San Mateo 4

1Tɨ'ɨj jí a'ɨ́ɨn ɨ́ xɨéjniu'ucare'ara'an ɨ́ Dios, a'ɨ́ɨ pu ya'uví'itɨ a'ɨ́jna ɨ́ Jesús ɨ́ jɨrí jetze tɨ́'ij a'ɨ́ɨn tiyaaru'u tiu'utése'en tɨ raamuá'itɨn a'ɨ́jna ɨ́ Jesús. 2Ajta a'ɨ́ɨn Jesús, a'úu pu é'etee a'achú cumu hua'apuate xɨcaj tɨ caí tí'icua'a. Aj pu i huata'í'icuataca'a. 3Ajta á'iyen a'ɨ́ɨn tiyaaru'u e'iré'ene a'ɨ́jna ɨ́ Jesús jemi tɨ ij raamuá'itɨn. Ayee pu tiraatá'ixaa tɨjɨ́n: ―Tɨ́ pua'a hui yaujra'an pej pú'een ɨ́ Dios. Patá'aj raata'aíjte'en amɨ́jna mɨ tetej tɨ́'ij pan huateújtaahua. 4Ajta Jesús, ayée pu tiu'utaniú tɨjɨ́n: ―Capu a'ɨ́ɨ na'a ruxe'eve'e ɨ́ pan tɨ jɨ́n te'utáviicua'i ɨ́ tevi, sino ajta pu a'ɨ́ɨn ruxe'eve'e nain ɨ́ niuucari tɨ é'eme'ecan ɨ́ Dios jemi. 5Tɨ'ɨj jí a'ɨ́ɨn tiyaaru'u ajtahua'a ya'uví'itɨ a'ɨ́jna ɨ́ Jesús a'ánna Jerusalén. Teyuu pu japuan ra'antítuaa a'u tɨ e'evé'epa'atzara'a. 6Ajta ayén tiraatá'ixaa tɨjɨ́n: ―Tɨ́ pua'a hui yaujra'an pej pú'een ɨ́ Dios, ancájvetzi, a'iné ayée pu té'eyu'usi'i ɨ́ yu'uxari jetze tɨjɨ́n: Dios pu huaja'uta'íti ɨ́ mej títetateí ɨ́ jemin mej mi muáacha'ɨn. Majta mú'eetzi memuá'atɨni rumuájca'a jɨme'e. A'ɨ́ɨme mú á muaatéchajtza tɨ́'ij caí ti'itɨ́j a'ij muaruure. 7Jesús pu ayén tiraatá'ixaa tɨjɨ́n: ―Mɨ́ ajta, ayée pu che'atá na'a ayén té'eyu'usi'i ɨ́ yu'uxari jetze tɨjɨ́n: “Capej piyen tirá'axɨeehuari'ira ti'itɨ́j jɨme'e tɨ Dios ayén ti'itɨ́j jɨ́n huárɨni.” 8Ajta a'ɨ́ɨn ɨ́ tiyaaru'u, ajtahua'a pu ya'uví'itɨ já'ahua'a yee jɨrí jetze tɨ ájtee. Aj pu i raataseíjra nainjapua, tɨ́j na'a seɨ́j chuéjra'a japua a'u mej a'uchéjme ɨ́ teɨte. Raataseíjra a'achú tɨ ve'etɨ́ a'uun huatacá'a. 9Ayee pu tiraatá'ixaa tɨjɨ́n: ―Nain nu muatapuaíjve'esin ne'íjna tɨ pua'a piyen huárɨni pej títunuta, pej pi naateánajche. 10Aj pu i Jesús ayén tiraatá'ixaa tɨjɨ́n: ―Aricu, mú'ee pej i'i tiyaaru'u, a'iné ayée pu té'eyu'usi'i ɨ́ yu'uxari jetze tɨjɨ́n: “Setá'aj raateánajche se'ɨ́jna ɨ́ tavástara'a ɨ́ a'amua Dios. A'ɨ́j xu'u huatévaɨre'en.” 11Aj pu i á'uraa a'ɨ́jna ɨ́ tiyaaru'u. Capu ché'e a'ij ráaruu. Matɨ́'ɨj mi huataseíjre ɨ́ mej títetateí ɨ́ ta japua mej mi raatévaɨre'en me'ɨ́jna ɨ́ Jesús. 12Tɨ́'ɨj Jesús ráamua'areeri'i tɨ aiteánami'ihuaca'a a'ɨ́jna ɨ́ Juan, aj pu'i á'uraa a'ujna chuéjra'a japua tɨ ayén téja'arájtehuaa tɨjɨ́n Galilea. 13A'uu pu e'erájraa a'ujna Nazarét. Tɨ'ɨj jí a'uun a'ucáane a'ujna Capernaúm, chajta'a tɨ a'utacá'a a'ujna tɨ e'eve'e'ástɨme ɨ́ jaj tɨ a'utacá'a a'ájna vejli'i seɨ́j chuéjra'a japua tɨ ayén téja'arájtehuaa tɨjɨ́n Zabulón, ajtahua'a seɨ́j chuéjra'a japua tɨ ayén téja'arájtehuaa tɨjɨ́n Neftalí. 14Ayee pu tiuju'urɨ́j tɨ ij ayén araúrasten a'ij tɨ tiu'utaxájtaca'a a'ɨ́jna tɨ tí'ixaxa'ata'a ɨ́ Dios jetze me'ecan a'ɨ́jna ɨ́ Isaías. 15Ayen tɨjɨ́n: Ayee pu té'eme a'ujna chuéjra'a japua a'u mej é'eche ɨ́ teɨte ɨ́ mej caí Israél jetze ajtéme'ecan, a'ujna tɨ huatacá'a u Zabulón, ajta ɨ́ seɨ́j chuéjra'a japua u Neftalí, ajta seɨ́j ɨ́ juye tɨ a'uun e'etéeneana a'u tɨ e'eve'e'ástɨme ɨ́ jaj tɨ ve'ée, ajta utavén pújme'en ɨ́ Jordán, ajta u Galileeye a'u mej a'uchéjme ɨ́ mej caí Israél jetze ajtéme'ecan. 16A'ɨ́ɨme ɨ́ teɨte, a'iné capu huá'a jemi raateájtuaa ɨ́ mej seijre'eca'a ɨ́ tɨ́ca'ari tzajta'a, a'ɨ́ɨ mú raaseíj tɨ u ajtátzaca'a, temua'a naa, majta a'ɨ́ɨme ɨ́ mej a'uchéjme'ecaa a'u mej yé'ejpuaíjtzica'a, ayée mú 'eene'e, xɨee mej cuj mɨ́'ɨchica'a, a'iné ayée pu hua'é'ene'e, xɨee tɨ huatɨ́ca'a. Aj pu'i huá'a jetze huatátzareajraa. Ayee pu tiu'utaxájtaca'a. 17Tɨ'ɨj jí a'ɨ́ɨn Jesús a'utéjche tɨ tihuá'amua'aten. Ayee pu tihuá'atixáate'ajraa tɨjɨ́n: ―Setá'aj seɨcɨé tiú'umua'ati ɨ́ ru tzajta'a a'iné pu'uri tɨ́n teja'uré'enejsin tɨ tiu'uta'aíjta ɨ́ Dios íiyen chaanaca japua. 18Ajta ɨ́ Jesús, áa pu 'ejtéme'eca'a a'ájna vejli'i tɨ e'eve'e'ástɨme ɨ́ jaj tɨ ayén téja'arájtehuaa tɨjɨ́n Galilea. Tɨ́'ɨj i a'ɨ́mej huaseíj ɨ́ mej hua'apua ɨ́ mej ru'ihuaamua'a pú'een. A'ɨ́ɨme mú a'ɨ́ɨn pú'een a'ɨ́jna ɨ́ Simón, ajta juutzeájra'an a'ɨ́jna ɨ́ Andrés. Ajta a'ɨ́jna ɨ́ Simón, ayée mú majta ratamuá'amua tɨjɨ́n Pedro. A'ɨ́ɨ mú xɨéjmua'ari jɨ́n hua'ité vivi'iraca'a. Ayee mu'u tí'ijrɨ'ɨrejca'a a'ɨ́ɨme. 19Aj pu i Jesús ayén tihua'utá'ixaa tɨjɨ́n: ―Mú se'utáuruyi'i neetzi jemi. Nee nu tejá'amuamua'aten sej si caí ché'e siyen hua'ité tí'iviivi'ira'an sino teɨte xu'u si tíseɨre'esin ineetzi jemi. 20Jɨ́me'en pu'u ayén tihua'utá'ixaa, aj mú mi raatapuá'ajtaca'a. Matɨ́'ɨj mi ateja'upí ɨ́ xɨéjmua'ari, Matɨ́'ɨj mi a'ucɨ́ jamuan. 21Tɨ́'ɨj ijtá'i á'ayee a'uré'ene. Ajtahua'a pu hua'apuaca huaseíj ɨ́ mej ru'ihuaamua'a pú'een. Seɨ́j pu ayén ántehuaa tɨjɨ́n Jacobo. Ajta ɨ́ juutzeájra'an, ayée pu ántehuaa tɨjɨ́n Juan. A'ɨ́ɨ pu huá'ape'eri ɨ́ Zebedeo. A'uu mú a'aráte'eca'a ɨ́ canuuhua'a jetze. Huá'a jamuan pu arácatii ɨ́ hua'atáàta. Xɨéjmua'ari mú rɨ́'ɨ tí'iruurejca'a tɨ tí'isiujtza'ani. Tɨ́'ɨj i Jesús hua'utajé mej mi jamuan á'ujujhua'ane'en. 22Aj mú mi raatapuá'ajtaca'a. Matɨ́'ɨj mi aitacɨ́j ɨ́ canuuhua'a jetze. A mú yaúurɨe ɨ́ rutáàta. Matɨ́'ɨj mi a'ucɨ́j jamuan ɨ́ Jesús. 23Tɨ́'ɨj a'ɨ́ɨn ɨ́ Jesús a'utéjche tɨ á'uche'ecane'en nainjapua tɨ́j na'a a'úu tɨ huatacá'a u Galileeye, a'ɨ́ɨ pu tihuá'amua'atehua'a ɨ́ teɨte tɨ́j na'a tɨ seijre'e hua'ateyuu tzajta'a. A'ɨ́ɨ pu jɨ́n tihuá'a'ixa'atehua'a ɨ́ niuucari tɨ jɨ́me'en raxa ɨ́ Dios tɨ tí'aijta nainjapua ɨ́ chaanaca. Ajta Jesús tihuá'uhuaa naíjmi'ica ɨ́ mej tí'icucui'i. Capu tí'iseicaj na'a ɨ́ cuí'ini'ira'a. A'ɨ́ɨ pu nain jɨ́n tiú'uhuaataca'a. 24Aj mú mi ráamua'areeri'i tɨ́j na'a a'uun tɨ huatacá'a seɨ́j ɨ́ chuéjra'a japua tɨ ayén téja'arájtehuaa tɨjɨ́n Siria. A'ɨ́j mú huámua'areeri'i a'ij tɨ ti'itɨ́j huáruu a'ɨ́jna ɨ́ Jesús. Matɨ́'ɨj mi u huaja'aráavi'itɨ ɨ́ mej tí'icucui'i, tɨ ti'imu'íi ɨ́ cuí'ini'ira'a. Seica mú huápɨ'ɨ tí'icucui'icaa, ajta seica, capu huá'aca'anisti'iraca'a. Ajta seica, tiyaaru'u pu huá'a tzajta'a seijre'eca'a, majta seica ɨ́ tɨ hua'acáteuunéjme'ecaa, majta seica mú cɨyáaxavi'i. Naíjmi'ica pu tihuá'uhuaa. 25Jéihua mú ajteáxɨɨreca'a ɨ́ teɨte, ɨ́ mej me'uun e'eráacɨ a'ujna chuéjra'a japua u Galileeye. Majta seica, a'úu mú e'eráacɨ tɨ ayén téja'arájtehuaa tɨjɨ́n tamuáamuata'a tɨ chájta'ajme, majta seica me'újna já'ahua'a u Jerusalén, majta seica tɨ́j na'a a'uun tɨ huatacá'a u Judea. Seica mú majta aitacɨ́j ɨ́ mej utavén pújme'en e'echéjme'e u Jordán. Jéihua mú jamuan á'ujujhua'ane'e.

will be added

X\