1 Ajta a'ɨ́ɨn ɨ́ cu'ucu'u, a'ɨ́ɨ pu a'uun a'utéechaxɨ ja'apuaíri japua, a'u tɨ e'eve'e'ástɨme ɨ́ jaj tɨ ve'ée. Netɨ́'ɨj ni ja'atɨ tɨ huápɨ'ɨ á'atesi'ire'e huaseíj. A'ɨ́ɨ pu ɨ́ jaj tzajta'a tɨ ve'ée a'itamé'eca'a. Tamuáamuata'a pua'améca pu ave'ehuájmee, ajta arahua'apuáca huíjmu'uu. Curuun pu te'uteárújti'ihuaca'a ɨ́ ru'e'ehuáj jetze seɨj ajta seɨj, ajta ayée pu té'eyu'usi'i a'ɨ́jna jetze ɨ́ mu'úura'an a'ij tɨ ántehuaa tɨ a'ij pua'a namuajre'e ɨ́ Dios jemi. 2 Ayee pu seijre'eca'a a'ɨ́jna ɨ́ ti'itɨ ɨ́ nej raaseíj. Ayee pu éene'e seijre'eca'a tɨ́j jɨ́ripu. Ayee pu éene'e ti'ɨ́ɨcajme tɨ́j juutze'e. Ayee pu ajta 'een anténi tɨ́j muajye. Ajta a'ɨ́ɨn ɨ́ cu'ucu'u, a'ɨ́ɨ pu nain raatátui a'ɨ́jna ɨ́ ti'itɨ ɨ́ rumuárɨ'eri'ire'ara'an, ajta tɨ́j na'a tɨ jɨ́n tí'aijta, ajta ɨ́ tɨ jɨ́n jeíhua antiújmua'aree. 3 Cu xɨee ti'ipuaíjti'ihuaca'a seɨj ɨ́ mu'úura'an tɨ́'ij huámɨ'ɨni. Ajta, ajtahua'a pu huarúj a'ɨ́jna ɨ́ tɨ ti'ipuaíjti'ihuaca'a. A'ɨ́j pu jɨ́n naíjmi'i matɨ́j mena'a mej yen huachéjme íiyen chaanaca japua, jé'ecan mú rɨ́'ɨ tira'utaseíj, majta ra'ará'astijre me'ɨ́jna ɨ́ ti'itɨ. 4 Majta me'ɨ́n ɨ́ teteca, a'ɨ́ɨ mú raateánajcheca'a me'ɨ́jna ɨ́ cu'ucu'u a'iné pu'uri a'ɨ́ɨn cu'ucu'u raatátui a'ɨ́jna ɨ́ ti'itɨ tɨ huápɨ'ɨ á'atesi'ire'e ɨ́ tɨ jɨ́n antiújmua'aree. Majta me'ɨ́n teɨte raateánajcheca'a me'ɨ́jna ɨ́ ti'itɨ. Ayee mú tɨjɨ́n: ―¿A'ataani ayén 'een tɨ́j amɨjna mɨ ti'itɨ? ¿A'iné auj tí'irɨ'ɨri tɨ ja'atɨ raaténe'usi'ite'en tɨ ij raatémua'itɨn? Capu xaa ne'u ja'atɨ. ―Ayee mú tiu'utaxájtaca'a. 5 Ca'aníjra'a pu raatá'a tɨ́'ij á'ujtzaahuate'e huápɨ'ɨ ɨ́ Dios jemi. Ayee pu tiraatá'a tɨ ayén á'ateevi'in tɨ a'ɨ́jna jɨ́n antiújmua'areere tɨ jeíhua huápɨ'ɨ a'ij pua'a tí'ixajta. Ayee pu á'ateere a'achú cumu hua'apuate máxcɨra'i japuan hua'apua. 6 Aj pu 'i a'utéjche tɨ a'ij pua'a tí'ixajta ɨ́ Dios jemi a'ɨ́jna jɨme'e tɨ ruseɨ́j ayén huaújruu tɨ́j ɨ́ Dios. Jé'ecan pu a'ij pua'a tirá'ixaa a'ɨ́jna ɨ́ Dios, ajta a'ɨ́mej ɨ́ mej a'uun é'eseijre'e ɨ́ Dios jemi u ta japua. A'ɨ́ɨ mú tí'ivaɨre'e matɨ́j chi'ira'an ɨ́ tɨ tzajta'an seijre'e ɨ́ Dios. 7 Ajta a'ɨ́ɨn ɨ́ cu'ucu'u, a'ɨ́ɨ pu ca'aníjra'a raatá'a tɨ́'ij hua'uténe'usi'ite'en a'ɨ́mej ɨ́ mej rɨ́'ɨ tí'iteseijre'e ɨ́ Dios jemi. Ajta ayén tiraatá'a tɨ́'ij hua'utémua'itɨn. Ayee pu ajta tiraatá'a tɨ a'ɨ́jna jɨ́n antiújmua'areere tɨ́'ij tíhua'uta'aíjte'en matɨ́j mena'a pua'amé yen seijre'e íiyen chaanaca japua, a'ɨ́ɨme teɨtejra'a, matɨ́j mena'a mej seɨ́j jetze airaújneijte majta a'ɨ́ɨme ɨ́ mej seɨj chuéjra'a japua é'eme'ecan, tɨ́j na'a ɨ́ tɨ seijre'e ɨ́ hua'aniuuca. 8 Matɨ́j mena'a pua'amé íiyen huachéjme ɨ́ chaanaca japua, a'ɨ́ɨ mú raná'amiche'e muá'aju'u, matɨ́j mena'a ɨ́ mej caí é'eyu'usi'ihuaca'a ɨ́ yu'uxari jetze ɨ́ tɨ ra'áa a'ɨ́jna ɨ́ Cáne'a ɨ́ tɨ huamé'ere tɨ́'ɨj caí xɨ huataseíjre ɨ́ chaanaca. A'ɨjna ɨ́ yu'uxari, a'ii pu a'ɨ́ɨn pú'een tɨ jetzen té'eyu'usi'i a'ij tɨ ántehuaa seɨj ajta seɨj matɨ́j mena'a pua'amé ruuri huateáturaa jemin ɨ́ Cáne'a tɨ́j na'a rusén jɨme'e. 9 Tɨ pua'a ja'atɨ huiteájnamua, ché'e a'ɨ́ɨn temua'a naa tiráanamua. 10 Tɨ pua'a pɨ́ti'ihuáujxɨ'epɨ'ɨntare'en, mej seɨ́j huateví'iran mej ra'iteáanan, a'ɨ́ɨ mú xaa raatévi'ira. Tɨ pua'a ja'atɨ titéecui'ini chun jɨme'e, ayée pu tiú'ujxe'eve'e tɨ ayén che'atá a'ɨ́jna jɨ́n tiú'umɨ'ɨni. Ayee pu Dios ayén tihua'utajé a'ɨ́mej ɨ́ mej rɨ́'ɨ tí'iteseijre'e ɨ́ jemin mej mi te'utáviicua'i, mej mi majta rá'atzaahuate'e. 11 Netɨ́'ɨj ni seɨ́j huaseíj ɨ́ ti'itɨ tɨ a'itanej á chuaata'a. Hua'apuaca pu ave'ehuájmee tɨ́j cáne'a. Ayee pu ajta tí'ixaxa'a tɨ́j ɨ́ cu'ucu'u. 12 A'ɨ́ɨ pu ra'ará'astijre a'ɨ́jna jetze me'ecan ɨ́ ti'itɨ ɨ́ ta'amuájca tɨ́j na'a ɨ́ tɨ jɨ́n antiújmua'aree. Ayee pu ca'anéeri jɨ́n tihuá'aijte'e matɨ́j mena'a mej íiyen seijre'e chaanaca japua mej mi raateánajche me'ɨ́jna ɨ́ ta'amuájca tɨ huarúj ɨ́ tɨ ti'ipuaíjti'ihuaca'a a'ɨ́jna jɨme'e ɨ́ tɨ huamɨ́'ɨ. 13 Ayee pu tí'imɨjhuaca a'ɨ́jna ɨ́ tɨ ravaɨre'e mej mi ti'itɨj jɨ́n rɨ́'ɨ tira'utaseíj. Jee xaa, ne'u, ayée pu tiraayɨ́'ɨtɨ tɨ taij u e'icájrɨeni u júte'e, mejseíiraca'a ɨ́ teɨte. 14 A'ɨ́ɨ pu huá'acuanamua ɨ́ teɨte ɨ́ mej yen seijre'e íiyen chaanaca japua a'ɨ́jna jɨme'e tɨ ca'aníjra'a ratá'aca tɨ ayén huárɨni a'ɨ́jna jetze me'ecan ɨ́ ta'amuájca. Aj pu 'i ayén tihua'u'íjca mej mi ratetáahuan ti'itɨ tévira'a tɨ ayén seijre'e tɨ́j a'ɨ́jna ɨ́ ti'itɨ ta'amuájca, a'ɨ́jna ɨ́ tɨ tiu'upuáijti'ihuaca'a a'ɨ́jna jɨme'e ɨ́ chun, ajta a'ɨ́jna ɨ́ ti'itɨ tɨ huarúj. 15 Ajta a'ɨ́ɨn ɨ́ ta'amuájca, ayée pu ajta tiraatá'a a'ɨ́jna ɨ́ tɨ ravaɨre'e tɨ́'ij xɨéjniu'ucari raatátɨsten a'ɨ́jna ɨ́ ti'itɨ tévira'a tɨ́'ij tiu'utaxáj. Ayee pu ajta tiraatá'a tɨ a'ɨ́jna jɨ́n antiújmua'areere tɨ ayén tíhua'uta'aíjte'en mej raajé'ica ja'atɨ tɨ na'a ɨ́ tɨ caí á'ujca'ane tɨ raateánajche a'ɨ́jna ɨ́ ti'itɨ tévira'a. 16 A'ɨ́ɨ pu ajta tihuá'aijte'e mej mi anaújyu'uxaxɨ'ɨn ɨ́ rumuájca'a jetze na'ari mej araujyú'uxaxɨ'ɨn ɨ́ rucuaatzi jetze naíjmi'i ɨ́ teɨte. Capu tíhua'utá'uuni'ira tɨ pua'a ja'atɨ ayén cɨ́lieen jɨ́n ti'itéjvee nusu ve'ecán jɨ́n ti'itéjvee, tɨ pua'a chíjteaani pú'een nusu caí a'ij tí'ijviicua'i. Capu ajta tɨ pua'a miyen ruxɨéehua á'ujujhua'ane'en na'ari mej ca'anéeri jɨ́n tí'imuarɨ'e. 17 Tɨ pua'a caí ja'atɨ é'eyu'usi'ihua a'ij tɨ ántehuaa a'ɨ́jna ɨ́ ti'itɨ na'ari ɨ́ tɨ jɨ́n tí'itɨej, capu rɨ'ɨríista a'ame tɨ a'ɨ́jna ɨ́ ja'atɨ ti'itɨ huánanan. Capu ajta rɨ'ɨríista a'ame tɨ ti'itɨ huátuaani. 18 A'ɨ́j pu jɨ́n, ayén tiú'ujxe'eve'e tɨ ja'atɨ rɨ́'ɨ mé teuúmua'aree. Ché'e a'ɨ́ɨn yaú'itɨée á'ara'ani a'ij tɨ huataújmua'a a'ɨ́jna ɨ́ tɨ jɨ́n tí'itɨej a'ij tɨ ántehuaa a'ɨ́jna ɨ́ ti'itɨ. A'ɨjna ɨ́ tɨ jɨ́n tí'itɨej, a'úu pu a'uvé'emej a'ɨ́mej tzajta'a ɨ́ teteca. Ayee pu tí'itɨej a'achú arájsevi sieentu japuan huaícate japuan arájsevi.
