1 Tɨ́'ɨj Jesús raatapuá'ajtaca'a tɨ ayén tihuaú'ixaate'e, tɨ'ɨquí a'uun e'erájraa a'uun tɨ huatacá'a u Galilea. Ajta antáraa után pújme'en ɨ́ játe'ana jetze u Jordán. A'uu pu a'ará'a tɨ́j na'a a'úu tɨ huacá'a u Judea. 2 Jéihua mú teɨte a'ucɨ́j jamuan. Ajta a'úu pu tihuá'uhuaa ɨ́ mej tí'icucui'ica'a. 3 Aj mú mi seica e'iré'ene ɨ́ Jesús jemi. Fariseos mú pú'een a'ɨ́ɨme. A'ɨ́ɨme méjhuauca'a mej raatémua'itɨn tɨ ij auté'ɨtzen ti'itɨ́j jɨme'e. Ayee mú tiraata'íhua'uri'i tɨjɨ́n: ―¿Ni qui a'ij tí'irɨ'ɨri tɨ ja'atɨ́ ayén mé rúurɨeeni ɨ́ ru'ɨ́j ti'itɨ́j jɨme'e, ti'itɨ́j tɨ na'a, capu amɨ́n a'ij? 4 Jesús pu ayén tiu'utaniú tɨjɨ́n: ―¿Ni qui secaí ja'anáj ra'ujíjve ɨ́ yu'uxari jetze tɨ jɨ́me'en yee a'ɨ́ɨn tɨ nu'u amuacaí huá'utaahuaca'a ɨ́ teɨte, ayée pu naíjmi'i huá'utaahuaca'a ɨ́ teáata'a, ajta ɨ́ 'ɨ́ita'a? 5 Ajta ayén tiu'uxájtaca'a a'ájná'ɨmua tɨjɨ́n: “A'ɨ́j pu jɨ́n a'ɨ́ɨn teáata'a ajtaméj ɨ́ ruvaújsimua'a jemi. Ru'ɨ́j pu nu'u jamuan huateáturaasin. Majta me'ɨ́n ɨ́ mej hua'apua, ayée mú huataújruurejsin cumu seɨ́j pu'u ɨ́ tevi.” 6 Ayee pu'i tí'een, camu ché'e hua'apua mena'a sino cumu seɨ́j pu'u. A'ɨ́j pu jɨ́n, ɨ́ tɨ Dios hua'anténajchi, miché'e caí ajtaújhua'anan ɨ́ teɨte. 7 Aj mú mi miyen tiraata'íhua'uri'i tɨjɨ́n: ―Tɨ́ pua'a ayén ti'éene'en, ¿a'iné 'een jɨ́n tiu'uta'aíjtaca'a a'ɨ́jna ɨ́ Moisés teecan tɨ nu'u ja'atɨ́ ru'ɨ́j a'ɨ́ɨn huatapíjte'en ɨ́ cuapée ti'itɨ́j ɨ́ tɨ jɨ́n mé rúurɨeni? 8 Jesús pu ayén tihua'utá'ixaa tɨjɨ́n: ―Ayee pu 'een jɨ́n Moisés ayén amuaatá'a tɨ ja'atɨ́ ru'ɨ́j ɨ́ cuapée huatapíjte'en mej mi ráamua'aree tɨ mé rúurɨe ɨ́ ru'ɨ́j a'iné capu ti'itɨ́j a'amua jetze tásiseiiri sej si rɨ́'ɨ tihuá'ajcha'ɨɨ ɨ́ seica. Ayee pu xaa Moisés amuaatá'a. Mɨ́ ajta, capu ayén éene'e ɨ́ 'ajmí'ɨmua. 9 ’Ayee nu hui tejá'amua'ixaate'e. Capu rɨ'ɨrí tɨ ja'atɨ́ cha'a na'a mé rúurɨeni ɨ́ ru'ɨ́j. A'ii pu'u a'ɨ́ɨn pú'een ɨ́ tɨ jɨ́n rɨ'ɨrí tɨ ja'atɨ́ mé rúurɨeni ɨ́ ru'ɨ́j. Tɨ́ pua'a a'ɨ́ɨn ɨ́ra'ara'an seɨ́j jamuan ti'ihuaújxana'acɨra'aten, aj pu xaa í'irɨ'ɨri tɨ mé rúurɨeeni. Ajta a'ɨ́ɨn cɨ́na'ara'an tɨ ayén cha'a na'a mé rúurɨe ɨ́ ru'ɨ́j, tɨ pua'a á'iyen seɨ́j ancuré'evi'itɨn ɨ́ 'ɨ́ita'a, a'ɨ́ɨ pu tiú'ujxana'acɨra'aten a'ɨ́jna jemi ɨ́ tɨ mé rúurɨe. ―Ayee pu tihua'utá'ixaa a'ɨ́jna ɨ́ Jesús. 10 Majta me'ɨ́n ɨ́ mej jamuan á'ujujhua'ane'e, ayée mú tiraatá'ixaa tɨjɨ́n: ―Tɨ́ pua'a ayén 'een a'ɨ́mej jemi ɨ́ mej néjne'ɨche, ayée pu titá'amitɨejte'e itejmi a'ɨ́jna jɨme'e, ayée pu tí'ixɨ'epɨ'ɨn mej caí néjne'ɨche. 11 Ajta Jesús pu ayén tihua'utá'ixaa tɨjɨ́n: ―Camu naíjmi'i miyen yaú'itɨée muá'aju'un, sino a'ɨ́ɨ mu'u ɨ́ tɨ Dios hua'utá'a mej mi miyen te'utáviicua'i ruxɨ́'evi'ira'a jɨme'e. 12 Ayee pu'u 'een a'iné ayée pu tihua'ucɨ́'ɨ seica tɨ́j na'a mej huanúnu'ihuaca'a. Majta seica, ayée mú 'een a'iné teteca mú miyen huá'uruu. Majta seica, a'ɨ́ɨ mú raaxɨ́'epɨ'ɨntare rujɨ́ɨmua'a mej mi te'enteárute ɨ́ Dios jemi. A'atɨ́ tɨ na'a tɨ ayén tiraayɨ́'ɨtɨ, ché'e a'ɨ́ɨn ayén huárɨni. 13 Majta me'ɨ́n ɨ́ seica, tɨ'ɨríi mú á e'evé'evi'itɨ ɨ́ Jesús jemi tɨ ij a'ɨ́ɨn hua'ajtamuárɨ'en, ajta tɨ ij Dios jemi raatéjhuauni a'ɨ́mej jɨme'e. Majta me'ɨ́n ɨ́ mej Jesús jamuan á'ujujhua'ane'e, a'ɨ́ɨ mú autéjhuii mej hua'ajteá'axɨ'ɨn a'ɨ́mej ɨ́ mej tɨ'ɨríi avé'evi'itɨxɨ. 14 Ajta a'ɨ́ɨn Jesús, ayée pu tihua'utá'ixaa tɨjɨ́n: ―Setá'aj hua'utá'an mɨ tɨ'ɨríi mej yé ve'eré'enen neetzi jemi. Caxu huá'ijmɨijra, a'iné a'ɨ́ɨme ɨ́ mej a'uté'uu ɨ́ Dios jemi, naími'i mú miyen 'een matɨ́j me'ɨ́mej mɨ tɨ'ɨríi. 15 Aj pu i huá'amu'uutze'e hua'avé'emuarɨ'ejxɨ a'ɨ́jna ɨ́ Jesús. Ajta iyá'uraa. 16 Ajta seɨ́j pu e'iré'ene ɨ́ Jesús jemi. Teáata'a a'ɨ́jna. Aj pu i ayén tiraata'íhua'uri'i tɨjɨ́n: ―Maeestru mɨ pej rɨ́'ɨ mé teuúmua'aree, ¿ti'itáani i'i xɨ́'epɨ'ɨn tɨ ruxe'eve'e nej ni niyen huárɨni tɨ i ayén náacɨ'ɨti nej ruuri ná'ara'ani ɨ́ Dios jemi tɨ́j na'a rusén jɨme'e? 17 Jesús pu ayén tiu'utaniú tɨjɨ́n: ―¿A'iné 'een jɨ́n piyen tí'inejee pe'ɨ́jna jɨme'e nej rɨ́'ɨ mé teuúmua'aree ca'ɨ́n qui inee rɨ́'ɨ neti'itevi? Seɨ́j pu'u a'ɨ́ɨn pú'een tɨ rɨ́'ɨ mé teuúmua'aree; a'ii pu a'ɨ́ɨn pú'een ɨ́ Dios. Tɨ́ pua'a piyen tí'ijxe'eve'e tɨ muáacɨ'ɨti pej piyen ruuri puá'ara'ani ɨ́ Dios jemi, patá'aj piyen ra'ará'astijre'en a'ij tɨ tiu'uta'aíjtaca'a ɨ́ Dios. 18 Aj pu i ayén tiraata'íhua'uri'i a'ɨ́jna ɨ́ ja'atɨ tɨjɨ́n: ―¿Ti'itáani niuucarijra'a na'ará'astijre'en? Jesús pu ayén tiraatá'ixaa tɨjɨ́n: ―A'ijna ne'u tɨ ayén huataújmua'a yee “capej tí'itecui'ica”, ajta a'ɨ́jna tɨ jɨ́me'en yee “capej tí'axana'acɨra'ate”, ajtahua'a seɨ́j tɨ ayén yee “capej tí'inahua'aj, capej pajta ja'atɨ́ hua'itzi jɨ́n ti'ixáate'e”. 19 Ajta pu hui ayén tiu'uta'aíjtaca'a ɨ́ Dios a'ɨ́jna jɨme'e pej nu'u huá'ajtzaahuati'ire'e ɨ́ a'atáàta, pajta ɨ́ anaanaj. Pajta, piyen huárɨni pej pi piyen rɨ́'ɨ tirájcha'ɨɨ ɨ́ axɨ́'ej tevi patɨ́j aseɨ́j. 20 Ajta a'ɨ́jna ɨ́ temuaij, ayée pu tiraatá'ixaa a'ɨ́jna ɨ́ Jesús tɨjɨ́n: ―Nain nu jɨ́n te'ará'aste tɨ́j na'a ti'ipua'amé. ¿Ti'itáani auj ná'aturaate'e? 21 Aj pu i Jesús ayén tiraatá'ixaa tɨjɨ́n: ―Tɨ́ pua'a ayén timua'aráanajche pej nain jɨ́n te'ará'asten, ayée pej huárɨni. Aricu, nain tiu'utuáa ɨ́ tiá'a. Pajta hua'uré'an ɨ́ tumin a'ɨ́mej ɨ́ mej caí a'ij tí'ijviicua'i. Tɨ́ pua'a piyen huárɨni, jé'ecan pepu'u ra'ancuré'asin ɨ́ ta japua ɨ́ Dios jemi. Aj pepu'u xaa, mú a'utá'iyi'i patá'aj neetzi jamuan á'uche'ecane'en. ―Ayee pu tiraatá'ixaa a'ɨ́jna ɨ́ Jesús. 22 Tɨ́'ɨj ayén tiráanamuajri'i a'ij tɨ Jesús tiu'utaxájtaca'a, aj pu i utéevatzɨ ɨ́ ru tzajta'a a'ɨ́jna ɨ́ temuaij. Huatáujxɨeemɨjte a'iné jeíhua pu tí'ijcha'ɨɨca'a. 23 Aj pu i Jesús ayén tihua'utá'ixaa a'ɨ́mej ɨ́ mej jamuan á'ujujhua'ane'e tɨjɨ́n: ―Ayej xaa ne'u ti'ayajna. Temua'a pu tí'imuarɨ'eri mej a'uteárute a'ájna Dios tɨ é'eseijre'e a'ɨ́ɨme ɨ́ chíjteaani. 24 Neajta niyen tejá'amua'ixaate'e. Jaítze'e pu muárɨ'eri tɨ chíjteaani a'uteárute a'ájna Dios tɨ é'eseijre'e caí tɨ cameeyu'u anaarute ti'itɨ́j pɨ́'ɨse'e jetze tɨ anacun. 25 Majta a'ɨ́ɨme, matɨ́'ɨj miyen tiráanamuajri'i, jé'ecan mú a'ij te'utaseíj. Majta miyen tí'iru'ihua'u tɨjɨ́n: ―¿Tɨ́ pua'a ayén tí'eene'en, aíi tá'uj na'a tí'irɨ'ɨri tɨ ja'atɨ́ a'uun a'uteáturan a'u tɨ Dios é'eseijre'e? 26 Aj pu i Jesús hua'useíj. Ajta ayén tihua'utá'ixaa tɨjɨ́n: ―A'ɨ́mej jemi ɨ́ teteca, capu xaa a'ij tí'irɨ'ɨri. Mɨ́ ajta, a'ɨ́ɨ pu xaa raayɨ́'ɨtɨ ɨ́ Dios. 27 Ajta a'ɨ́jna ɨ́ Pedro, ayée pu tiu'utaniú tɨjɨ́n: ―Teajta iteen, nain tu teri mé teuhuá'axɨ ɨ́ tej tí'ijcha'ɨɨca'a tej ti á'ujujhua'ane'en á'a jamuan. ¿Ti'itáani tacɨ'ɨti itejmi? 28 Aj pu i Jesús ayén tihua'utá'ixaa tɨjɨ́n: ―Ayee nu tejá'amua'ixaate'e tzáahuati'ira'a jɨme'e. A'ájna xɨcájra'a jetze tɨ Dios nain jɨ́n ti'ijéjcuare'en, inee, i nej neajta teáata'a jetze airáane, a'ájna netɨ́'ɨj aujyeíjxɨ'ɨsin japuan ɨ́ ne'ɨpuá, ayée pu seíire'e a'ame temua'a naa mej mi atanéjne'ere. Seajta mú'een mɨ sej ne jamuan á'ujujhua'an, ayée xu che'atá sena'a títeujrá'asixɨ'ɨn japuan ɨ́ á'amua'ɨpua, seɨj seajta seɨj. Tamuáamuata'a japuan hua'apua xu ará'ase mú'een, ajta ayén te'ará'ase ɨ́ á'amua'ɨpua. Aj xu si siyen tíhua'uxɨ́'epɨ'ɨntari'ire'en a'ɨ́mej teɨtejra'a ɨ́ mej Israél jetze ajtéme'ecan, a'ɨ́mej teɨtejra'a mej miyen tamuáamuata'a japuan hua'apua ará'ase. 29 ’Neajta niyen tejá'amua'ixaate'e, ja'atɨ́ tɨ na'a tɨ ti'itɨ́j á'urɨeeni a'ɨ́jna jɨme'e tɨ á'uche'ecane'en neetzi jamuan, tɨ pua'a chi'ij, nusu ruja'atzimuá na'ari rucu'utzimuá o rujúutzimua'a, ca'ɨ́n rutáàta, runáàna na'ari tɨ pua'a yá'urɨeeni ɨ́ chuej tɨ japuan tí'ihuaste'e, ayée pu tí'ijcɨ'ɨti. Tɨ́ pua'a seɨ́j na'a ɨ́ tɨ yá'ujɨsin, ayée pu tí'iracɨ'ɨti a'achú cumu anxɨ́te ɨ́ ti'itɨ. Ajta, ayén tí'iracɨ'ɨti tɨ ruuri á'ara'ani tɨ́j na'a rusén jɨme'e a'ájna Dios tɨ é'eseijre'e. 30 ’Ajta, ayée pu hui ajta té'eme: mu'iitɨ́ ɨ́ mej nu'u ve'ecán jɨ́n títetateí ɨ́ Dios jemi íjii, a'ɨ́ɨ mú cɨliéene'e jɨ́n títetatée muá'aju'un jemin ɨ́ Dios. Majta mu'iitɨ́ ɨ́ mej nu'u cɨ́lieene'en jɨ́n títetateí ɨ́ Dios jemi íjii, a'ɨ́ɨ mú ve'ecán jɨ́n títetatée muá'aju'un a'ájna xɨcájra'a jetze tɨ jetzen Dios tiu'uta'aíjta.
