1 Tɨ́'ɨj acájraa ɨ́ Jesús jɨrí jetze, jeíhua mú teɨte a'ucɨ́j jamuan. 2 Tɨ'ɨj jí seɨ́j ave'eré'ene ɨ́ Jesús jemi. Tí'icui'icaa a'ɨ́jna jɨme'e tɨ tinéj ɨ́ 'atzaj huá'ire'ara'an jetze. Ayee mú ratamuá'amua tɨjɨ́n lepra. Tɨ́'ɨj i a'ɨ́ɨn títunutaca'a jemin ɨ́ Jesús. Ayee pu tiraatá'ixaa tɨjɨ́n: ―Tɨ́ pua'a hui mua'aráanajche pej tináahuaate'en. 3 Aj pu i Jesús ra'ajtamuárɨej. Ayen tɨjɨ́n: ―Na'aráanajche pej huarún. Jɨ́me'en pu'u ayén raataxájtaca'a, aj pu i tiraacá'ari'iri'i ɨ́ tɨ jɨ́me'en tí'icui'icaa. Tɨ'ɨj jí huarúj. 4 Aj pu i Jesús ayén tiraatá'ixaa tɨjɨ́n: ―Casi'i, capej ja'atɨ́ ixaate'e sino aricu, a'ɨ́jna jemi tɨ tí'iva'ɨri teyujta'a. Ché'e muaaseíj. Pajta tiu'utámuaɨ'ɨvejta a'ij tɨ tiu'uxájtaca'a ɨ́ Moises teecan. Ayee mú éeni'icɨ'e ramua'aréeren tɨjɨ́n pepu'uri huarúj. 5 - 6 Aj pu i Jesús a'uteájrupi a'ujna Capernaúm. Tɨ́'ɨj a'uun a'uteájrupi, seɨ́j pu u a'uvé'emej tɨ i'i xantaaru'u. A'ii pu a'ɨ́ɨn pú'een tɨ anxɨ́te tí'aijta. Jé'ecan pu rájhuaviiri'i a'ɨ́jna ɨ́ ja'atɨ. Ayen tɨjɨ́n: ―Nevástara'a, jé'ecan pu tí'icui'i a'ɨ́jna tɨ nevaɨre'e. An pu a'ujcá'a ɨ́ utaatzi japua. Cɨyáaxara'a. Nainjapua pu racui'i huápɨ'ɨ. 7 Aj pu i Jesús ayén tiraatá'ixaa tɨjɨ́n: ―Née nu xaa a'umé'e na'ame nej ni tiráahuaate'en. 8 Aj pu i ayén tiu'utaniú a'ɨ́jna tɨ anxɨ́te tí'aijta tɨjɨ́n: ―Nevásta'ara'a, capu ayén muaavíjte'e pej piyen uteárute u niche, a'iné canu Israél jetze ajtéme'ecan. Ayee pepu'u huárɨni, patá'aj piyen tiraataxáj ɨ́ niuucari jɨme'e. Aj pu xaa rujni a'ɨ́jna tɨ nevaɨre'e. 9 Ayee nu tí'imua'ixaate'e ne'ɨ́jna jɨme'e ɨ́ mej seica tí'ine'aijte'e ineetzi. Neajta inee, nee nu seica tí'aijte'e. Tɨ́ pua'a niyen tiraata'ixaate'en seɨ́j tɨjɨ́n: “Aricu, u pá'ume'en”, a'ɨ́ɨ pu xaa a'umé'e a'ame. Na'ari, tɨ pua'a niyen tiraata'ixaate'en ɨ́ seɨj tɨjɨ́n: “Yé vé'exɨjri'i”, a'ɨ́ɨ pu ajta yé ve'eré'enejsin. Neajta niyen tiraata'aíjte'esin ɨ́ tɨ nevaɨre'e tɨjɨ́n: “Aisí mú'ee, pɨ́ huarɨ́chi.” Ajta a'ɨ́ɨn, ayée pu rɨni. ―Ayee pu tiu'utaxájtaca'a a'ɨ́jna ɨ́ xantaaru'u. 10 Tɨ́'ɨj Jesús ráanamuajri'i, jé'ecan pu huataújtemua'ave. Aj pu i ayén tihua'utá'ixaa a'ɨ́mej ɨ́ mej rá'ajaahuate'e tɨjɨ́n: ―Ayee nu tejá'amua'ixaate'e tzáahuati'ira'a jɨme'e. Huá'a tzajta'a ɨ́ teɨte ayujna mej huachéjme tɨ́j na'a tɨ huatacá'a íiyu Israél, canu ja'anáj seɨ́j huaté'uu íiyu Israél, ja'atɨ́ tɨ ayén che'atá na'a té'atzaahuate'e tɨ́j a'íjna i teáata'a. 11 Neajta niyen tejá'amua'ixaate'e, a'ɨ́jna jɨme'e yee jeíhua mú u a'uvé'eju'u muá'aju'un mej mi a'ujrá'ase me'ɨ́jna jamuan ɨ́ Abraham teecan, majta me'ɨ́jna ɨ́ Isaac teecan, majta me'ɨ́jna jamuan ɨ́ Jacobo teecan. A'uu mú hui a'uvé'eju'u muá'aju'un a'u tɨ xɨcaj 'eíjninei, majta a'u tɨ xɨcaj e'eteáru'ipi. Aj mú mi tí'icua'ani huá'a jamuan ɨ́ mé huaíca tɨ́'ɨj teja'uré'ene a'ájna xɨcájra'a jetze tɨ Dios nain jɨ́n tiu'uta'aíjta íiyen chaanaca japua. 12 Mɨ́ majta a'ɨ́mej ɨ́ mej Israél jetze ajtéme'ecan, Dios pu hua'irá'iti á pua'acɨé a'u tɨ a'utɨ́ca'a. Jéihua mú huateujyéineajra'asin, majta jeíhua mú ancuré'ujcɨ'ɨmée muá'aju'un ɨ́ rutamej jɨme'e a'ɨ́jna jɨme'e mej jeíhua rajpuaíitzi. ―Ayee pu tihua'utá'ixaa. 13 Aj Jesús ayén tiraatá'ixaa a'ɨ́jna tɨ anxɨ́te tí'aijta tɨjɨ́n: ―Aricu, ayée pu té'eme patɨ́j peri té'antzaahua. Jɨ́me'en pu'u ayén tiraatá'ixaa, aj pu i huarúj a'ɨ́jna tɨ tí'ivaɨre'e a'ɨ́jna jemi ɨ́ xantaaru'u. Tɨ'ɨj jí á'uraa a'ɨ́jna ɨ́ Jesús. 14 Aj pu i Jesús a'uun a'ará'a Pedro tɨ é'eche. A'uu pu i a'ɨ́ɨn huaseíj a'ɨ́jna ɨ́ mu'uneára'an ɨ́ Pedro. An pu já'ujca'atii ɨ́ utaatzi japua. Tí'icui'icaa. Pɨ́staca'a a'ɨ́jna ɨ́ 'ɨ́ita'a. 15 Aj pu i Jesús rajví'i muájca'are'ara'an jetze. Jɨ́me'en pu ayén huarɨ́j, aj pu'i huarúj. Ajta a'ɨ́ɨn ɨ́ 'ɨ́ita'a, a'ɨ́ɨ pu ájchee. Ajta á'iyen a'utéjche tɨ tiraamí. 16 Tɨ́'ɨj huateátɨca'areca'a, jeíhua mú huaje'eráavi'itɨ Jesús jemi a'ɨ́mej ɨ́ mej tiyaaru'u huá'a tzajta'a seijre'eca'a. A'ɨ́ɨ pu hua'uta'aíj a'ɨ́mej ɨ́ tiyáaru'use mej nu'u huirácɨɨne ɨ́ teɨte tzajta'a. Ajta naíjmi'ica pu tiú'uhuaa ɨ́ mej tí'icucui'icaa. 17 Ayee pu tiuju'urɨ́j tɨ ij araúrasten a'ij tɨ tiu'utaxájtaca'a a'ɨ́jna ɨ́ Isaías, ɨ́ tɨ ajmí'i tí'ixaxa'ata'a ɨ́ Dios jetze me'ecan. Ayen tɨjɨ́n: “A'ɨ́ɨ pu titá'ari'iri'i a'ɨ́jna ɨ́ tɨ jɨ́n caí ché'e tú'uca'anisti'iraca'a. Ajta a'ɨ́ɨ pu yá'utɨɨ ɨ́ tej jɨ́n tí'icucui'icaa.” 18 Tɨ́'ɨj Jesús hua'useíj ɨ́ teɨte ɨ́ mej jeíhua ajteáxɨɨreca'a ɨ́ jemin, aj pu i ayén tíhua'uta'aíjte mej nu'u antácɨɨne antavén pújme'en. 19 Aj pu i seɨ́j tɨ tiújmua'ate ɨ́ yu'uxari jetze, a'ɨ́ɨ pu ave'eré'ene jemin ɨ́ Jesús. Ayee pu tirájhuaviiri'i tɨjɨ́n: ―Maestru, niché'e á jamuan á'uche'ecane'en a'u tɨ na'a pej a'umé'e pua'amé. 20 Aj pu i Jesús ayén tiraatá'ixaa tɨjɨ́n: ―Canu mu'u a'umé'e na'ame. A'ɨ́ɨme ɨ́ arachuíjse, a'úu mú hui u'uche cuunísta'a, majta a'ɨ́ɨme ɨ́ pina'ase a'úu mú ti'itítu'a a'u mej é'e'aseca. Mɨ́ neajta inee, i nej neajta teáata'a jetze airáane, canu a'atzu huatéechi'i ɨ́ nej tzajta'an huácuti. ―Ayee pu tiraatá'ixaa. 21 Ajta seɨ́j tɨ á'uche'ecane'e jamuan, a'ɨ́ɨ pu ayén rájhuaviiri'i tɨjɨ́n: ―Nevástara'a, niché'e yé huácatii íiye niche asta na'a caí huámɨ'ɨni ɨ́ nitáàta. Netɨ́'ɨj ra'ava'anán, aj nu ni yé ve'eré'enejsin nej ni á'uche'ecane'en á jamuan. 22 Ayee pu tiraatá'ixaa a'ɨ́jna ɨ́ Jesús tɨjɨ́n: ―Miche'e mɨ seica ra'avá'anan ɨ́ hua'axɨ́'ej mɨ'ɨchi a'ɨ́ɨme ɨ́ mej caí ramua'ate ɨ́ Dios. Mɨ́ pajta mú'ee, patá'aj ca'anacan yé ve'eré'enen. 23 Aj pu'i Jesús ateájraa ɨ́ baarcu jetze, majta a'ɨ́ɨme ɨ́ mej jamuan á'ujujhua'ane'e. 24 Aj pu i temua'a ca'anín jɨ́n tiu'utá'eecareca'a ɨ́ jaj japua. Jé'ecan pu'i tiújta'ahua'a vivejmé'e. Tɨ'ɨj jí ateáxɨɨre'axɨ ɨ́ baarcu jetze. Ajta a'ɨ́ɨn ɨ́ Jesús, a'ɨ́ɨ pu í'icujcaa. 25 Majta me'ɨ́n ɨ́ mej á'ujujhua'ane'e jamuan, a'ɨ́ɨ mú ave'eré'ene jemin. Aj mú mi raajɨ́ste. Miyen tɨjɨ́n: ―¡Maeestru, ta japua huániuuchi! ¡Tu'uri hui cui'ini! 26 Aj pu'i ayén tihua'uta'íhua'uri'i tɨjɨ́n: ―Mɨ́ sej caí a'atzu té'atzaahuate'e, ¿a'iné sej si huápɨ'ɨ tí'itziɨɨne'e? Aj pu i ájchee. Tɨ'ɨj jí hua'utá'ijmɨijri'i ɨ́ eeca, ajta ɨ́ jaj. Aj pu i huatéepua'aj ɨ́ eeca, ajta a'ureújé'iye já'araa ɨ́ jaj, temua'a naa. 27 Jé'ecan mú a'ij ra'utaseíj a'ɨ́ɨme ɨ́ teteca. Ayee mú tí'iru'ihua'uraca'a tɨjɨ́n: ―¿Ti'itáani tévira'a pú'een amɨ́jna? Amɨ́ pu tihuá'aijte'e ɨ́ eeca, ajta ɨ́ jaj. Majta mú hui rá'aste. 28 Tɨ́'ɨj tá'i Jesús a'uun a'ará'a utavén pújme'en já'ahua'a Gadara tɨ ajtéme'ecan. Matɨ́'ɨj mi aitacɨ́j ɨ́ baarcu jetze. Aj mú mi seica hua'antinájcheca'a. Ma hua'apua a'ɨ́ɨme. A'uu mú e'eráacɨ a'u mej mɨ'ɨchite é'enaamuaca. Tiyáaru'use pu huá'a tzajta'a seijre'eca'a. Jéihua mú simuáruunica'a. A'ɨ́j pu jɨ́n caí rɨ'ɨríistaca'a tɨ ja'atɨ́ a'uré'enen a'ujna juye jetze. 29 Matɨ́'ɨj mi miyen titeejíjhuaca'a. Miyen tɨjɨ́n: ―¿A'iné hui ti'itɨ́j peteáruuren itejmi jemi, Jesús, pej i'i yaujra'an ɨ́ Dios? ¿Ni piyen mú a'uvé'emej pej pi puaíjtzi taatá'an? Aru capu xɨ teja'uré'ene a'ájna xɨcájra'a tej jetzen rajpuaíitzi tá'aju'un. 30 Majta a'ɨmuá seica huaté'uu ɨ́ tuiixute. Mé mu'íi. A mú á'ujujhua'an mete'enticuáa. 31 Matɨ́'ɨj mi me'ɨ́n ɨ́ tiyáaru'use tɨ huá'a tzajta'a seijre'eca'a, a'ɨ́ɨ mú miyen rájhuaviiri'i me'ɨ́jna ɨ́ Jesús tɨjɨ́n: ―Tɨ́ pua'a piyen titaatamuárite'en itejmi, taata'ítechi itejmi a'u mej a'uté'uu mɨ tuiixu. 32 Aj pu i ayén tihua'utá'ixaa tɨjɨ́n: ―Sericu. Matɨ́'ɨj mi huiráacɨ. Aj mú mi huá'a tzajta'a a'uteájrupi ɨ́ tuiixute. Majta me'ɨ́n ɨ́ tuiixu, matɨ́'ɨj mi huataúruu a'uun pújme'en játe'ana tɨ a'atamɨ́'ɨye. Matɨ́'ɨjtá mi atéavatzɨ á jaata'a. Aj mú mi aujámɨ naíjmi'i. 33 Majta me'ɨ́n ɨ́ mej tuiixu cha'ɨɨca'a, a'ɨ́ɨ mú huataúruu. Matɨ́'ɨj mi me'uun a'ucɨ́j chajta'a mej mi tiu'utaxáj. A'ɨ́j mú hua'utá'ixa a'ij tɨ ti'itɨ́j huá'uruu ɨ́ tuiixu, majta a'ij tɨ ti'itɨ́j huá'uruu a'ɨ́mej ɨ́ tiyáaru'use ɨ́ mej huá'a tzajta'a seijre'eca'a. 34 Matɨ́'ɨj mi a'ɨ́ɨme a'uun mej huachéjme'ecaa a'ujna, naími'i mú ave'eré'ene ɨ́ Jesús jemi mej mi jamuan tiu'uxáj. Matɨ́'ɨj raaseíj, jeíhua mú rájhuaviiri'i me'ɨ́jna ɨ́ Jesús tɨ nu'u á'ura'ani u já'ahua'a yee.
