San Mateo 23

1Aj pu i Jesús hua'utá'ixa a'ɨ́mej ɨ́ teɨte mej jemin e'etiújseɨre'eca'a, ajta a'ɨ́mej ɨ́ mej jamuan á'ujujhua'ane'e. Ayen tɨjɨ́n: 2―A'ɨ́ɨme, ɨ́ mej tiú'ujmua'ate ɨ́ yu'uxari jetze, majta a'ɨ́ɨme ɨ́ fariseos, a'ɨ́ɨ mú títeté'u'upu'u teyujta'a mej mi miyen che'atá mena'a tihuá'umua'aten ɨ́ teɨte ɨ́ yu'uxari jetze a'ij tɨ rɨjca'a a'ɨ́jna ɨ́ Moisés teecan. 3A'ɨ́j pu jɨ́n ayén ruxe'eve'e sej si hua'ará'astijre'en, seajta siyen huárɨni nain jɨme'e a'ij mej tejá'amua'ixaate'e. ’Mɨ́ seajta mú'een, caxu siyen che'atá sena'a rɨjca a'ij mej ye'í rɨcɨ a'iné camu miyen jé'iyecan jɨ́n tí'ijrɨ'ɨre a'ij mej tejá'amua'ixaate'e. 4Ayee mú ve'ecán jɨ́n tihua'a'íjcate'e ɨ́ teɨte a'ɨ́jna jɨme'e tɨ ayén huápɨ'ɨ muárɨ'eri tɨ caí ja'atɨ́ raayɨ́'ɨtɨ tɨ ayén huárɨni. Majta á'iyen, a'ɨ́ɨ mú hua'uta'aíjte'esin ɨ́ teɨte mej nu'u mi me'ɨ́jna jɨ́n ra'ará'astijre'en. Mɨ́ majta me'ɨ́n, camu a'atzu taúra'aca tɨ ij ayén che'atá na'a tihuá'ucɨ'ɨti. 5’Matɨ́j mena'a mej miyen rɨcɨ, ayée mu'u rɨcɨ jéjre'ecɨtze'e mej mi teɨte hua'useíj. Antajíya'ujme'en mú ratá'ahuaca me'ɨ́jna ɨ́ mej jɨ́n antéujjɨ́'ɨcɨ'ejme ɨ́ rumu'úu jetze, majta tɨ́tɨ'ɨjmé'en te'ejviɨ́jxɨ a'utɨ́ tɨ aucástɨmee ɨ́ hua'asiicu'u. 6Jé'ecan mú raxɨ́'eve'e tɨ tihuá'ucɨ'ɨti mej a'ujrá'ase ɨpuari japua jamuan a'ɨ́jna ɨ́ tɨ antiújmua'aree a'ɨ́jna jɨme'e ɨ́ mej jɨ́n tí'iyeste. Ajta hua'atéyujta'a, ayée mú raxɨ́'eve'e mej a'ujrá'ase ɨ́ ta'amuájca ɨ́ ɨpuari japua a'uj mej á'araraase ɨ́ huá'avaujsimua'a. 7Jé'ecan pu hua'aráanajche mej me'ɨ́n teɨte hua'utateújte a'ájna a'u mej tí'itu'araca. Ajta, ayée pu hua'aráanajche mej teɨte miyen tihuá'ajeeve tɨjɨ́n nevástara'a. 8’Mɨ́ seajta mú'een, caxu siyen rahuauca tɨ ij ja'atɨ́ ayén tejamuaatájeeve tɨjɨ́n nevástara'a. Caxu xaa ne'u, a'iné naíjmi'i xu ru'ihuaamua'a, ajta seɨ́j pu'u pú'een ɨ́ á'amuavastara'a. A'ii pu a'ɨ́ɨn pú'een ɨ́ Dios. 9Seajta mú'een, caxu siyen ja'atɨ́ huatámua'ati tɨjɨ́n niyá'upua, a'iné seɨ́j pu'u pú'een ɨ́ sej seri rájya'upua. An pu é'eseijre'e u ta japua. 10’Caxu seajta rahuauca mej miyen tejá'amuajeeve tɨjɨ́n nemaeestro. Caxu a'atzu, a'iné seɨ́j pu'u pú'een ɨ́ tɨ i'i á'amuamaestru, inee i nej i'i Cɨríistu'u, tɨ Dios án neja'ujyeíjtza ɨ́ ɨpuari japua. 11’Ajta, a'ɨ́jna tɨ jaítze'e ve'ecán jɨ́n ti'itéjvee a'amua tzajta'a, a'ɨ́ɨ pu hui amuaatévaɨre'esin naíjmi'ica mú'ejmi. 12Ayee pu'u, a'iné ja'atɨ́ tɨ na'a tɨ á'ujtzaahuate'e tɨ nu'u ve'ecán jɨ́n ti'itéjvee, Dios pu raatá'asin tɨ cɨliéene'e jɨ́n te'enteárute. Mɨ́ ajta, ja'atɨ́ tɨ na'a tɨ jé'iyecan jɨ́n ruseijrata tɨ cɨliéene'e jɨ́n ti'itéjvee, Dios pu ayén raatá'asin tɨ te'enteárute ti'itɨ́j jɨme'e tɨ ve'ée. 13’Setá'aj huataújxɨeemɨste'en mú'een mɨ sej tiú'ujmua'ate ɨ́ yu'uxari jetze, seajta mú'een mɨ sej i'i fariseos. Caxu siyen tí'ijrɨ'ɨre tzáahuati'ira'a jɨme'e a'iné caxu araúraste rujɨ́ɨmua'a. Ayee xu tihua'aténaamua ɨ́ teɨte mej mi caí a'uteárute a'u tɨ Dios é'eseijre'e u ta japua. Caxu á'ujca'ane sej siyen huárɨni a'ij tɨ tí'ijxe'eve'e ɨ́ Dios. Caxu seajta hua'atá'aca mej mi miyen huárɨni mɨ seica ɨ́ mej tí'itese'e mej mi me'uun a'uteárute. 14’Seajta, setá'aj siyen huataújxɨeemɨste'en, mú'een mɨ sej tiú'ujmua'ate ɨ́ yu'uxari jetze, seajta mú'een mɨ sej i'i fariseos. Caxu siyen tí'ijrɨ'ɨre tzáahuati'ira'a jɨme'e a'iné caxu araúraste rujɨ́ɨmua'a. Ayee xu tihuá'ari'ira ɨ́ huá'a chi'ij a'ɨ́mej ɨ́ mej 'uuca, mɨ mej majta rujɨ́ɨmua'atajme. Seajta á'iyen, a'uun xu a'uteáru'ipi u teyujta'a; seajta a'ateevi'i jɨ́n rahuavíiraca ɨ́ Dios jemi. Mú'een xu siyen ruseijrata sej nu'u caí ti'itɨ́j jɨ́n auteájturaa. A'ɨ́j pu jɨ́n jaítze'e xu rajpuaíitzi xá'aju'un. ’Seajta, setá'aj siyen che'atá sena'a huataújxɨeemɨste'en mú'een mɨ sej caí rɨ́'ɨ mé titeumuámua'aree. Capu ti'itɨ́j tásiseiiri á'amuatzajta'a. 15’Setá'aj huataújxɨeemɨste'en, mú'een, mɨ sej tiú'ujmua'ate ɨ́ yu'uxari jetze, seajta mú'een mɨ sej i'i fariseos. Caxu siyen tí'ijrɨ'ɨre tzáahuati'ira'a jɨme'e a'iné caxu araúraste rujɨ́ɨmua'a. Ayee xu íiyen cɨɨne nainjapua ɨ́ chaanaca, seajta yen cɨɨne ɨ́ jaj japua sej si seɨ́j huatémua'itɨn tɨ ij a'ɨ́ɨn ayén ti'itiújcha'ɨɨ setɨ́j mú'een. Seajta, setɨ́'ɨj raatémua'itɨn, ayée xu tihuá'umua'aten tɨ ij á'iyen jaítze'e amuaatémua'itɨn jeíhua a'ɨ́jna jɨme'e tɨ a'ij pua'a tí'itevistan, ajta tɨ́'ij a'ɨ́ɨn jeíhua pu jaítze'e rajpuaíitzi a'ame secaí mú'een. 16’Ayee xu si éene'e seuj tihuá'amua'ate. Ayee xu tí'ixaxa'a mú'een tɨjɨ́n: “Capu ti'itɨ́j vaɨre'e tɨ pua'a ja'atɨ́ ayén te'ataújratzii niuucajtze'en ɨ́ teyuu, sino tɨ jɨ́me'en yee tɨ pua'a ja'atɨ́ ayén te'ataújratzii niuucajtze'en a'ɨ́jna ɨ́ oro tɨ teyuu jetze seijre'e, aj pu xaa ayén ruxe'eve'e tɨ a'ɨ́ɨn ja'atɨ́ ayén araúrasten a'ɨ́jna jɨme'e tɨ te'ataújratzii.” 17’Mú'een xu caí ti'itɨ́j ú'umua'aree, mɨ sej caí tivejáu'itɨe. ¿Ti'itáani jaítze'e ruxe'eve'e ɨ́ Dios jemi? ¿Ni a'ɨ́jna ɨ́ oro tɨ teyuu jetze seijre'e na'ari ɨ́ teyuu tɨ tzajta'an Dios huateúra'ate'en a'ɨ́jna ɨ́ oro? 18Jee xaa ne'u, jaítze'e pu ruxe'eve'e ɨ́ teyuu. Ayee xu seajta tí'ixaxa'a mú'een tɨjɨ́n: “Tɨ́ pua'a ja'atɨ́ ayén te'ataújratzii niuucajtze'en a'ɨ́jna tɨ japuan tiu'utámuaɨ'ɨvejta, capu ti'itɨ́j a'ij tí'ivaɨre'e.” Mɨ́ seajta siyen tí'ixaxa'a tɨjɨ́n: “Tɨ́ pua'a ja'atɨ́ ayén te'ataújratzii niuucajtze'en ɨ́ muaɨ'ɨvéjri tɨ án yá'ujra japuan a'ɨ́jna tɨ japuan tiu'utámuaɨ'ɨvejta, aj pu xaa ayén a'ɨ́jna jɨ́n ruxe'eve'e tɨ araúrasten.” Capu ti'itɨ́j a'amua tzajta'a tásiseiiri. 19’Mú'een, mɨ sej caí rɨ́'ɨ mé titeumuámua'aree, ¿ti'itáani jaítze'e ruxe'eve'e ɨ́ Dios jemi? ¿Ni a'ɨ́jna ɨ́ muaɨ'ɨvéjri na'ari a'ɨ́jna tɨ japuan raatámuaɨ'ɨvajtaca'a, a'ɨ́jna tɨ japuan Dios huateúra'ate'en a'ɨ́jna ɨ́ muaɨ'ɨvéjri? 20Jee xaa ne'u, jaítze'e pu ruxe'eve'e a'ɨ́jna sej japuan án yá'ujra ɨ́ tɨ tiu'utámuaɨ'ɨvejta. ’Ayee pu'u tí'een, a'ɨ́jna tɨ te'ateújratziira niuucajtze'en a'ɨ́jna tɨ japuan tiu'utámuaɨ'ɨvejta, ayée pu 'een jɨ́n te'ateújratziira niuucajtze'en a'ɨ́jna ɨ́ ti'itɨ́j, ajta niuucajtze'en naíjmi'i tɨ́j na'a tɨ án japuan yá'ujra. 21Ajta a'ɨ́jna ɨ́ ja'atɨ tɨ ayén te'ateújratziira niuucajtze'en ɨ́ teyuu, a'ɨ́ɨ pu te'ateújratziira niuucajtze'en a'ɨ́jna ɨ́ teyuu, ajta niuucajtze'en Dios tɨ ari huiirájca a'ujna. 22’Ajta, tɨ pua'a ja'atɨ́ ayén te'ateújratziira niuucajtze'en u ta japua, ayée pu che'atá na'a te'ateújratziira niuucajtze'en a'ɨ́jna ɨ́ ɨpuari Dios tɨ án japuan 'é'e yé'ixaca. A'ɨ́j pu jɨ́n, ayée pu che'atá na'a te'ateújratziira niuucajtze'en a'ɨ́jna ɨ́ Dios tɨ án 'é'e yé'ixaca japuan a'ɨ́jna ɨ́ ɨpuari. 23’Setá'aj huataújxɨeemɨste'en, mú'een, mɨ sej tiú'ujmua'ate ɨ́ yu'uxari jetze, seajta mú'een mɨ sej i'i fariseos. Caxu siyen tí'ijrɨ'ɨre jé'iyecan jɨme'e a'iné caxu siyen ra'ará'astijre'en nain jɨme'e a'ij tɨ té'eyu'usi'i ɨ́ yu'uxari jetze. Mú'een xu xaa raatá'an ja'icáj tɨ ruxe'eve'e a'ɨ́jna jɨme'e ɨ́ sej jɨ́n rá'ancacare'en ɨ́ sej racua'aca se'ɨ́jna ɨ́ menta, seajta se'ɨ́jna tɨ naa teáarɨ́'e, anis ti'itɨ́j, seajta se'ɨ́jna ɨ́ cumiinu. ’Mɨ́ seajta, caxu a'atzu ra'ará'astijre'en se'ɨ́jna jɨme'e ɨ́ tɨ jaítze'e ruxe'eve'e tɨ ayén tɨ jɨ́me'en yee: “setá'aj siyen raaxɨ́'epɨ'ɨntari'ire'en a'ij tɨ tiraavíjte'e”, ajtahua'a seɨ́j tɨ ayén yee: “setá'aj huá'ancu'uvajxɨ'ɨn ɨ́ ruxɨ́'ej teɨte”, ajtahua'a i'i tɨ jɨ́me'en yee: “setá'aj caí te'uté'ɨtzeaara'an seɨ́j jemi.” Ayee pu xɨ́'epɨ'ɨn éene'e á'ame'enche'e sej caí yá'uhua'anan se'ɨ́jna tɨ jaítze'e ruxe'eve'e, mú'een xu seajta siyen huárɨniiche'e ɨ́ tɨ cɨliéene'e seijre'e. 24Capu hui ti'itɨ́j a'amua japua nine'i, mú'ejmi, mɨ sej tihuá'amua'aten ɨ́ seica. Jé'ecan xu tí'itese'eca'a sej si siyen ra'ará'astijre'en se'ɨ́jna jɨme'e ɨ́ niuucari tɨ caí jeíhua ruxe'eve'e. Mɨ́ seajta mú'een, xu'uri mé rúurɨe se'ɨ́jna ɨ́ Dios tɨ raaxájtaca'a a'ɨ́jna ɨ́ niuucari. 25’Setá'aj huataújxɨeemɨste'en mú'een, mɨ sej tiú'ujmua'ate ɨ́ yu'uxari jetze. Caxu siyen tí'ijrɨ'ɨre jé'iyecan jɨme'e. Ayee xu tí'iteɨ'ɨhuaca, seajta naa éene'en tiu'uteujchéete'en sej si naa éene'en xá'ara'ani mé jéjre'e. Mɨ́ seajta, ɨ́ ru tzajta'a, jé'ecan xu a'ij pua'a tí'iteteɨte, a'ɨ́jna jɨme'e sej seri tihuá'urɨiiri'i ɨ́ tihua'áa ɨ́ seica, seajta sej caí á'ujcu'uvejca'a ɨ́ sej jɨ́n tiu'utémua'itɨ. 26Mɨ́ pej i'i fariseo tɨ caí ti'itɨ́j a'atzajta'a tásiseiiri, pauj mi'i rɨ́'ɨ uhuá'aruuren ɨ́ tɨ ú'useijre'e ɨ́ á'a tzajta'a. Aj pu xaa, naa seíire'e a'ame ɨ́ tɨ é'eseijre'e mé jéjre'e. 27- 28’Setá'aj huataújxɨeemɨste'en mú'een, mɨ sej tiú'ujmua'ate ɨ́ yu'uxari jetze. Caxu siyen tí'ijrɨ'ɨre tzáahuati'ira'a jɨme'e. Mú'een xu siyen naa seijre'e mé jéjre'e. Seajta mú'een, a'ij xu pua'a tí'iteteɨte ɨ́ ru tzajta'a. Ayee xu 'een tɨ́j huá'achi'i ɨ́ mej tzajta'an huajé'enaamuaca ɨ́ mej meri huácuii. A'iné ayée mú racácuainare'en mé jéjre'e, a'ɨ́j pu jɨ́n naa seijre'e a'ɨ́jna ɨ́ huá'achi'i. Mɨ́ ajta, u tzajta'an, jeíhua pu te'urá'a ɨ́ tihuá'acari, ajta ɨ́ tihuá'ahua'ira'a tɨ ari tí'ipeti. Ayee xu che'atá sena'a a'ij pua'a 'een ɨ́ ru tzajta'a a'ɨ́jna jɨme'e ɨ́ sej caí siyen tí'ijrɨ'ɨre tzáahuati'ira'a jɨme'e, seajta a'ij pua'a rɨcɨ. 29’Setá'aj huataújxɨeemɨste'en, mú'een mɨ sej tiú'ujmua'ate ɨ́ yu'uxari jetze, seajta mú'een mɨ sej i'i fariseos. A'iné caxu siyen tí'ijrɨ'ɨre tzáahuati'ira'a jɨme'e. Ayee xu rá'ajta'ahuaca ɨ́ huá'achi'i ɨ́ mej tzajta'an hua'ateájtuaani ɨ́ mej meri huácuii, ɨ́ mej Dios jetze me'ecan tí'ixaxa'ata'a. Seajta siyen tiracámeijra mé jéjre'e temua'a naa a'ɨ́jna huá'achi'i mej tzajta'an hua'ateájtuaani a'ɨ́mej ɨ́ mej rɨ́'ɨ tí'iteteɨtestaca'a. 30’Seajta siyen tí'ixaxa'a tɨjɨ́n: “Tɨ́ pua'a tiyen ruuri tá'ara'aniche'e a'ájná'ɨmua matɨ́'ɨj yé chejca'a a'ɨ́ɨme tavaújsimua'a teeca, catu xaa ne'u tiyen che'atá tena'a hua'ucui'iníiche'e a'ɨ́mej ɨ́ mej Dios jetze me'ecan tí'ixaxa'ata'a matɨ́j tihuá'ucuii ɨ́ tavaújsimua'a teeca.” 31A'ɨ́j xu jɨ́n siyen té'antzaahuate'en ɨ́ ru jetze ɨ́ sej se'ɨ́ɨn pú'een huá'ahuaacɨxa'astemua'a a'ɨ́mej ɨ́ mej huá'ucuii a'ɨ́mej ɨ́ mej Dios jetze me'ecan tí'ixaxa'ata'a. 32Ayee xu'u i, setá'aj raanaíjmire'en a'ɨ́jna ɨ́ mej jɨ́n auteájturaa ɨ́ Dios jemi a'ɨ́ɨme ɨ́ ruvaújsimua'a teeca. 33’Mú'een xu a'ij pua'a tí'iteteɨte, mɨ sej a'ɨ́jna jetze airáane ɨ́ cu'ucu'u tɨ tí'ihua'itaca, ¿a'iné tejamuá'amitɨejte'e? ¿Ni qui ayén yee mú'een xu huateújvaɨre'esin tɨ ij caí Dios amuaatá'an ɨ́ puaíjtzi? Ayej xaa ne'u ti'ayajna, puaíjtzi pu á'amuacɨ'ɨti tɨ́j na'a rusén jɨme'e. 34A'ɨ́j nu jɨ́n niyen tejámuaata'íti'ira a'ɨ́mej ɨ́ mej Dios jetze me'ecan tí'ixaxa'a, neajta seica ɨ́ mej rɨ́'ɨ mé titeumuámua'aree, neajtahua'a seica ɨ́ mej tí'imua'ata. Mɨ́ seajta mú'een, seica xu cui'ini, seajta seica siyen huá'atatan ɨ́ cúruu jetze, seajta seica, ayée xu tihua'utévajxɨ'ɨsin u á'amuateyujta'a. Seajta seica, ayée xu hua'utamuárite'esin a'u tɨ é'echajta'a, seajta méyee. 35’Ayee pu'i 'éen jɨ́n tejá'amuacɨ'ɨti nain jɨ́n ɨ́ puaíjtzi ɨ́ mej jɨ́n titéecui íiyen chaanaca japua tɨ́j na'a mej raajé'ica a'ɨ́jna ɨ́ Abel teecan tɨ yú e'iré'ene matɨ́'ɨj raajé'ica me'ɨ́jna ɨ́ Zacarías ɨ́ tɨ yaujra'an pú'eene'e a'ɨ́jna ɨ́ Berequías. A'uu mú ya'ujé'ica já'ita'a tɨ a'utéjvee ɨ́ hua'ateyuu, ajta a'ɨ́jna ɨ́ mej japuan tiu'utámuaɨ'ɨvejta. 36’Ayee nu hui tejá'amua'ixaate'e tɨ ayén ti'ayajna. Naíjmi'i jɨme'e ɨ́ mej miyen a'ij pua'a rɨjca'a, puaíjtzi pu tihuá'acɨ'ɨti a'ɨ́mej íjii mej yéchej a'ɨ́jna jɨme'e. 37’Seajta mú'een, mɨ sej Jerusalén huachéjme, naími'i mú'een mɨ sej Jerusalén jetze ajtéme'ecan, jé'ecan nu huatánxɨeemɨjte'e mú'ejmi jemi, a'iné ayée xu huá'acui'ica a'ɨ́mej ɨ́ mej Dios jetze me'ecan tí'ixaxa'a. Seajta mú'een, siyen hua'uteátu'asixɨ a'ɨ́mej ɨ́ mej Dios jetze me'ecan tejá'amua'aijte'e mú'ejmi. Mu'íi nu niyen tí'ijxe'eve'eca'a nej niyen rɨ́'ɨ tejamuáacha'ɨɨn, nej ni amua'irájtuaani. Néjxe'eve'eca'a nej niyen amuáaruuren tɨ́j tecuaara'i tɨ hua'antéseɨre'e ɨ́ chɨ́ɨpɨli'ise tɨ hua'ava'ana ɨ́ ru'ana jɨme'e. Mɨ́ seajta mú'een, caxu siyen tí'ijxe'eve'eca'a. 38’Casi'i mú'een, pu'uri tɨ́n nej yé rúurɨeeni a'ɨ́jna xɨcájra'a nej jetzen raatátuaani ɨ́ a'amuachi'i. Muá'avi'in pu a'utéchaxɨjsin. 39Ayee pu'u, a'iné caxu ché'e ja'anáj neseijran ajta sena'a caí siyen raataxáj yee: “Ché'e huaújtemua'ave'en a'ɨ́jna tɨ ye'evé'eme niuucajtze'en a'ɨ́jna ɨ́ tavástara'a.”

will be added

X\