San Mateo 18

1A'ájná'ɨmua, a'ɨ́ɨ mú ave'eré'ene ɨ́ Jesús jemi a'ɨ́ɨme ɨ́ mej jamuan á'ujujhua'ane'e. Ayee mú tiraata'íhua'uri'i tɨjɨ́n: ―¿A'ataani jaítze'e ruxe'eve'e ɨ́ Dios jemi seɨ́j ɨ́ tɨ ta jetze ajtéme'ecan? 2Aj pu i Jesús seɨ́j huatajé ɨ́ pa'arɨ'ɨ. A já'ita'a ya'utára a'u mej e'eré'etei ɨ́ seica. 3Aj pu i ayén tihua'utá'ixaa tɨjɨ́n: ―Jee xaa, ayée nu tejá'amua'ixaate'e tɨ ayén ti'ayajna. Tɨ́ pua'a secaí seɨcɨé tiú'umua'ati, tɨ pua'a secaí siyen rahuauca sej siyen che'atá sena'a jé'iyecan jɨ́n tí'imua'ajca matɨ́j mɨ tɨ'ɨríi, caxu ja'anáj a'uteáruti ɨ́ ta japua Dios tɨ é'eseijre'e. 4’A'ɨ́j pu jɨ́n ayén tí'een, ja'atɨ́ tɨ na'a tɨ ayén huataújseijrata tɨ caí ti'itɨ́j jɨ́n ruxe'eve'e, ayée pu xaa éene'e a'ame tɨ́j a'íjna i pa'arɨ'ɨ. A'ii pu a'ɨ́ɨn pú'een ɨ́ tɨ jaítze'e ruxe'eve'e ɨ́ Dios jemi. 5Ajta, ja'atɨ́ tɨ na'a tɨ ayén ra'ancuré'evi'itɨ neniúucajtze'e seɨ́j ɨ́ pa'arɨ'ɨ tɨ́j a'íjna, a'ɨ́jna ɨ́ tevi, a'ɨ́ɨ pu ajta na'ancuré'evi'itɨ ineetzi. 6’Ja'atɨ́ tɨ na'a tɨ a'ij pua'a tiru'uté'an ɨ́ ru tzajta'a ɨ́ ruxɨ́'ej pa'arɨ'ɨ tɨ ayén ná'atzaahuate'e tɨ́j a'íjna, ayée pu tɨ'ɨjtzú a'ɨ́ɨn ɨ́ ja'atɨ́, amuacaí mej me'uun u ra'acáavi'ire ɨ́ tete se'uníjra'a tɨ ve'ée matá'aj ra'ateájrɨeeni á jaata'a tɨ ij a'ɨ́ɨn a'ujámɨn. 7’Cui'i xaa huá'a jemi, a'ɨ́mej ɨ́ mej yen huachéjme íiyen chaanaca japua, ɨ́ mej majta ca'aníjra'a hua'atá'aca ɨ́ seica mej mi auteáturan ɨ́ Dios jemi. Ayee pu tiujú'ujxe'eve'e mej mi ɨ́ seica ayén auteáturan ɨ́ Dios jemi. Mɨ́ ajta, cui'i xaa ne'u a'ɨ́jna jemi tɨ ayén ca'aníjra'a hua'atá'aca mej mi miyen huárɨni. 8’Patɨ́'ɨj auteáturan ɨ́ Dios jemi, tɨ pua'a piyen tiru'ujpuá'ajte'en ɨ́ á jetze, piyen tɨjɨ́n nemuajca'a pu pú'eene'e, na'ari ne'ɨ́ɨca pu pú'eene'e, ayée nu tí'imua'ixaate'e. Para'antiveíjche, pej pi mé rúurɨeni. Jé'ecan pu jaítze'e timuaatéva'ɨre pej a'uteáturan seɨ́j jɨme'e ɨ́ amuájca'a, na'ari seɨ́j jɨme'e ɨ́ a'ɨ́ɨca a'ájna Dios tɨ é'eseijre'e, a'ájna pej e'erúuri pua'amé jemin. Na'ari pecaí piyen huárɨni, hua'apuaca pej jɨ́n ɨ́ amuájca'a na'ari hua'apuaca jɨ́n ɨ́ a'ɨ́ɨca pej a'uteáruti a'ájna já'ahua'a a'u tɨ caí é'emɨ'ɨni ɨ́ taij. 9’Ajta, tɨ pua'a piyen jetzen tiru'ujpuá'ajte'en mua'a jɨ́'ɨ pe'ɨ́jna ɨ́ pej jɨ́n auteájturaa ɨ́ Dios jemi, aitátɨchi. Mé pej rúurɨeeni. Jé'ecan pu timuaatéva'ɨre pej piyen a'uteárute seɨ́j jɨme'e ɨ́ 'ajɨ́'ɨ a'ájna Dios tɨ tejé'aijta. Na'ari caí, ayée pej hua'apuaca jɨ́n ájjɨ'ɨsi tɨ́'ɨj a'ɨ́ɨn muajá'ujɨsin a'u tɨ caí ja'anáj é'emɨ'ɨni ɨ́ taij. 10’Rɨ́'ɨ xu'u mú'een sej si caí a'ij pua'a huajá'useijra seɨ́j tɨ auj cɨ́lieen. Ayee nu tejá'amua'ixaate'e tzáahuati'ira'a jɨme'e, a'ɨ́ɨme ɨ́ mej tí'ivaɨre'e u ta japua, ɨ́ mej majta huá'acha'ɨɨ muá'ara'ani, ja'anáj tɨ na'a, a'ɨ́ɨ mú huaté'uu jemin ɨ́ tɨ ní'iya'upua tɨ é'eseijre'e u ta japua. 11Ayee nu 'een jɨ́n mú a'uvé'emej inee, i nej neajta teáata'a jetze airáane nej ni huá'a japua huániuuni a'ɨ́jna tɨ á'uvej. 12’¿A'iné tejamuá'amitɨejte'e a'ij tɨ huárɨni ɨ́ ja'atɨ tɨ anxɨ́te huá'ajye'emua ɨ́ cáne'axɨ? Tɨ́ pua'a seɨ́j á'uveti mé já'ahua'a, ¿ni caí ayén rɨni? A'ɨ́ɨ pu huaja'utéhuiite'esin naíjmi'ica ɨ́ seica a'ánna jɨrí jetze. U pu a'umé'e a'ame tɨ ij raaré'ehuauni a'ɨ́jna tɨ á'uvej. 13Ajta, ayée nu tejá'amua'ixaate'e. Ayee pu ti'ayajna, tɨ pua'a a'ɨ́ɨn mé'e yé'uteuni, jaítze'e pu rɨ́'ɨ tiraatá'ixaa a'ɨ́jna jɨme'e tɨ ráateu ɨ́ tɨ á'uvej, caí mɨ seica ɨ́ tɨ ari huája'utéhuiite'eca'a. 14’Ayee pu che'atá na'a 'een a'ɨ́jna jemi a'ɨ́jna ɨ́ tɨ á'amua'iya'upua tɨ ta japua é'eseijre'e. Capu a'atzu raxɨ́'eve'e tɨ seɨ́j á'uveti tɨ cɨ́lieen tɨ́j a'íjna i pa'arɨ'ɨ. 15’Tɨ́ pua'a a'ihuáara'a ti'itɨ́j jɨ́n auté'ɨtzen mú'eetzi jemi, ayée pej huárɨni. Aricu, u a'utá'ixaate'e avíitzi jɨme'e ɨ́ tɨ jɨ́n auté'ɨtze mú'eetzi jemi. Tɨ́ pua'a a'ɨ́ɨn muá'antzaahuate'en, mú'ee pej xaa raamuá'itɨ ɨ́ a'ihuáara'a sej si seajtáhua'a ru'ihuaamua'a xá'ara'ani temua'a naa. 16Mɨ́ ajta, tɨ pua'a caí muá'antzaahuate'en, patá'aj seica ánvi'itɨn a'ɨ́jna jemi, hua'apuaca mej mi ráamua'aree tɨ pua'a muá'antzaahuate'en nusu caí. Tɨ́ pua'a a'ihuáara'a caí muá'antzaahuate'en, a'ɨ́ɨme ɨ́ mej hua'apua, ayée mú tiu'utaxájta tɨ ayén ti'ayajna ɨ́ pej jɨ́n jetzen tí'ijpua'ajte'e a'ɨ́jna ɨ́ a'ihuáara'a. 17Ajta á'iyen, tɨ pua'a caí huá'antzaahuate'en ɨ́ mej hua'apua, patá'aj hua'utá'ixaate'en naíjmi'ica ɨ́ mej tiújse'ɨri. Ajta, tɨ pua'a a'ihuáara'a caí huá'antzaahuate'en a'ɨ́mej, ayée pej che'atá pena'a raruuren patɨ́j huá'aruure a'ɨ́mej ɨ́ mej caí ajtéme'ecan mú'ejmi jetze nusu a'ɨ́ɨme ɨ́ mej tiú'ujijve'e ɨ́ gobierno jetze me'ecan. 18’Ayee nu tejá'amua'ixaate'e tzáahuati'ira'a jɨme'e, setɨ́j sena'a sej tí'ijmɨi íiyen chaanaca japua, Dios pu ayén che'atá na'a té'ijmɨ u ta japua. Ajta setɨ́j sena'a sej huatá'aca íiyen chaanaca japua, Dios pu ayén che'atá na'a huatá'aca u ta japua. 19’Neajta nu niyen tejá'amua'ixaate'e mɨ sej íiyen chaanaca japua huaté'uu, tɨ pua'a siyen che'atá sena'a tirú'umua'areere mɨ sej hua'apua se'ɨ́jna jɨme'e a'ij sej ye'í tí'ijhuaviiran ɨ́ Dios jemi, a'ɨ́jna tɨ ní'iya'upua, ayée pu che'atá na'a á'amuaruure a'ij sej tí'ijhuavii. 20Ayee pu hui té'eme, a'iné a'u tɨ na'a mej e'etiújse'ɨri neniúucajtze'e, a'úu nu a'utevée na'ame huá'a tzajta'a. Capu amɨ́n a'ij tɨ pua'a mehua'apuáj mena'a na'ari mehuaíca mena'a. 21Ajta a'ɨ́ɨn ɨ́ Pedro, a'ɨ́ɨ pu ave'eré'ene ɨ́ Jesús jemi. Ajta ayén tiraata'íhua'uri'i tɨjɨ́n: ―Nevástara'a, ¿a'achúni pua'amé ruxe'eve'e nej tiraatá'uuni'i ɨ́ ne'ihuaara'a tɨ pua'a ti'itɨ́j jɨ́n auté'ɨtzen neetzi jemi? ¿Ni qui aráhua'apua pua'amé? 22Jesús pu ayén huataniú tɨjɨ́n: ―Canu niyen raataxájta yee aráhua'apua, sino aráhua'apuájetze huaícate japuan tamuáamuata'a japuan aráhua'apua. 23’Ayee pu tí'ijxe'eve'e ɨ́ Dios mej mi ti'ihuaúruuni'i seɨj majta seɨj. Na'ari caí, ayée pu che'atá na'a huá'aruuren tɨ́j a'ɨ́jna ɨ́ rey tɨ ayén tí'ijxe'eve'eca'a tɨ raaxɨ́'epɨ'ɨntare'en a'achú mej caj té'echa'ɨɨca'a a'ɨ́ɨme ɨ́ mej ravaɨre'eca'a. 24Pu'uri a'utéjche tɨ ayén tiraaxɨ́'epɨ'ɨntare'en, matɨ́'ɨj seɨ́j a'uré'eneijte jemin tɨ jeíhua té'echa'ɨɨca'a, a'achú cumu tamuáamuata'a vi'ira'a tumin. 25Ajta a'ɨ́jna tɨ té'echa'ɨɨca'a, capu tí'ituaave'eca'a ɨ́ tɨ jɨ́n tiraanájchite'en. A'ɨ́j pu jɨ́n, ɨ́ rey ayén tiu'uta'aíjtaca'a mej nu'u huá'utuaani a'ɨ́jna ɨ́ teáata'a, ajta ɨ́ ɨ́ra'ara'an, majta ɨ́ tɨ'ɨríi ajta nain tɨ tí'ijcha'ɨɨ. Ayee pu tiu'uta'aíjtaca'a tɨ ij tiraanájchite'en nain a'achú tɨ té'echa'ɨɨ. 26’Aj pu i a'ɨ́ɨn tɨ té'echa'ɨɨ títunutaca'a á vejli'ipua ɨ́ rey jemi. Jéihua pu rajjé tɨjɨ́n: “Paúche'e nechu'eve'e. Nee nu xaa tí'imuanajchite'en nain jɨme'e a'achú nej timuá'acha'ɨɨre'e.” 27’Ajta a'ɨ́jna tɨ rajíjve'e, a'ɨ́ɨ pu rá'ancu'uvajxɨ. Tiraatá'uuni'iri'i nain jɨme'e ɨ́ tɨ té'echa'ɨɨca'a. Aj pu i raatátuaa. 28’Jɨ́me'en pu'u huirájraa a'ɨ́jna tɨ ravaɨre'e, aj pu i seɨ́j huáteu tɨ ayén ajta tirá'acha'ɨɨre'eca'a. Anxɨ́te tumin pu'u té'echa'ɨɨca'a. A'ɨ́ɨ pu raatéevi'i. Tɨ'ɨj jí a'utéjche tɨ ra'antéevi'i ɨ́ cɨjpáara'an jetze. Ca'anín pu jɨ́n ayén tiraata'aíjte tɨjɨ́n: “Tinaanájchite'e a'achú pej tiná'acha'ɨɨre'e.” 29’Aj pu i títunutaca'a a'ɨ́jna tɨ ajta ayén ravaɨre'eca'a a'ɨ́jna ɨ́ rey. Ayee pu tiraatajé tɨjɨ́n: “Paúche'e nechu'eve'e. Nee nu tí'imuanajchite'en.” 30’Mɨ́ ajta a'ɨ́jna ɨ́ seɨ́j, capu raataxɨ́'eve, sino iyá'uraa. Ajta á'iyen tíraata'aíjtaca'a mej nu'u ra'iteáanan ajta na'a caí tiraanájchite'en nain a'achú tɨ té'echa'ɨɨca'a. 31’Majta me'ɨ́n ɨ́ seica ɨ́ mej ravaɨre'e a'ɨ́jna ɨ́ rey, matɨ́'ɨj tiu'uséij a'ij tɨ ti'itɨ́j huarɨ́j, matɨ́'ɨj mi u á'uju'un jemin ɨ́ tɨ tihuá'aijte'e. Nain mú raatá'ixaa a'ij tɨ ti'itɨ́j huarɨ́j. 32’Ajta a'ɨ́ɨn ɨ́ rey, tɨ'ɨquí raata'aíjtaca'a a'ɨ́jna ɨ́ tɨ ravaɨre'e. Ayee pu tiraatá'ixaa tɨjɨ́n: “Mú'ee pej nevaɨre'e, huápɨ'ɨ pej a'ij pua'a tí'itevij. Nee nu timuaatá'uuni'iri'i nain jɨme'e a'achú pej tiná'acha'ɨɨre'eca'a ne'ɨ́jna jɨme'e ɨ́ pej piyen tinéjhuaviiri'i. 33¿Ni caí ayén tiraavíjte'eca'a pej piyen che'atá pena'a rá'ancu'uvajxɨ'ɨn ɨ́ axɨ́'ej tevi tɨ nevaɨre'e netɨ́j neajta inee timuá'ancu'uvajxɨ mú'eetzi?” 34’Ajta a'ɨ́ɨn tɨ tí'ira'aijte'e, jé'ecan pu huataniú'ucaca'a a'ɨ́jna jemi. Aj pu i a'uun tiu'utátui a'ɨ́mej jemi ɨ́ mej huá'anaamuaca mej mi ra'iteáanan ajta na'a caí nain tiraanájchite'en a'achú tɨ té'echa'ɨɨca'a. 35’Ajta a'ɨ́ɨn tɨ ní'iya'upua tɨ ta japua é'eseijre'e, ayée pu che'atá na'a á'amuaruuren seɨj ajta seɨj tɨ pua'a pecaí tiraatá'uuni'i ɨ́ a'ihuáara'a tzáahuati'ira'a jɨme'e.

will be added

X\