San Mateo 22

1Ajtahua'a pu Jesús ayén tihua'utá'ixaa niuucari jɨme'e. Ayee pu tihua'utá'ixaa tɨjɨ́n: 2―Ayee pu Dios huá'aruure ɨ́ teteca mej íiyen japuan cɨɨne ɨ́ chaanaca tɨ Dios te'áijta. Ayee pu che'atá na'a huá'aruuren tɨ́j a'ɨ́jna ɨ́ rey tɨ tiú'uyeste a'ɨ́jna jɨme'e tɨ yaujra'an huaténe'ɨcheca'a. 3’Ajta a'ɨ́ɨn ɨ́ rey, a'ɨ́ɨ pu nu'u hua'uta'íteca'a a'ɨ́mej ɨ́ mej tí'ijvaɨre'e mej nu'u u hua'utájeeve a'ɨ́mej ɨ́ tɨ ari hua'utá'inee. Mɨ́ majta a'ɨ́mej ɨ́ mej huatá'iniihuaca'a, camu á'ujca'anejca'a mej á a'ire'enen. 4’Ajtahua'a, seica huata'íteca'a mej mi majta hua'utájeeve. Ayee pu tihua'utá'ixaa a'ɨ́mej ɨ́ mej tí'ijvaɨre'e tɨjɨ́n: “Ayee xu yeehui tihua'utá'ixaate'en a'ɨ́mej nej neri hua'utá'inee tɨjɨ́n pu'uri tiu'uté'atɨme ɨ́ cua'ira, pu'uri ajta tiu'uta'aíjtaca'a mej huá'ucui'ini ɨ́ ye'emuaate tɨ tihuá'ucɨ'ɨmite, huáacasi, majta puuyesi. Nain pu yeehui ari huaxɨ́'epɨ'ɨn tej ti tiú'uyesten.” 5’Majta me'ɨ́n ɨ́ mej huatá'iniihuaca'a, camu a'atzu huá'utzaahua. Ma'ucɨ́jxɨ micu. Seɨ́j pu a'uun á'ume a'u tɨ tejé'ehuaste'e. Ajta seɨ́j, a'úu pu á'ume a'u tɨ tejá'atua. 6Majta ɨ́ seica, a'ɨ́ɨ mú nu'u hua'uvívi'i ɨ́ mej tí'ijvaɨre'e me'ɨ́jna ɨ́ rey. Majta a'ij pua'a huá'uruu. Majta huá'ucuii seica. 7’Jé'ecan pu nu'u huataniú'ucaca'a a'ɨ́jna rey. A'ɨ́ɨ pu hua'uta'íteca'a a'ɨ́mej ɨ́ xantaaru'u. Matɨ́'ɨj mi huá'ucuii naíjmi'ica ɨ́ teɨte. Majta raaré'atai ɨ́ huá'achi'i. 8’Aj pu i a'ɨ́ɨn ɨ́ rey ayén tihua'utá'ixaa a'ɨ́mej ɨ́ mej tí'ijvaɨre'e tɨjɨ́n: “Pu'uri huaxɨ́'epɨ'ɨn tej tí'iyesten. Mɨ́ ajta, a'ɨ́mej ɨ́ nej neri hua'utá'inee, capu ayén hua'ucɨ́'ɨ mej mú mú a'uvé'eju'un. 9Sericu mú'een, tɨ́j na'a tɨ cure'enéjme ɨ́ caaye, setá'aj hua'utá'inen matɨ́j mena'a ɨ́ teɨte a'achú sej pua'améca jé'eteuni.” 10’Matɨ́'ɨj mi huiráacɨ caaye jetze a'ɨ́ɨme ɨ́ mej tí'ijvaɨre'e. Jéihua mú huá'ajseɨj ɨ́ teɨte a'achú mej pua'améca á'uteu, ɨ́ mej a'ij pua'a tí'iteteɨte, majta ɨ́ mej rɨ́'ɨ tí'iteteɨte. Ayee mu'u pua'amé a'uteájrupi u chi'ita a'achú mej ú'uve. 11’Aj pu nu'u i a'ɨ́ɨn rey, a'uteájrupi a'ujna tɨ́'ij a'ɨ́mej huaseíj ɨ́ tɨ hua'utá'inee. Aj pu i ja'atɨ́ huaseíj tɨ caí ayén ti'itéechen a'ij tɨ tiraavíjte'e tɨ pua'a seɨ́j huaténeɨche. 12Ayee pu tiraata'íhua'uri'i tɨjɨ́n: “Casi'i, ne'amiigu, ¿a'iné tiu'utárɨ'ɨristareca'a pej caí piyen éene'e ti'itéechen a'ij tɨ tiraavíjte'e, pej uteárute peyujna?” Ajta a'ɨ́ɨn ɨ́ ja'atɨ́, capu nu'u a'atzu huataniú. 13’Aj pu i a'ɨ́ɨn rey ayén tíhua'uta'aíj a'ɨ́mej ɨ́ mej tí'ijvaɨre'e tɨjɨ́n: “Setá'aj yeehui ra'amuájɨ'ɨcɨ'en muájca'are'ara'an jetze, seajta ɨɨcájra'an jetze. Seajta, mé pua'acɨé ya'urájrɨeeni a'u tɨ a'utɨ́ca'a. A'uu mú yeehui ruyeíne muá'aju'un, majta rutamej jɨ́n ancuré'ujcɨ'ɨmée muá'aju'un me'ɨ́jna jɨme'e ɨ́ mej rajpuaíjtzi.” 14’Majta me'ɨ́n tɨ Dios huá'ajee, a'ɨ́ɨ mú mu'íi. Mɨ́ majta, me'ɨ́n tɨ Dios hua'avé'ehuau, camu mu'íi, sino cɨ́j mu'u, micu. 15Majta me'ɨ́n ɨ́ fariseos, a'ɨ́ɨ mú a'ucɨ́j. Majta miyen raaxɨ́'epɨ'ɨntare mej mi raatémua'itɨn me'ɨ́jna ɨ́ Jesús tɨ ij a'ɨ́ɨn ayén auté'ɨtzen mej mi me'ɨ́jna jɨ́n jetzen te'ujpuá'ajte'en. 16Matɨ́'ɨj mi seica huata'áiteca'a mej mi tiu'uxáj jamuan ɨ́ Jesús. Aj mú mi a'ucɨ́j, majta seica jamuan ɨ́ mej jamuan á'ujujhua'ane'e a'ɨ́jna ɨ́ Heródes. Ayee mú tiraatá'ixaa tɨjɨ́n: ―Maeestru, a'ij tu mua'aree tɨ caí ti'itɨ́j timuá'aturaate'e, pajta hui piyen tzáahuati'ira'a jɨ́n tí'imua'ata a'ij tɨ tí'ijxe'eve'e ɨ́ Dios. Mú'ee pej caí tí'ajaahuate'e ɨ́ teɨte jemi a'iné capu mú'eetzi jetze ruxe'eve'e ja'atén mej pú'een. 17Patá'aj piyen titaatá'ixaate'en yee: ¿Ni qui xɨ́'epɨ'ɨn tej te'ɨ́ɨn tiu'unájchi a'ɨ́jna jɨme'e ɨ́ mej huá'ajijve'e ɨ́ gobierno jetze me'ecan nusu tecaí? ¿Ni qui tiyen tiraanájchite'en te'ɨ́jna tɨ tí'ita'aijte'e tɨ ayén ántehuaa tɨjɨ́n César? 18Ajta a'ɨ́ɨn ɨ́ Jesús, pu'uri ramua'areereca'a mej caí miyen tí'ira'ihua'u jé'iyecan jɨme'e sino ayée mú raxɨ́'eve'eca'a mej a'ij pua'a ráaruuren. Ayee pu tihua'utá'ixaa tɨjɨ́n: ―Mú'een xu caí siyen tí'ijrɨ'ɨre jé'iyecan jɨme'e. ¿A'iné 'een jɨ́n siyen tí'itese'e sej naateevi'i? 19Tumin senaataseíjrate'e ɨ́ mej jɨ́n tí'inajchita me'ɨ́jna ɨ́ mej jɨ́n huá'ajijve'e. Aj mú mi seɨ́j ye'evé'e'ɨ'ɨte, ɨ́ tumin. 20Aj pu i ayén tihua'uta'íhua'uri'i tɨjɨ́n: ―¿A'ataani ɨ́ néerime'ara'an a'aseijre'e? ¿A'iné ántehuaa yéj tɨ á'ayu'usi'i? 21Ayee mú tiraatá'ixaa tɨjɨ́n: ―Amɨ́jna ne'u ɨ́ tej tiyen ratamuá'amua tɨjɨ́n César. Aj pu i ayén tihua'utá'ixaa tɨjɨ́n: ―Setá'aj siyen huárɨni. Seraatá'an se'ɨ́jna ɨ́ César a'achú tɨ caj tí'iracɨ'ɨti, seajta raatá'an ɨ́ Dios a'achú tɨ caj tí'iracɨ'ɨti a'ɨ́jna. 22Matɨ́'ɨj miyen tiráanamuajri'i, jé'ecan mú naa rɨ́'ɨ tira'utaseíj. Matɨ́'ɨj mi á yaúurɨe. Majta a'ucɨ́j. 23A'ájna xɨcájra'a jetze, a'ɨ́ɨ mú majta á e'iré'ene a'ɨ́ɨme ɨ́ saduceos. Ayee mú tí'ixaxa'a a'ɨ́ɨme tɨ jɨ́me'en yee camu ché'e huatarújsin ɨ́ mej huácuii. Matɨ́'ɨj mi miyen tiraata'íhua'uri'i me'ɨ́jna ɨ́ Jesús tɨjɨ́n: 24―Maeestru, ayée pu ra'uyú'uxaca'a a'ɨ́jna ɨ́ Moisés teecan. Tɨ́ pua'a nu'u ja'atɨ́ tɨ neɨche, tɨ pua'a a'ɨ́ɨn caí títɨ'ɨríjmua'a huámɨ'ɨni, ruxe'eve'e nu'u tɨ a'ɨ́ɨn ihuáare'ara'an ra'ancuré'evi'itɨn a'ɨ́jna tɨ ratévi'itɨne'e ɨ́ tɨ huamɨ́'ɨ tɨ ij títɨ'ɨríjmua'a á'ara'ani a'ɨ́jna jetze me'ecan. 25’Ayee pu hui ja'anáj tiuju'urɨ́j téjmi tzajta'a. Mua'aráhua'apuaca'a me'ɨ́jna ɨ́ ru'ihuaamua'a. Ajta a'ɨ́ɨn tɨ i'ivasta'a, a'ɨ́ɨ pu huaténe'ɨcheca'a. Ajta á'iyen huamɨ́'ɨ. Aru capu títɨ'ɨrijmuá'a já'araa a'ɨ́jna tɨ ratévi'itɨne'e. A'ɨ́ɨ pu jemi huateájturaa a'ɨ́jna tɨ ra'ité'ase. 26Ayee pu che'atá na'a tiráaruu a'ɨ́jna ɨ́ juutzeájra'an ɨ́ tɨ ra'ité'ase ɨ́ tɨ vásta'a me'ecan, a'ɨ́ɨ pu ajta caí títɨ'ɨrijmuá'a já'araa, huamɨ́'ɨ. Ajta á'iyen ɨ́ seɨj, ɨ́ tɨ i'i huaíca, a'ɨ́ɨ pu ra'anténexcaca'a. Ajta, ayée pu che'atá na'a tiráaruu. Ajta á'iyen, ayén te'irájraa tɨ ayén tihuá'uruu naíjmi'ica ɨ́ mej aráhua'apua. Capu ja'atɨ́ títɨ'ɨrijmuá'a já'araa. 27Tɨ'ɨj jí, a'ɨ́ɨn 'ɨ́ita'a ajta huamɨ́'ɨ. 28’Ari íjii, ¿a'ataani hui ɨ́ra'ara'an pú'éene'e a'ame, a'ájna xɨcájra'a mej jetzen majtáhua'a huatarújsin? Naíimi'i mú xaa ratévi'itɨne'e, a'ɨ́ɨme ɨ́ mej aráhua'apua. 29Aj pu i Jesús ayén tiu'utaniú tɨjɨ́n: ―Sete'uteújxua mú'een a'iné caxu ramua'aree a'ij tɨ té'eyu'usi'i ɨ́ yu'uxari jetze. Caxu seajta ramua'aree a'ij tɨ 'een ɨ́ muárɨ'eri'ire'ara'an ɨ́ Dios. 30A'ájna xɨcájra'a mej jetzen huatarújsin ɨ́ mɨ'ɨchite, camu miyen néjne'ɨchen ɨ́ teteca. Majta ɨ́ 'uuca, camu majta viɨchen, sino ayée mú éene'e muá'aju'un matɨ́j a'ɨ́ɨme ɨ́ mej tí'ivaɨre'e u ta japua Dios tɨ é'eseijre'e. 31- 32’Mɨ́ seajta mú'een, jɨ́me'en a'ájna xɨcájra'a mej jetzen huatarújsin a'ɨ́ɨme ɨ́ mej huácuii, ¿ni tzaa secaí ja'anáj ra'ujíjve ɨ́ yu'uxari jetze a'ij tɨ Dios tejá'amua'ixaate'e tɨjɨ́n: “Nee nu nauj huá'a Dios pú'een a'ɨ́mej ɨ́ á'amuaya'upua, a'ɨ́jna ɨ́ Abraham, ajta a'ɨ́jna ɨ́ Isaac, ajta a'ɨ́jna ɨ́ Jacobo”? Dios pu tihuaú'ixaa cumu mej mauj ruurica'a. A'ɨ́j pu jɨ́n, a'ɨ́ɨ pu a'ɨ́ɨn pú'een ɨ́ huá'a Dios a'ɨ́mej ɨ́ mej ruuri. Capu huá'a Dios pú'een a'ɨ́mej ɨ́ mej mɨ'ɨchite. ―Ayee pu tihua'utá'ixaa. 33Majta me'ɨ́n ɨ́ teɨte ɨ́ mej e'etiújseɨj ɨ́ jemin, jé'ecan mú naa rɨ́'ɨ tira'utaseíj me'ɨ́jna jɨme'e a'ij tɨ a'ɨ́ɨn tihuá'amua'atejca'a. 34Majta me'ɨ́n ɨ́ fariseos, matɨ́'ɨj ráamua'areeri'i tɨ Jesús ayén hua'utémua'itɨ a'ɨ́mej ɨ́ saduceos, aj mú mi tiújseɨj. 35Ajta seɨ́j tɨ huá'a jetze ajtéme'ecantaca'a, temua'a pu tiraayɨ́'ɨtɨhua'a a'ij tɨ té'eyu'usi'i ɨ́ yu'uxari jetze. A'ɨ́ɨ pu ayén tiraata'íhua'uri'i tɨjɨ́n: 36―Maeestru, ¿ti'itájni niuucarijra'a jaítze'e ruxe'eve'e ɨ́ tɨ ra'uyú'uxaca'a a'ɨ́jna ɨ́ Moisés teecan? 37- 38Aj pu i Jesús ayén tiraatá'ixaa tɨjɨ́n: ―A'ii pu a'ɨ́ɨn pú'een ɨ́ niuucarijra'a ɨ́ ta'amuájca, tɨ jaítze'e ruxe'eve'e caí máàj seɨ́j niuucarijra'a, tɨ ayén tɨjɨ́n: “Patá'aj piyen rɨ́'ɨ te'utá'amua'ati ɨ́ á'a tzajta'a ɨ́ Dios jemi, nain ɨ́ pej jɨ́n rɨ́'ɨ te'utá'amua'ati, a'achú pej caj té'aca'ane ɨ́ á'axɨejniu'uca jetze, pajta nain jɨ́n á'axe'evi'ira'a jɨme'e, ajta á'amua'atziira'a jɨme'e.” 39’Ajta, ayée pu hui che'atá na'a 'een ɨ́ tɨ ra'ité'ase tɨjɨ́n: “Patá'aj nu'u piyen che'atá pena'a rɨ́'ɨ tirájcha'ɨɨ ɨ́ axɨ́'ej tevi patɨ́j aseɨ́j ti'iti'á'acha'ɨ́ɨ.” 40Nain a'ij tɨ ra'uyú'uxaca'a a'ɨ́jna ɨ́ Moisés teecan, ajta nain a'ij mej tiu'utaxájtaca'a a'ɨ́ɨme ɨ́ mej Dios jetze me'ecan tí'ixaxa'ata'a, nain pu jɨ́n ayén tirájteusin a'ɨ́jna jɨme'e i tɨ tí'ihua'apua i niuucari. ―Ayee pu Jesús tiraatá'ixaa. 41Maúche'e mú e'eré'ete'ecaa a'ɨ́ɨme ɨ́ fariseos. Tɨ'ɨj jí Jesús ayén tihua'uta'íhua'uri'i tɨjɨ́n: 42―¿A'iné tejamuá'amitɨejte'e mú'ejmi jɨ́me'en a'ɨ́jna ɨ́ Cɨríistu'u, tɨ Dios án yá'ujra ɨ́ ɨpuari japua? ¿A'ataani yaujra'an pú'een? Ayee mú titeetaniú tɨjɨ́n: ―A'ɨ́ɨ pu hui rayauj a'ɨ́jna ɨ́ David teecan. 43Aj pu i Jesús ayén tihua'uta'íhua'uri'i tɨjɨ́n: ―Tɨ́ pua'a ayén ti'ayajna, tɨ́'ɨj a'ɨ́ɨn xɨéjniu'ucare'ara'an ɨ́ Dios raatá'a tɨ David tiu'utaxáj a'ɨ́jna jɨme'e ɨ́ Cɨríistu'u, ¿a'iné 'een jɨme'e David ayén raatamuá'a tɨjɨ́n nevástara'a? Ayee pu tiu'utaxájtaca'a a'ɨ́jna ɨ́ David teecan tɨjɨ́n: 44Tavástara'a pu ayén tiraatá'ixaa a'íjna i nevástara'a tɨ jɨ́me'en yee: “A'ujyeíjxɨ'ɨ ɨpuari japua íiye nerɨ'ɨríinta'a. Paúche'e huatéjcatii ajta nena'a caí hua'utémua'itɨn ɨ́ mej muájcha'ɨɨre'e.” 45’A'ɨ́j pu jɨ́n, tɨ pua'a David ayén raatamuá'a tɨjɨ́n nevástara'a, ¿a'iné tí'irɨ'ɨri tɨ a'ɨ́ɨn Cɨríistu'u ayén a'ɨ́ɨn pu'éene'e á'ara'ani ɨ́ yaujra'an? Capu a'ij tí'irɨ'ɨri xaa ne'u, a'iné Cɨríistu'u pu jaítze'e ve'ecán jɨ́n ti'itéjvee caí David teecan ayén ti'itéveeca'a. 46Majta me'ɨ́n ɨ́ mej ráanamuajri'i, camu a'atzu a'ij tirájteu a'ij mej tiu'utániuuni. Tɨ́j na'a a'ájná'ɨmua, capu ché'e ja'atɨ́ á'uca'anejca'a tɨ ayén tiraata'íhua'u.

will be added

X\