Apocalipsis 12

1Aj pu 'i ti'itɨ huataseíjre u júte'e ɨ́ nej jɨ́n rɨ́'ɨ te'utaseíj. 'Ɨ́ita'a pu seijre'eca'a tɨ ayén éene'en ti'itéchejca'a cɨ́ɨxuri jɨme'e tɨ naa ti'itetáatɨye'i tɨ́j ɨ́ xɨcaj. Ajta máxcɨra'i japua újveeca'a a'ɨ́jna ɨ́ 'ɨ́ita'a. A'ɨ́ɨ pu curuun ajta u'uteárujte'ecaa tɨ jetzen seijre'eca'a ti'itɨ cumu xu'ura'ave. Ayee mú ará'aseca'a a'achú cumu tamuáamuata'a japuan hua'apua. 2Pu'uri autájucaca'a, ajta ruyeineca'a a'ɨ́jna jɨme'e tɨ rá'acui'icaa a'iné pu'uri tɨ́n tiyaúj a'ame. 3Ajtahua'a seɨj huataseíjre. Me'ecui xaa, a'ɨ́jna ɨ́ cu'ucu'u ɨ́ tɨ pa'u, ɨ́ tɨ vivéj. Arahua'apuáca pu huíjmu'uu, ajta tamuáamuata'a ave'ehuájmee. A'ɨ́ɨ pu ajta ru'uteárujte'ecaa ɨ́ curuun ɨ́ tɨ aráhua'apua. 4Ajta, rucuasi pu jɨ́n hua'aré'ana je'icáca a'ɨ́mej ɨ́ xu'ura'ave ɨ́ mej júte'e é'eseijre'e. Aj pu 'i hua'ajájpuaca'a. Aj pu 'i huaje'icáahua'axɨ íiyen chaanaca japua. Ajta a'ɨ́ɨn ɨ́ cu'ucu'u, áa pu vejli'i jemin a'utéechaxɨ a'ɨ́jna ɨ́ 'ɨ́ita'a tɨ ari tɨ́n tiyaúj a'ame tɨ́'ij raatécɨ'ɨme tɨ́'ɨj huanú'ihua ɨ́ uneeca'i. 5Aj pu 'i tiyaúj já'araa, teáatacan. A'ii pu a'ɨ́ɨn pú'een tɨ ca'anéeri jɨ́n tíhua'uta'aíjte'esin matɨ́j mena'a pua'amé ɨ́ mej chaanaca japua é'eme'ecan. Ajta a'ɨ́ɨn uneeca'i, Dios pu ya'uví'itɨ u ta japua a'u tɨ é'eseijre'e ɨ́ ɨpuari tɨ japuan acájca ɨ́ Dios. 6A'ɨjna ɨ́ 'ɨ́ita'a, áa pu huataúruu a'ujna pújme'en a'u tɨ caí é'e ja'atɨ, a'u tɨ ajta Dios rɨ́'ɨ yá'uruurijtze. A'uu pu á'ateeri a'achú cumu seivi'ira'a japuan tamuáamuata'ate japuan huaícate xɨcaj. Ajta a'ɨ́ɨn ɨ́ Dios, a'ɨ́ɨ pu racha'ɨ́ɨ a'ame. 7Matɨ́'ɨj mi autéjhuii mej huaténe'use'en ɨ́ ta japua. A'ɨjna ɨ́ Miguel, majta ɨ́ mej jamuan tí'ivaɨre'eca'a, a'ɨ́ɨ mú rané'usi'ite'eca'a me'ɨ́jna ɨ́ cu'ucu'u, majta me'ɨ́jna ɨ́ mej ravaɨre'eca'a ɨ́ cu'ucu'u. 8Matɨ́'ɨj mi hua'utéemua'itɨ me'ɨ́jna ɨ́ cu'ucu'u, majta a'ɨ́mej ɨ́ mej ravaɨre'eca'a. Capu ché'e hua'utá'a mej me'uun a'uté'uuca'a u ta japua. 9Matɨ́'ɨj mi ye'icájrɨe me'ɨ́jna ɨ́ cu'ucu'u tɨ vivéj, a'ɨ́jna ɨ́ cu'ucu'u tɨ jéjcua ɨmuá seijre'eca'a, a'ɨ́jna ɨ́ tej tiyen ratamuá'amua tɨjɨ́n tiyaaru'u, teajta ɨ́ tej tiyen ratamuá'amua tɨjɨ́n Satanás. A'ii pu a'ɨ́ɨn pú'een a'ɨ́jna ɨ́ tɨ huá'acuanamua matɨ́j mena'a pua'amé yen seijre'e íiyen chaanaca japua. Aj mú mi aye'icájrɨe íiyen chaanaca japua, jamuan ɨ́ mej ravaɨre'eca'a. 10Netɨ́'ɨj ni ráamua'areeri'i tɨ ja'atɨ a'uun ta japua a'utéveeca'a. Tɨ'ɨquí ca'anín jɨ́n tiu'utaxájtaca'a ayén tɨjɨ́n: ―Pu'uri hui xaa ayén teja'uré'ene tɨ a'ɨ́ɨn ɨ́ taDioj ari hua'irájtuaa a'ɨ́mej ɨ́ mej rá'astijre'e. Pu'uri nain jɨ́n antiújmua'aree tɨ ij tíhua'uta'aíjte'en naíjmi'ica tɨ́j na'a rusén jɨme'e. Pu'uri hui nain jɨ́n tira'íjca a'ɨ́jna ɨ́ Cɨríistu'u tɨ ari ra'antíhua'u, a'iné pu'uri ya'ucájrɨe a'ɨ́jna tɨ tihuá'axajtzi'i ɨ́ ta'ihuaamua'a. Nain xɨcaj tzajta'a, ajta nain tɨ́ca'ari tzajta'a, a'ɨ́ɨ pu hui ayén tihuá'axajtzi'i a'ɨ́jna jemi ɨ́ Dios. 11’Majta me'ɨ́n ɨ́ ta'ihuaamua'a, a'ɨ́ɨ mú me'ɨ́jna jɨ́n ra'antimuá'itɨ me'ɨ́jna jɨme'e tɨ a'ɨ́ɨn Cáne'a ra'iráaxɨre ɨ́ ruxuure'e tɨ́j muaɨ'ɨvéjri ɨ́ Dios jemi, majta mú ra'antimuá'itɨ me'ɨ́jna jɨme'e mej miyen tihua'utá'ixaate'eca'a a'ɨ́jna jɨme'e ɨ́ niuucari ɨ́ tɨ jɨ́me'en raxa ɨ́ Cɨríistu'u. Camu a'atzu raatéxɨeehuataca'a mej rá'astijre'e. Capu amɨ́n a'ij tɨ pua'a ja'atɨ ayén huá'aneeche tɨ huá'ucui'ini. Maúche'e mú rá'aviicua'i. 12’Setá'aj siyen huaújtemua'ave'en mɨ sej seyun seijre'e ta japua, seajta mú'een, mɨ sej seyun tí'ivaɨre'e. Seajta mú'een, mɨ sej seyun huachéjme se'újna chaanaca japua, seajta mú'een, mɨ sej se'uun a'uté'uuca'a ɨ́ jaj japua, cui'i xaa, a'iné mú'ejmi jemi ari huataseíjre a'ɨ́jna ɨ́ tiyaaru'u. Ajta í'iniu'ucamɨ'ɨ huápɨ'ɨ a'iné pu'uri ramua'aree tɨ caí ché'e á'ateeri, a'iné Dios pu'uri ra'iteánajsin. ―Ayee pu tiu'utaxájtaca'a a'ɨ́jna ɨ́ Dios. 13Ajta a'ɨ́ɨn ɨ́ cu'ucu'u, tɨ́'ɨj ráamua'areeri'i tɨ a'uun é'ejve ɨ́ chaanaca japua, aj pu 'i raatavén a'ɨ́jna ɨ́ 'ɨ́ita'a ɨ́ tɨ tiyaúj já'araa. 14Ajta Dios pu ayén tiraatá'a a'ɨ́jna ɨ́ 'ɨ́ita'a tɨ ráavaɨre'en tɨ́'ij ca'anacan tícheni a'u tɨ a'ij éene'e a'ɨ́jna jemi ɨ́ cu'ucu'u. Ajta Dios pu ti'ijmícua a'ame. Aj pu 'i a'uun a'ará'a a'u tɨ caí é'e ja'atɨ, a'u tɨ ajta Dios rɨ́'ɨ tiyá'uruurijtze. A'uu pu á'ateeri a'achú cumu huaíca nine'ira'a japuan já'ita'a. 15Aj pu 'i a'ɨ́ɨn cu'ucu'u jeíhua jaj aijxɨ́re án ruténe'etze'e tɨ́'ij ya'ujaújte'en, ajta rá'ujamɨste'en a'ɨ́jna ɨ́ 'ɨ́ita'a. 16Ajta a'ɨ́ɨn ɨ́ chuej, a'ɨ́ɨ pu raatévaɨ a'ɨ́jna jɨme'e tɨ a'utátzi'ite tɨ́'ij ateárute ɨ́ jaj, ɨ́ tɨ ra'ijxɨ́re ɨ́ cu'ucu'u án ruténe'etze'e. 17Aj pu 'i a'ɨ́ɨn cu'ucu'u raatájaaxɨejvi'iri'i a'ɨ́jna ɨ́ 'ɨ́ita'a. Ajta á'uraa. Aj pu 'i a'utéjche tɨ hua'uténe'usi'ite'en a'ɨ́mej ɨ́ seica, ɨ́ mej yaújmua'ame'en pú'een a'ɨ́jna ɨ́ 'ɨ́ita'a. A'ii mú a'ɨ́ɨn pú'een ɨ́ mej miyen rá'astijre'e a'ij tɨ tihuá'aijte'e ɨ́ Dios, ɨ́ mej majta te'anxájta me'ɨ́jna jɨme'e ɨ́ Jesús.

will be added

X\