San Mateo 28

1Tɨ́'ɨj mú á'ume a'ɨ́jna ɨ́ xɨca mej jetzen ruse'upi, tapuá'arijme'eca, a'ɨ́jna ɨ́ María, Magdala tɨ é'eme'ecan, ajta ɨ́ seɨ́j tɨ ajta María, u mú á'uju'un mej mi ya'utéeseij a'u mej ye'avá'ana. 2Ca'anín pu jɨ́n huateújca'atzɨjxɨ ɨ́ chuej a'iné seɨ́j tɨ tí'ivaɨre'e u ta japua, a'ɨ́ɨ pu e'icaanej u júte'e. Aa pu e'iré'ene a'u mej ye'avá'ana. Antárɨiihuaca'a a'ɨ́jna ɨ́ tete tɨ jɨ́n ujnámi'ihuaca'a tɨ únú'ujcun. Ajta japuan a'ujyeíjxɨ. 3Jé'ecan pu tétaave'e cuaiínavi'in jɨme'e i tɨ jɨ́n ti'itéechen temua'a naa a'ɨ́jna ɨ́ ja'atɨ. 4Majta me'ɨ́n ɨ́ mej tí'icha'ɨɨca'a, huápɨ'ɨ mú ruviveeca'a, majta a'itavátzɨ me'ɨ́jna jɨme'e mej huápɨ'ɨ tiu'utátziɨn. Cu xɨee mej cuj huácuii. 5Ajta a'ɨ́ɨn tɨ tí'ivaɨre'e u ta japua, ayée pu tihua'utá'ixaa a'ɨ́mej ɨ́ 'uuca tɨjɨ́n: ―Caxu tí'itziɨɨne'e, a'iné néjmua'aree sej u ye'evé'ehuau se'ɨ́jna ɨ́ Jesús ɨ́ mej rá'utatai. 6Capu hui ye'e já'ahua'a a'iné pu'uri huatarúj tɨ́j ajmí'i tiu'utaxájtaca'a. Casi'i, mú sé'uju'un setá'aj ya'useíj a'u mej ye'etéete. 7’Seajta, setá'aj á'ucɨɨne jíye'itzi jɨme'e sej si huaja'utá'ixaate'en a'ɨ́mej ɨ́ mej jamuan á'ujujhua'ane'e tɨ jɨ́me'en yee: “A'ɨ́ɨ pu ari huatarúj, ajta amuacaí pu nu'u a'umé'e a'ame a'ujna Galilea tɨ ij a'ɨ́ɨn huajá'uchu'eve'en a'ujna. A'uu xu nu'u yé'eseijran.” Nu'uri amuaatá'ixaa. 8Majta me'ɨ́n ɨ́ 'uuca, ca'anacan mú a'ucɨ́j. Maúche'e mú tí'itziɨɨne'eca'a. Mɨ́ majta, muaataújtemua'ave jeíhua. A'uu mú a'uruáachejraa mej mi tihua'utá'ixaate'en a'ɨ́mej ɨ́ mej Jesús jamuan á'ujujhua'ane'e. 9Ajta, jíye'itzi jɨ́n, Jesús huá'uteu. Ayee pu tihua'utateújte tɨjɨ́n: ―¿A'iné sena'a? Majta me'ɨ́n, á mú e'iré'ene jemin. Majta ra'avé'evi'iraxɨ ɨɨcájra'an jetze. Majta rɨ́'ɨ tiraatá'a. 10Aj pu i Jesús ayén tihua'utá'ixaa tɨjɨ́n: ―Caxu tí'itziɨɨne'e. Sericu mú'een, setá'aj tihua'utá'ixaate'en ɨ́ ne'ihuaamua'a mej á'ucɨɨne me'újna Galilea. A'uu mú hui nejé'eseijran. 11Maúche'e mú huajú'ucaa a'ɨ́ɨme ɨ́ 'uuca, seica mú a'uun á'uju'un u chajta'a. A'ii mú a'ɨ́ɨn pú'een seica ɨ́ mej tí'icha'ɨɨca'a. Majta miyen tihua'utá'ixaa a'ɨ́mej ɨ́ mej tí'aijta teyujta'a nain a'ij tɨ ti'itɨ́ huarɨ́j. 12Majta me'ɨ́n ɨ́ mej tí'aijta teyujta'a, a'ɨ́ɨ mú tiújseɨj huá'a jamuan ɨ́ vaujsi mej mi raaxɨ́'epɨ'ɨntare'en a'ij mej ye'í huárɨni. Aj mú mi tumin hua'utá'a ɨ́ xantaaru'u, jeíhua. 13Ayee mú tihua'utá'ixaa tɨjɨ́n: ―Ayee xu huárɨni mú'een. Setá'aj siyen tihua'utá'ixaate'en yee: “Seica mú mú a'uvé'eju'un tɨ́ca'ɨmua a'ɨ́ɨme ɨ́ mej Jesús jamuan á'ujujhua'ane'e tetɨ́'ɨj cu'utzuca'a iteen. A'ɨ́ɨ mú yá'utɨɨ ɨ́ tévira'an avíitzi jɨme'e.” 14Ajta tɨ pua'a ráamua'aree ɨ́ tajtuhuan a'ij tɨ ti'itɨ́ huarɨ́j, teen tu tiyen tiraatá'ixaate'esin tɨ ij caí ti'itɨ́j jɨ́n a'ij amuáaruuren mú'ejmi. 15Majta tumin mú á'utɨɨ a'ɨ́ɨme ɨ́ xantaaru'u. Majta miyen che'atá mena'a huarɨ́j matɨ́j me'ɨ́n seica hua'uta'íteca'a. Tɨ́j na'a tɨ yú e'iré'ene, ayée mú tí'ixaxa'a nainjapua a'ɨ́ɨme ɨ́ mej Israél jetze ajtéme'ecan tɨ ayén ti'ayajna. 16Majta me'ɨ́n ɨ́ mej tamuáamuata'a japuan seɨ́j mua'ará'axcaa, a'úu mú á'uju'un a'ujna Galilea. A'uu mú a'ará'a jɨrí jetze tɨ́j amuacaí tihua'utá'ixaa a'ɨ́jna ɨ́ Jesús mej nu'u me'uun a'atanén. 17Matɨ́'ɨj raaseíj, aj mú mi rɨ́'ɨ tiraatá'a. Mɨ́ majta me'ɨ́n, camu rɨ́'ɨ rá'atzaahuate'eca'a tɨ a'ɨ́ɨn pú'eene'e. 18Aj pu i Jesús e'iré'ene vejli'i huá'a jemi. Ayee pu tihua'utá'ixaa tɨjɨ́n: ―Pu'uri naatá'a nej niyen nain jɨ́n antínmua'aree tɨ́j na'a tɨ a'uun é'eseijre'e u ta japua, ajta tɨ́j na'a tɨ íiyen seijre'e chaanaca japua. 19’A'ɨ́j xu jɨ́n a'ucɨ́jxɨ'ɨn nainjapua seɨ́j chuéjra'a japua sej si hua'utémua'itɨn ɨ́ teɨte mej mi na'ará'astijre'en. Seajta huá'umuaɨ'ɨhuan niuucajtze'en ɨ́ tɨ ní'iya'upua, seajta niuucajtze'en ɨ́ nej i'i yaujra'an, seajta niuucajtze'en ɨ́ xɨéjniu'ucare'ara'an ɨ́ Dios. 20’Seajta mú'een, setihuá'amua'atehua'an mej mi nain jɨ́n na'ará'astijre'en a'ij nej neri tejamuaata'aíj mú'ejmi. Neajta inee, rɨ́'ɨ nu'u yé huatevée na'ame a'amua jemi tɨ́j na'a tɨ yú auca'itɨ́ a'ame asta na'a caí nain te'entipuá'are. Ayee pu'u.

will be added

X\