Filipenses 1

1Inee, i nej i'i Pablo, ajta a'íjna i Timoteo, iteen i tej ravaɨre'e te'ɨ́jna ɨ́ Jesus ɨ́ Cɨríistu'u, ayée tu tejá'amuayu'use'e naíjmi'ica mú'een, mɨ sej rá'atzaahuate'e se'ɨ́jna ɨ́ Jesus ɨ́ Cɨríistu'u, majta me'ɨ́ɨme ɨ́ mej tejá'amua'aijte'e, majta me'ɨ́ɨme ɨ́ mej tejá'amuavaɨre'e ti'itɨj jɨme'e. Naíjmi'ica tu tejá'amuayu'use'e mɨ sej Filipos a'uhuachéjme. 2Ché'e a'ɨ́ɨn Dios ɨ́ tɨ tá'iya'upua, ajta a'ɨ́ɨn ɨ́ tavástara'a a'ɨ́jna ɨ́ Jesus tɨ ajta i'i Cɨríistu'u, miché'e me'ɨ́n rɨ́'ɨ tejá'amuacha'ɨ́ɨ muá'ara'ani, miché'e majta amua'anpuá'ajte'en ɨ́ á'amuaxɨejniu'uca jetze mɨ sej mu'íi, sej si xɨ́'epɨ'ɨn ru'ihuaamua'a xá'ara'ani temua'a naa. 3Jé'ecan nu netémua'ave'e ɨ́ Dios jemi ja'anáj tɨ na'a nej huáhuau ɨ́ Dios jemi mú'ejmi jɨ́me'en netɨ́'ɨjtá amua'utámua'aree. 4Ja'anáj tɨ na'a nej huahuauca ɨ́ Dios jemi naíjmi'ica jɨme'e mú'een, jé'ecan nu tí'ijteujtzi'ire'e ɨ́ Dios jemi netɨ́'ɨjtá á'amuaamua'areere. 5Ayee nu'u caj tí'irɨcɨ inee a'ɨ́jna jɨme'e ɨ́ sej naatévaɨ tej ti hua'utá'ixaate'en ɨ́ teɨte te'ɨ́jna ɨ́ niuucari tɨ jɨ́me'en raxa ɨ́ Dios. Senaatévaɨ ɨ́ jéjcua, seajta íjii. 6Nee nu neajta jépɨ'ɨn tejá'umua'aree tɨ a'ɨ́jna ɨ́ tɨ a'utéjche tɨ rɨ́'ɨ amuáaruuren ɨ́ a'amua tzajta'a, a'ɨ́ɨ pu xaa ne'u raanaíjmire'esin a'ɨ́jna xɨcájra'a jetze tɨ́'ɨj ajtahua'a uvé'enen a'ɨ́jna ɨ́ Jesús tɨ ajta ayén ántehuaa ɨ́ Cɨríistu'u. 7Ayee pu tiraavíjte'e nej niyen ti'ihuánmua'aten mú'ejmi jɨme'e a'iné mú'ejmi nu a'amua jemi á'anca'ane. Tɨ pua'a niyen í'inami'ihua, na'ari tɨ pua'a nej a'ɨ́jna jetze huatániuni ɨ́ niuucari tɨ a'ɨ́jna jetze raxa ɨ́ Dios, na'ari niyen tiraataxáj yee temua'a pu i'i xɨ́'epɨ'ɨn amɨjna i niuucari, naími'i tu ra'ancuré'a'ave ɨ́ tej jɨ́n rajpuaíitzi, teajta a'achú tɨ caj taatapuaíjve ɨ́ Dios. 8Dios pu ramua'aree nej jeíhua a'ij pua'a té'enemua'ate mú'ejmi jɨme'e. Ayee nu che'atá a'amua jetze á'anca'ane a'ij tɨ a'ɨ́ɨn ajta a'amua jetze á'ujca'ane a'ɨ́jna ɨ́ Jesus tɨ ajta i'i Cɨríistu'u. 9Ayee nu tí'ijhuavii ɨ́ Dios jemi naíjmi'i jɨme'e mɨ sej ru'ihuaamua'a, sej si jaítze'e huaújxe'eve'en rujɨ́ɨmua'a tɨ́j na'a tɨ yú auca'itɨ́ a'ame, setá'aj caí ti'itɨj jɨ́n auté'ɨtzen, setá'aj siyen raayɨ́'ɨtɨhua'an jaítze'e, setá'aj nain jɨ́n rɨ́'ɨ mé titeumuámua'aree ɨ́ Dios jemi. 10Neajta nu niyen tí'ijxe'eve'e tɨ ij ayén amuaatámitɨejte'en ɨ́ tɨ jaítze'e ruxe'eve'e, tɨ ij caí ti'itɨ a'amua tzajta'a tásiseiirihua'an tɨ a'ij pua'a een, tɨ ij caí ja'atɨ ti'itɨj jɨ́n mú'ejmi jetze te'ujpuá'ajte'en a'ɨ́jna xɨcájra'a jetze tɨ́'ɨj yéj uvé'enen a'ɨ́jna ɨ́ Cɨríistu'u ɨ́ tɨ Dios án yá'ujra ɨ́ ɨpuari japua. 11Setá'aj siyen huárɨni ti'itɨ tɨ í'ixɨ'epɨ'ɨn a'ɨ́jna jemi ɨ́ Jesus tɨ ajta i'i Cɨríistu'u tɨ́j na'a tɨ yú a'ucá'a. Aj mú mi xaa jeíhua rɨ́'ɨ tiraatá'asin ɨ́ Dios. 12Casi'i, ne'ihuaamua'a, ayée nu tí'ijxe'eve'e sej ráamua'aree a'ɨ́jna jɨme'e, a'ij tɨ ti'itɨ náaruu, ɨ́ netɨ́'ɨj tiu'utévaɨ niuucajtze'en ɨ́ Dios mej mi jaítze'e ráanamua. 13Pu'uri jéjre'e seijre'e nej námi'i ne'ɨ́jna jɨme'e nej tí'ivaɨre'e ɨ́ Cɨríistu'u jetze me'ecan. Temua'a mú ramua'aree a'ɨ́ɨme ɨ́ xantaaru'u ɨ́ mej racha'ɨɨ a'ɨ́jna tɨ ve'ecán jɨ́n ti'itéjvee, majta ɨ́ seica. Naími'i mú ramua'aree. 14Majta ɨ́ seica ɨ́ ne'ihuaamua'a, ɨ́ mej majta ti'ixa ɨ́ Cɨríistu'u jetze me'ecan, mu'uri á'ujca'anejca'a me'ɨ́jna jɨme'e nej námi'i. Mu'uri ti'ixa ca'anisíj jɨme'e. Camu ti'itɨj jɨ́n tí'itziɨɨne'e. 15Mɨ majta seica miyen ti'ixa ɨ́ Cɨríistu'u jetze me'ecan, a'iné jeíhua mú chueere'e neetzi jɨme'e, mej néjcha'ɨɨre'e. Majta seica miyen ti'ixa tzáahuati'ira'a jɨme'e. 16A'ɨ́ɨme ɨ́ mej ti'ixa tzáahuati'ira'a jɨme'e, ayée mú rɨcɨ a'iné mení'ixe'eve'e. A'ɨ́ɨ mú ramua'aree nej námi'i a'ɨ́jna jɨme'e nej ne'ɨ́jna jɨ́n tí'ixajtaca'a Cɨríistu'u jetze me'ecan. 17Mɨ majta ɨ́ seica, a'ɨ́ɨ mú rujɨ́ɨmua'a mena'a a'ij tirájteu mej tiu'utaxáj ɨ́ Cɨríistu'u jetze me'ecan. Camu ti'ixa tzáahuati'ira'a jɨme'e sino ayée mú tí'imua'atze tɨ pua'a miyen ti'ixa, aj nu ni jaítze'e tirajpuaíitzi na'ame íiyu nej námi'i. 18Aru, ¿a'iné í'irɨni? A'ii pu a'ɨ́ɨn pú'een ɨ́ tɨ jaítze'e ruxe'eve'e ɨ́ mej tí'ixaxa'a ɨ́ Cɨríistu'u jetze me'ecan. A'ɨ́j nu jɨ́n netémua'ave'e. Capu ne jetze ruxe'eve'e a'ij mej ye'í ti'ixa, tɨ pua'a metí'ixajta jé'iyecan jɨme'e nusu mecaí. Ayej ti'ayajna. Mɨ neajta inee, jaítze'e nu máàj netémua'ave'e. 19Ayee nu'u, nee nu ramua'aree tɨ xɨ́'epɨ'ɨn te'iráame neetzi jemi a'iné mú'een xu rahuavii ɨ́ Dios jemi. Ajta a'ɨ́ɨn ɨ́ xɨéjniu'ucare'ara'an ɨ́ Cɨríistu'u, a'ɨ́ɨ pu i ajta naatévaɨ. 20Jé'ecan nu rachú'eve'e, ayée nu neajta tí'ijxe'eve'e, nej ni caí ja'anáj tí'itevi'ira'a ɨ́ Dios jemi. Huápɨ'ɨ nu raxɨ́'eve'e nej niyen a'ahuánca'ane'en nej niyen rɨ́'ɨ tiu'utánseijrata mej mi ráamua'aree ɨ́ nej Cɨríistu'u nu jetze neca'ane tɨ pua'a niyen irá'ateevi'in nej i'irúuri ná'ara'ani na'ari nej huámɨ'ɨni. 21Ayee pu tiná'amitɨejte'e ineetzi, tɨ pua'a niyen irá'ateevi'in nej i'irúuri ná'ara'ani, nain nu jɨ́n tiu'utévaɨre'esin ne'ɨ́jna jemi ɨ́ Cɨríistu'u. Mɨ neajta, tɨ pua'a neri huámɨ'ɨni, nee nu xaa tiu'utémua'itɨ ɨ́ ta japua. 22Tɨ pua'a niyen irá'ateevi'in nej i'irúuri ná'ara'ani, aj nu xaa ne'u nain tí'iseijran a'ij nej tí'imuarɨ'e. Aj nu xaa ne'u tiu'utémua'itɨ. A'ɨ́j nu xaa caí mua'aree ti'itɨj tɨ jaítze'e í'ixɨ'epɨ'ɨn, tij nej irá'ateevi'in nej ruuri nusu nej ca'anacan huámɨ'ɨni. 23Jé'ecan nu ráamua'areeri'i i nexɨejniu'uca jɨme'e. Aru canu xáahuí ramua'aree ti'itɨj tɨ jaítze'e na'aráanajche. Jé'ecan pu ayén ne'astɨ́ á'aye'i nej á'ura'ani neatá'aj a'utevée ná'ara'ani ɨ́ Cɨríistu'u jemi. Jaítze'e pu í'ixɨ'epɨ'ɨn tzɨ́te'e nej á'ura'ani. 24Mɨ ajta jaítze'e pu a'amua jetze ruxe'eve'e nej ruuri ná'ara'ani. 25Ayej ne'ase, ayén ti'ayajna nej yen huacaí ná'ara'ani. Ayen nu huacaí na'ame sej si jaítze'e rá'antzaahuate'en, sej si jaítze'e huaújtemua'ave'en. 26A'ɨ́j pu jɨ́n netɨ́'ɨjtáhua'a yé huacaí ná'ara'ani a'amua jemi, jé'ecan xu huataújtemua'ave'esin, seajta rɨ́'ɨ tiraatá'an ɨ́ Cɨríistu'u tɨ i'i Jesús, a'iné a'ɨ́ɨ pu naatévaɨ ineetzi. 27Me'ecui xaa, huápɨ'ɨ pu ruxe'eve'e sej siyen huárɨni a'ij tɨ tiraavíjte'e, setɨ́j tiráanamuajri'i se'ɨ́jna jetze ɨ́ niuucari tɨ jetzen raxa ɨ́ Dios. Tɨ pua'a ne'uun a'atanén nej tejámuaatá'ixaate'en na'ari nej yé'umua'ati ye'ɨmuá, ayée nu raxɨ́'eve'e nej ni ráamua'aree sej seuj té'atzaahuate'e naíjmi'i. Setá'aj naíjmi'i tiu'utése'en tɨ ij caí ja'atɨ amuaamuá'itɨn sej si caí ché'e rá'atzaahuate'en ɨ́ niuucari tɨ jetzen raxa ɨ́ Dios. 28Mú'een xu caí siyen tihuá'itziɨɨne'e setiu'utatése'e sej ti'ihuaúrixaate'en huá'a jamuan ɨ́ mej amuájcha'ɨɨre'e. Tɨ pua'a siyen huárɨni, aj mú xaa ráamua'aree mej huatéepua'are. Mɨ seajta mú'een, Dios pu amua'irájtuaani. 29Ayee pu'u na'a, a'iné Dios pu amuaatá'a sej rajpuaíjtzi xá'ara'ani Cɨríistu'u jetze me'ecan, seajta rá'antzaahuate'en. 30Ayee tu teri taxɨ́'ej antí'uuve te'ɨ́jna jɨme'e setɨ́j amuacaícan naaseíj ɨ́ nej jɨ́n tí'itese'eca'a, seajta seúche'e xu ranamuajran nej tí'itese'e naúche'e.

will be added

X\