San Mateo 3

1A'ájná'ɨmua aj pu a'utaseíjre a'u tɨ caí é'e ti'itɨ́j a'ɨ́jna ɨ́ Juan tɨ huá'amuaɨ'ɨhuacare'e. A'uu pu tihuá'a'ixaate'eca'a. 2Ayee pu tihua'utá'ixaa tɨjɨ́n: ―Setá'aj seɨcɨé tiú'umua'ati ɨ́ ru tzajta'a a'iné pu'uri hui tɨ́n a'ájna teja'uré'enejsin tɨ Dios íiyen tiu'uta'aíjta nainjapua ɨ́ chaanaca. 3A'ɨ́jna ɨ́ Juan, a'ii pu a'ɨ́ɨn pú'eene'e tɨ jɨ́me'en raataxájtaca'a ajmí'i a'ɨ́jna ɨ́ ja'atɨ tɨ tí'ixaxa'ata'a ɨ́ Dios jetze me'ecan. Ayee pu ántehuaaca'a tɨjɨ́n Isaías. Ayen tɨjɨ́n: Ja'atɨ́ pu u e'ejíihuá a'ame a'ujna já'ahua'a a'u tɨ caí é'e ti'itɨ́j. Yee pu ti'ixa tɨjɨ́n: “Naa xu rɨ́'ɨ huaujjéjcuare'en, mɨ ru tzajta'a, mú'een, a'iné tavástara'a pu yé uvé'enejsin. Caxu a'ij yá'unamuajra.” 4Ajta a'ɨ́jna ɨ́ Juan, ayée pu éene'e ti'itéchejca'a cɨ́ɨxuri tɨ itzíjhua, cameeyu'u ju'uxa'a jɨme'e. Ajta típuaasica'a, navij tu rumua'atɨ́. Ajta nu'u huátuna'ise cua'acare'e, ajta searate, 'ɨtzitá mej xuaa. 5Majta me'ɨ́n ɨ́ mej a'ɨmuá a'uchéjme'ecaa, naíjmi'i mú e'iré'enineica'a a'u tɨ a'utéveeca'a ɨ́ Juan. A'uu mú e'erácɨ'ɨca'a tɨ́j na'a a'u tɨ huatacá'a a'ujna chuéjra'a japua tɨ ayén téja'arájtehuaa tɨjɨ́n Judea, majta seica ɨ́ mej me'uun é'eche a'ujna chajta'a tɨ ayén téja'arájtehuaa tɨjɨ́n Jerusalén, majta ɨ́ seica ɨ́ mej me'uun é'eme'ecan a'u tɨ a'atamɨ́'ɨye ɨ́ játe'ana tɨ ayén téja'arájtehuaa tɨjɨ́n Jordán. A'uu mú a'uré'enineica'a mej mi ráanamua. 6Jɨ́me'en mu'u tiu'utétzaahuate ɨ́ mej jɨ́n auteájturaa ɨ́ Dios jemi, aj pu'i Juan huá'amuaɨ'ɨhuaca'a ɨ́ játe'anara'an jetze ɨ́ Jordán. 7Mɨ́ ajta ɨ́ Juan, tɨ́'ɨj a'ɨ́mej huaseíj ɨ́ mej miyen ánte'arua tɨjɨ́n fariseos, majta ɨ́ mej miyen ánte'arua tɨjɨ́n saduceos, tɨ́'ɨj a'ɨ́ɨn hua'useíj ɨ́ mej jeíhua e'evé'eju'uca'a mej mi huaújmuaɨ'ɨhua, ayée pu tihua'utá'ixaa tɨjɨ́n: ―Mú'een mɨ sej tí'ihua'itaca, ¿ni tzaa seri tí'itese'e tɨ caí Dios puaíjtzi amuaatá'an? ¿A'ataani amuaatá'ixaa sej si siyen rɨcɨ? 8Rɨ́'ɨ xu'u se'íjna jɨme'e mej mi ráamua'aree ɨ́ teɨte sej seri tzáahuati'ira'a jɨ́n tí'imua'atze. 9Caxu siyen tí'imua'ajca ɨ́ ru tzajta'a yee: “Ayej ti'ayajna tɨ naa titaatévaɨre'en a'iné teen tu i'i huáacɨxa'astemua'ame'en a'ɨ́jna ɨ́ Abraham teecan.” Ayee nu tejá'amua'ixaate'e. Ayej ti'ayajna tɨ Dios raayɨ́'ɨtɨ tɨ rɨ́'ɨ raará'atza ɨ́ tete matɨ́j ɨ́ huáacɨxa'astemua'ame'en a'ɨ́jna ɨ́ Abraham teecan. Capu ti'itɨ́j a'ij tejámuaatévaɨre'esin sej siyen tí'imua'ajca rujɨ́ɨmua'a sino sej siyen huanén tɨ́j Abraham teecan. 10Pu'uri teja'uré'enejsin vejli'i a'ájna xɨcájra'a jetze ja'anáj tɨ pua'a amua'ajteá'axɨ'ɨsin ɨ́ Dios ca'anín jɨme'e. Ayee pu á'amuaruuren cumu tɨ́j ja'atɨ́ cɨyej té'ijveichixɨ'ɨn tepuaij jɨme'e. Nain ɨ́ cɨyej tɨ caí tí'itaaca, a'ɨ́ɨ pu té'ijveichixɨ'ɨsin. Tɨ'ɨj jí ra'anteátaira. Ayee pu che'atá na'a tejamua'ajteá'axɨ'ɨsin mú'ejmi. 11Aru inee, nee nu amuáamuaɨ'ɨhuaca'a jaj jɨme'e mej mi ráamua'aree ɨ́ teɨte sej seri seɨcɨé tiu'umuá'aj ɨ́ ru tzajta'a. Mɨ́ ajta, a'ɨ́ɨn tɨ hui nehuárita'a yé e'evé'eme, a'ɨ́ɨ pu jaítze'e raayɨ́'ɨtɨ necaí inee. A'iné nee nu cɨ́lieene'en jɨ́n ti'itéjvee ɨ́ jemin, capu ayén tínaavíjte'e ineetzi nej rajtaɨ́'ɨpɨ'ɨn ɨ́ ca'acaira'an. Mɨ́ ajtá'i a'ɨ́ɨn, seɨ́j pu huata'íti tɨ huateáturan mú'ejmi jemi. Ajta a'ɨ́ɨn ɨ́ xɨéjniu'ucare'ara'an ɨ́ Dios, a'ɨ́ɨ pu uté'a'asin mɨ a'amua tzajta'a. Ajta a'ɨ́jna tɨ hui nehuárita'a yé e'evé'eme, a'ɨ́ɨ pu rɨ́'ɨ á'amuaruuren. 12Ayee pu té'eme. Xɨee tɨ ja'atɨ́ ari ru'ite'ɨ́ ɨ́ tɨ jɨ́n ra'anáca'atzi ɨ́ triigu. A'ɨ́ɨ pu ru'irátu'isin ɨ́ xaɨɨri pua'acɨé. Ajta a'ɨ́jna ɨ́ imue'eri, rájseɨre'esin u chi'ita. Ajta ɨ́ xaɨɨri, taij jetze pu án yá'urɨeexɨjsin ɨ́ tɨ caí ja'anáj á'amɨ'ɨni. ―Ayee pu tihua'utá'ixaa a'ɨ́jna ɨ́ Juan. 13Aj pu i Jesús huataseíjre. A'uu pu a'arájraa a'ujna chuéjra'a japua tɨ ayén téja'arájtehuaa tɨjɨ́n Galileeye tɨ́'ij Juan ráamuaɨ'ɨhua játe'ana jetze tɨ ayén ántehuaa tɨjɨ́n Jordán. 14Ajta a'ɨ́jna ɨ́ Juan, ayée pu tí'imua'ajca tɨ raatá'ijmɨi. Ayee pu tiraatá'ixaa tɨjɨ́n: ―¿Ni mú'ee piyen yé vé'eme inee jemi? Jaítze'e pu raavíjte'e pej piyen náamuaɨ'ɨhua ineetzi. 15Mɨ́ ajta a'ɨ́ɨn ɨ́ Jesús, ayée pu tiraata'ixaa tɨjɨ́n: ―Ché'e ayén 'eene'en. Ayee pu hui tiraavíjte'e tej tiyen huárɨni tej ra'ará'astijre'en te'ɨ́jna jɨme'e a'ij tɨ tí'ijxe'eve'e ɨ́ Dios. Aj pu i Juan ráamuaɨ'ɨhuaca'a ɨ́ Jesús. 16Tɨ́'ɨj ráamuaɨ'ɨhuaca'a, aj pu'i Jesús a'itáraa á jaata'a. Jɨ́me'en pu'u a'itáraa, tɨ́'ɨj jí antácuunareca'a ɨ́ ta japua tɨ a'utéjmuaa. Tɨ'ɨj jí iiraaseíj tɨ a'icamé'ecaa a'ɨ́jna ɨ́ xɨéjniu'ucare'ara'an ɨ́ Dios. Ayee pu seijre'eca'a tɨ́j cucui'i. Tɨ'ɨj jí japuan a'ujyeíjxɨ. 17Ajta á'iyen niuucari huánamuajri'i tɨ júte'e uj e'icánamuajre'e. Ayen tɨjɨ́n: ―Niyauj pej pɨ́rɨcɨ ɨ́ nej muá'ixe'eve'e. Jé'ecan pej hui naa rɨ́'ɨ naatá'a i ne tzajta'a.

will be added

X\