Apocalipsis 10

1Netɨ́'ɨj ni neajtahua'a seɨ́j huaseíj tɨ tí'ivaɨre'e u ta japua. Jé'ecan pu ruca'ané a'ɨ́jna, ajta júte'e pu ve'ecáme'ecaa. Jaitɨri pu racánajca'a, ajta cu'uxaí ataviɨ́jca'a ɨ́ mu'úura'an jetze. Ayee pu té'ajtaave'e ɨ́ néerime'ara'an tɨ́j ɨ́ xɨcaj, ajta ayén seijre'eca'a ɨ́ ɨɨcájra'an tɨ́j ti'itɨ tɨ teátaasin. 2A'ɨ́ɨ pu ru'itépijcaa ɨ́ rumuájca'a jetze ɨ́ yu'uxari tɨ cɨ́lieen. Pu'uri autácuuri'ihuaca'a. Aj pu 'i e'era'ɨ́ɨcataca'a ɨ́ jaj japua ɨ́ tɨ ve'ée a'ɨ́jna jɨme'e ɨ́ ru'ɨ́ɨca rurɨ'ɨríinta'a pújme'en. A'ɨ́ɨ pu ajta e'era'ɨ́ɨcataca'a ɨ́ chuej japua ɨ́ seɨ́j jɨme'e ɨ́ ru'ɨ́ɨca ru'úutata'a pújme'en. 3Aj pu 'i ca'anín jɨ́n huajíjhuaca'a. Ayee pu namuajre'eca'a tɨ́j muajye tí'iji'ihuaca. Jɨ́me'en pu'u ayén tiu'ujíjhuaca'a, matɨ́'ɨj mi huatéeniu a'ɨ́ɨme ɨ́ mej aráhua'apua ará'ase. 4Matɨ́'ɨj miyen huatéeniu, nee nu ra'ayú'uxaache'e. Neajta á'iyen ráanamuajri'i ɨ́ ja'atɨ tɨ júte'e neja'utajé ayén tɨjɨ́n: ―Patá'aj rú'umua'areere a'ij mej tiu'utaxájtaca'a ɨ́ mej huatéeniu a'ɨ́ɨme ɨ́ mej aráhua'apua ará'ase. Capej rá'ayu'uxa. 5- 6Ajta a'ɨ́ɨn ɨ́ tɨ ta japua tí'ivaɨre'e ɨ́ nej raaseíj tɨ jaj japua e'era'ɨ́ɨcataca'a, ajta chuej japua ajta e'era'ɨ́ɨcataca'a, a'ɨ́ɨ pu ajmeíjca'ataca'a, ajta ayén te'ataújratziiri'i tɨ nu'u ari teja'uré'enejsin a'ɨ́jna xɨcáara'an tɨ jetzen nain te'entipuá'ari. A'ɨ́j pu jetze te'ataújratziiri'i ɨ́ niuucajtze'en a'ɨ́jna tɨ rusén jɨ́n ruuri. A'ii pu a'ɨ́ɨn pú'een ɨ́ Dios tɨ ta japua a'utéjmuaa huatétaahuaca'a, ajta naíjmi'ica tɨ a'uun é'eseijre'e. A'ɨ́ɨ pu ajta raatétaahuaca'a ɨ́ chaanaca ɨ́ tej japuan yen seijre'e. A'ɨ́ɨ pu ajta raatétaahuaca'a tɨ́j na'a tɨ japuan tí'iseijre'e, ajta ɨ́ jaj tɨ ve'ée, ajta tɨ́j na'a tɨ a'uun é'eseijre'e. 7Ayee pu tiu'utaxájtaca'a a'ɨ́jna ɨ́ ja'atɨ tɨ nu'u a'ɨ́jna a'araúrastejsin a'ɨ́jna ɨ́ tɨ rú'avaa ɨ́ Dios jemi a'ij tɨ a'ɨ́ɨn Dios te'ataújratziiri'i huá'a jemi ɨ́ mej ravaɨre'eca'a me'ɨ́jna jɨme'e mej jetzen me'ecan tí'ixaxa'ata'a. A'ɨ́jna pu nu'u ayén a'araúrastejsin a'ɨ́jna xɨcáara'an tɨ jetzen ucáajijhua ɨ́ tɨ ta japua tí'ivaɨre'e ɨ́ tɨ aráhua'apua pú'een. 8Aj pu 'i a'ɨ́ɨn ɨ́ nej ráanamuajri'i tɨ júte'e teja'utaxájtaca'a, ayée pu tinaatá'ixaa tɨjɨ́n: ―Aricu, a'ɨ́jna jemi patá'aj ra'ancuré'ɨ'ɨn ɨ́ yu'uxari tɨ autácuuri'i muájca'are'ara'an jetze a'ɨ́jna tɨ ta japua tí'ivaɨre'e, tɨ a'uun japuan huatéjvee ɨ́ jaj japua, tɨ ajta a'uun japuan huatéjvee ɨ́ chuej japua. 9Netɨ́'ɨj ni ne'uun á'ume ne'ɨ́jna jemi tɨ ta japua tí'ivaɨre'e. Ayee nu tiraata'ixaa tɨ naata'ɨ́'ɨte'en ɨ́ yu'uxari tɨ cɨ́lieen. Aj pu 'i ayén tinaatá'ixaa tɨjɨ́n: ―Ye'ecui, ne'u. Patá'aj hui raatéjcua'ani. A'ɨ́ɨ pu mua'atzíivite'e a'ame mua'a jucaatze'e. Ajta, ayée pu mua'améncate'e a'ame mua'aténi'itze'e tɨ́j searate. 10Netɨ́'ɨj ni ra'ancuré'ɨ ne'ɨ́jna ɨ́ yu'uxari tɨ cɨ́lieen. A'uu nu ye'encuré'ɨɨ ɨ́ muájca'are'ara'an jetze a'ɨ́jna tɨ ta japua tí'ivaɨre'e. Netɨ́'ɨj ni raatéjcuaa. Jé'ecan pu naa tinú'ucacarejca'a ɨ́ neteni jaítze'e tɨ́j searate. Ajta, netɨ́'ɨj yá'uxɨj, jé'ecan pu ná'atzijvire'eca'a yé nejucáatze'e. 11Aj pu 'i ayén tinaatá'ixaa tɨjɨ́n: ―Ayee pu ajta ayén tiú'ujxe'eve'e pej pajtáhua'a tiu'utaxáj a'ɨ́mej jemi ɨ́ teɨte ɨ́ mej seɨj chuéjra'a japua é'eme'ecan, ɨ́ mej majta seɨ́j niuucari jɨ́n tí'ixaxa'a, pajta huá'a jɨme'e ɨ́ mej tihuá'aijte'e.

will be added

X\