́n: ―Cui'i xaa, cui'i xaa, mú'ee pej chajta'a pú'een, tɨ ve'ée, ɨ́ pej pe'ɨ́jna ti'itéchejca'a ɨ́ tɨ mesti tɨ naa 'een, pajta pe'ɨ́jna jɨme'e tɨ nacamua, pajta ɨ́ tɨ pa'u jɨme'e, ɨ́ pej ucá'arujti'iri'i pe'ɨ́jna ɨ́ tɨ oro jɨ́n taavíjhua, pajta pe'ɨ́jna jɨme'e ɨ́ tetej tɨ huápɨ'ɨ tí'ijnajche, pajta pe'ɨ́jna jɨme'e ɨ́ perla ti'itɨ. 17’Seɨ́j hora pu hui jɨ́n, naíjmi'i tiu'uré'axɨ tɨ́j na'a tɨ huápɨ'ɨ tí'ijnajcheca'a. Majta a'ɨ́ɨme ɨ́ mej ramɨ́jhuaca me'ɨ́jna ɨ́ baarcu, majta a'ɨ́ɨme ɨ́ mej tí'imɨjhuaca me'ɨ́jna jetze ɨ́ baarcu ɨ́ mej é'ecɨɨne ɨ́ jaj japua, majta naíjmi'i ɨ́ mej hua'ité vivi'i, a'úu mú ɨmuá huahuístɨraa. 18Matɨ́'ɨj raaseíj me'ɨ́jna ɨ́ cɨtzij tɨ ajtiɨ́'ɨmua ájcɨtziujtaca'a, tɨ té'ajtaiira ɨ́ chajta'a, matɨ́'ɨj mi huateújyeineajraa. Miyen tɨjɨ́n: ―¿Ti'itájni máa chajta'a seijre'eca'a tɨ́j amɨjna? Capu hui mé'e é'e chajta'a. 19Matɨ́'ɨj mi ti'itɨ avá'ujratziiraxɨ ti'itɨ tɨ muiini ɨ́ rumu'úu jetze, mej ruyein, majta ruxɨeemɨ́jte'e. Ayee mú tí'itejijhuaca'a tɨjɨ́n: ―Cui'i xaa, cui'i xaa, mú'ee hui chajta'a tɨ ve'ée, a'iné mú'eetzi mú jetze huateújchijteaanitaca'a matɨ́j mena'a pua'amé mej tihuá'a'aijte'eca'a a'ɨ́mej ɨ́ mej baarcu jetze antacɨ'ɨca ɨ́ jaj japua. A'ɨ́ɨ mú hui jɨ́n huateújchijteaanitaca'a me'ɨ́jna jɨme'e pej jeíhua huápɨ'ɨ tí'ijcha'ɨɨca'a. ―Ayee mú tiu'utaxájtaca'a a'ɨ́ɨme ɨ́ teɨte. 20Seajta mú'een, mɨ sej ta japua é'eseijre'e, setá'aj huataújtemua'ave'en, seajta mú'een, mɨ sej rɨ́'ɨ tí'iteseijre'e ɨ́ Dios jemi, seajta mú'een, mɨ tɨ Dios amua'antíhua'u, sej si'i tihua'utá'ixaate'en ɨ́ teɨte, seajta mú'een, mɨ sej Dios jetze me'ecan tí'ixaxa'ata'a. Setá'aj huataújtemua'ave'en se'ɨ́jna jɨme'e tɨ Dios ayén tejámuaaxɨ́'epɨ'ɨntari'iri'i a'ɨ́jna jɨme'e tɨ ra'uxɨ́jte a'ɨ́jna ɨ́ 'ɨ́ita'a. 21Aj pu 'i seɨj tɨ ta japua tí'ivaɨre'e, tɨ ajta jeíhua huápɨ'ɨ ruca'ané, a'ɨ́ɨ pu tetej ájtɨɨ tɨ ayén seijre'eca'a tɨ́j a'ɨ́jna ɨ́ mej jɨ́n te'á'atɨ'ɨxɨca. Aj pu 'i ra'ateájrɨe ɨ́ jaj tzajta'a tɨ ve'ée. Ayee pu tiu'utaxájtaca'a tɨjɨ́n: ―Ayee pu hui che'atá na'a éeni'icɨ'e raaté'uuna a'ɨ́jna ɨ́ chajta'a tɨ ve'ée, tɨ ayén téja'arájtehuaa tɨjɨ́n Babilonia. Capu ché'e mé'e é'e seíire'e a'ame. 22’Camu ché'e miyen namuáare'e muá'aju'u a'ɨ́ɨme ɨ́ mej tí'icuinaca a'ɨ́jna jetze ɨ́ aarpa nusu a'ɨ́ɨme ɨ́ mej tí'icuinaca ruchuicari jɨme'e. Camu hui majta namuáare'e muá'aju'u mú'ejmi jemi a'ɨ́ɨme ɨ́ mej tí'icɨ'ɨsite'e cɨ́'ɨsiti'ira'a jetze na'ari a'ɨ́ɨme ɨ́ mej ucáaji'ihua muá'aye'i ɨ́ trompeeta jetze. Majta a'ɨ́ɨme ɨ́ mej tí'imɨjhuaca, matɨ́j mena'a pua'améca, a'ij mej mena'a tiraayɨ́'ɨtɨ, camu hui ché'e mú'ejmi jemi seíire'e muá'aju'u. Camu xaa ne'u a'atzu. Camu majta ché'e namuáare'e muá'aju'u a'ɨ́ɨme ɨ́ mej té'atɨxɨca. 23’Ajta, capu hui ché'e a'atáa a'ame mú'ejmi jemi ɨ́ taij tɨ huatátza á'aye'i ɨ́ huá'achi'i tzajta'a. Capu ajta ché'e ayén namuáare'e a'ame mej xahuaani'i jɨ́n tiu'utaxáj a'ɨ́ɨme ɨ́ mej mauchén huanéjne'ɨcheca'a, ajta mej mauchén huáviɨche, a'iné a'ɨ́ɨme ɨ́ mej mú'ejmi jemi tí'itu'araca'a, a'ii mú me'ɨ́n pú'eene'e ɨ́ mej yen japuan seijre'eca'a ɨ́ chaanaca, ɨ́ mej majta vivejmé'en jɨ́n títetaté'eca'a. Pajta piyen tihuá'ucuanamua matɨ́j mena'a pua'amé ɨ́ mej seɨj chuéjra'a japua é'eme'ecan pe'ɨ́jna jɨme'e pej piyen huatá'aseijrataca'a pej huápɨ'ɨ naa seijre'e a'ɨ́mej jemi mej mi miyen huárɨni tɨ a'ij pua'a een ɨ́ Dios jemi. 24A'ii pu ajta a'ɨ́ɨn pú'een tɨ huá'ucuii naíjmi'ica a'ɨ́mej ɨ́ mej Dios jetze me'ecan tí'ixaxa'ata'a, majta a'ɨ́mej ɨ́ mej rɨ́'ɨ tí'iteseijre'eca'a ɨ́ Dios jemi. Jee xaa ne'u, a'ɨ́ɨ pu huá'ucuii matɨ́j mena'a pua'amé huácuiihuaca'a íiyen chaanaca japua, tɨ́j na'a jéjcua ɨmuá, tɨ ajta íjii.

will be added

X\