San Mateo 26

1Tɨ́'ɨj Jesús raatapuá'ajtaca'a tɨ nain tiu'utaxájtaca'a a'íjna i niuucari, aj pu i ayén tihua'utá'ixaa a'ɨ́mej ɨ́ mej jamuan á'ujujhua'ane'e. 2Ayen tɨjɨ́n: ―Xu'uri ramua'aree tɨ ari vejli'i a'ájna mej tí'iyesten me'ɨ́jna jɨme'e tɨ Dios tihua'utá'uuni'i. A'atura aúche'e hua'apua xɨca. Ja'atɨ́ pu ajta tiu'utátuiire'esin ɨ́ nejɨ́me'e i nej neajta teáata'a jetze airáane mej mi ná'utatan cúruu jetze. ―Yee pu'u tihua'utá'ixaa. 3Majta me'ɨ́n ɨ́ mej tihuá'aijte'e teyujta'a, majta a'ɨ́ɨme ɨ́ mej tiú'ujmua'ate ɨ́ niuucari jɨme'e tɨ tí'aijta, majta ɨ́ hua'avaujsi ɨ́ mej Israél jetze ajtéme'ecan, a'úu mú e'etiújseɨj u chi'ira'an jetze a'ɨ́jna tɨ nain jɨ́n antiújmua'aree u hua'atéyujta'a. Ayee pu ántehuaa a'ɨ́jna tɨjɨ́n Caifás. 4A'ɨ́ɨ mú tiú'ujmua'atziite'eca'a a'ij mej ye'í huárɨni mej mi hua'itzi jɨ́n raatéevi'i me'ɨ́jna ɨ́ Jesús mej mi raajé'ica. 5Majta miyen tí'iru'ixaate'eca'a tɨjɨ́n: ―Catu raatévi'ira matɨ́'ɨj tí'iyeste ɨ́ teɨte mej mi caí huataníniu'ucacu. Tɨ́ pua'a tiyen huárɨni, a'ɨ́ɨ mú taaténe'usi'ite'esin. 6Ajta a'ɨ́jna ɨ́ Jesús, a'úu pu a'utéveeca'a u Betania a'u tɨ é'eche a'ɨ́jna ɨ́ ja'atɨ tɨ ayén ántehuaa tɨjɨ́n Simón. A'ii pu a'ɨ́ɨn pú'een ɨ́ mej majta miyen ratamuá'amua tɨjɨ́n Tɨ́ Cá'atzaj. 7Aj pu i seɨ́j á e'iré'ene jemin a'ɨ́jna ɨ́ Jesús. 'Ɨ́ita'a pu pɨ́rɨcɨ tɨ limeeta huátɨsime'eca'a. Tetej limeetajra'a pu pú'eene'e. Naa pu te'evé'ejɨstica'a tɨ naa teáarɨ́'e, tɨ ajta huápɨ'ɨ tí'ijnajche. Tɨ́'ɨj Jesús huatecaíca meesa jetze, a'ɨ́ɨn 'ɨ́ita'a án pu yé'ajtuaa án mu'úutze'en. 8Majta me'ɨ́n ɨ́ mej Jesús jamuan á'ujujhua'ane'e, matɨ́'ɨj raaseíj a'ij tɨ huarɨ́j, jé'ecan mú huataníniu'ucacuca'a ɨ́ 'ɨ́ita'a jemi. Aj mú mi miyen tiu'utaxájtaca'a tɨjɨ́n: ―¿A'iné 'een jɨ́n á'uvej amɨ́jna ɨ́ aceite? 9Rɨ'ɨríistaca'anche'e pu mej ráatuaanijche'en mej mi raamuá'itɨnche'e jeíhua ɨ́ tumin mej mi hua'utá'an a'ɨ́mej ɨ́ mej caí a'ij tí'ijviicua'i. 10Ajta a'ɨ́ɨn ɨ́ Jesús, a'ɨ́ɨ pu ráamua'areeri'i a'ij mej ye'í tí'ixajtaca'a. Aj pu i ayén tihua'utá'ixaa tɨjɨ́n: ―¿A'iné 'een jɨ́n siyen rájaaxɨejvi'i se'íjna i 'ɨ́ita'a? A'ij tɨ náaruu, temua'a pu naa i'i xɨ́'epɨ'ɨn. 11Ayee nu tejá'amua'ixaate'e. A'ɨ́ɨme ɨ́ mej caí a'ij tí'ijviicua'i, maúche'e mú mú'ejmi jemi seíire'e muá'aju'un tɨ́j na'a rusén jɨme'e. Ja'anáj tɨ na'a pu i í'irɨ'ɨriista a'ame sej siyen tihua'utévaɨre'en. Mɨ́ neajta inee, canu ché'e mú'ejmi jemi seíire'e na'ame. 12’Ayee pu'u, tɨ́'ɨj a'íin 'ɨ́ita'a na'avé'emeijri'i ineetzi, ayée pu 'een jɨ́n ayén náaruu a'ɨ́jna jɨme'e tɨ na'avá'anan. 13Ayee nu tejá'amua'ixaate'e tɨ ayén ti'ayajna, íiyen chaanaca japua, a'u tɨ na'a mej tihua'utá'ixaate'en ɨ́ teɨte a'ij tɨ Dios tihua'irájtuaani a'ɨ́ɨ mú majta hua'utá'ixaate'esin a'ij tɨ huarɨ́j a'íjna i 'ɨ́ita'a mej mi jeíhua ra'utámua'aree. 14Ajta seɨ́j tɨ huá'a jetze ajtéme'ecan ɨ́ mej tamuáamuata'a japuan hua'apua ará'ase, a'ɨ́jna tɨ ayén ántehuaa tɨjɨ́n Judás Iscariotes, a'ɨ́ɨ pu ajtáraa huá'a jemi. A'uu pu á'uraa tɨ ij tiu'uxáj huá'a jamuan ɨ́ mej tí'aijta teyujta'a. 15Ayee pu tihua'uta'íhua'uri'i tɨjɨ́n: ―¿A'achúni setí'ineanajchite'en tɨ pua'a nejamuaatátuiire'en ne'ɨ́jna ɨ́ Jesús? Maraaté'itɨee ɨ́ tumin. Majta raatá'a a'achú cumu seité japuan tamuáamuata'a ɨ́ tumin, rumua'atɨ́ plata. 16Ajta iyá'uraa a'ɨ́jna ɨ́ Judás. Tɨ́j na'a a'ájná'ɨmua, a'ɨ́ɨ pu a'utéjche tɨ ráahuauni ja'anáj tɨ i'i xɨ́'epɨ'ɨn tɨ ij hua'utátuiire'en. 17Tɨ́'ɨj teja'uré'ene a'ájna xɨcájra'a ɨ́ ta'amuájca mej jetzen tí'iyestehua'a matɨ́'ɨj pan cua'acare'e tɨ caí cujchira'a, aj mú mi á e'iré'ene ɨ́ Jesús jemi a'ɨ́ɨme ɨ́ mej jamuan á'ujujhua'ane'e. Ayee mú tiraata'íhua'uri'i tɨjɨ́n: ―¿A'uné jetze mua'aráanajche tej á'uju'un tej ti rɨ́'ɨ tejá'uruuren ɨ́ pej ráacua'ani ɨ́ pan tej jɨ́n ra'utámua'aree a'ájna xɨcájra'a tɨ jetzen Dios tihua'utá'uuni'iri'i ɨ́ tayaujmua'a ɨ́ mej anáaté'ee muaanúnu'ihuaca'a? 18Aj pu i ayén tihua'utá'ixaa tɨjɨ́n: ―Sericu mú'een se'ájna chajta'a. Aa xu ja'atɨ́ é'eteuni. Setá'aj siyen tiraata'ixaate'en yee: “Yee pu ti'ixa ɨ́ maestro tɨjɨ́n pu'uri a'ájna teja'uré'ene nej nain jɨ́n raanaíjmire'en, neajta nej ra'utámua'aree a'ájna xɨcájra'a tɨ jetzen Dios tihua'utá'uuni'iri'i ɨ́ tayaujmua'a mej anáaté'ee muaanúnu'ihuaca'a.” 19Majta me'ɨ́n ɨ́ mej Jesús jamuan á'ujujhua'ane'e, ayée mú huarɨ́j a'ij tɨ Jesús tiu'uta'aíjtaca'a. Nain mú rɨ́'ɨ tiú'uruu ɨ́ mej tí'icua'ani. 20Tɨ́'ɨj huachúmua'ancaa, Jesús pu huatecaíca ɨ́ meesa jetze huá'a jamuan ɨ́ mej tamuáamuata'a japuan hua'apua mua'ará'axcaa. 21Mu'uri tí'icua'acáa, tɨ́'ɨj ayén tihua'utá'ixaa tɨjɨ́n: ―Ayej xaa ne'u ti'ayajna, seɨ́j tɨ a'amua jetze ajtéme'ecan, a'ɨ́ɨ pu nejɨ́me'e tiu'utátuiire'esin huá'a jemi ɨ́ mej tí'aijta teyujta'a. 22Aj mú mi huataújxɨeemɨste ɨ́ ru tzajta'a. Ma'utéjhuii mej raata'íhua'u me'ɨ́jna ɨ́ Jesús, seɨj ajta seɨj. Miyen tɨjɨ́n: ―¿A'ataani a'ɨ́ɨn pú'een? ¿Ni qui inee? Ajtahua'a seɨ́j ayén tɨjɨ́n: ―¿A'ataani a'ɨ́ɨn pú'een? ¿Ni qui inee? 23Jesús pu ayén tiu'utaniú tɨjɨ́n: ―A'ijna tɨ pan cua'a a'íjna jetze i tuxa'a nee jamuan, a'ii pu a'ɨ́ɨn pú'een ɨ́ tɨ nejɨ́me'e tiu'utátuiire'esin. 24Ayee pu teja'uré'enejsin ineetzi jemi i nej neajta teáata'a jetze airáane a'ij tɨ té'eyu'usi'i ɨ́ yu'uxari jetze. Mɨ́ ajta, a'ɨ́jna jemi tɨ nejɨ́me'e tiu'utátuiire'esin, jaítze'e pu raatévaɨre'enche'e tɨ caí huanú'ihuanche'e a'iné rajpuaíitzi pu a'ame huápɨ'ɨ. Ché'e a'ɨ́ɨn huataújxɨeemɨste'en. 25Ajta a'ɨ́ɨn ɨ́ Judás, ɨ́ tɨ hua'utátuiire'emɨ'ɨca'a, ayée pu tiraata'íhua'uri'i tɨjɨ́n: ―Maestru, canu xaa ne'ɨ́n pú'een, ¿ni qui necaí? Jesús pu ayén tiraatá'ixaa tɨjɨ́n: ―Mu'ée pej aseɨ́j piyen tiraataxájtaca'a. 26Maúche'e mú tí'icua'a tɨ́'ɨj Jesús pan ti'ɨ́j. Rɨ́'ɨ pu tiraatá'a ɨ́ Dios, ajta ra'antítaaraxɨ. Aj pu i hua'uré'e'ɨ'ɨpɨ'ɨ. Ayen tihuá'ixaate'e tɨjɨ́n: ―Xa'ancuré'e'ɨ'ɨpɨ'ɨ. Xáacua'a. A'ii pu a'ɨ́ɨn pú'een i nehuá'ira'a. 27Ajta á'iyen, vaasu tijáj. Tɨ́'ɨjta'i rɨ́'ɨ tiraatá'a ɨ́ Dios, a'ɨ́ɨ pu hua'uré'i'ite. Ayen ti'ixáata tɨjɨ́n: ―Xa'anti'í, naíjmi'i mú'een. 28A'íjna tɨ urajmuaa, a'ii pu a'ɨ́ɨn pú'een i nexuure'e nej ra'iráxɨre'esin ne'ɨ́jna jɨme'e nej ni raanaíjmire'en a'ɨ́jna tɨ jɨ́n Dios ruseɨ́j ayén te'ataújratziiri'i ɨ́ jéjcua ɨmuá. A'ɨ́j nu jɨ́n huá'a japua niuuni mu'iicáca tɨ ij Dios ayén tihua'utá'uuni'i. 29’Ayee nu tejá'amua'ixaate'e. Ayej xaa ne'u ayén ti'ayajna, íjii tɨ́j na'a tɨ yú auca'itɨ́ a'ame, canu ché'e ra'antí'isin ne'íjna i já'ara'a uuva jetze tɨ me'ecan sino a'ájna xɨcájra'a tɨ Dios jetzen huateúra'ate'esin nainjapua ɨ́ chaanaca. Aj nu xaa a'amua jamuan ra'antí'isin neajtahua'a rujéjcuatze'en. 30Aj mú mi seɨ́j tiu'utáchuiicaca'a ɨ́ mej jɨ́n rɨ́'ɨ tiraatá'a ɨ́ Dios. Aj mú mi a'ucɨ́j. A'uu mú a'ará'a Aceituunajemi, jɨrí tɨ á'utaaca. 31Aj pu i Jesús ayén tihua'utá'ixaa tɨjɨ́n: ―Ijii, tɨ tɨ́ca'aren, mé xu núujɨsin. Setiu'utatévi'ira'ata neetzi jemi. Ayee pu té'eme tɨ́j té'eyu'usi'i tɨ Dios ayén tiu'utaxájtaca'a tɨjɨ́n: “Nee nu i nej i'i Dios, a'ɨ́j nu jé'icatan cáne'axɨ tɨ tiseíj. Majta me'ɨ́n a'ucɨ́jxɨ'ɨsin ɨ́ cáne'axɨ.” 32Mɨ́ neajta inee, netɨ́'ɨj huatarún, áa nu a'umé'e na'ame u Galilea. Amuacaí nu ará'aiixa, seajta á'iyen mú'een. 33Ajta a'ɨ́ɨn ɨ́ Pedro, ayée pu tiu'utaniú tɨjɨ́n: ―Capu amɨ́n a'ij tɨ pua'a naíjmi'i metiu'utatévi'ira'ata mɨ seica mú'eetzi jemi. Canu ja'anáj niyen rɨni inee. 34Aj pu i Jesús ayén tiraatá'ixaa tɨjɨ́n: ―Ayee nu tí'imua'ixaate'e tɨ ayén ti'ayajna, íjii tɨ́ca'a, tɨ́'ɨj caí xɨ huajíjhuan ɨ́ gallo, huaíca pej piyen tína'avé'avaata yee pej nú'u caí nemua'ate. 35Mɨ́ ajta a'ɨ́ɨn Pedro, ayée pu tiraatá'ixaa ca'anín jɨme'e tɨjɨ́n: ―Tɨ́ pua'a ayén tiú'ujxe'eve'e nej á jamuan huámɨ'ɨni, capu amɨ́n a'ij. Canu ja'anáj niyen tímua'avé'avaata yee nej caí muamua'ate. Majta me'ɨ́n ɨ́ seica, ayée mú che'atá mena'a tiu'utaxájtaca'a. 36Aj pu i á'uraa a'ɨ́jna ɨ́ Jesús, majta me'ɨ́n ɨ́ mej jamuan á'ujujhua'ane'e. A'uu mú a'ará'a, huastari jemi, cɨyej tɨ e'eré'evee tɨ ayén téja'arájtehuaa tɨjɨ́n Getsemaní. Ayee pu tihua'utá'ixaa tɨjɨ́n: ―Yé xu'u tité'en mú'een, iiyecuí. Neajta inee, mé nu'u vejli'i a'atanéjsin nej ni raatéjhuauni ɨ́ Dios jemi. 37Aj pu i á'uraa. Huaja'uví'itɨ a'ɨ́mej, a'ɨ́jna ɨ́ Pedro, ajta a'ɨ́mej ɨ́ mej hua'apua, ɨ́ mej yaújmua'ame'en pú'een a'ɨ́jna ɨ́ Zebedeo. Ajta á'iyen a'ij pua'a raatá'a ɨ́ ru tzajta'a. Jé'ecan pu huataújxɨeemɨste. 38Aj pu i ayén tihua'utá'ixaa tɨjɨ́n: ―Jé'ecan pu caí nú'uca'anisti'i yú ne tzajta'a. Huápɨ'ɨ nu nexɨeemɨste'e. Cu xɨee nej cuj mɨ'ɨni. Yé xu huateáturan mú'een íiye. Seuche'e xu atanéjne'ere nee jamuan. 39A'atzu pu a'ɨmuá ájca'i yee a'uré'ene. Tɨ́'ɨj i é'ejtunutaca'a á chuaata'a. Aj pu i ayén tirájhuaviiri'i ɨ́ Dios tɨjɨ́n: ―Dios pej ní'iya'upua, naíjmi'i pu rɨ'ɨrí mú'eetzi jemi. Tɨ́ pua'a peti'itá'acare'en tɨ caí ayén tí'inecɨ'ɨti a'íjna tɨ a'ij pua'a 'een, ɨ́ nej jɨ́n rajpuaíitzi na'ame. Na'ari caí, ché'e caí ayén 'eene'en netɨ́j tí'ijxe'eve'e inee, sino patɨ́j mú'ee tí'ijxe'eve'e. 40Aj pu i á e'iré'ene a'u mej a'uté'uuca'a ɨ́ mej jamuan á'ujujhua'ane'e. Mu'uri í'icu'utzuca'a. Tɨ́'ɨj hua'ujɨ́ste, aj pu i ayén tiraata'íhua'uri'i a'ɨ́jna ɨ́ Pedro tɨjɨ́n: ―¿Ni tzaa pecaí té'eviicua'i pej atáneere nee jamuan a'achú cumu sei hora? 41Seuche'e xu atanéjne'ere, seajta setá'aj raatéjhuauni ɨ́ Dios jemi tɨ́'ij caí tejamuáacɨ'ɨti ti'itɨ́j ɨ́ sej jɨ́n auteáturan ɨ́ Dios jemi. Ayee nu tejá'amua'ixaate'e. Mú'een xu xaa huateújca'anen ɨ́ ru tzajta'a. Mɨ́ ajta caí, capu á'amuaca'anisti'i. 42Ajta á'uraa. Ajtahua'a ayén tirájhuaviiri'i ɨ́ Dios tɨjɨ́n: ―Dios pej ní'iya'upua, tɨ pua'a caí a'ij tí'irɨ'ɨri tɨ i caí ayén tí'inecɨ'ɨti a'ɨ́jna ɨ́ nej jɨ́n rajpuaíitzi na'ame, ché'e ayén 'eene'en patɨ́j tí'ijxe'eve'e mú'ee. 43Tɨ́'ɨjtáhua'a á e'iré'ene. Ajtahua'a pu huá'uteu, mecu'utzúca'a, a'iné jeíhua pu huá'amua'itɨjca'a ɨ́ cutzi. 44Aa mú a'uteájturaa a'ɨ́mej ɨ́ mej cu'utzuca'a. Huaícacajetze pu ajtahua'a u á'ume ɨ́ Jesús. Ajtahua'a pu raatéjhuau ɨ́ Dios jemi. Ayee pu che'atá na'a tirájhuaviiri'i a'ij tɨ amuacaícan tiraatáhuaviiri'i. 45Tɨ́'ɨj ajtahua'a á e'iré'ene a'u mej a'uté'uuca'a a'ɨ́ɨme ɨ́ mej jamuan á'ujujhua'ane'e. Ayee pu tihua'utá'ixaa tɨjɨ́n: ―Pu'uri íjii, sej huápɨ'ɨ rucu'utzive'e. Pu'uri íjii sej huácu'utzu, seajta huaújse'upe'en. Casi'i, pu'uri aúche'e. Pu'uri a'ájna teja'uré'ene tɨ ij a'ɨ́ɨn hua'utátuiire'esin ɨ́ ne jɨ́me'en, i nej neajta teáata'a jetze airáane mej mi naateevi'i a'ɨ́ɨme ɨ́ mej a'ij pua'a rɨcɨ. 46’Xá'ajhuiixɨ'ɨ. Che'eré ticu. Pu'uri e'evé'eme a'ɨ́jna tɨ ne jɨ́me'en tiu'utátuiire'esin. 47Aúche'e pu tí'ixajtaca'a tɨ́'ɨj a'ɨ́ɨn Judás á e'iré'ene. A'ɨ́jna ɨ́ Judás, a'ɨ́ɨ pu huá'a jetze ajtéme'ecan a'ɨ́mej ɨ́ mej tamuáamuata'a japuan hua'apua mua'ará'axcaa. Jéihua mú teɨte jamuan huajú'ucaa. Seica mú tiu'ɨ́'ɨsime'e ɨ́ nahuaa tɨ ruxɨ́'ejta'a te'ejcamɨ́ɨmɨjmee, majta seica cɨyej tiu'ɨ́ɨ ɨ́ mej jɨ́n huá'ucui'ini. Naíjmi'ica mú huata'áijtaca'a a'ɨ́ɨme ɨ́ mej tí'aijta teyujta'a, majta ɨ́ huá'avaujsimua'a ɨ́ teɨte. 48Ajta a'ɨ́ɨn tɨ hua'utátuii a'ɨ́jna ɨ́ Jesús, amuacaí pu ti'ihuaújmua'atzii a'ij tɨ ye'í huárɨni mej mi ráamua'aree ja'atɨ́ tɨ a'ɨ́ɨn pú'een ɨ́ Jesús. Ayen tɨjɨ́n: ―A'ɨ́jna ne'u, ɨ́ nej ru'itépɨ'ɨtze'esin netɨ́'ɨj raatateújte'en, a'ii pu a'ɨ́ɨn pɨ́rɨcɨ. Setá'aj hui raatéevi'i. 49Jɨ́me'en pu'u a'ará'a, aj pu i ajteáxɨɨreca'a a'u tɨ a'utéveeca'a a'ɨ́jna ɨ́ Jesús. Ayee pu tiraatateújte tɨjɨ́n: ―¿A'iné pena'a, Maeestru? Ajta ru'itépɨ'ɨtze. 50Aj pu i ayén tiraatá'ixaa a'ɨ́jna ɨ́ Jesús tɨjɨ́n: ―Ne'amiigu, ¿ni pe'ɨ́jna jɨ́n piyen yé vé'eme? ―Yee pu'u tiraata'íhua'uri'i. Majta me'ɨ́n ɨ́ seica, a'ɨ́ɨ mú ajteáxɨɨreca'a jemin. Matɨ́'ɨj mi raatéevi'i. 51Matɨ́'ɨj raatéevi'i, aj pu i seɨ́j tɨ Jesús jamuan á'uche'ecane'e, a'ɨ́ɨ pu rú'ijcupi ɨ́ runahuaa tɨ ruxɨ́'ejta'a te'ejcamɨ́ɨmɨjmee. Aj pu i ru'itéjtze a'ɨ́jna ɨ́ tɨ ravaɨre'e a'ɨ́jna tɨ tihuá'aijte'e u teyujta'a. Tɨ'ɨj jí ra'ajtaveíjcheca'a ɨ́ naxaira'an. 52Ajta Jesús ayén tiraata'aíj a'ɨ́jna ɨ́ ja'atɨ tɨjɨ́n: ―Ucárujte'e mua'anáhuaa, a'iné tɨ pua'a piyen ruíjcuta mua'anáhuaa, a'ɨ́ɨ mú majta muaajé'icatan nahuaa jɨme'e. 53¿Ni ayén timuá'amitɨejte'e mú'eetzi tɨ ayén ruxe'eve'e pej piyen huárɨni? ’Casi'i, tɨ pua'a niyen raatáhuavii ɨ́ tɨ ní'iya'upua, a'ɨ́ɨ pu raayɨ́'ɨtɨ tɨ hua'uta'aíjte'en a'ɨ́mej ɨ́ mej tí'ivaɨre'e u ta japua mej mi ave'ecanén menaatévaɨre'en. Majta me'ɨ́n, a'ɨ́ɨ mú miyen a'ará'axcan a'achú cumu huaícate vi'ira'a. 54’Aru tɨ pua'a hui niyen huárɨni, capu ché'e huatárɨ'ɨristari tɨ ij ayén araúrasten a'ij tɨ té'eyu'usi'i ɨ́ yu'uxari jetze tɨ nu'u ayén ruxe'eve'e mej miyen náaruuren. 55Aj pu i Jesús ayén tihua'uta'íhua'uri'i ɨ́ teɨte tɨjɨ́n: ―¿Ni siyen yé vé'eju'un se'ɨ́jna jɨme'e ɨ́ nej niyen hua'uré'eseɨre'esin ɨ́ teɨte mej mi huaténe'use'en ɨ́ gobierno jemi? ¿Ni se'ɨ́jna jɨ́n tiu'ɨ́'ɨsin ɨ́ nahuaa tɨ ruxɨ́'ejta'a te'ejcamɨ́ɨmɨjmee, seajta cɨyej tiu'ɨ́'ɨsin sej si naateevi'i? ’Nain tújca'ari tzajta'a tɨ yú e'iré'ene, a'úu nu a'utéveeca'a teyujta'a. Netejá'amuamua'atehua'a nu ná'aye'i. Mɨ́ seajta mú'een, caxu ja'anáj naateevi'i se'újna. ¿A'iné 'een jɨ́n siyen rɨcɨ íjii? 56Ayee pu nain tiuju'umé'e a'ame tɨ i ayén araúrasten a'ij mej mejmí'i tira'uyú'uxaca'a ɨ́ yu'uxari jetze a'ɨ́ɨme ɨ́ mej Dios jetze me'ecan tí'ixaxa'ata'a. Majta me'ɨ́n ɨ́ mej tamuáamuata'a japuan hua'apua ará'axcaa, naími'i mu'u mi á yaúurɨe. Matɨ́'ɨj mi huataúruu. 57Majta me'ɨ́n ɨ́ mej raatéevi'i me'ɨ́jna ɨ́ Jesús, a'úu mú ya'uví'itɨ me'ɨ́jna jemi ɨ́ Caifás, a'ɨ́jna tɨ nain jɨ́n antiújmua'aree teyujta'a. Majta me'ɨ́n ɨ́ mej tiú'ujmua'ate ɨ́ niuucari tɨ tí'aijta, majta me'ɨ́n ɨ́ huá'avaujsimua'a, a'úu mú majta e'etiújseɨre'eca'a a'utɨ́ a'utéveeca'a a'ɨ́jna ɨ́ Caifás. 58Ajta a'ɨ́jna ɨ́ Pedro, a'atzu pu a'ɨmuá raavájrajme'e a'ɨ́jna ɨ́ Jesús. A'uu pu vejli'i a'ará'a a'u tɨ já'ita'a e'eráyaujta'a, a'u tɨ e'irájca a'ɨ́jna tɨ nain jɨ́n antiújmua'aree teyujta'a. A'uu pu ajta a'uteájrupi. Aj pu i huá'a jamuan a'ujyeíjxɨ a'ɨ́mej ɨ́ mej tí'icha'ɨɨ tɨ ij ráamua'aree a'ij tɨ tejauumé'e a'ame. 59Majta me'ɨ́n mej tí'aijta teyujta'a jamuan naími'i ɨ́ hua'ajueesi, a'ɨ́ɨ mú rahuauca'a ɨ́ hua'itzi ɨ́ mej jɨ́n Jesús jetze te'ujpuá'ajte'en tɨ ayén hua'utá'an mej mi raajé'ica. 60Mu'iitɨ́ mú á'ujca'anejca'a mej hua'itzi jɨ́n té'antzaahuate'en. Capu amɨ́n a'ij. Camu ti'itɨ́j huáteu ɨ́ mej jɨ́n jetzen te'ujpuá'ajte'en. A'atzu á'ateevi'ica tɨ ayén tí'irɨcɨ. Aj mú xaa me'ɨ́n ɨ́ mej hua'apua mú á e'iré'ene. 61Ayee mú tihua'utá'ixaa tɨjɨ́n: ―Ayee pu yeehui tiu'utaxájtaca'a amɨ́jna mɨ tevi a'ɨ́jna jɨ́me'en yee: “Nee nu raayɨ́'ɨtɨ nej raaté'uuna a'íjna i teyuu tɨ chi'ira'an pú'een ɨ́ Dios, ajta nu'u ajta rá'ajtaahua huaíca xɨcaj tzajta'a.” 62Aj pu i seɨ́j ájchee. A'ii pu a'ɨ́ɨn pú'eene'e ɨ́ tɨ nain jɨ́n antiújmua'aree u teyujta'a. Ayee pu a'ɨ́ɨn tiu'uta'íhua'uri'i ɨ́ Jesús tɨjɨ́n: ―¿Ni pecaí a'ij pena'a tiu'utániuusin? ¿Ti'itájni pú'een a'íjna ɨ́ mej jɨ́n té'antzaahuate'e mú'eetzi jemi? 63Ajta a'ɨ́ɨn ɨ́ Jesús, capu ti'itɨ́j a'ij tiu'utaxájtaca'a. Ajta a'ɨ́ɨn tɨ nain jɨ́n antiújmua'aree ɨ́ teyujta'a, ayée pu tiraatá'ixaa tɨjɨ́n: ―Ayee nu tí'imua'aijte'e niuucajtze'en ɨ́ Dios patá'aj taatá'ixaate'en ja'atɨ́ pej pú'een. ¿Ni mú'ee pe'ɨ́n pɨ́rɨcɨ a'ɨ́jna ɨ́ tɨ í'iyaujra'an ɨ́ Dios? 64Jesús pu ayén tiu'utataniú tɨjɨ́n: ―Mu'ée pej piyen raataxájtaca'a. Mɨ́ neajta inee, ayée nu tejá'amua'ixaate'e tɨ ayén tejauumé'e a'ame. Mú'een xu neseíra'a xá'aju'un ineetzi i nej neajta teáata'a jetze airáane netɨ́'ɨj án huatéyeijxa rɨ'ɨríinta'an a'ɨ́jna ɨ́ tɨ nain jɨ́n antiújmua'aree u ta japua, seajta neseíra'a xá'aju'un netɨ́'ɨjtáhua'a yé ve'ecáanen ɨ́ jaitɨri jetze. 65Ajta a'ɨ́ɨn ɨ́ tɨ nain jɨ́n antiújmua'aree ɨ́ teyujta'a, a'ɨ́ɨ pu ra'antisiújtza'an ɨ́ rusiicu'u mej mi ráamua'aree tɨ a'ɨ́ɨn huataniú'ucaca'a. Ayen tɨjɨ́n: ―A'ij pu pua'a ti'ixa ɨ́ Dios jemi. Capu ché'e ruxe'eve'e mej mi seica té'antzaahuate'en jemin. ¿Ni caí ayén ti'ayajna? Casi'i, xu'uri ráanamuajri'i tɨ ayén a'ij pua'a ti'ixa ɨ́ Dios jemi. 66’¿A'iné tejamuá'amitɨejte'e mú'ejmi? Majta me'ɨ́n ɨ́ seica, miyen tɨjɨ́n: ―Ayee pu tiraavíjte'e tɨ huámɨ'ɨni a'ɨ́jna jɨme'e. 67Aj mú mi ra'arátzijmua'axɨ á néerime'ara'an jetze, majta ra'itéevajxɨ ɨ́ rumuájca'a jɨme'e. Seica mú majta ru'itéva'ara'a. 68Majta miyen tiraatá'ixaa tɨjɨ́n: ―Taatá'ixaate'e mú'ee mɨ pej nu'u i'i Cɨríistu'u, ¿a'ataani mu'iitéjvee? 69Ajta a'ɨ́ɨn ɨ́ Pedro, a'úu pu anu'uhuátacatii já'ita'a tɨ e'eráyaujta'a ɨ́ chi'ita. Ajta seɨ́j uteájrupi, ɨ́ tɨ ravaɨre'e a'ɨ́jna ɨ́ teyujta'a tɨ antiújmua'aree. 'Ɨ́ita'a a'ɨ́jna. Aj pu i á e'iré'ene jemin. Ayee pu tiraata'íhua'uri'i tɨjɨ́n: ―Mu'ée pej pajta á'uche'ecane'e pe'ɨ́jna jamuan, tɨ Galilea é'eme'ecan. 70Ajta a'ɨ́ɨn Pedro, seɨcɨé pu tiraatá'ixaa mej seíiraca'a ɨ́ seica, ayén tɨjɨ́n: ―Canu ramua'aree a'ij pej ye'í ti'ixa. 71Aj pu i ájchee. Pu'uri huiiramé'eca tá'apueerta. Aa pu a'utéechaxɨ. Ajtahua'a seɨ́j raaseíj 'ɨ́ita'a. Aj pu i ayén tihua'utá'ixaa ɨ́ teɨte ɨ́ mej a'uun a'uráte'eca'a tɨjɨ́n: ―Amɨ́jna mɨ tevi, a'ɨ́ɨ pu xaa á'uche'ecane'e jamuan a'ɨ́jna ɨ́ Jesús, Nazarét tɨ é'eme'ecan. 72Ajtahua'a pu seɨcɨé tiu'utaxájtaca'a a'ɨ́jna ɨ́ Pedro. Niuucajtze'en pu jɨ́n ayén tihua'utá'ixaa tɨjɨ́n: ―Canu ramua'ate ne'ɨ́jna ɨ́ tevi. 73A'atzu á'ateevi'ica, majta me'ɨ́n ɨ́ mej e'eré'ete'ecaa, a'ɨ́ɨ mú á e'iré'ene vejli'i jemin. Ayee mú tiraatá'ixaa tɨjɨ́n: ―Mú'ee pej xaa huá'a jetze ajtéme'ecan. Tu'uri ramua'aree te'ɨ́jna jɨme'e a'ij pej ye'í te'enrú'u. 74Ajta á'iyen Pedro ayén a'utéjche tɨ ayén rájhuavii ɨ́ Dios tɨ nu'u Dios ayén puaíjtzi raatá'an tɨ pua'a caí ayén ti'ayajna. Aj pu i ayén tihua'utá'ixaa niuucajtze'en ɨ́ Dios tɨjɨ́n: ―Canu ramua'ate nemɨ́jna mɨ tevi. Jɨ́me'en pu'u ayén tiu'utaxájtaca'a, aj pu i huajíjhuaca'a a'ɨ́jna ɨ́ tecuaara'i. 75Tɨ'ɨj jí á'iyen Pedro ra'utámua'areeri'i a'ij tɨ Jesús amuacaí tiraatá'ixaa tɨ jɨ́me'en yee: “Tɨ́'ɨj nu'u caí xɨ huajíjhua'a ɨ́ gallo, ayée pej nu'u huaíca piyen tína'avé'avaata yee capej nemua'ate.” Aj pu'i huirájraa. Jé'ecan pu a'ij pua'a raatá'a. Tiujyeínejraa huápɨ'ɨ.

will be added

X\