San Mateo 6

1’Rɨ́'ɨ xu'u mú'een sej caí siyen huárɨni ɨ́ tɨ xɨ́'epɨ'ɨn 'een mé jéjre'e huá'a tzajta'a ɨ́ teɨte mej mi amuaaséij. Tɨ́ pua'a siyen sena'a rɨjca, capu ti'itɨ́j tejá'amuacɨ'ɨti a'ɨ́jna jemi ɨ́ sej rájya'upua tɨ a'ɨ́ɨn tejámuaatapuaíjve'en. 2A'ɨ́j pu jɨ́n, setɨ́'ɨj tihuá'apuaijve'e a'ɨ́mej ɨ́ mej caí a'ij tí'ijviicua'i, caxu raxájta mé jéjre'e yee ayée tu huarɨ́j. Ayee mú xaa rɨcɨ seica ɨ́ ruteyujta'a, majta caaye jetze a'ɨ́ɨme ɨ́ mej ra'ará'astijre'e hua'aye'ira jéjre'ecɨtze'e. A'ɨ́ɨ mú miyen rɨcɨ mej mi a'ɨ́ɨn teɨte rɨ́'ɨ tihua'utá'ixaate'en. Ayee nu tejá'amua'ixaate'e tɨjɨ́n a'ɨ́ɨ mú meri nain huamuá'itɨ me'ɨ́jna jɨme'e ɨ́ mej teɨte rɨ́'ɨ tiu'utá'ixaa. 3Mɨ́ pajta mú'ee, tɨ pua'a ti'itɨ́j paraatapuaíjve'en ɨ́ tɨ caí a'ij tí'ijviicua'i, ayée pej huárɨni tɨ ij caí ja'atɨ́ ráamua'aree. 4Ayee pej huárɨni, tɨ pua'a petiu'utapuaíjve'en avíitzi jɨme'e, aj pu xaa, a'ɨ́ɨn ɨ́ pej rájya'upua, a'ɨ́ɨ pu raseíj ɨ́ tɨ rú'avaa. Ajta, a'ɨ́ɨ pu timuaatá'asin a'ɨ́jna ɨ́ pej raamuá'itɨ. 5’Ajta, setɨ́'ɨj mú'een téniuusime'en ɨ́ Dios jemi, caxu siyen jéjre'ecɨtze'e rɨjca matɨ́j ɨ́ seica ɨ́ mej nu'u ra'ará'astijre'e hua'aye'ira ɨ́ mej miyen tí'ijrɨ'ɨre. Yee pu tihua'aráanajche mej uteáru'ipi u teyujta'a mej huatéjniuuni ɨ́ Dios jemi, na'ari mej miyen e'ejcáacɨ'ɨca a'ujna caaye jetze mej mi seica hua'useíj. Ayee nu tejá'amua'ixaate'e tzáahuati'ira'a jɨme'e, amɨ́ mu'u huamuá'itɨ, xaa ne'u. 6’Mɨ́ pajta mú'ee, patɨ́'ɨj téniuusime'en ɨ́ Dios jemi, pauj mi'i uteárutén a'ujna 'achi'itá. Pajta te'iteanán ɨ́ ta'anténine'i jɨme'e. Aj pej xaa pi huatéjniuuni a'ɨ́jna jemi ɨ́ pej rájya'upua ɨ́ tɨ caí seijre'e. Ajta á'iyen a'ɨ́jna ɨ́ pej rájya'upua ɨ́ tɨ tí'isise'ij naíjmi'i tɨ́j na'a a'u tɨ é'eruuri'ihuaca'a avíitzi jɨme'e, a'ɨ́ɨ pu hui muaatá'asin ɨ́ pej raamuá'itɨ. 7’Ajta, patɨ́'ɨj téniuusime'en ɨ́ Dios jemi, capej piyen á'ateevi'in pej téniuusime'en ɨ́ niuucari jɨme'e tɨ caí a'ij huataújmua'a. Ayee mú xaa rɨcɨ a'ɨ́ɨme ɨ́ mej caí ramua'ate ɨ́ Dios. Ayee pu tihuá'amitɨejte'e tɨ Dios ayén huá'unamua tɨ pua'a miyen á'ateevi'in mej téniuusime'en. 8Caxu siyen che'atá sena'a rɨjca matɨ́j a'ɨ́ɨme, a'iné ayée pu i tí'een sej caí xɨ huatéeniu jemin ɨ́ sej rájya'upua, a'ɨ́ɨ pu ari rú'umua'aree ti'itɨ́j tɨ a'ij tejamuá'aturaate'e. 9Ayee xu si tí'ijhuaviira. Siyen tɨjɨ́n: Mú'ee, ɨ́ pej tá'iya'upua, a'úu pej é'eseijre'e u ta japua, miché'e rɨ́'ɨ yá'unamuajra a'ij pej ántehuaa. 10Ché'e teja'uré'enen a'ájna xɨcájra'a jetze patɨ́'ɨj nainjapua tiu'uta'aíjta íiyen chaanaca japua. Miché'e ra'ará'astijre'en a'ij pej tí'ijxe'eve'e íiyen chaanaca japua mej mi miyen che'atá mena'a ra'ará'astijre'en u ta japua. 11Patá'aj pajta taatá'an ɨ́ tɨ tí'icua'iri'i ɨ́ tɨ ruxe'eve'e nain xɨcaj tzajta'a. 12Titaatá'uuni'iri'i ɨ́ tej jɨ́n auteájturaa mú'eetzi jemi a'iné ayée tu che'atá tena'a rɨ́'ɨ tíhua'utá'uuni'ira a'ɨ́mej ɨ́ mej auteájturaa itejmi jemi. 13Pajta, capej piyen titaatá'acare'en ti ayén titáacɨ'ɨti ɨ́ tej jɨ́me'en caí rá'aviicua'i sino patá'aj piyen ta japua huániuuni tɨ ij caí taatémua'itɨn a'ɨ́jna tɨ a'ij pua'a 'een. Ayee tu tí'imuahuavii a'iné mú'ee pej tí'ita'aijte'e nainjapua, mú'ee pej antí'amua'aree nain jɨme'e, miché'e naími'i rɨ́'ɨ timuaatatémua'aviste'en tɨ́j na'a rusén jɨme'e. 14’A'ɨ́j nu jɨ́n niyen tejá'amua'ixaate'e. Tɨ́ pua'a siyen tihua'utá'uuni'i ɨ́ teɨte ɨ́ mej jɨ́n auteájturaa mú'ejmi jemi, a'ɨ́ɨ pu ajta tejámuaatá'uuni'ira mú'ejmi a'ɨ́jna ɨ́ sej rájya'upua tɨ a'uun é'eseijre'e u ta japua. 15Mɨ́ ajta, tɨ pua'a secaí siyen tihua'utá'uuni'i ɨ́ teɨte ɨ́ mej jɨ́n auteájturaa mú'ejmi jemi, a'ɨ́jna ɨ́ sej rájya'upua, capu ajta tejámuaatá'uuni'ira mú'ejmi ɨ́ sej jɨ́n auteájturaa ɨ́ jemin. 16’Tɨ́ pua'a seúru'itzi'ive'e, caxu siyen acaújtzaahuate'e ɨ́ runéerime jetze matɨ́j a'ɨ́ɨme ɨ́ seica ɨ́ mej miyen rɨcɨ jéjre'ecɨtze'e. A'ɨ́ɨme ɨ́ teɨtejra'a, ayée mú acaújtzaahuate'e ɨ́ runéerime jetze mej mi seica teɨte ráamua'aree yee mej rú'itzi'ive'e. 17- 18Ayee nu tejá'amua'ixaate'e tzáahuati'ira'a jɨme'e. Mu'uri me'ɨ́jna jɨ́me'en raamuá'itɨ nain ɨ́ tɨ tihuá'acɨ'ɨti. Mɨ́ pajta mú'ee, patɨ́'ɨj á'itzi'ive'e, patá'aj acá'ajɨsta'ante'en, pajta te'avá'ahuaate'en á'amu'uutze'e aceite jɨme'e, mej mi caí ráamua'aree ɨ́ teɨte yee pe'á'itzi'ive'e. A'ɨ́ɨ pu'u ayá'upua ɨ́ pej caí rasise'i, a'ɨ́ɨ pu ramua'aree. Ajta a'ɨ́jna ɨ́ ayá'upua tɨ rasise'i ɨ́ tɨ rú'avaa, a'ɨ́ɨ pu muaatá'asin ɨ́ pej raamuá'itɨ. 19’Caxu siyen té'useɨre'e u ruchi'itá jeíhua ɨ́ tɨ huápɨ'ɨ tí'ijnajche sej si se'uun te'urácha'ɨɨca. Tɨ́ pua'a siyen huárɨni, aj mú mi tejpuási raatéte'eneajxɨ'ɨsin ɨ́ caanari. Ajta ɨ́ tepúusti'i, temua'a pu tiu'uteújchuitaamua'asin. Majta a'ɨ́ɨme ɨ́ nahua'ari, a'úu mú uteáruti ca'anéeri jɨme'e. Matɨ́'ɨj mi té'unahua'an. 20Mɨ́ seajta mú'een, setá'aj te'uhuáseɨre'en u ta japua jeíhua ɨ́ tɨ huápɨ'ɨ ruxe'eve'e ɨ́ Dios jemi. Capu ti'itɨ́j ruchuitáamua'aca a'ujna, capu ajta ti'itɨ́j a'uvaɨ́jtzi. Camu majta uteáru'ipi ɨ́ nahua'ari me'újna. 21Ayee pu té'eme: ti'itɨ́j tɨ na'a tɨ mú'ejmi tejá'amua'a, tɨ jaítze'e timuaatéva'ɨri, mú'een xu tiújmua'atzíite'e xá'aju'un se'ɨ́jna jɨme'e. 22’Ajta hui, amɨ́jna mɨ á'ajɨ'ɨ, a'ii pu a'ɨ́ɨn pú'een ɨ́ pej jɨ́n á'uche'ecan. Tɨ́ pua'a rɨ'éene'en puá'ajjɨ'ɨsíjme'eni, temua'a pej naa meteúunee. 23Mɨ́ ajta, tɨ pua'a caí ti'itɨ́j vaɨre'e mua'a jɨ́'ɨ, ayée pu hua'éen cumu tɨ́j huatɨ́ca'a. Ajta mua'axɨejniu'uca, tɨ pua'a piyen rɨ́'ɨ raaté'avaa, ayée pu che'atá na'a tí'ivaɨre'e ɨ́ pej jɨ́n huáye'iven huá'a tzajta'a ɨ́ teɨte. Ajta tɨ pua'a piyen caí rɨ́'ɨ tiraaté'avaa ɨ́ mua'axɨejniu'uca tɨ ij caí ché'e mú á'ayee mú á'uvi'itɨjcare'en, ¿ni caí ayén te'iráame cumu tɨ́j huatɨ́ca'a? Capu a'atzu huáneeri'i. 24’Capu ja'atɨ́ raayɨ́'ɨtɨ tɨ hua'apuaca jemi tiu'utévaɨre'en. Tɨ́ pua'a tiu'utatése'en tɨ ayén huárɨni, seɨ́j pu ticha'ɨ́ɨre'e a'ame tɨ tí'ira'aijte'e, ajta ɨ́ seɨ́j, a'ɨ́ɨ pu raxɨ́'eve'e a'ame tɨ tiraata'aíjte'en. Na'ari caí, nain pu jɨ́n tiraatévaɨre'esin ɨ́ seɨj, ajta a'ɨ́ɨ pu caí ra'ará'astijre'e ɨ́ seɨj tɨ tí'ira'aijte'e. Jɨ́me'en a'ɨ́jna ɨ́ Dios, ajta jɨ́me'en a'ɨ́jna ɨ́ tumin, capu ja'atɨ́ ayén raayɨ́'ɨtɨ tɨ tiu'uta'aíjti'ire'en ruxɨ́'ej na'a a'ɨ́mej jemi ɨ́ mej hua'apua. 25’A'ɨ́j nu jɨ́n niyen tejá'amua'ixaate'e jɨ́me'en a'ɨ́jna yee: Caxu se'ɨ́jna jɨ́n tí'imuajca yee: “¿A'iquí tetí'icua'ani?”, nusu yee: “¿A'iquí tetí'iteye'en?”, na'ari yee: “¿Ti'itaqui jɨ́n tetiu'utétachejte'esin?” ¿Ni caí jaítze'e ruxe'eve'e ɨ́ Dios jemi sej ruuri xá'ara'ani, caí ɨ́ cua'ira? ¿Ni caí ayén che'atá na'a jaítze'e ruxe'eve'e ɨ́ Dios jemi á'amuahua'ira'a tɨ ruuri, caí ɨ́ sej jɨ́n tiu'uteújchejte'en? A ni'ijtá ne'u. 26’Casi'i, hui sehua'useíj mɨ pina'ase ɨ́ mej júte'e rá'ara'a. Camu a'atzu tí'ihuaste'e, camu majta tí'itza'anaca, camu majta rase'ɨri ɨ́ imue'eri ɨ́ ruchi'itá. Mɨ́ ajta, a'ɨ́ɨ pu tihuá'ami'icuaca a'ɨ́jna ɨ́ á'amuaya'upua a'uun tɨ é'eseijre'e u ta japua. Ajta jeíhua xu jaítze'e jetzen ruxe'eve'e mecaí a'ɨ́ɨme mɨ pina'ase. A'ɨ́ɨ pu rɨ́'ɨ tejá'amuacha'ɨ́ɨ a'ame. 27Capu a'atzu tí'ivaɨre'e tɨ ja'atɨ́ ayén á'uche'ecane'en ayén te'entímua'astɨ́ a'ɨ́jna jɨme'e yee a'iquí té'eme. Capu a'atzu raatéva'ɨri tɨ jaítze'e á'ateevi'in. 28’Ajta, ¿a'iné 'een jɨ́n siyen tí'itziɨɨne'e se'ɨ́jna jɨme'e yee ti'itájqui jɨ́n tetiu'utétachejte'esin? ’Casi'i mú'een, xaaseíj mɨ xuuxu'u a'ij tɨ té'ejvivausi mé já'ahua'a tɨ huapá'atza. Capu tí'imɨjhuaca mɨ xuuxu'u, capu ajta tí'itzaca. 29Mɨ́ neajta inee, ayée nu tejá'amua'ixaate'e, a'ɨ́jna ɨ́ rey, a'ɨ́jna ɨ́ Salomón teecan, jé'ecan pu huápɨ'ɨ tí'ijcha'ɨɨca'a. Mɨ́ ajta, capu ja'anáj naa éene'en tiu'uteújchejte tɨ́j mɨ xuuxu'u. 30’Ayee pu'u, Dios pu ayén naa éene'en rɨ́'ɨ tí'iruure mɨ ɨxaj tɨ íjii a'uun é'eseijre'e a'úu tɨ a'upá'atza. Ajta á'iyen, aré'apua'a rasijchen. Tɨ́'ɨj huatéehuan, aj mú mi raateátaiira chuej tzajta'a tá'ajtaavijhua. Dios pu xaa jaítze'e rɨ́'ɨ á'amuaruure caí a'ɨ́jna tɨ rɨ́'ɨ ráaruu mɨ ɨxaj. Mú'een xu hui caí a'atzu té'atzaahuate'e xaa ne'u. 31A'ɨ́j nu jɨ́n niyen tejá'amua'ixaate'e. Caxu siyen tí'imuajca se'ɨ́jna jɨme'e yee: “¿Ti'itájqui tecua'ani?”, nusu yee: “¿Ti'itájqui teyé'en?”, na'ari yee: “¿Ti'itájqui jɨ́n tetiu'utétachejte'esin?” 32’A'ɨ́ɨme ɨ́ mej caí ramua'ate ɨ́ Dios tzáahuati'ira'a jɨme'e, a'ii mú a'ɨ́ɨn pú'een ɨ́ mej jɨ́n rahuauca. Mɨ́ ajta, a'ɨ́ɨn ɨ́ á'amuaya'upua ta japua tɨ é'eseijre'e, a'ɨ́ɨ pu ari ramua'aree nain tɨ́j na'a ɨ́ tɨ tejamuá'aturaate'e. 33Ayee pu'u, seuj mi'i raatahuaún tɨ Dios tejamua'aíjte'en, seajta sej ra'ará'astijre'en a'ij tɨ a'ɨ́ɨn tí'ijxe'eve'e. Tɨ́ pua'a siyen huárɨni, Dios pu ajta tejámuaatá'asin naíjmi'i a'íjna ɨ́ tɨ tejamuá'aturaate'e. 34’Ayej xaa ne'u ti'ayajna. Caxu tí'imuajca se'ɨ́jna jɨme'e yee a'iquí té'eme ruijmua'a. Ruijmua'a xu sijta tí'itese'e xá'aju'un se'ɨ́jna jɨme'e ɨ́ tɨ tejá'amuacɨ'ɨti a'ájna. Amɨ́ pu'u aúche'e ɨ́ sej jɨ́n tí'itese'en íjii.

will be added

X\