Filemón 1

1- 2Inee, i nej i'i Pablo, ayée nu een jɨ́n aiteánami'i a'ɨ́jna jɨme'e nej ra'ará'astijre ɨ́ Cɨríistu'u tɨ ajta Jesús pú'een. Jamuan ɨ́ ne'ihuaara'a a'ɨ́jna ɨ́ Timoteo, ayée tu tí'imuayu'use'e mɨ pej i'i Filemón, mɨ pej ta jamuan tí'imɨjhuaca, mɨ tej muaxe'eve'e jeíhua, ajta a'ɨ́jna tɨ i'i Apia, a'ɨ́jna ɨ́ 'ɨ́ita'a tɨ tajuu pú'een tɨ ajta té'atzaahuate'e, ajta mɨ Arquipo, ɨ́ tɨ ayén che'atá na'a té'eviicua'i tetɨ́j iteen. Teen tu tihuá'ayu'use'e naíjmi'ica ɨ́ mej a'uun e'etiújse'ɨri a'u pej é'eche. 3Ajta a'ɨ́ɨn Dios ɨ́ tej rájya'upua, ajta a'ɨ́ɨn tavástara'a, a'ɨ́jna ɨ́ Jesús tɨ ajta i'i Cɨríistu'u, miché'e rɨ́'ɨ tejamuáacha'ɨɨn, miché'e majta amua'anpuá'ajte'en ɨ́ a'amua tzajta'a. 4Tɨ́j na'a nej amua'utámua'aree, ayée nu rɨ́'ɨ tiratá'acaa ná'aye'i ɨ́ Dios netɨ́j nena'a tí'ijhuavii. 5Ayee nu een jɨ́n tí'ijteujtzi'ire'e ná'aye'i ne'ɨ́jna jɨme'e nej niyen tí'inamua pej jeíhua huápɨ'ɨ rá'astijre'e ɨ́ tavástara'a, a'ɨ́jna ɨ́ Jesús. Pajta jeíhua huápɨ'ɨ huá'axe'eve'e a'ɨ́mej ɨ́ mej teɨtestemua'ame'en pú'een ɨ́ Dios. 6Ayee nu tí'ijhuavii ɨ́ Dios jemi pej pi piyen huatá'aseijrata tzáahuati'ira'a jɨme'e pej nain jɨ́n rá'astijre'e ɨ́ tavástara'a mej mi ɨ́ seica ráamua'aree tzáahuati'ira'a jɨme'e a'ij tɨ een tɨ́j na'a pua'amé tí'itacɨ'ɨti a'ɨ́jna jɨme'e tej rá'atzaahuate'e ɨ́ Cɨríistu'u. 7Jé'ecan nu netémua'ave'e mú'eetzi jemi. Jee xaa ne'u, rɨ́'ɨ pej naatá'a a'ɨ́jna jɨme'e pej ca'aníjra'a hua'utá'a a'ɨ́mej ɨ́ mej teɨtestemua'ame'en pú'een ɨ́ Dios. 8Nee nu xaa ne'ɨ́jna jɨ́n antínmua'aree nej ti'itɨj jɨ́n timuaata'aíjte'en a'ij pej ti'itɨ huáruuren a'ɨ́jna jɨme'e tɨ Cɨríistu'u na'antíhuau. 9Mɨ neajta caí, canu niyen rɨni nej timuaata'aíjte'en ca'anéeri jɨme'e. A'ɨ́ɨ pu'u na'aráanajche nej niyen timuaatáhuavii a'iné jeíhua nu muaxe'eve'e inee, i nej neri vástacɨra'i pú'een, neajta neri aiteánami'i ne'ɨ́jna jɨme'e nej rá'astijre'e ɨ́ Cɨríistu'u tɨ ajta i'i Jesús. 10Ayee nu tí'imuahuavii ne'ɨ́jna jɨme'e ɨ́ niyauj a'ɨ́jna ɨ́ Onésimo, tɨ ari ajta té'atzaahuate'e a'ɨ́jna jɨme'e nej niyen raatéya'upuajtaca'a ayujna a'u nej aiteánami'i. 11Jéjcua ɨmuá, capu ti'itɨ timuaatévaɨ. Mɨ ajta a'ɨ́ɨn, pu'uri tineetéva'ɨri ineetzi, ajta pu mú'eetzi ti'itéva'ɨri. 12Nu'uri ní raata'íti mú'eetzi jemi ne'ɨ́jna ɨ́ nej jeíhua huápɨ'ɨ raxɨ́'eve'e. 13Ayee nu tí'ijxe'eve'eca'a tɨ yé huateáturanche'e nee jamuan tɨ ij naatévaɨre'enche'e mú'eetzi jetze me'ecan nej nauj yé aiteánami'i ne'ɨ́jna jɨme'e nej tihuá'ixaate'e ɨ́ teɨte Cɨríistu'u jetze me'ecan. 14Mɨ neajta inee, canu tí'ijxe'eve'eca'a ti'itɨ́ pej caí neetá'acare'en sino nej niyen Onésimo japuan huániuuni. Tɨ pua'a piyen ti'itɨj jɨ́n naatévaɨre'enche'e, ayée nu tí'ijxe'eve'eca'a pej piyen huárɨni á'axe'evi'ira'a jɨme'e. Canu xaa ne'u raxɨ́'eve'eca'a pej ca'anéeri jɨ́n piyen huárɨniiche'e. 15- 16Tij caí ayén een jɨ́n a'atzu á'atee tɨ ɨmuá a'ij huárupi tɨ ij ajtahua'a mú'eetzi jemi huateáturan tɨ́j na'a rusén jɨme'e, tɨ ij a'ɨ́ɨn huateáturan mú'eetzi jemi tɨ́j muá'ihuaara'a pej jeíhua raxɨ́'eve'e. Capu ché'e ca'anéeri jɨ́n muatévaɨre'esin sino a'ihuáara'a pu a'ame. Jé'ecan pu ruxe'eve'e ineetzi jemi a'ɨ́jna ɨ́ ja'atɨ. Aru jaítze'e pu ruxe'eve'e mú'eetzi jemi a'iné tevi pu pú'een, ajta a'ihuáara'a pú'een ɨ́ tavástara'a jemi. 17A'ɨ́j nu jɨ́n niyen muahuavii tɨ pua'a piyen tinaaseíjri'i nej á jamuan tí'imuarɨ'e. Patá'aj piyen che'atá pena'a ra'ancuré'evi'itɨn pe'ɨ́jna ɨ́ Onésimo patɨ́j tína'ancuré'evi'itɨ ineetzi. 18Tɨ pua'a ti'itɨj jɨ́n a'ij pua'a muáaruu na'ari tɨ pua'a ti'itɨj jɨ́n timuá'acha'ɨɨre'e, neetzi pej huajíjve'en. 19Nemuajca'a nu jɨ́n tí'imuayu'use'e. Inee, i inee i'i Pablo, nee nu tí'imuanajchite'en. Mɨ neajta inee, canu a'atzu ne'ɨ́jna jɨ́n timuaatá'ixaate'esin ne'ɨ́jna jɨme'e ɨ́ pej tiná'acha'ɨɨre'e pe'ɨ́jna jɨme'e tɨ timuáacɨ'ɨti pej ruuri pua'amé tɨ́j na'a rusén jɨme'e. 20Ayee nu tí'ijxe'eve'e, ne'ihuaara'a, pej pi ti'itɨj jɨ́n naatévaɨre'en ɨ́ tavástara'a jemi. Patá'aj ca'aníjra'a naatá'an ɨ́ Cɨríistu'u jemi. 21Ayee pu tiná'amitɨejte'e tɨ ayén ti'ayajna pej piyen huárɨni a'ij nej tí'imuahuavii. A'ɨ́j nu jɨ́n yé tí'imuayu'use'e. Nu'uri ramua'aree pej piyen jaítze'e rɨni a'ij nej caí tí'imuahuavii. 22Ajta a'ɨ́jna jɨme'e, patá'aj piyen huárɨni. Patá'aj seɨj rɨ́'ɨ huáruuren ɨ́ cuaartu nej ni ne'uun huiirájcati, a'iné ayée nu rachú'eve'e tɨ Dios neetá'acare'en nej neajtahua'a ne'uun a'atanén mú'eetzi jemi a'ɨ́jna jɨme'e pej piyen raatáhuaviiri'i ɨ́ Dios jemi. 23A'ɨ́ɨ pu ajta yé muateujte'e a'ɨ́jna ɨ́ Epafras tɨ nej jamuan yé aiteánami'i, a'ɨ́jna jɨme'e tɨ ajta rá'astijre'e ɨ́ Cɨríistu'u tɨ ajta i'i Jesús. 24A'ɨ́ɨ mú majta yé muateujte'e a'ɨ́ɨme, a'ɨ́jna ɨ́ Marcos, ajta ɨ́ Aristarco, ajta Demas, ajta ɨ́ Lucas. A'ii mú a'ɨ́ɨn pú'een ɨ́ mej nej jamuan tí'imuarɨ'e. 25Ajta a'ɨ́ɨn tavástara'a, a'ɨ́jna ɨ́ Jesús tɨ ajta i'i Cɨríistu'u, ché'e a'ɨ́ɨn ruxɨ́'evi'ira'a jɨ́n rɨ́'ɨ tejamuáacha'ɨɨn. Yee pu'u, ché'e ayén teja'ure'enén.

will be added

X\