Apocalipsis 15

1Netɨ́'ɨj ni neajtahua'a seɨ́j huaseíj ɨ́ tɨ ta japua jeíhua ruxe'eve'e. Jé'ecan nu rɨ́'ɨ tira'utaseíj. A'ii mú a'ɨ́ɨn pú'een ɨ́ mej tí'ivaɨre'e u ta japua, ɨ́ mej aráhua'apua ará'ase. A'ɨ́j mú jɨ́n antiújmua'aree me'ɨ́jna jɨme'e ɨ́ puaíjtzi ɨ́ tɨ ayén ará'ase a'achú cumu aráhua'apua. A'ii pu a'ɨ́ɨn pú'een ɨ́ tɨ nain jɨ́n te'entipuá'ajte ɨ́ tɨ jɨ́me'en Dios ayén puaíjtzi hua'utá'asin a'ɨ́jna jɨme'e tɨ huápɨ'ɨ niu'ucamɨ'ɨ. 2Netɨ́'ɨj ni ti'itɨ huaseíj. Naa pu tí'imesti. Aa pu a'umuáanijme'ecaa, cu xɨee viidrio na'a, taij tɨ tzajta'an seijre'e. Majta a'ɨ́ɨme ɨ́ mej raatéemua'itɨ me'ɨ́jna ɨ́ tevi tɨ huápɨ'ɨ tesi'ire'e, majta ɨ́ tevi tɨ ravaɨre'e, majta ɨ́ tɨ jɨ́n ti'itɨée á'aye'i ɨ́ tɨ jɨ́n ayén ántehuaa, a'úu mú huaté'uuca'a a'utɨ́ e'eve'e'ástɨme a'ɨ́jna ɨ́ viidrio tɨ amuáanijmee. A'ɨ́ɨ mú te'ité'ɨ'ɨca'a rumuájca'a jetze me'ɨ́jna ɨ́ aarpa tɨ Dios hua'utapuaíjve mej mi me'ɨ́jna jɨ́n tiu'utácuiina ɨ́ amɨ́n. 3Majta miyen me'ɨ́jna jɨ́n tí'ichuiicaca'a me'ɨ́jna jɨme'e a'ij tɨ huarɨ́j a'ɨ́jna ɨ́ Moisés tɨ tí'ivaɨre'eca'a ɨ́ Dios jemi, majta me'ɨ́jna jɨme'e a'ij tɨ huarɨ́j ɨ́ Cáne'a. Miyen tɨjɨ́n: Jé'ecan pej huápɨ'ɨ rɨ́'ɨ naa huarɨ́j patɨ́'ɨj tu'irájtuaa mú'ee, tavástara'a, mɨ pej Dios pú'een, pej pajta nain jɨ́n antí'amua'aree. A'ɨ́j tu jɨ́n rɨ́'ɨ te'utaseíj. Tɨ́j na'a a'ij pej rɨcɨ, xɨ́'epɨ'ɨn pej rɨcɨ, pajta tzáahuati'ira'a jɨ́n raaxɨ́'epɨ'ɨntare'e, mɨ pej piyen tí'aijta tɨ́j na'a tɨ yú auca'itɨ́ a'ame tɨ́j na'a rusén jɨme'e. 4Naími'i mú miyen rɨ́'ɨ timuaateájtuaani, majta rɨ́'ɨ timuaatá'asin, mú'eetzi, mɨ pej tavástara'a pú'een, a'iné mú'ee pej aseɨ́j rɨ'éene'ecán jɨ́n seijre'e ɨ́ Dios jemi. Naíjmi'i ɨ́ mej seɨj chuéjra'a japua é'eme'ecan, a'ɨ́ɨ mú a'uvé'eju'u muá'aju'u mej mi muaateánajche, a'iné pepu'uri tíhua'utaseíjrate pej piyen xɨ́'epɨ'ɨn huarɨ́j a'ij tɨ tiraavíjte'e. 5Netɨ́'ɨj ni atáneereca'a tɨ pua'a ari te'entácuuni'i u teyujta'a a'u tɨ e'irácatii a'ɨ́jna ɨ́ tɨ te'anxájta a'ɨ́jna jɨme'e ɨ́ Dios. 6Matɨ́'ɨj mi me'uun a'iráacɨ u teyujta'a a'ɨ́ɨme ɨ́ mej ta japua tí'ivaɨre'e ɨ́ mej aráhua'apua ará'ase. Mu'uri ráatɨsime'e ɨ́ puaíjtzi ɨ́ tɨ ajta aráhua'apua ará'ase. Cɨ́ɨxuri mú majta ti'itechée tɨ mé'e ti'itetáatɨye'i temua'a naa. Majta mú avé'ejɨ'ɨcɨ'ihuajme'ecaa án rútaviitze'e puaasi jɨme'e tɨ oro jɨ́n taavíjhua. 7Ajta seɨj ɨ́ mej muáacua ɨ́ mej ruuri, a'ɨ́ɨ pu hua'uré'e'ɨ'ɨpɨ'ite a'ɨ́mej ɨ́ mej aráhua'apua ará'ase a'ɨ́jna ɨ́ tuxa'a ɨ́ tɨ avé'ejɨstijmee ɨ́ tɨ jɨ́n huápɨ'ɨ niu'ucamɨ'ɨ ɨ́ Dios ɨ́ tɨ i'irúuri rusén jɨme'e. Seɨj ajta seɨj pu hua'uré'e'ɨ'ɨpɨ'ite a'ɨ́jna ɨ́ tuxa'a. 8Aj pu 'i temua'a téjcɨtziujtareca'a u teyujta'a a'ɨ́jna jɨme'e ɨ́ muárɨ'eri'ire'ara'an ɨ́ Dios. Ajta, jeíhua pu huápɨ'ɨ huatátzareajraa. Aj pu 'i temua'a te'uhuájɨsteca'a u teyujta'a a'ɨ́jna ɨ́ cɨtzij. Capu ché'e huatárɨ'ɨristareca'a tɨ seɨj a'uun a'uteárute u teyujta'a ajta mena'a caí ra'antipuá'ajte'en ɨ́ mej aráhua'apua ará'ase mej puaíjtzi hua'utá'an ɨ́ tɨ ajta aráhua'apua ará'ase.

will be added

X\